Apocalipsis 4:8 - Chayahuita (Shahui)

⁸ Nisha nisha niponaraihuëꞌ, yaꞌipiya anpiantëhuanpi. Saota saota yaꞌhuëtopi. Ina aipi, ina acopoꞌ, cato quëran chachin yaꞌpirin yaꞌhuëtopi. Inapitasoꞌ tahuërirë chachin, tashirë chachin Yosë chinotápi. Co taꞌtopihuëꞌ. Napopianachin naporapi: “¡Ma noyacha Tata Yosëso paya! ¡Noyasáchin ninin! Chini chiníquën nanantaton, yaꞌipiya huaꞌanëntarin. Iráca quëra huarëꞌ yaꞌhuërin. Ipora huantaꞌ nanpiárin. Inasoꞌ yaꞌhuërárin. ¡Ma noyacha inaso paya!” tosapi.

Apocalipsis 4:8 ပူးပေါင်းရင်းမြစ်များ

Génesis 17:1

Apran iscon shonca iscon piꞌipitasoꞌ, Siniorori yaꞌnotahuaton, itapon: —Caso Yosëco, yaꞌipi nanitaparahuë. Natëtonco, nohuantërahuësoráchin niquëꞌ.

Salmos 91:1

Siniorosoꞌ chini chiníquën nanantaton, yaꞌipi nanitaparin. Ina yaꞌipi cancanënpoa quëran imapatëhuaꞌ, sano yaꞌhuëarihuaꞌ. Chiníquën nanantaton aꞌpaiarinpoaꞌ.

Éxodo 15:11

Co insonta Sinioro quëma pochin nininhuëꞌ. Quëmasáchin noya noyanquën. Chini chiníquën nanantëran. Anaꞌintacaso marëꞌ paꞌpi huëhuëpiro nininsopita maꞌsha aꞌnoran. Napoaton yaꞌipiya quëran chinochinën.

Éxodo 3:14

—Israiro ansianoꞌsa ayontonahuaton shaꞌhuitëquëꞌ: “Naporin Yosë: ‘Caso Yosëco yaꞌhuëmiatërahuë. Sinioro itaramaco. Shimashonëmapita Apraan, Isaco, Cacopo, inapita chinotërinaco. Iquipitoquë chiníquën aparisitërinëmaso nitotërahuë. Nani yonquirahuë nichaꞌëaꞌhuamaso marëꞌ. Iquipito quëran ocoirahuatënquëmaꞌ, Canaan parti quëpaaranquëmaꞌ. Inaquësoꞌ, cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, iporoꞌsaꞌ, quiposoroꞌsaꞌ, inapita yaꞌhuërapi. Inapitasoꞌ, co manta chinotërinacohuëꞌ. Inaso noꞌpaꞌ noya noya, inaquëso co manta pahuaninhuëꞌ,’ tënin,” itëquëꞌ. Ina yaꞌnotatonco nontaꞌhuanquëmaso marëꞌ aꞌparinco.

Ezequiel 1:18

Tahuinanoꞌsasoꞌ, panca masho nisahuaton, huëhuëpiro yaꞌnorin. Naporahuaton yaꞌipi tahuirinso nani chachin yaꞌpirahuanaꞌpiapi.

Ezequiel 1:6

Aꞌnaya aꞌnaya catapini catapini yaꞌpirahuanpi. Catapini catapini chachin anpiantëhuanpi.

Joel 1:15

Anaꞌintacaso tahuëri nani naniriarin. Ina tahuëri nanihuachin, ¡maꞌhuántacha nisarëhua paya! Naporoꞌ Siniorosoꞌ ataꞌhuatarinpoaꞌ. Yaꞌipi nanitapaton inapotarinpoa huachi.

Hechos 20:31

Napoaton iyaroꞌsaꞌ, niꞌcona nonpintochinënquëmaꞌ. Cara piꞌipi catahuaranquëmaꞌ. Tahuërirë chachin, tashirë chachin pënënanquëmaꞌ. Naꞌcon nosororanquëmaꞌ niꞌton, naꞌnëto, aꞌnaya aꞌnayanquëmaꞌ pënënanquëmaꞌ. Ina yonquiatomaꞌ, nipënëncoꞌ, nicatahuacoꞌ.

