Apocalipsis 3:2 - Chayahuita (Shahui)

² Ipora huantaꞌ niyontonpiramahuëꞌ, topinan quëran naporamaꞌ: ‘Yaꞌipi natëtoi, noya ninai,’ topiramahuëꞌ, co huachi Yosë noya niꞌninquëmahuëꞌ. Huëꞌërëso pochin cancantëramaꞌ niꞌton, co yonquiramahuëꞌ. Pënsha yatacopirinso pochin cancantëramaꞌ. Pën yatacopihuachina, pishitërëꞌ noya orotacaso marëꞌ. Inapochachin canpitantaꞌ chiníquën Yosë yonquiantacoꞌ.

Apocalipsis 3:2 ပူးပေါင်းရင်းမြစ်များ

Isaías 35:3

Sanpatërëso pochin cancantopisopita, achinicancancoꞌ. Canotërëso pochin cancantopisopitantaꞌ, catahuaco chiníquën cancanchinaꞌ.

Daniel 5:27

Tiquiri pëꞌtënanquë pëꞌtënëso pochin Yosë nitohuachinquëna, pahuanan tapon naporin.

Mateo 23:5

Piꞌpian Yosë quiricanën ninshitahuatonaꞌ, tëꞌyainaquë achinpipi piyapiꞌsari nicacaiso marëꞌ. Naporahuatonaꞌ, naporopi aꞌmopi nohuitacaiso marëꞌ. ‘Inapohuatëhuaꞌ, piyapiꞌsaꞌ noya niꞌsarinënpoaꞌ,’ taꞌtonaꞌ, napopi. Napoaponaraihuëꞌ, co aquëtëꞌ Yosë yonquipihuëꞌ.

Mateo 25:13

Napoaton canpitantaꞌ noya yonquiatomaꞌ, oꞌmantaꞌhuasoꞌ tahuëri ninacoꞌ. Onporosoꞌ nanipon nimara, co nitotëramahuëꞌ. Niꞌcona patontatënquëmaꞌ,” itërin.

Mateo 25:7

Aꞌnaroáchin shonca nanoꞌsa chachin capayatahuatonaꞌ, nanparinënapita taparapi noya orotacaso marëꞌ.

Hechos 18:23

Huaꞌquimiáchin inaquë yaꞌhuërin. Ina quëran naquëranchin yonquirin paaton nasha imapisopita nicacaso marëꞌ. Carasia parti paꞌsahuaton, pënënaꞌpiarin. Naporahuaton, Piriquia partintaꞌ paꞌsahuaton, pënënaꞌpiarin. Aꞌnaya aꞌnaya ninanoroꞌsaquë Quisoso imapisopita achinicancanaꞌpiarin. Achinicancanpachina, noya noya imasapi.

1 Pedro 4:7

Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ.

1 Pedro 5:8

Sopaisoꞌ inimiconënpoaꞌ. Yacamairinpoaꞌ co noyahuëꞌ nicacaso marëꞌ. Paꞌpiniꞌ yamaninposo pochachin sopai paꞌsarin piyapiꞌsaꞌ minsëcaso marëꞌ. Napoaton noya yonquiatomaꞌ, niꞌsácoꞌ.

Apocalipsis 16:15

Nani Quisoso shaꞌhuitërinpoaꞌ: “Niꞌcoꞌ, iyaroꞌsaꞌ. Aꞌnanaya oꞌmantararahuë. Ihuatë pochin nicato, co nitotasënquëmahuëꞌ, oꞌmantararahuë niꞌton, nani tahuëri ninaco. Noya ninahuatamaco, noya cancantaramaꞌ. Yosë noya niꞌsarinquëmaꞌ. Noyápiachin aꞌmorëso pochin noyasáchin nicoꞌ. Ina quëran oꞌmantahuato, co tapanapomahuëꞌ. Noya cancantaramaꞌ,” itërinpoaꞌ.

Apocalipsis 2:4

Nipirinhuëꞌ, co huachi noya nosororamacohuëꞌ. Iráca yaꞌnan imapomaco, tëhuënchachin nóya nosororamaco. Canpita capinintaꞌ noya ninosororamaꞌ. Iporaso nipirinhuëꞌ co huachi iráca pochin noya ninosororamahuëꞌ. Co huachi cantaꞌ noya nosororamacohuëꞌ. Ina marëꞌ sëtato, co noya niꞌnanquëmahuëꞌ.

Apocalipsis 3:1

Ina quëran Quisoso shaꞌhuitaantarinco: —Ansiano Sartisiquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco ninshitaranquëmaꞌ. Casoꞌ canchisë ispiritoroꞌsaꞌ Yosëri camairinsoꞌ cantaꞌ camairahuë, natërinaco. Naporahuaton, tayoraroꞌsaꞌ sëꞌquërahuëso pochin, ansianoroꞌsantaꞌ acorahuë aꞌchinacaiso marëꞌ. Canpitasoꞌ nohuitëranquëmaꞌ. Yaꞌipi co noyahuëꞌ ninamasopita nitotërahuë. Aꞌnapitasoꞌ nicatënënquëmaꞌ, ‘noya imapi,’ topirinahuëꞌ, co tëhuënchachin imaramacohuëꞌ. Chimipi pochin cancantëramaꞌ.

Apocalipsis 3:3

Yaꞌnan natanapomaꞌ, Yosë nanamën noꞌtëquën aꞌchintërinënquëmaꞌ. Ina yonquiatomaꞌ, yaꞌipi co noyahuëꞌ yonquiramasopita naniantocoꞌ. Yaꞌipi cancanëma quëran casáchin yonquico. Co noya cancantaantahuatamahuëꞌ, aꞌnaroáchin anaꞌintaranquëmaꞌ. Ihuatonaꞌpi huëꞌninso pochachin aꞌnanaya anaꞌintaranquëmaꞌ. Co nitotasënquëmahuëꞌ, oꞌmantararahuë.