Apocalipsis 3:18 - Chayahuita (Shahui)

¹⁸ Napoaton pënënanquëmaꞌ. Chiníquën nontoco catahuainquëmaꞌ. Niꞌcoꞌ. Oro aꞌpëhuatëra, yaꞌipi nëꞌhuë inquirin. Orosachin quëparitërin, noyasáchin nininsoꞌ. Inapochachin canpitantaꞌ nontoco catahuainquëmaꞌ noya yonquicamaso marëꞌ. Naꞌcon pahuantarinquëmaꞌ Yosë pochin nicacamasoꞌ. Casáchin yonquico Yosë noya niꞌinquëmaꞌ. Yonquihuatamaco, huiríchin aꞌmorëso pochin noya nisaramaꞌ. Somaraya pochin cancantëramaꞌ niꞌton, co tëhuënchachin nohuitëramacohuëꞌ. Nimirioquë acorayatërëso pochin anoyacancanchinquëmaꞌ cancanëma quëran nohuitamacoso marëꞌ.

Apocalipsis 3:18 ပူးပေါင်းရင်းမြစ်များ

Salmos 16:7

Yonquiransopita anitotëranco. Ina marëꞌ noya cancantato chinotëranquën. Tashirë chachin yonquihuatënquën, aꞌchintaranco noya nicaꞌhuaso marëꞌ.

Salmos 32:8

Sinioronënpoa naporin: “Carinquën catahuaranquën noꞌtëquën yonquicasoꞌ. Anitotaranquën maꞌsona nicacasoꞌ. Noyasha pënënatënquën, noya ira aꞌnorëso pochin nitaranquën.

Salmos 73:24

Noya nicaꞌhuaso marëꞌ nani tahuëri ayonquiranco. Aꞌna tahuërintaꞌ, inápaquë quëpantaranco huachi.

Proverbios 1:25

Napoatomaꞌ, pënënanquëmasopita nocanamaꞌ. Aꞌchintëranquëmasopitantaꞌ, co yaimaramahuëꞌ.

Proverbios 1:30

Yaotëatënquëma napotápiranquëmahuëꞌ, pënënanquëmasopita nocanamaꞌ.

Proverbios 23:23

Noꞌtëquën nanan nitotacasoꞌ, yonquínahuan nicacasoꞌ, aꞌchinpisoꞌ noya natanacasoꞌ, yonqui yonquícharacasoꞌ, inapita cancantëquëꞌ. Ina pochin nipatan, ama aꞌpoquësohuëꞌ.

Isaías 55:1

Sinioro tënin: “Yamororëso pochin cancantohuatamaꞌ, huëco anoyacancanchinquëmaꞌ. Co coriqui yaꞌhuëtopirinquëmahuëꞌ, catahuararanquëmaꞌ. Nontohuatamaco cosharo achinitërinso pochachin achincancanaranquëmaꞌ. Huino, ohuaca shoꞌshoiꞌ, inapita achinitërinso pochin asanocancanaranquëmaꞌ.

Miqueas 1:11

Sahuiri ninanoquë yaꞌhuëramasopitantaꞌ, aꞌna noꞌpaꞌpaꞌ quëpainëmaso yaꞌhuërin. Iꞌnanpirashitëꞌ quëpaponëma niꞌton, paꞌpi taparo nicapomaꞌ. Saanan ninanoquë yaꞌhuëramasopitasoꞌ, tancapitaponënquëmaꞌ. Napoaton co pipiamasoꞌ, nanitaramahuëꞌ. Piti-siri ninanoquë yaꞌhuëpisopitantaꞌ, naꞌnëmiataponaꞌ. Co huachi inso Cota huënton Israiro tërantaꞌ, ina ninano quihuiponhuëꞌ. Inimiconënapitari ataꞌhuantërin niꞌton, co huachi ina quihuiponahuëꞌ.

