Apocalipsis 22:18 - Chayahuita (Shahui)

¹⁸ Nani noꞌtëquën ninshitëranquëmaꞌ. Yaꞌipi ninorinsoꞌ noꞌtëquën ninshitëranquëmaꞌ. Natanpatamaꞌ, inachachin aꞌchinacasoꞌ yaꞌhuërin. Iso nanan apancatohuatamaꞌ, iso quiricaquë shaꞌhuirinso chachin nisha nisha quëran Yosë anaꞌintarinquëmaꞌ. Naꞌcon naꞌcon anaꞌintarinquëmaꞌ.

Apocalipsis 22:18 ပူးပေါင်းရင်းမြစ်များ

Mateo 15:13

—Ama ina marëꞌ paꞌyancosohuëꞌ. Oshaquëran Yosëri anaꞌintarin. Niꞌcoꞌ. Maꞌsha shaꞌpatëra, co pacatëroꞌ paꞌararëhuëꞌ. Ocoirahuatëꞌ tëꞌyatërëꞌ. Inapochachin co nanamën imapisopitahuëꞌ Yosëri aꞌpoarin. Inapitasoꞌ somaraya pochin cancantopi. Somarayasoꞌ co nanitërinhuëꞌ aꞌna somaraya noya quëpacasoꞌ. Quëparin naporini, cato chachin panca naninquë anochitonahuëꞌ, itërin Quisosori.

Efesios 4:17

Quisocristo nanan quëtërinco niꞌton, pënënaranquëmaꞌ. Naꞌa piyapiꞌsaꞌ co imatonaraihuëꞌ, topinan quëran yaꞌhuërapi. Somaraya pochin cancantatonaꞌ, nisha nisha yonquipi. Co natantochináchinhuëꞌ cancantopi niꞌton, co Yosë nanamën nitotopihuëꞌ. Co Yosë yonquiatonaraihuëꞌ, co mantaꞌ Yosë nohuitopihuëꞌ. Ama inapita pochin nicosohuëꞌ.

Deuteronomio 12:32

Yaꞌipi camairanquëmasopita, noꞌtëquën natëcoꞌ. Ama ina apancatocosohuëꞌ. Naporahuaton ama aꞌna nananya tëranta apahuantocosohuëꞌ,” itërin.

Deuteronomio 4:2

Sinioroso Yosënënpoa niꞌton, natëcaso marëꞌ naꞌcon camairinquëmasoꞌ, nani shaꞌhuitëranquëmaꞌ. Ama ina apancatocosohuëꞌ. Naporahuaton ama aꞌna nananya tëranta apahuantocosohuëꞌ.

1 Tesalonicenses 4:6

Aꞌna quëmapi saꞌin ama sëꞌhuacosohuëꞌ. Ama ina pochin niꞌtomaꞌ, soꞌin nonpintocosohuëꞌ. Sëꞌhuahuatamaꞌ, Yosë noꞌtëquën anaꞌintarinquëmaꞌ. Iráca inachachin chiníquën pënënainquëmaꞌ.

Apocalipsis 1:3

Iso quirica nontohuatamaꞌ, noya cancantaramaꞌ. Ina natanpatamantaꞌ, noya cancantaramaꞌ. Aꞌna tahuëri maꞌsona onpocasoꞌ shaꞌhuitaranquëmaꞌ. Natëhuatamaꞌ, Yosë noya niꞌsarinquëmaꞌ. Ayaroꞌ tahuëri nani yaꞌcaririarinpoa huachi.

Apocalipsis 15:1

Ina quëran Yosë nohuanton, huaꞌnarëso pochin niantarahuë. Aꞌna tahuëri oshahuanoꞌsaꞌ chiníquën anaꞌintarin. Ina anitotincoso marëꞌ nani maꞌsha aꞌnotërinco. Paꞌpi huëhuëpiroꞌ niꞌnahuë. Canchisë anquëni yaꞌhuarin. Aꞌnaya aꞌnaya Yosëri yaaꞌparin piyapiꞌsaꞌ anaꞌintacaso marëꞌ. Ina nohuanton, isoroꞌpaquë nani maꞌsha onpocaisoꞌ yaꞌhuapon. Inapoaton, anaꞌintërinsoꞌ naniarin.

