Apocalipsis 5:12 - Chayahuita (Shahui)

¹² “¡Ma noyacha Carniroaꞌhuaso paya! Piyapiꞌsaꞌ oshanënaꞌ inquitacaso marëꞌ chiminin. Noya noya niꞌton, yaꞌipi piyapiꞌsari chinochinaꞌ. Chini chiníquën nanantaton, yaꞌipi nanitaparin. Nani maꞌsha yaꞌhuëtërin, yaꞌipi huaꞌanëntarin. Yaꞌipi nitotërin. Napoaton yaꞌipinpoaꞌ natëahuaꞌ. ‘Yosparinquën, Sinioro,’ itahuaꞌ,” tosapi.

Apocalipsis 5:12 ပူးပေါင်းရင်းမြစ်များ

Mateo 28:18

Quisosori yaꞌcarirahuaton, itapon: —Tata Yosë nohuanton, chini chiníquën nanantërahuë. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntarahuë.

Juan 1:29

Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon.

Juan 17:2

Nani chiníquën nanan quëtëranco yaꞌipi piyapiꞌsaꞌ huaꞌanëntaꞌhuaso marëꞌ. Quëma nohuanton, aꞌnaquën imasarinaco. Inapitasoꞌ anoyacancantërahuë quëma nohuitatënën nanpimiatacaiso marëꞌ.

2 Corintios 8:9

Sinioro Quisocristo nosoroatonpoaꞌ, catahuarinpoasoꞌ nani nitotëramaꞌ. Iráca noya noya inápaquë yaꞌhuëpirinhuëꞌ, isoroꞌpaquë oꞌmarin nichaꞌëinquëmaso marëꞌ. Co mantaꞌ isëquë yaꞌhuëtërinhuëꞌ. Parisitërin quëran nichaꞌërinquemaꞌ noya noya cancantacaso marëꞌ. Parisitaton, naꞌcon catahuarinquëmaꞌ.

1 Timoteo 1:17

Napoaton Yosëíchin natëahuaꞌ. Nani tahuëriya: “¡Ma noyacha Yosëso paya!” itahuaꞌ. Inasoꞌ co onporontaꞌ taꞌhuantaponhuëꞌ. Co quënanpirëhuahuëꞌ, huaꞌanëntomiatërinpoaꞌ. Inaíchin chinotacasoꞌ yaꞌhuërin. Ama onporontaꞌ ina naniantahuasohuëꞌ. Amen.

Apocalipsis 1:6

Huëntonënquë chachin ayaꞌconatonpoaꞌ, huaꞌanëntërinpoaꞌ. Yosëíchin yonquicaso marëꞌ corto huaꞌanoꞌsaꞌ pochin acorinpoaꞌ. ¡Ma noyacha inaso paya! Yaꞌipi piyapiꞌsari chinochinaꞌ. Ipora quëran huarëꞌ inasáchin natëinaꞌ. Amen.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

Apocalipsis 15:3

Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

Apocalipsis 19:1

Ina quëran notohuaroꞌ inápaquë yaꞌhuëpisopita nonsapi natanahuë. Capa cancantatonaꞌ, chiníquën nonsapi: “¡Ma noyacha Tata Yosëso piyapiꞌsaꞌ nichaꞌërin paya! Chini chiníquën nanantarin niꞌton, yaꞌipi piyapiꞌsari chinochinaꞌ.

Apocalipsis 4:11

“Quëmasáchin Sinioro imarainquën. Noya noyanquën niꞌton, yaꞌipi piyapiꞌsaꞌ chinochinënquën. Nani tahuëri natëinënquën. Yaꞌipi nanitaparan. Yaꞌipi maꞌsha ninan. Quëma nohuanton, ipora huantaꞌ yaꞌhuarin,” itopi.

Apocalipsis 5:13

Ina quëran yaꞌipi Yosëri nininsopita napopianachin chinotapi, natanahuë. Inápaquë yaꞌhuërinsopita, isoroꞌpaquë yaꞌhuërinsopita, chiminpisopita, marëquë yaꞌhuërinsopita, yaꞌipiya Yosë chinotapi. “Ma noyacha Tata Yosëso paya. Huaꞌanëntarinpoaꞌ niꞌton, ‘Yosparinquën’ itahuaꞌ. Inasáchin natëahuaꞌ. Noya noya niꞌton, chinotahuaꞌ. Yaꞌipiya nanitaparin. Carniroaꞌhuantaꞌ inapochachin chinotahuaꞌ. Ipora quëra huarëꞌ ina natëahuaꞌ,” tosapi.

Apocalipsis 5:6

Itohuachincora, Quisoso quënanahuë. Huancanachin Yosë huënsërinso yaꞌcariya huaniarin. Ansianoꞌsaꞌ, catapini maꞌsharoꞌsa pochin nininsopita, inapitari tancapitopi. Quisoso chachin niponahuëꞌ, carniroaꞌhua nani tëpapiso pochin yaꞌnorin. Canchisë pomohuan nisahuaton, canchisë yaꞌpirin yaꞌhuëtërin. Chiníquën nanantaton, canchisë ispiritoroꞌsaꞌ aꞌparin yaꞌipiroꞌpaquë nicainpoaso marëꞌ.

Apocalipsis 5:8

Nani maꞌpahuachina, maꞌsharoꞌsa pochin nininsopita isonahuatonaꞌ, Carniroaꞌhua chinotapi. Ansianoꞌsantaꞌ isonahuatonaꞌ, ina chinotapi. Aꞌnaya aꞌnaya arparoꞌsaꞌ sëꞌquëpi piꞌniatonaꞌ chinotacaiso marëꞌ. Sënaontaꞌ aꞌnaya aꞌnaya quëpapi, oro quëran nininsoꞌ. Inaquë yonarin pochin pimóchin nininsoꞌ yaꞌhuërin tomontacaso marëꞌ. Tomontërinso pochin imarëhuasopita Yosë nontërëhuaꞌ. “Nontohuatëhuaꞌ, noya nataninpoaꞌ,” taꞌtonaꞌ, Yosë chinotapi.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.

Apocalipsis 6:1

Yosë nohuanton, huaꞌnarëso pochin niantarahuë. Quirica soꞌnanpinan nininsoꞌ quënantarahuë, canchisë toꞌniquë achinpitërinsoꞌ. Naporoꞌ Carniroaꞌhuari yaꞌnan achinpitërinsoꞌ iꞌshotërin. Iꞌshotohuachina, aꞌna maꞌsha pochin nininsoꞌ chiníquën nonin, huira pochin natanahuë. —¡Huëquë huachi! itërin.

Apocalipsis 7:12

“Tëhuënchachin Sinioro, piyapiꞌsaꞌ nichaꞌëran. ¡Ma noyanquëncha quëmaso paya! Yaꞌipiya chinochinënquën. Yaꞌipi nitotëran. Chini chiníquën nanantaton, yaꞌipiya nanitaparan niꞌton, yaꞌipi natëinënquën. ‘Yosparinquën,’ ichinënquën. Naꞌcon natëmiatarainquën. Co onporontaꞌ aꞌpoarainquënhuëꞌ. Amen,” itapi.