Colosenses 1:10 - Chayahuita (Shahui)

¹⁰ Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën.

Colosenses 1:10 ပူးပေါင်းရင်းမြစ်များ

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Miqueas 4:5

Nisha piyapiroꞌsasoꞌ, mamanshinëna natëpi. Canpoaso napoaponahuëꞌ: “Sinioroso Yosënënpoaꞌ,” taꞌtëhuaꞌ, inasáchin natëahuaꞌ.

Habacuc 2:14

Inapotohuatënquëmaꞌ, Iꞌshari marë mëntatërinso pochin yaꞌipi isoroꞌpaquë yaꞌhuëpisopita chini chiníquën nanantërahuëso nitotapi.

Juan 15:16

Co canpitaora nohuanton imaramacohuëꞌ. Ca nohuanto, imaramaco. Carinquëmaꞌ huayonanquëmaꞌ. Nani acoranquëma opa sëꞌpaquën naꞌcon nitërinso pochin nisápamaso marëꞌ. Inapohuatamaꞌ: ‘Quisoso nanan quëtërinco,’ taꞌtomaꞌ, Yosë nontocoꞌ catahuainquëmaꞌ. Ca pochin yonquiatomaꞌ, maꞌsona nipatamaꞌ, acochinquëmaꞌ.

Juan 15:8

Opa naꞌcon nitërinso pochin canpitantaꞌ noya noya nicoꞌ. Ina quëran aꞌnapitantaꞌ nicatënënquëmaꞌ, Yosë yonquiaponaꞌ. Naporahuatomaꞌ, noya noya imasaramaco.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Romanos 1:13

Tëhuënchachin iyaroꞌsaꞌ, iráca quëran huarëꞌ nicapënquëmaꞌ yapaꞌpirahuëꞌ. Ipora huantaꞌ co nanitërahuëꞌ pacaꞌhuasoꞌ. Nisha nisha parti aꞌchinpatëra, piyapiꞌsaꞌ natëtonaꞌ, Quisocristo imasapi. Canpitantaꞌ yaaꞌchintëranquëmaꞌ noya noya imacamaso marëꞌ.

Romanos 4:12

Cotioroꞌsantaꞌ Apraan pochin natëtohuachinara, huiꞌninpita pochin nipi antaꞌ. Co marca niacotopiso marëꞌ noya cancantopihuëꞌ. Coꞌhuara marca niacochatërasohuëꞌ, Apraansoꞌ natëtërin. Aꞌnapitantaꞌ ina pochin cancantohuachinara, Yosëri noya niꞌsarin.

Romanos 6:4

Quisocristo chiminpachina, paꞌpitopi. Aporintohuachinënpoara, canpoantaꞌ paꞌpitërinënpoaso pochin co noyahuëꞌ yonquirëhuasopita naniantërëhuaꞌ. Tata Yosë chiníquën nanantaton, Quisocristo ananpitaantarin. Canpoantaꞌ nasha cancan quëtërinpoaꞌ nasha pochin nanpicaso marëꞌ. Ina yonquiatëhuaꞌ, aporihuanëhuaꞌ.

2 Corintios 2:14

Ma noyacha Tata Yosëso paya, tënëhuaꞌ. Quisocristo imarëhuaꞌ niꞌton, nani tahuëri ina catahuarinpoaꞌ inimiconënpoapita minsëcasoꞌ. Inapitasoꞌ co nohuantopihuëꞌ Quisocristo nanamën aꞌchinaꞌhuaisoꞌ. Co nohuantopirinahuëꞌ, nisha nisha parti paatoi, nanamën aꞌchinárai. Pimóton huaꞌsaiꞌ pimoanahuaninso pochin Quisocristo nanamën nahuinarin. Aꞌchintatoi, naꞌa piyapiꞌsaꞌ anitotërai.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

2 Corintios 5:9

Maꞌsona tërantaꞌ nipatëhuaꞌ, Yosëíchin natërëhuaꞌ noya nicainpoaso marëꞌ. Nanpihuatëhuaꞌ, chiminpatëhuantaꞌ, Sinioro nohuantërinsoáchin nohuantërëhuaꞌ.

2 Corintios 9:8

Yosë yaꞌipi nanitaparin. Nosoroatënquëmaꞌ, naꞌcon catahuarinquëmaꞌ noya nicacamasoꞌ. Nani tahuëri catahuarinquëmaꞌ. Ina catahuahuachinquëmaꞌ, noya cancantaramaꞌ. Ina nohuanton, yaꞌhuëtarinquëmaꞌ aꞌnapitantaꞌ quëtacaso marëꞌ.

Efesios 1:17

Tata Yosësoꞌ noya noya ninin. Inasáchin chinotacasoꞌ yaꞌhuërin. Quisocristo isoroꞌpaquë oꞌmaton, Yosë anohuitërinpoaꞌ. Ina yonquiato, canpita marëꞌ Yosë nontërahuë: “Catahuaquëꞌ Sinioro noꞌtëquën yonquiꞌinaꞌ. Noya noya nohuichinënquën. Noya nohuitohuachinënquën, quëma yonquiranso chachin nitotapi.