Malaquías 3:3

Huënsëaton corto huaꞌanoꞌsa tapararin. Oro, prata, inapita pënquë asoquipiso pochin co noyahuëꞌ nipisopita inquitarin. Naporo huarëꞌ Nihui quëran pipipisopitasoꞌ, noꞌtën chachin ca marëꞌ maꞌsha quëpisoꞌ, aꞌnotaponaco.

Mateo 13:44

Ina quëran itaantarin: “Isontaꞌ aꞌchinchinquëmaꞌ Yosë huaꞌanëntërinsoꞌ nitotacamaso marëꞌ. Aꞌna quëmapi yaꞌhuëpirinhuëꞌ. Aꞌna noꞌpaꞌ paꞌtaton, oro pochin nininsopita quënanconin. Acoporoꞌ yaꞌhuëpirinhuëꞌ, quënanconin. Paꞌyataton, imotantarahuaton, paꞌnin huachi. Yaꞌipi maꞌshanënpita paꞌanahuaton, coriqui canarin quëran, ina noꞌpaꞌ paꞌanconin huachi. ‘Quënanahuësoꞌ noya nóya,’ taꞌton, ina naꞌcon naꞌcon nohuantërin,” tënin. (Inapochachin Yosë huaꞌanëntinquëmasoꞌ naꞌcon naꞌcon nohuantocoꞌ, tapon naporin.)

Mateo 25:9

‘Coꞌchi nanitëraihuëꞌ taꞌpantaꞌhuainquëmaso paya. Inapohuatoi, co huachi quiyantaꞌ orotarinhuëꞌ. Yaꞌipinpoaꞌ tacopianarihuaꞌ. Manóton paatomaꞌ, paꞌanconcoꞌ,’ itopi.

Lucas 12:21

Canpitantaꞌ nani maꞌsha canapomarahuëꞌ, co Yosë yonquihuatamahuëꞌ, ina maꞌhuan pochin nisaramaꞌ. Co mantaꞌ yaꞌhuëtomiatarinquëmahuëꞌ. Co Yosëꞌpaꞌ canamiataramahuëꞌ,” tënin Quisoso.

2 Corintios 5:3

Chiminpatëhuaꞌ, co huaꞌyanënpoarachin inápaquë yaꞌhuëmiatarinhuëꞌ. Nasha nonënpoaꞌ quëtarinpoaꞌ.

2 Corintios 8:9

Sinioro Quisocristo nosoroatonpoaꞌ, catahuarinpoasoꞌ nani nitotëramaꞌ. Iráca noya noya inápaquë yaꞌhuëpirinhuëꞌ, isoroꞌpaquë oꞌmarin nichaꞌëinquëmaso marëꞌ. Co mantaꞌ isëquë yaꞌhuëtërinhuëꞌ. Parisitërin quëran nichaꞌërinquemaꞌ noya noya cancantacaso marëꞌ. Parisitaton, naꞌcon catahuarinquëmaꞌ.

1 Timoteo 6:18

Naꞌa coriqui yaꞌhuëtohuachinquëmaꞌ, aꞌnapita nosoroatomaꞌ, catahuacoꞌ. Maꞌsha pahuantohuachina, quëtocoꞌ. Ama mantaꞌ apiracosohuëꞌ. Noya nicoꞌ.

Santiago 2:5

Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ.

