Apocalipsis 4:9 - Chayahuita (Shahui)

⁹ Apira apira chinotapi. “¡Ma noyacha Yosëso paya! Yaꞌipi piyapiꞌsari chinochinaꞌ. Naꞌcon catahuarinpoaꞌ niꞌton, ‘Yosparinquën Sinioro,’ itahuaꞌ. Inasoꞌ huaꞌanëntomiatarinpoaꞌ. Co onporontaꞌ taꞌhuantarinhuëꞌ,” topachinara,

Apocalipsis 4:9 ပူးပေါင်းရင်းမြစ်များ

Salmos 47:8

Yosësoꞌ, yaꞌipi nacionoꞌsa copirnonën nicacaso marëꞌ yaꞌconin. Noya noya huaꞌanëntacaso shiranënquë huënsëárin.

Éxodo 15:18

Sinioronënpoaso nipirinhuëꞌ, huaꞌanëntomiatapon. Co onporonta pipiarinhuëꞌ,” topi.

Isaías 6:1

Osiasë copirno chimininso piꞌiquë, huaꞌnarëso pochin Sinioro niꞌnahuë. Huaꞌanëntacaso shiranën paꞌpi inápaquë acorahuaton, huënsëarin niꞌnahuë. Aꞌmorinsontaꞌ, chinotacaso pëi yaꞌipi mëntatërin.

Daniel 4:34

Noyataꞌhuaso tahuëri nanihuachina, ca Napocotonoco inápaquë nëꞌpëtërahuë. Naporo chachin huaꞌyantërahuësoꞌ, noyatërahuë ninatanahuë. Noyatahuato: “Yosparinquën Sinioro,” itërahuë. Inaso yaꞌhuëmiatërin niꞌton, chinotërahuë: “Quëmasoꞌ Sinioro chiníquën nanantëran. Naporansoꞌ, inachachin nisápon. Shihuëipita onpo huënton ocoipirinahuë tërantaꞌ, quëmasoꞌ huaꞌanëntápon.

Deuteronomio 32:40

Inápaquë anquirahuato shaꞌhuitaranquëmaꞌ: Caso yaꞌhuëmiatërahuë niꞌto, noꞌtëquën shaꞌhuitaranquëmaꞌ. Sahuëni huënaráchin yaꞌhuëtërincoso toꞌnahuato, noya coisë pochin nisarahuë. Inimiconëhuëpita noꞌtëquën iꞌhuërëtarahuë. Noꞌhuirinacosopita, nanirinso chachin anaꞌintarahuë.

Hebreos 7:25

Napoaton nanitërin noyá nichaꞌëinpoasoꞌ. “Quisocristoíchin anoyacancantërinpoaꞌ,” taꞌtëhuaꞌ, Yosë imarëhuaꞌ. Iporahuantaꞌ Quisocristo nanpiárin catahuainpoaso marëꞌ. Nani tahuëri canpoa marëꞌ Yosë nontárin.

Hebreos 7:8

Isoroꞌpaquë corto huaꞌanoꞌsari diesmo maꞌpatopirinahuëꞌ, inapitantaꞌ piyapiꞌsaꞌ niꞌton, chiminpi antaꞌ. Miriquisoso nipirinhuëꞌ nanpiarin pochin cancantërëhuaꞌ. Yosë quiricanën nontërëhuaꞌ quëran, naporëhuaꞌ.

Apocalipsis 1:18

Nanpiárahuë. Chiminaporahuëꞌ, nanpiantarahuë. Casoꞌ chini chiníquën nanantërahuë. Onporosona chiminacaisoꞌ cari shaꞌhuitarahuë. Ca nohuantohuato, nanpiapi. Ca nohuantohuato, chiminaponaꞌ. Co imarinacosopitahuëꞌ chiminpachinaꞌ, parisitopiquë aꞌpararahuë.