Efesios 2:10

Yosë anoyacancantërinpoaꞌ. Anoyacancantahuatonpoaꞌ, acorinpoaꞌ nóya nicacaso marëꞌ. Quisocristo catahuahuachinpoaꞌ, noya nisarëhuaꞌ. Iráca quëran huarëꞌ yonquirinpoaꞌ ina pochin nicacasoꞌ. Ina marëꞌ nichaꞌërinpoaꞌ.

Efesios 4:1

Quisocristo nanamën aꞌchinahuëso marëꞌ tashinan pëiquë poꞌmopirinacohuëꞌ, iporahuantaꞌ pënënáranquëmaꞌ. Yosë nichaꞌëtënquëmaꞌ, huëntonënquë ayaꞌconinquëmaꞌ. Napoaton noyasáchin nicoꞌ.

Efesios 4:13

Inapohuatëhuaꞌ, yaꞌipinpoaꞌ imarëhuasopita napopináchin yonquiarihuaꞌ. Yosë huiꞌnin chachin nóya nohuitarihuaꞌ. Ina quëran noya noya cancantarihuaꞌ. Soꞌsorëso pochin oshaquëran Quisocristo pochachin cancantacasoꞌ yaꞌhuërin.

Efesios 5:10

Noya yonquiatomaꞌ, Yosë nohuantërinsoꞌ nitotocoꞌ. Ina nitotohuatamaꞌ, yaꞌipiya natëcoꞌ.

Efesios 5:15

Napoaton iyaroꞌsaꞌ noya yonquiatomaꞌ yaꞌhuëcoꞌ. Aꞌnaquën co mantaꞌ yonquipihuëꞌ. Ama inapita pochin cancantocosohuëꞌ. Noꞌtëquën yonquicoꞌ.

Efesios 5:2

Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

Filipenses 1:11

Quisocristo catahuahuachinquëmaꞌ, noyasáchin nisaramaꞌ. Ina quëran aꞌnapitantaꞌ nicatënquëmaꞌ, Yosë yonquiapi. “Ma noya Yosëri catahuarin niꞌton, noya nipi. Ma noyacha Yosëso paya,” tosapi.

Filipenses 1:27

Iporasoꞌ iyaroꞌsaꞌ nóya nicoꞌ. Quisocristo nanamën yonquiatomaꞌ, ina pochachin cancantocoꞌ. Yosë huëntonënquë yaꞌconamaꞌ niꞌton, ina pochin cancantacasoꞌ yaꞌhuërin. Nicaponquëmaꞌ paꞌsamarahuë. Co aꞌnaꞌ nanitapohuëꞌ nimara. Ina niponahuëꞌ, nani tahuëri noya nicoꞌ noya nanan natanchi. Yaꞌipinquëmaꞌ, iyaroꞌsaꞌ, imamiatocoꞌ. Ama aꞌnayanquëma tërantaꞌ nisha yonquicosohuëꞌ. Napopináchin yonquiatomaꞌ, Quisocristo nanamën aꞌchinácoꞌ. Inapohuatamaꞌ, natantohuato, nóya cancantarahuë huachi.

Filipenses 4:18

Iporasoꞌ nóya iꞌhuërëtëramaco huachi. Napoaton noya yaꞌhuarahuë. Co mantaꞌ pahuantërincohuëꞌ. Iꞌhua Ipapërotito huëꞌpachina, coriqui aꞌpatëramaco niꞌton, maꞌsha yaꞌhuëtërinco. Ina marëꞌ “Yosparinquëmaꞌ,” itëranquëmaꞌ. Yosë nosoroatomaꞌ, aꞌpatiramaco. Yosë chinotacaiso marëꞌ pimóchin nininsoꞌ aꞌpëhuachinara, Yosëri noya niꞌnin. Inapochachin canpitantaꞌ coriqui aꞌpatëramaco niꞌton, Yosë noya niꞌninquëmaꞌ.

Colosenses 2:19

Inapitasoꞌ co tëhuënchachin Quisocristo imapihuëꞌ. Inasáchin motënpoaꞌ pochin nicaton, huaꞌanëntarinpoaꞌ. Niꞌcoꞌ. Nonënpoaꞌ nisha nisha yaꞌhuëtërin. Motënpoari yaꞌipi camairin noya sacatacaiso marëꞌ. Inapochachin imarëhuasopitantaꞌ Quisocristoíchin noya camairinpoaꞌ. Achinirinpoaꞌ soꞌsorëso pochin nicacaso marëꞌ. Ina pochin nicacasoꞌ Yosë nohuantërin.

Colosenses 2:6

Yaꞌnan imapomaꞌ, Quisocristo anoyacancantërinquëmaꞌ. Inasáchin huaꞌanëntërinquëmaꞌ. Iporahuantaꞌ inasáchin natëtomaꞌ, imamiatocoꞌ.

Colosenses 3:20

Huaꞌhuaroꞌsantaꞌ paꞌpinaꞌ natëinaꞌ. Aꞌshinantaꞌ natëinaꞌ. Yaꞌipi pënënpisoꞌ natëinaꞌ. Inapohuachina, Siniorori noya niꞌsarin.

