Apocalipsis 9:20 - Chayahuita (Shahui)

²⁰ Naꞌa piyapiꞌsaꞌ chiminpirinahuëꞌ, co naporo tërantaꞌ aꞌnapitasoꞌ yonquiapihuëꞌ. Niꞌsaponaraihuëꞌ, inachachin co noyahuëꞌ cancantapi. Aquëtë chachin sopairoꞌsaꞌ chinotapi. Nisha nisha mamanshi moshapi. Oro quëran, prata quëran, huaꞌna quëran, naꞌpi quëran, nara quëran, ina quëranpita nipisoꞌ. Co inapitasoꞌ quënantopihuëꞌ, co natantopihuëꞌ, co iratopihuëꞌ. Co nanpipirinahuëꞌ, mosharapi.

Apocalipsis 9:20 ပူးပေါင်းရင်းမြစ်များ

2 Reyes 22:17

Yaꞌipi Cota huënton israiroꞌsa aꞌporinaco. Inapoatona nisha nisha mamanshiroꞌsa moshacaiso marëꞌ yonarin pochin nininsoꞌ, aꞌpëpi. Naꞌcon co noyahuëꞌ nipiso marëꞌ anoꞌhuitërinaco. Napoaton isëquë yaꞌhuëpisopita anaꞌintaꞌhuaso yaꞌhuërin huachi,’ itocoꞌ,” tënahuë.

Isaías 41:7

Nara patëtonaꞌpiri, nitapacaisoꞌ ninaꞌpi achinicancanin. Marticho quëran papincatonaꞌpintaꞌ, papiotiinanquë sacatonaꞌpi achinicancanin: “Nani noyá achinpitërëhuaꞌ,” itërin. Napotahuaton naoquë mamanshi noyá payontërin. Chiníquën huanicaso marëꞌ napotërin.

Jeremías 1:16

Piyapinëhuëpitasoꞌ, oshahuanápatona aꞌporinaco. Nisharoꞌsari moshapiso nonanahuatonaꞌ, inapita moshacaiso marëꞌ yonarin pochin nininsoꞌ, aꞌpëpi. Napopiso marëꞌ inapo anaꞌintarahuë.

Daniel 5:23

Yosë tëꞌhuataton natëcaso nipirinhuëꞌ, nocanatë pochin ninan. Inapoaton minëroꞌsa ina pëinën quëran quëpiso amatohuatana, quëshirinën. Quëpachinara, inaquë përaransopita huino ichioꞌoran. Naporahuaton mamanshinënpita oro quëran nipisoꞌ, mosharan. Prata, shaꞌpi huaꞌna, huaꞌnamia, nara, naꞌpi, inapita quëran nipisontaꞌ, mosharan. Inapitaso co máquënoꞌsahuë niꞌtonaꞌ, co quënantopihuëꞌ, co natantopihuëꞌ, co manta nitotopihuëꞌ, napopi. Napopirinahuëꞌ, inapitaso chinotëran. Yosëso ananpirinquën. Ina nohuantohuachin maꞌpitaso yonquiranso ninan. Inaso napopirinhuëꞌ, co chinotëranhuëꞌ.

Daniel 5:4

Inaquë huino oꞌosahuatonaꞌ, mamanshinënapita oro quëran nipisoꞌ, mosharápi. Prata, shaꞌpi huaꞌna, huaꞌnamia, nara, naꞌpi, inapita quëraonta nipisoꞌ, mosharápi.

Miqueas 5:13

Mamanshinëmapita ataꞌhuantarahuë. Naꞌpiroꞌsanta moshacamaso marëꞌ acoramasopita, inapotarahuë. Inapitasoꞌ canpitaora chachin nicapomarahuëꞌ, mosharamaꞌ.

Mateo 21:32

Coansha Paotista pënënpirinquëmahuëꞌ, co yanatëramahuëꞌ. Noya cancantamaso marëꞌ aꞌchintopirinquëmahuëꞌ, co yanatëramahuëꞌ. Copirno marëꞌ coriqui maꞌpatonaꞌpiroꞌsaꞌ, monshihuanaꞌpiroꞌsaꞌ, inapitaso nipirinhuëꞌ aꞌnaroáchin natëtonaꞌ, noya cancantopi. Ina nicapomarahuëꞌ, co yonquiramahuëꞌ. Co natëtochináchinhuëꞌ cancantëramaꞌ, itërin.

Hechos 17:29

Napoaton Yosëntaꞌ canpoa pochin nanpirárin antaꞌ. Co inasoꞌ mamanshi pochinhuëꞌ. Mamanshiso nipirinhuëꞌ piyapiꞌsari inahuara yonquinëna quëran nipi. Oro quëran, prata quëran, naꞌpi quëran, ina quëranpita nipi. Ama Yosësoꞌ mamanshi pochin cancantocosohuëꞌ.