2 Corintios 6:18

Tataparinquëma pochachin noya nosoroaranquëmaꞌ. Huiꞌnahuëpita pochin cancantëranquëmaꞌ, itërinpoaꞌ Tata Yosë. Chini chiníquën nanantaton, yaꞌipiya huaꞌanëntërin,” tënin quiricanënquë.

1 Tesalonicenses 2:9

Canpitataquë yaꞌhuasocoi, chiníquën sacatatoi, aꞌchintërainquëmaꞌ. Tahuërirë chachin tashirë chachin sacatërai ama topinan maꞌsha maꞌpacaꞌhuainquëmaso marëhuëꞌ. Quiyaora sacatonëhuëi quëran coshatërai. Naporahuatoi, Yosë nanamën aꞌchintërainquëmaꞌ. Co ina naniantëramahuëꞌ, tënahuë.

1 Timoteo 4:16

Nani tahuëri yonquiquëꞌ nóya imacamaso marëꞌ. Naporahuaton, noꞌtëquën aꞌchinquëꞌ. Inapohuatan, Yosë catahuarinquën imamiataton chaꞌëcaso marëꞌ. Aꞌnapitantaꞌ natanpachinquën, chaꞌësapi.

2 Timoteo 4:2

Nanamën aꞌchináquëꞌ. Piyapiꞌsaꞌ yanatanpachinaꞌ, aꞌchintëquëꞌ. Sacaiꞌ aꞌchinacaso nipirinhuëꞌ, onpopiontaꞌ aꞌchináquëꞌ. Aꞌnaquënsoꞌ co yaimapachinahuëꞌ, noꞌtëquën shaꞌhuitëquëꞌ natëinaꞌ. Co noyahuëꞌ nipachinaꞌ, pënënquëꞌ. Noya nontëquëꞌ chiníquën cancantatonaꞌ, imainaꞌ. Yaꞌipi piyapiꞌsaꞌ aꞌchintëquëꞌ noya nicacaiso marëꞌ. Nipirinhuëꞌ, ama noꞌhuiquësohuëꞌ. Sanoanan quëran pënënquëꞌ.

Hebreos 13:8

Quisocristo co onporontaꞌ nishataponhuëꞌ. Iráca nosororinpoaꞌ. Ipora huantaꞌ catahuarinpoaꞌ. Co onporontaꞌ naniantarinpoahuëꞌ. Inasáchin imahuaꞌ.

Apocalipsis 1:4

Ca Coanshaco quirica aꞌpataranquëmaꞌ. Asia parti yaꞌhuëramasopita ninshitaranquëmaꞌ. Imaramaꞌ niꞌton, aꞌnaya aꞌnaya ninanoroꞌsaquë niyontonatomaꞌ, Yosë chinotëramaꞌ. Canchisë ninanoquë niyontonamasoꞌ aꞌnaya aꞌnayanquëmaꞌ yonquiatënquëmaꞌ, ninshitaranquëmaꞌ. Inaora nohuanton, Tata Yosë noya catahuainquëmaꞌ. Asanocancainquëmaꞌ. Iráca quëran huarëꞌ yaꞌhuërin. Ipora huantaꞌ nanpiarin. Inasoꞌ yaꞌhuërápon. Co onporontaꞌ chimianinhuëꞌ. Huaꞌanëntacasoꞌ shiranën notënanquë canchisë ispiritoroꞌsaꞌ yaꞌhuapi catahuainquëmaso marëꞌ.

Apocalipsis 1:8

Yosë chachin shaꞌhuitërinpoaꞌ: “Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuërahuë. Ipora huantaꞌ nanpiárahuë. Co onporontaꞌ taꞌhuantapohuëꞌ, yaꞌhuërápo. Chini chiníquën nanantërahuë,” tënin.

Apocalipsis 14:11

Co onporontaꞌ pën tacopiaponhuëꞌ. Inaquë conaintaꞌ tomontápon. Parisitápona. Co sanoarinhuëꞌ. Insopitasona maꞌsha paꞌpi tëꞌhuatoroꞌ nininsoꞌ natëtonaꞌ, mamanshinën moshahuachinaꞌ, tahuërirë chachin, tashirë chachin chiníquën parisitáponaꞌ. Co marcanën niacotacasoꞌ yaꞌhuërinhuëꞌ, tënin.