Apocalipsis 10:6

“Yosë niꞌsárinco niꞌton, co nonpinahuëꞌ. Inasoꞌ iráca quëran huarëꞌ yaꞌhuaton, co onporontaꞌ ayaponhuëꞌ. Isoroꞌpaꞌ, marë, piꞌiroꞌtëꞌ, yaꞌipi yaꞌhuërinsopita inari ninin. Tëhuënchachin co huachi huaꞌqui quëranhuëꞌ anaꞌintomiatarin.

Apocalipsis 15:7

Ina marëꞌ canchisë minëroꞌsa pochin nininsoꞌ yaꞌhuërin, oro quëran nipisoꞌ. Aꞌnaraꞌ maꞌsha pochin nininsoꞌ minëroꞌsaꞌ masahuaton, anquëniroꞌsaꞌ quëtërin. “Paatomaꞌ, minëroꞌsaquë yaꞌhuërinsoꞌ tëꞌyanantocoꞌ. Aꞌnaya aꞌnaya tëꞌyanantohuatamaꞌ, Yosëri chiníquën anaꞌintarin huachi,” taꞌton, aꞌnaya aꞌnaya quëtërin. Yosësoꞌ co onporontaꞌ chimianinhuëꞌ, niꞌsárinpoaꞌ.

Apocalipsis 21:5

Ina quëran Yosë huaꞌanëntacasoꞌ shiranënquë huënsëaton, itërinco: —Niꞌquëꞌ. Yaꞌipiya anoyatarahuë. Nashasáchin acoarahuë. Noꞌtëquën nontëranquën niꞌton, ninshitëquëꞌ. Yaꞌipiya natëtacaisoꞌ yaꞌhuërin, itërinco.

Apocalipsis 4:2

Aꞌnanaya Ispirito Santo nohuanton, huaꞌnarëso pochin Yosë yaꞌhuërinsoꞌ quënanahuë. Huaꞌanëntacasoꞌ shiranënquë aꞌnaraꞌ huënsëárin, niꞌnahuë.

Apocalipsis 4:8

Nisha nisha niponaraihuëꞌ, yaꞌipiya anpiantëhuanpi. Saota saota yaꞌhuëtopi. Ina aipi, ina acopoꞌ, cato quëran chachin yaꞌpirin yaꞌhuëtopi. Inapitasoꞌ tahuërirë chachin, tashirë chachin Yosë chinotápi. Co taꞌtopihuëꞌ. Napopianachin naporapi: “¡Ma noyacha Tata Yosëso paya! ¡Noyasáchin ninin! Chini chiníquën nanantaton, yaꞌipiya huaꞌanëntarin. Iráca quëra huarëꞌ yaꞌhuërin. Ipora huantaꞌ nanpiárin. Inasoꞌ yaꞌhuërárin. ¡Ma noyacha inaso paya!” tosapi.

Apocalipsis 5:1

Yosë nohuanton, huaꞌnarëso pochin niantarahuë. Inápaquë yaꞌhuërinsoꞌ quënanato, quirica niꞌnahuë, soꞌnanpinan. Inchinan imirin quëran Yosëri sëꞌquërarin. Cato quëran chachin nani ninshitërin. Toꞌniquë noyá achinpitërin. Canchisëroꞌ achinpitërin.

Apocalipsis 6:16

Yaꞌipi piyapiꞌsaꞌ tëꞌhuatatonaꞌ, motopi nontapirinahuëꞌ: —Panca naꞌpiroꞌsaꞌ notarintatonaꞌ, yaꞌcopiinacoi ama Yosë quënanaincoiso marëhuëꞌ. Inápaquë huaꞌanëntarin. Carniroaꞌhuantaꞌ chiníquën noꞌhuirincoi.

Apocalipsis 7:15

Napoaton Yosë yaꞌhuërinquë huëntapi. Tahuërirë chachin tashirë chachin ina chinotapi. Yosëri ichiyaꞌhuëaton, niꞌsarin.