Hechos 19:26

Paonoso nipirinhuëꞌ isëquë huëcaton, pënëntarin. ‘Aꞌnaíchin Yosë yaꞌhuërin. Piyapiꞌsari nipisoꞌ co inasoꞌ Yosëhuëꞌ,’ tosarin, natanamaꞌ canpitantaꞌ. Yaꞌipi Asia partintaꞌ nahuinin. Naꞌa piyapiꞌsaꞌ natanahuatonaꞌ, natëpi. Natëtonaꞌ, mamanshi aꞌpopi.

Hechos 7:41

Ohuacaꞌhuaya pochin nininso nipi. Maꞌsha tëparahuatonaꞌ, mamanshi moshapi. Inahuara nipisoꞌ niponahuëꞌ, paꞌyatatonaꞌ pita nipi.

2 Corintios 12:21

Iráca aꞌnaquëmaꞌ co noyahuëꞌ yonquiramaꞌ. Monshihuanamaꞌ, sanapirachin yonquiramaꞌ. Ipora huantaꞌ aꞌnaquëmaꞌ inapoaramaꞌ nimara. Co ina naniantohuatamahuëꞌ, canconpato, paꞌpi sëtarahuë. Carinquëmaꞌ aꞌchintëranquëmasoꞌ niꞌton, Yosë atapanarinco. Co oshanëmaꞌ aꞌpohuatamahuëꞌ, chiníquën asëtaramaco.

Deuteronomio 31:29

Carimaso ipora nani camairanquëmaꞌ, noꞌtëquën imacamaso marëꞌ. Napoaponahuë nani chiminpato, ina aꞌporahuatoma nitapicancanaramaꞌ. Ina marëꞌ aꞌna tahuëri Yosë anaꞌintatënquëma aparisitarinquëmaꞌ. Sinioro niꞌsápirinquëmahuëꞌ, co noyahuëꞌ nisarama niꞌton, chiníquën anoꞌhuitaramaꞌ,” itërin Moisësëri.

Deuteronomio 32:17

Mamanshiroꞌsa marëꞌ maꞌsharoꞌsa tëparamaꞌ. Inapoatomaꞌ, sopairoꞌsa chachin chinotëramaꞌ. Sinioroíchin chinotacaso nipirinhuëꞌ, inapita chinotëramaꞌ. Shimashonëmapitasoꞌ, co ina moshapirinahuëꞌ. Canpitaso inapita ipora nohuitatomaꞌ, yamoshaconamaꞌ.

Deuteronomio 4:28

Inaquë quëpahuachinënquëmaꞌ, nisha nisha mamanshiroꞌsa piyapiꞌsari nipisoꞌ moshaaramaꞌ. Aꞌnaquën nara quëran, aꞌnaquënso naꞌpi quëran nipi niꞌton, co manta quënantopihuëꞌ, co natantopihuëꞌ, co coshatopihuëꞌ, co niipihuëꞌ. Napoaponahuëꞌ, canpitaso moshatapataramaꞌ.

1 Timoteo 4:1

Tëhuënchachin Ispirito Santo ninoton, aꞌninquëchin shaꞌhuitërinpoaꞌ: “Aꞌna tahuëri aꞌnaquën piyapiꞌsaꞌ Yosë nanamën aꞌporapi. Sopai natëtonaꞌ, nonpin nanan aꞌchinpachinaꞌ, imasapi. Ayaroꞌ tahuëri yaꞌcaritohuachin, naporapi,” tënin.

Apocalipsis 15:1

Ina quëran Yosë nohuanton, huaꞌnarëso pochin niantarahuë. Aꞌna tahuëri oshahuanoꞌsaꞌ chiníquën anaꞌintarin. Ina anitotincoso marëꞌ nani maꞌsha aꞌnotërinco. Paꞌpi huëhuëpiroꞌ niꞌnahuë. Canchisë anquëni yaꞌhuarin. Aꞌnaya aꞌnaya Yosëri yaaꞌparin piyapiꞌsaꞌ anaꞌintacaso marëꞌ. Ina nohuanton, isoroꞌpaquë nani maꞌsha onpocaisoꞌ yaꞌhuapon. Inapoaton, anaꞌintërinsoꞌ naniarin.

Apocalipsis 16:8

Ina quëran aꞌna anquënintaꞌ paꞌnin anaꞌintacaso marëꞌ. Minëquë yaꞌhuërinsoꞌ piꞌiquë tëꞌyanantohuachina, piꞌi chini chiníquën piꞌcatarin. Pën pochin piꞌcataton, piyapiꞌsaꞌ chiníquën aparisitarin.

Apocalipsis 9:19

Nanamëna quëran tëparapi. Huinamëna quëraontaꞌ yaꞌhuan pochin quëtëtatonaꞌ, tëparapi.

Apocalipsis 9:21

Paꞌpi co noyahuëꞌ cancantatonaꞌ, tëpatapi, pënotapi, monshihuanapi, maꞌsha ihuatapi. Yosëri anaꞌintërinsoꞌ niꞌsáponaraihuëꞌ, co naporo tërantaꞌ nohuantapihuëꞌ oshanënaꞌ aꞌpocaisoꞌ.