Apocalipsis 14:3

Nasha cantanën inápaquë cantarapi. Yosë notënanquë cantarapi. Ansianoꞌsaꞌ, catapini maꞌsharoꞌsa pochin nininsopita, inapitantaꞌ natanapi. Pasa catapini shonca catapini huaranca imapisopita cantapisoꞌ. Isoroꞌpaquë yaꞌhuaponaꞌ, Quisosori nichaꞌërin. Oshanëna marëꞌ chiminaton, anoyacancantërin niꞌton, inapitaráchin nanitopi ina cantacaisoꞌ.

Apocalipsis 15:3

Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

Apocalipsis 15:7

Ina marëꞌ canchisë minëroꞌsa pochin nininsoꞌ yaꞌhuërin, oro quëran nipisoꞌ. Aꞌnaraꞌ maꞌsha pochin nininsoꞌ minëroꞌsaꞌ masahuaton, anquëniroꞌsaꞌ quëtërin. “Paatomaꞌ, minëroꞌsaquë yaꞌhuërinsoꞌ tëꞌyanantocoꞌ. Aꞌnaya aꞌnaya tëꞌyanantohuatamaꞌ, Yosëri chiníquën anaꞌintarin huachi,” taꞌton, aꞌnaya aꞌnaya quëtërin. Yosësoꞌ co onporontaꞌ chimianinhuëꞌ, niꞌsárinpoaꞌ.

Apocalipsis 16:14

Sopairoꞌsaꞌ niꞌton, nani maꞌsha nanitapapi. Sacaiꞌ nininsopita nisapi piyapiꞌsari natëcaiso marëꞌ. Nonpintatonaꞌ, napoapi. Nisha nisha copirnoroꞌsaꞌ camairaꞌpiaponaꞌ quira nicacaiso marëꞌ. Anaꞌintacasoꞌ tahuëri nani yaꞌcaritëriarin niꞌton, niyontonaponaꞌ. “Canpoari Yosë minsëahuaꞌ,” taꞌtonaꞌ, napoaponaꞌ.

Apocalipsis 16:7

Artaro quëraontaꞌ noninsoꞌ natanahuë: “Tëhuënchachin Sinioro quëmasáchin yaꞌipi huaꞌanëntëran. Chini chiníquën nanantaton, noꞌtëquën nonan. Noꞌtëquën anaꞌintaran,” tënin.

Apocalipsis 19:15

Quëmapi quëchitërinsoꞌ nanamën quëran sahuëni pochin nininsoꞌ yaꞌhuëtërin. Chiníquën nanantaton, nanamën quëran chachin inimiconënpita minsëarin. Noninsoꞌ sahuëni pochin nicaton, topinan noncharapirinhuëꞌ, co noyahuëꞌ nipisopita minsëarin. Piyapiꞌsaꞌ noꞌtëquën anaꞌintarin. Yosëri noꞌhuirin niꞌton, oparoꞌsaꞌ toꞌpoirëso pochin oshahuanoꞌsaꞌ chiníquën anaꞌintarin.

Apocalipsis 19:4

Napohuachinara, cato shonca catapini ansianoꞌsaꞌ, catapini maꞌsharoꞌsa pochin nininsopita, inapitantaꞌ isonahuatonaꞌ, Yosë chinotapi: “¡Naporinchi paya! ¡Ma noyacha Tata Yosëso paya! Shiranënquë huënsëaton, yaꞌipiya huaꞌanëntarin,” tosapi.

Apocalipsis 21:22

Inaquësoꞌ co Yosë chinotacasoꞌ pëiꞌ yaꞌhuërinhuëꞌ. Yosë chini chiníquën nanantërinso chachin yaꞌipi parti yaꞌhuarin. Carniroaꞌhuantaꞌ yaꞌhuarin niꞌton, noya noya chinotarihuaꞌ.

Apocalipsis 3:7

Ina quëran itaantarinco: —Ansiano Piratiripiaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Casoꞌ noya noyaco. Casáchin noꞌtëquën aꞌchinahuë. Iráca Yosëri Tapi shaꞌhuitërin. ‘Aꞌna tahuëri quëma shiparinquën yaꞌipi piyapinëhuëpita huaꞌanëntarin,’ itërin. Iráca ninorincoso chachin nani oꞌmarahuë Yosë huëntonënquë ayaꞌconaꞌhuanquëmaso marëꞌ. Niahuiquë yaꞌcoana iꞌsoarahuatëꞌ, ayaꞌconëꞌ. Inapochachin carinquëmaꞌ ayaꞌconpatënquëmaꞌ, co insontaꞌ nanitërinhuëꞌ ocoiinquëmasoꞌ. Oncotohuatëra, co aꞌnapita nanitopihuëꞌ yaꞌconacaisoꞌ.

