Apocalipsis 5:9 - Chayahuita (Shahui)

⁹ Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.

Apocalipsis 5:9 ပူးပေါင်းရင်းမြစ်များ

Salmos 33:3

Nasha canta ocoirahuatoma cantacoꞌ. Noya cantatomaꞌ, noyasha piꞌnicoꞌ.

Salmos 40:3

Inapotërinco niꞌton, nasha cantanën ocoiato cantarahuë. “Ma noyacha Yosë catahuarinco paya,” tënahuë cantato. Ina nicatonaꞌ, naꞌa piyapiroꞌsa Yosë tëꞌhuatopi. Ina tëꞌhuatatonaꞌ, natëpi huachi.

Salmos 96:1

Nasha cantanën cantatëhuaꞌ, Sinioro chinotahuaꞌ. Yaꞌipi isoroꞌpaquë yaꞌhuërëhuasopita inasáchin chinotahuaꞌ.

Isaías 42:10

Nasha canta cantatomaꞌ, Sinioro chinotocoꞌ. Aquë noꞌparoꞌsaquë yaꞌhuëpisopita, ina chinochinaꞌ. Marë paꞌtopisopitantaꞌ, ina chinochinaꞌ. Inaquë maꞌsharoꞌsa yaꞌhuërinsopita, marë yonsanoꞌsaquë yaꞌhuëpisopita, yaꞌipi inapitantaꞌ, ina chinochinaꞌ.

Daniel 3:4

Aꞌna huaꞌani caniaritacaso marëꞌ chiníquën camaitërin: “Yaꞌipinquëma copirno camaitërinso noya natancoꞌ. Naporin: ‘Canpitaso nisha nisha piyapinquëmaꞌ. Nisha nisha nacionquë yaꞌhuëramaꞌ. Nisha nisha nananquë nonamaꞌ.

Daniel 4:1

Ca Napocotono copirnoco ninshitaranquëmaꞌ. Canpitaso nisha nisha nacionquë yaꞌhuëramaꞌ. Nisha nisha nananquë nonamaꞌ. Naporahuaton nisha nisha piyapinquëmaꞌ. Paꞌpi nohuantërahuë yaꞌipinquëma noya yaꞌhuëatomaꞌ, sano yaꞌhuëcamasoꞌ.

Daniel 5:19

Inapotërin niꞌton, nisha nisha piyapiꞌsari tëꞌhuatatona natëpi. Nisha nisha nacionquë yaꞌhuëaponaraihuëꞌ, nisha nisha nananquë nonaponaraihuëꞌ, natëpi. Insosona nohuantërinsoꞌ, atëpatërin. Insosona nohuantërinsoꞌ, nichaꞌërin. Nohuantërinsopita chini chiníquën nanan camaitacaiso marëꞌ quëtërin. Aꞌnaquënso nipirinhuëꞌ, chiníquën nanantopirinahuëꞌ, ocoihuachina atapanin.

Daniel 6:25

Ina piquëran Tario copirnosoꞌ, quirica ninshitërin: “Ca Tario copirnoco ninshitaranquëmaꞌ. Canpitaso nisha nisha nacionquë yaꞌhuëramaꞌ. Nisha nisha nananquë nonamaꞌ. Naporahuaton nisha nisha piyapinquëmaꞌ. Paꞌpi nohuantërahuë yaꞌipinquëma noya yaꞌhuëatomaꞌ, sano yaꞌhuëcamasoꞌ.

Mateo 20:28

Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Mateo 26:28

Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Hechos 20:28

Canpitantaꞌ niꞌcona piꞌpian tërantaꞌ Yosë naniantotamaꞌ. Quisoso imapisopitantaꞌ noya niꞌcoꞌ. Ispirito Santo nani acorinquëmaꞌ huaꞌanën pochin nicacamaso marëꞌ. Inapitantaꞌ Yosë huëntonënquë yaꞌconpi. Quisoso chiminaton, ayaꞌconinpoaꞌ.

1 Corintios 6:20

Quisocristo chiníquën parisitaton, chiminin nichaꞌëinpoaso marëꞌ. Nichaꞌërinpoaꞌ niꞌton, yaꞌipi nonënpoa quëran huarëꞌ huaꞌanëntinpoasoꞌ yaꞌhuërin. Napoaton noyasáchin nicoꞌ aꞌnapitantaꞌ nicatënënquëmaꞌ Yosë chinochinaꞌ.

1 Corintios 7:23

Quisocristo chiminaton, nichaꞌërinquëmaꞌ. Inasáchin natëtomaꞌ, yonquicoꞌ. Ama piyapiꞌsa marëáchin sacatatomaꞌ, Yosë naniantocosohuëꞌ.

Efesios 1:7

Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

Efesios 5:19

Yosë quiricanënquë cantapisoꞌ yonquiatomaꞌ, nishaꞌhuitocoꞌ. Yosë cantanën cantacoꞌ. Nisha nisha cantanën cantatomaꞌ, yaꞌipi cancanëma quëran Yosë chinotocoꞌ.

Colosenses 1:14

Ina chiminin niꞌton, nichaꞌërinpoaꞌ. Oshanënpoaꞌ inquitërinpoa huachi.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Hebreos 11:14

“Co isoroꞌpaquë yaꞌhuëmiatarihuahuëꞌ. Yosëꞌpaꞌ tëhuënchinsoꞌ yaꞌhuëmiatarihuaꞌ,” taꞌtonaꞌ, napopi.

