Apocalipsis 22:2 - Chayahuita (Shahui)

² Ninano huáncana iiꞌ paꞌsarin. Cato yonsan quëran chachin nara papotërin. Nanpirin nara itopisoꞌ. Nani yoqui nitarin. Shonca catoroꞌ nitasoꞌ, piꞌipi naniarin. Monoquëontaꞌ yaꞌipi piyapiꞌsa noya yaꞌhuëcaiso marëꞌ yaꞌhuërin. Co huachi canioponahuëꞌ.

Apocalipsis 22:2 ပူးပေါင်းရင်းမြစ်များ

Génesis 2:9

Naporahuaton, nisha nisha noyápiachin cashinoꞌsa apapotërin. Yashi yashin caꞌchináchin nitërinsopita apapotërin. Nararo huancánachin nanpirin nara apapotërin. Inaquë chachin aꞌnantaꞌ, apapotërin. Anitotacaso nara itopisoꞌ. Ina caꞌpachinaꞌ, noya nininsopita nitotaponahuëꞌ, co noyahuëꞌ nininsopitanta nitotapi huachi.

Proverbios 3:18

Yonquínahuan nipatëhuaꞌ, nanpirin nara caꞌnëso pochin ninëhuaꞌ. Yonquínahuan ninëhuaso coꞌsoꞌ aꞌpohuatëhuahuëꞌ, tëhuënchachin capa cancantarihuaꞌ.

Isaías 6:10

Piyapinëhuëpita yonquinëna tapitëquëꞌ. Nëꞌhuëya pochin cancanchinaꞌ. Somarayapiso pochin cancantatonaꞌ, ama manta noꞌtëquën yonquiꞌinasohuëꞌ. Shaꞌhuitërahuësoꞌ noꞌtëquën yonquipi naporini, oshanëna aꞌpoitonahuëꞌ. Inapopi naporini, co huachi anaꞌintaꞌhuasoꞌ yaꞌhuëitonhuëꞌ,” itërinco.

Oseas 14:4

Sinioro naporin: “Israiroꞌsasoꞌ, co natantochináchinhuëꞌ cancantopirinahuëꞌ catahuahuato, co huachi ina pochin cancantaponahuëꞌ. Co quëꞌyápirohuë nipirinahuëꞌ, nosoroarahuë. Noꞌhuitërahuësoꞌ sanoato, napotarahuë.

Malaquías 4:2

Noya nicatomaco natëramacosopitaso nipirinhuëꞌ, noya coisë pochin ninahuësoꞌ, niꞌsaramaꞌ. Piꞌi aꞌpinpachina aꞌninquëchin maꞌsha quënanëso pochin niꞌsaramaꞌ. Naporoꞌ canpitaso nichaꞌësaranquëma niꞌton, capa cancantaramaꞌ. Ohuacaꞌhuaroꞌsa oncorapipi quëran iꞌsohuatohuachinara, niirëꞌnachin taꞌapiso pochin cancantaramaꞌ.

Lucas 4:18

“Sinioro ispiritonën yaꞌcoancantërinco niꞌton, noya catahuarinco. Naꞌa piyapiꞌsaꞌ co Yosë nohuitatonahuëꞌ, nosorotopi. Napoaton Yosë acorinco noya nanan aꞌchintaꞌhuaso marëꞌ. Sopairi minsëpirinhuëꞌ, ocoiarahuë noya yonquicaiso marëꞌ. Somaraya nininsopita anoyatarahuë. Parisitapisopita nichaꞌësarahuë.

1 Pedro 2:24

Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

Apocalipsis 2:7

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, Yosëꞌpaꞌ yaꞌhuëmiataramaꞌ. Inatohuaꞌ nanpirin nara nitërinsoꞌ caꞌpatamaꞌ, noya noya nanpimiataramaꞌ. Nani huachi,” itëquëꞌ, ninshitohuatan, itërinco Quisoso.

Apocalipsis 21:21

Yaꞌcoanaroꞌsantaꞌ noyápiachin. Aꞌnaya aꞌnaya panca huiri naꞌpi quëran nipi. Cachintaꞌ oro quëran chachin ninin. Orosachin niponahuëꞌ, iꞌhua iꞌhuanánshin quënantërëꞌ.

Apocalipsis 21:24

Inaquë nisha nisha piyapinpoaꞌ napopianachin yonquiarihuaꞌ. Noya aꞌpintarinpoaꞌ. Nisha nisha copirnoroꞌsantaꞌ isoroꞌpaquë chiníquën nanantaponaraihuëꞌ, naporoꞌ Yosëíchin yonquirapi. “Ma noyacha Yosësoꞌ catahuarinpoa paya,” tosapi.

Apocalipsis 22:1

Ina quëran Yosë nohuanton, huaꞌnarëso pochin niantarahuë. Nasha Quirosarin niantahuato, anquëni pancaiꞌ aꞌnotërinco, noyápiachin nininsoꞌ. Inasoꞌ, Nanpirin iiꞌ itopisoꞌ. Yosë huaꞌanëntërin quëran pipirarin. Inaquë Carniroaꞌhuantaꞌ huaꞌanëntarin.

Apocalipsis 22:14

Huënainën quëran anoyacancantërinsopita nóya cancantaponaꞌ. Aꞌmopisoꞌ pëꞌsarëso pochin noyápiachin cancantapi. Inapitasáchin nanan yaꞌhuëtopi nanpirin nara nitërinsoꞌ capatonaꞌ, nanpimiatacaisoꞌ. Naporahuaton, nasha Quirosarinquë noya yaꞌconapi.

Apocalipsis 22:19

Iso quirica quëran nani noꞌtëquën anitotëranquëmaꞌ. Aꞌna nanayan tërantaꞌ apahuantohuatamaꞌ, co nanpirin nara nohuitaramahuëꞌ. Co Yosë ninanonënquë paꞌsaramahuëꞌ.