Apocalipsis 4:4

Inaquë cato shonca catapini ansianoꞌsaꞌ huaꞌanëntacasoꞌ shiraroꞌsaquë tahuishin miáchin huënsëapi. Huirichinachin aꞌmopi. Yancotëꞌ oro quëran nininsoꞌ yancopi.

Apocalipsis 4:6

Shira notënanquë panca sono pochin yaꞌhuërin. Co iꞌsha pochinhuëꞌ. Isihuico pochin niponahuëꞌ, acopoquë huarëꞌ quënantërëꞌ. Yosë shiranën tahuirinquë catapini maꞌsharoꞌsa pochin nininsoꞌ yaꞌhuëpi, nanpirihuanpisoꞌ. Naꞌa yaꞌpirahuanatonaꞌ, itoparan itoparan quënantopi.

Apocalipsis 4:9

Apira apira chinotapi. “¡Ma noyacha Yosëso paya! Yaꞌipi piyapiꞌsari chinochinaꞌ. Naꞌcon catahuarinpoaꞌ niꞌton, ‘Yosparinquën Sinioro,’ itahuaꞌ. Inasoꞌ huaꞌanëntomiatarinpoaꞌ. Co onporontaꞌ taꞌhuantarinhuëꞌ,” topachinara,

Apocalipsis 5:6

Itohuachincora, Quisoso quënanahuë. Huancanachin Yosë huënsërinso yaꞌcariya huaniarin. Ansianoꞌsaꞌ, catapini maꞌsharoꞌsa pochin nininsopita, inapitari tancapitopi. Quisoso chachin niponahuëꞌ, carniroaꞌhua nani tëpapiso pochin yaꞌnorin. Canchisë pomohuan nisahuaton, canchisë yaꞌpirin yaꞌhuëtërin. Chiníquën nanantaton, canchisë ispiritoroꞌsaꞌ aꞌparin yaꞌipiroꞌpaquë nicainpoaso marëꞌ.

Apocalipsis 6:1

Yosë nohuanton, huaꞌnarëso pochin niantarahuë. Quirica soꞌnanpinan nininsoꞌ quënantarahuë, canchisë toꞌniquë achinpitërinsoꞌ. Naporoꞌ Carniroaꞌhuari yaꞌnan achinpitërinsoꞌ iꞌshotërin. Iꞌshotohuachina, aꞌna maꞌsha pochin nininsoꞌ chiníquën nonin, huira pochin natanahuë. —¡Huëquë huachi! itërin.

Apocalipsis 6:6

Naporoꞌ catapini maꞌsharoꞌsaꞌ huancánachin, noninsoꞌ natanahuë: —Yaꞌipi cosharoꞌ naꞌcon paꞌtarin. Aꞌna tahuëriraꞌ iꞌhuaquë huarëꞌ sacatopirinahuëꞌ, aꞌna quiroichin trico paꞌanapi. Inapochachin aꞌna cosharontaꞌ pahuanarin. Sipatasoꞌ trico pochin niponahuëꞌ, co ina pochin paꞌtopirinhuëꞌ, inantaꞌ paꞌtarin. Aꞌna tahuëriraꞌ iꞌhuaquë huarëꞌ sacatopirinahuëꞌ, cara quiroichin paꞌanapi. Tomaꞌ, huino, inapitantaꞌ pahuanarin. Niꞌcona chiniatamaꞌ, tënin.

Apocalipsis 7:11

Inaquë Yosë chachin huaꞌanëntacasoꞌ shiranënquë huënsëarin. Ansianoꞌsaꞌ, catapini maꞌsharoꞌsa pochin nininsopita, inapitari tancapitopi. Ina tahuirinquë notohuaroꞌ anquëniroꞌsaꞌ huaniapi. Chinotopisoꞌ natanahuatonaꞌ, inapitantaꞌ isonahuatonaꞌ, Yosë chinotapi:

Apocalipsis 7:15

Napoaton Yosë yaꞌhuërinquë huëntapi. Tahuërirë chachin tashirë chachin ina chinotapi. Yosëri ichiyaꞌhuëaton, niꞌsarin.