2 Pedro 2:1

Iráca Yosëri acorinsopita noꞌtëquën pënëntopi. Aꞌnaquënso nipirinhuëꞌ nonpin nanan pënëntatonaꞌ, israiroꞌsaꞌ nonpintopi. Inapochachin iporantaꞌ aꞌnaquën nonpin nanan yaaꞌchintarinënquëmaꞌ. Noyasha nontapirinënquëmahuëꞌ, nonpintarinënquëmaꞌ. “Quiyantaꞌ imarai,” taponaraihuëꞌ, nonpin nanan aꞌchinapi anishacancantacaiso marëꞌ. Quisocristo nichaꞌëinpoaso marëꞌ chiminin. Inaíchin natëcaso nipirinhuëꞌ, nisha aꞌchinaꞌpiroꞌsasoꞌ co yanatëpihuëꞌ. Ina marëꞌ aꞌna tahuëri Yosëri anaꞌintarin. Aꞌnanaya anaꞌintarin.

1 Juan 1:7

Yosësoꞌ noyasáchin ninin. Tahuëri pochin cancantërin. Canpoantaꞌ tahuëri pochin yonquihuatëhuaꞌ, Yosë nohuitarihuaꞌ. Naporahuaton, noya niniꞌtëhuaꞌ yaꞌhuarihuaꞌ. Huiꞌnin chachin chiminin niꞌton, yaꞌipi oshanënpoaꞌ inquitarinpoaꞌ. Huënainën quëran anoyacancantarinpoaꞌ.

1 Juan 2:2

Yaꞌhuërënamënpoaꞌ chiminin niꞌton, nontohuatëhuaꞌ, oshanënpoaꞌ inquitarinpoaꞌ. Oshanënpoaꞌ inquitatonpoaꞌ, nanan anoyatërinpoaꞌ. Yaꞌipi piyapi marëꞌ chiminin. Yaꞌipinpoaꞌ oshanënpoaꞌ inquitinpoasoꞌ nohuantopirinhuëꞌ.

Apocalipsis 10:11

Ina quëran shaꞌhuitërinaco: —Naꞌa piyapiꞌsaꞌ pënëantaquëꞌ. Aꞌna tahuëri maꞌsona onpocaisoꞌ Yosë anitotarinquën. Nisha nisha piyapiꞌsaꞌ, nisha nisha nananquë nonpisopita, copirnoroꞌsaꞌ, inapita maꞌsona onpocaisoꞌ Yosë ninoton, anitotarinquën ninshitamaso marëꞌ, itërinaco.

Apocalipsis 11:9

Cara tahuëri miria pochin nisha nisha piyapiꞌsaꞌ, nisha nisha nananquë nonpisopita inapitari niꞌsapi. Nicaponaraihuëꞌ, co nohuantapihuëꞌ paꞌpitacaisoꞌ.

Apocalipsis 13:7

Yosë imapisopita co quëꞌyarinhuëꞌ. Sopai nohuanton, aparisitarin. Quira nisahuaton, canatarin. Notohuaroꞌ piyapiꞌsaꞌ nisha nisha parti yaꞌhuëpisopita huaꞌanëntarin. Nisha nisha nananquë nonpisopita huaꞌanëntarin.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

Apocalipsis 14:6

Ina quëran aꞌna anquënintaꞌ quënanahuë. Inápaquë yanponarin noya nanan shaꞌhuicaso marëꞌ. Nisha nisha piyapiꞌsaꞌ, nisha nisha nananquë nonpisopita, yaꞌipiya shaꞌhuitarin.

Apocalipsis 15:3

Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

Apocalipsis 17:15

Ina quëran aꞌchintaantarinco. —Panca iroꞌsantaꞌ niꞌnan, ina aipi sanapi huënsërinsoꞌ. Inantaꞌ aꞌchinchinquën nitotëquëꞌ. Inapochachin aꞌna tahuëri nisha nisha piyapiꞌsaꞌ yaꞌhuaponaꞌ, nisha nisha nananquë nonpisopita. Huaꞌhuayatërahuëꞌ yaꞌhuaponaꞌ. Nisha nisha copirnori huaꞌanëntërinsopita.

Apocalipsis 4:11

“Quëmasáchin Sinioro imarainquën. Noya noyanquën niꞌton, yaꞌipi piyapiꞌsaꞌ chinochinënquën. Nani tahuëri natëinënquën. Yaꞌipi nanitaparan. Yaꞌipi maꞌsha ninan. Quëma nohuanton, ipora huantaꞌ yaꞌhuarin,” itopi.

Apocalipsis 5:12

“¡Ma noyacha Carniroaꞌhuaso paya! Piyapiꞌsaꞌ oshanënaꞌ inquitacaso marëꞌ chiminin. Noya noya niꞌton, yaꞌipi piyapiꞌsari chinochinaꞌ. Chini chiníquën nanantaton, yaꞌipi nanitaparin. Nani maꞌsha yaꞌhuëtërin, yaꞌipi huaꞌanëntarin. Yaꞌipi nitotërin. Napoaton yaꞌipinpoaꞌ natëahuaꞌ. ‘Yosparinquën, Sinioro,’ itahuaꞌ,” tosapi.

Apocalipsis 5:6

Itohuachincora, Quisoso quënanahuë. Huancanachin Yosë huënsërinso yaꞌcariya huaniarin. Ansianoꞌsaꞌ, catapini maꞌsharoꞌsa pochin nininsopita, inapitari tancapitopi. Quisoso chachin niponahuëꞌ, carniroaꞌhua nani tëpapiso pochin yaꞌnorin. Canchisë pomohuan nisahuaton, canchisë yaꞌpirin yaꞌhuëtërin. Chiníquën nanantaton, canchisë ispiritoroꞌsaꞌ aꞌparin yaꞌipiroꞌpaquë nicainpoaso marëꞌ.