Colosenses 4:5

Co imarinsopitasohuëꞌ huëꞌpachinaꞌ, noya nontocoꞌ. Ama tapanatomahuëꞌ, noya aꞌchintocoꞌ. Onpopiontaꞌ noya nanan shaꞌhuitocoꞌ.

1 Tesalonicenses 2:12

Achinicancanainquëmaꞌ. “Yosë imaramaꞌ niꞌton, noyasáchin nicoꞌ Yosë noya niꞌinquëmaꞌ,” itërainquëmaꞌ. Ina acorinquëmaꞌ huaꞌanëntërinquë yaꞌconacamasoꞌ. Aꞌna tahuëri yaꞌhuërinꞌpaꞌ quëpantahuachinquëmaꞌ, noya noya yaꞌhuëcontaramaꞌ.

1 Tesalonicenses 4:1

Iporasoꞌ iyaroꞌsaꞌ Sinioro Quisoso nanan quëtërincoi niꞌton, pënëantarainquëmaꞌ. Iráca pënënainquëmaꞌ noya nicacamaso marëꞌ. “Noya nipatamaꞌ, Yosë noya niꞌsarinquëmaꞌ,” itërainquëmaꞌ, natëramacoi. Iporasoꞌ aquë aquëtëꞌ natëtatomaꞌ, noyasáchin nicoꞌ, tënahuë.

2 Timoteo 2:4

Sontaro yaꞌconpatëra, co huachi aꞌna sacato yonquirëhuëꞌ. Capitanáchin natërëꞌ. Ina nohuantërinsoáchin ninëꞌ. Inapochachin canpoantaꞌ Quisocristoachin natëcasoꞌ yaꞌhuërin.

Tito 3:1

Imapisopita nani nitotopirinahuëꞌ, inachachin quëmarintaꞌ pënëantaquëꞌ. “Copirno natëcoꞌ,” itëquëꞌ. Yaꞌipi copirno acorinsopitantaꞌ natëcasoꞌ yaꞌhuërin. Noya nicacaisoꞌ yonquiꞌinaꞌ.

Tito 3:14

Yaꞌipi imapisopitantaꞌ shaꞌhuitëquëꞌ noya niinaꞌ. Pahuantërinsopita catahuainaꞌ. Inapotohuachinaꞌ, co topinan yaꞌhuapihuëꞌ.

Hebreos 11:5

Iráca Inoco noya natërin niꞌton, Yosëri inápaquë quëpantarin. Napoaton co chimininhuëꞌ. Piyapiꞌsari yonisápirinahuëꞌ, co quënanpihuëꞌ. Coꞌhuara inápaquë quëpantayátërasohuëꞌ, “Inoco nóya niꞌnahuë,” tënin Yosë quiricanënquë.

Hebreos 13:16

Noyasáchin niahuaꞌ. Nicatahuacasoꞌ ama naniantahuasohuëꞌ. Aꞌnapita maꞌsha pahuantohuachinaꞌ, ama apiratocosohuëꞌ. Inapohuatëhuaꞌ, Yosë noya chinotarëhuaꞌ niꞌton, noya niꞌsarinpoaꞌ.

Hebreos 13:21

Yosë naꞌcon catahuainquëmaꞌ ina nohuantërinsoꞌ nicacamaso marëꞌ. Piꞌpian tërantaꞌ co noyahuëꞌ yonquihuatamaꞌ, anoyacancanchinquëmaꞌ. Quisocristo catahuahuachinpoaꞌ, nani tahuëri nóya nisarëhuaꞌ. Ina quëran noya niꞌsarinpoa huachi. Yaꞌipi piyapiꞌsaꞌ inasáchin chinochinaꞌ. Ama onporontaꞌ ina naniantahuasohuëꞌ. Amen.

2 Pedro 1:8

Ina pochin Yosë pënëninpoaꞌ noya noya imacaso marëꞌ. Ina pochin cancantohuatamaꞌ, co topinan quëran imasaramahuëꞌ. Oshaquëran noya noya cancantohuatamaꞌ, noya noya Quisocristo nohuitaramaꞌ.

2 Pedro 3:18

Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro

1 Juan 3:22

Yosë pënëninpoasoꞌ natëhuatëhuaꞌ, noya natanarinpoaꞌ. Ina nohuantërinsoáchin yonquihuatëhuaꞌ, catahuarinpoaꞌ. Ina pochin cancantohuatëhuaꞌ, maꞌpitaso nipatëhuaꞌ, quëtarinpoaꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.

3 Juan 1:6

Inapitasoꞌ huënantahuatonaꞌ, niyontonaiquë shaꞌhuitiirinacoi: “Iya Acayo noya nosororincoi,” itiirinacoi. Naquëranchin quëmataquë cancoantahuachinaꞌ, catahuantaquëꞌ noya paꞌinaꞌ, tënahuë. Yosë marëꞌ sacatapi niꞌton, catahuaquëꞌ ama pahuanchinasohuëꞌ.