1 Pedro 1:7

Maꞌsha onpohuatëhuaꞌ, Yosë catahuararinpoaꞌ yaꞌipi cancanënpoa quëran imacaso marëꞌ. Oro tapacaiso marëꞌ aꞌirotopiso pochin nitarinpoaꞌ. Oro inapotohuachinara, noyápiachin pipirin. Yaꞌipi nëꞌhuë huiquitahuaton, orosachin ninin. Inapochachin iporasoꞌ Yosë nohuanton, pënquë ahuiquitërëso pochin maꞌsha onpotërinpoaꞌ noya noya acoinpoaso marëꞌ. Oro paꞌton niponahuëꞌ, co yaꞌhuëmiatërinhuëꞌ. Canpoaso nipirinhuëꞌ, Yosë natëhuatëhuaꞌ, nanpimiatarihuaꞌ. Napoaton naꞌcon yonquiaꞌahuaꞌ cancanënpoa quëran huarëꞌ natëcasoꞌ. Ina Yosë nohuantërinsoꞌ. Natëmiatohuatëhuaꞌ, Yosë noya noya niꞌsarinpoaꞌ. Quisocristo oꞌmantahuachin, noya noya acorarinpoaꞌ. Ina pochin yaꞌnoarihuaꞌ.

Apocalipsis 16:15

Nani Quisoso shaꞌhuitërinpoaꞌ: “Niꞌcoꞌ, iyaroꞌsaꞌ. Aꞌnanaya oꞌmantararahuë. Ihuatë pochin nicato, co nitotasënquëmahuëꞌ, oꞌmantararahuë niꞌton, nani tahuëri ninaco. Noya ninahuatamaco, noya cancantaramaꞌ. Yosë noya niꞌsarinquëmaꞌ. Noyápiachin aꞌmorëso pochin noyasáchin nicoꞌ. Ina quëran oꞌmantahuato, co tapanapomahuëꞌ. Noya cancantaramaꞌ,” itërinpoaꞌ.

Apocalipsis 19:8

Huiríchin aꞌmorëso pochin Yosëri noyápiachin cancan quëtërin. Tëhuënchachin inari catahuarin noya nicacaiso marëꞌ,” tosapi.

Apocalipsis 2:9

Imaramacoso marëꞌ naꞌcon parisitëramasoꞌ nitotërahuë. Co naꞌa maꞌsha yaꞌhuëtopirinquëmahuëꞌ, Yosë nohuitacamasoachin cancantatomaꞌ, sano cancantëramaꞌ. Aꞌna tahuërintaꞌ Yosëꞌpaꞌ paꞌpatamaꞌ, co mantaꞌ pahuantarinquëmahuëꞌ. Iporaso nipirinhuëꞌ aꞌnaquën chiníquën pinorinënquëmaꞌ. ‘Yosë piyapinëncoi quiyasoꞌ,’ topirinahuëꞌ, Satanasë huëntonënquë yaꞌconpi.

Apocalipsis 3:17

Canpitasoꞌ naporamaꞌ: ‘Naꞌa maꞌsha yaꞌhuëtërincoi niꞌton, noya yaꞌhuarai. Quiyasoꞌ noya piyapicoi. Aꞌnapita quëran noya noya nitotërai. Co mantaꞌ pahuantërincoihuëꞌ,’ topiramahuëꞌ, co noꞌtëquën yonquiramahuëꞌ. Cancanëma quëran yonquiramasopita nitotërahuë. Saꞌahuaya pochin niꞌnanquëmaꞌ. Coriqui pahuantërinso pochin canpitasoꞌ naꞌcon pahuantarinquëmaꞌ noya cancantacamasoꞌ. Somaraya pochin cancantatomaꞌ, co tëhuënchachin nohuitëramacohuëꞌ. Saꞌahua capa aꞌmocasoꞌ nininso pochin co noyápiachin cancantëramahuëꞌ. Paꞌpi nosorotëramaꞌ.

Apocalipsis 4:4

Inaquë cato shonca catapini ansianoꞌsaꞌ huaꞌanëntacasoꞌ shiraroꞌsaquë tahuishin miáchin huënsëapi. Huirichinachin aꞌmopi. Yancotëꞌ oro quëran nininsoꞌ yancopi.

Apocalipsis 7:13

Ina quëran aꞌna ansiano nataninco. —¿Ma piyapiꞌsataꞌ isopita, huiríchin aꞌmopisoꞌ? ¿Intohua quërantaꞌ huëntapi? ¿Nitotëran ti? itërinco.