Apocalipsis 7:1 - Chayahuita (Shahui)

¹ Ina quëran Yosë nohuanton, huaꞌnarëso pochin niantarahuë. Aꞌna tahuëri maꞌsha onpocasoꞌ aꞌnotantarinco. Catapini anquëni yaꞌnopi, niꞌnahuë. Aꞌnasoꞌ piꞌi pipirinsoꞌ parti huaniarin. Aꞌnantaꞌ piꞌi yaꞌconinsoꞌ parti huaniarin. Huancanachiontaꞌ catoꞌ ninotërapi. Inaquëpita Yosëri acorin isoroꞌpaꞌ anaꞌintacaiso marëꞌ. Oshaquëran Yosë nohuanton, anaꞌintapi. Piꞌpisha pahuanarin niꞌton, anquëniroꞌsari ihuan yaꞌcopirapi ama marëquë, isoroꞌpaquë inaquëpita maꞌsha onpocaiso marëhuëꞌ. Ama nararoꞌsa tërantaꞌ oyanacaiso marëhuëꞌ yaꞌcopirapi.

Apocalipsis 7:1 ပူးပေါင်းရင်းမြစ်များ

Ezequiel 37:9

Naporoꞌ Siniorosoꞌ nontaantatonco: “Carinquën nanan quëtaranquën niꞌton, niinëhuë përáquëꞌ: ‘Catapini parti quëran chachin huëꞌsahuaton isopita chimipiroꞌsa ananpiquëꞌ,’ itëquëꞌ,” itaantarinco.

Daniel 7:2

Ninshitohuachina, iso pochin acorin: “Huëꞌëhuëquë panca marë niꞌnahuë. Catapini ihuanoꞌsa yaꞌhuërinsopitari pihuihuachina, marëso panca coꞌsacaitërin.

Jonás 1:4

Marë huancoanaiꞌ paꞌsapirinahuëꞌ, Sinioro nohuanton panca ihuaiꞌ paꞌnin. Napohuachina, panca coꞌsacaitërin. Napoaton: “Ipora tëhuënchinso nancha yaꞌquiapon,” topi yonquiatonaꞌ.

Mateo 24:31

Oꞌmantarahuato, naꞌa anquëniroꞌsaꞌ aꞌpararahuë. Panca tronpita pihuitonaꞌ, yaꞌipi parti paꞌsapi huayonahuësopita ayontonacaiso marëꞌ.

Marcos 13:27

Oꞌmantahuato, anquëniroꞌsaꞌ aꞌpararahuë Yosëri huayoninsopita yaꞌipi parti quëran ayontonacaiso marëꞌ. Paꞌsahuatonaꞌ, nisha nisha parti quëran huarëꞌ ayontonapi huachi.

Apocalipsis 20:8

Ocoiantahuachin, isoroꞌpaquë huënantarin nisha nisha piyapiꞌsaꞌ nonpintacaso marëꞌ. Yaꞌipi parti paaton, notohuaroꞌ piyapiꞌsaꞌ nonpintarin, Coco, Macoco inapita itopisoꞌ. Inotë pochin co pichicasohuëꞌ. Sopairi nonpintërin niꞌton, niyontonapi quira nicacaiso marëꞌ.

Apocalipsis 6:6

Naporoꞌ catapini maꞌsharoꞌsaꞌ huancánachin, noninsoꞌ natanahuë: —Yaꞌipi cosharoꞌ naꞌcon paꞌtarin. Aꞌna tahuëriraꞌ iꞌhuaquë huarëꞌ sacatopirinahuëꞌ, aꞌna quiroichin trico paꞌanapi. Inapochachin aꞌna cosharontaꞌ pahuanarin. Sipatasoꞌ trico pochin niponahuëꞌ, co ina pochin paꞌtopirinhuëꞌ, inantaꞌ paꞌtarin. Aꞌna tahuëriraꞌ iꞌhuaquë huarëꞌ sacatopirinahuëꞌ, cara quiroichin paꞌanapi. Tomaꞌ, huino, inapitantaꞌ pahuanarin. Niꞌcona chiniatamaꞌ, tënin.

Apocalipsis 7:3

—Ama apiramiáchin anaꞌintocosohuëꞌ. Ninataco Yosë piyapinënpita catahuai. Co Yosë marcanën acochátëraraihuëꞌ. Tëꞌyainaquë acotëraꞌpiapoi. Nani acotohuatoi, yaꞌipiroꞌpaꞌ, marë, nararoꞌsaꞌ, inapita anaꞌintocoꞌ, itiirin.

Apocalipsis 8:7

Yaꞌnan pihuirinsoꞌ irinpachina, Yosë nohuanton, ocaiꞌ, pën, inapita inápa quëran anotarin. Huënairë chachin anotarin. Pancana huiquitarin. Patoma pochin huiquitarin. [Cacharonquë un tercero, topisoꞌ.] Nararoꞌsaꞌ, panpatëroꞌ inapitanta napochachin huiquitarin.

Apocalipsis 9:14

“Catapini anquëniroꞌsaꞌ iꞌquiritëquë paꞌinaꞌ piyapiꞌsaꞌ aparisitacaiso marëꞌ. Panca iꞌ yonsanquë nani ninarapisoꞌ, Iyopiratisiiꞌ itopiquë,” itërin.

Apocalipsis 9:4

“Ama panpatëroꞌ, nara monoꞌ, nitërinsoꞌ inapita pëꞌyacosohuëꞌ. Piyapiꞌsaꞌ co Yosë marcanën tëꞌyainquë yaꞌhuëtohuachinarahuëꞌ, inapita aparisitocoꞌ,” itërin.