Apocalipsis 15:6

Canchisë anquëniroꞌsaꞌ ina quëran pipiapi. Huiríchin huiríchin aꞌmopi. Tëꞌtëtënquë oro pochin nininquë nitonpopi. Piyapiꞌsaꞌ oshahuanpi niꞌton, Yosëri aꞌpaarin nisha nisha aparisitacaiso marëꞌ.

Apocalipsis 19:20

Quira nipachinara, huiri cahuario aipi huënsërinsoari canarin. Canarahuaton, maꞌsha paꞌpi tëꞌhuatoroꞌ nininsoꞌ masarin. Nonpin nanan pënëntonaꞌpintaꞌ, masarin. Inasoꞌ, sacaiꞌ nininsoꞌ nicaton, notohuaroꞌ piyapiꞌsaꞌ nonpintërin maꞌsha paꞌpi tëꞌhuatoroꞌ nininsoꞌ imacaiso marëꞌ. Marcanën niacotahuatonaꞌ, mamanshinën moshapirinahuëꞌ, minsëarin huachi. Minsërahuaton, cato chachin masahuaton, anaꞌintomiatarin. Nanpirapirinahuëꞌ, parisitopiquë tëꞌyatarin huachi. Inaquë panca sono shaꞌpimoꞌshirë chachin pën tënëntápon. Co onporontaꞌ pipiapihuëꞌ.

Apocalipsis 20:10

Ina quëran sopai anaꞌintomiatarin. Huaꞌquiꞌ piyapiꞌsaꞌ nonpintërin niꞌton, Yosëri anaꞌintarin. Panca sono shaꞌpimoꞌshirë chachin pën orotërinquë tëꞌyatarin. Co onporontaꞌ pipiarinhuëꞌ. Inaquë maꞌsha paꞌpi tëꞌhuatoroꞌ nininsontaꞌ parisitarin. Nonpin nanan pënëntonaꞌpintaꞌ inaquë chachin parisitarin. Tahuërirë chachin, tashirë chachin chiníquën parisitapi. Co onporontaꞌ sanoarinhuëꞌ. Co onporontaꞌ pipiapihuëꞌ.

Apocalipsis 20:15

Co nanpirin quiricaquë nininënpita yaꞌhuëhuachinahuëꞌ inaquë chachin aꞌpararin.

Apocalipsis 22:10

Ina quëran itantarinco: “Yaꞌipi Yosë anitotërinquënsoꞌ nani ninshitëran. Ama topinan ninshitëquësohuëꞌ. Ninorinsoꞌ nani naniriarin niꞌton, yaꞌipi piyapiꞌsaꞌ nanan aꞌpatëquëꞌ nitochinaꞌ.

Apocalipsis 22:16

“Ca Quisosoco anquëninëhuë aꞌpatimaranquën. Nani nanan shaꞌhuitërinquën yaꞌipi imarinacosopita nitotacaiso marëꞌ. Aꞌnaya aꞌnaya niyontonpiquë aꞌpatëquëꞌ nonchinaꞌ. Iráca Tapi yaꞌhuapon, Yosëri shaꞌhuitërin: ‘Aꞌna tahuëri shiparin nóya nisarin. Yaꞌipi piyapiꞌsaꞌ nichaꞌësarin,’ itërin. Ca inaco. Tapi shiinco chachin. Casoꞌ huënio tayora huënaráchin aꞌpininso pochin aꞌpintaranquëmaꞌ,” itërinco Quisoso.

Apocalipsis 22:7

Quisoso chachintaꞌ naporin: “¡Tëhuënchachin co huaꞌquiya quëranhuëꞌ oꞌmantararahuë! Nani maꞌsha anitotëranquën ninshitacamaso marëꞌ. Insoquëma tërantaꞌ natëhuatamaꞌ, noya cancantaramaꞌ,” itërinco.

Apocalipsis 22:9

Yachinotopirahuëꞌ, shaꞌhuitërinco. “Ama chinotocosohuëꞌ. Casoꞌ anquënico. Canpita pochachin cantaꞌ Yosë natërahuë. Iráca quëran huarëꞌ aꞌnaquën Yosë nanamën pënëntërin. Quëmantaꞌ pënëntëran. Aꞌnapita iso quirica natanahuatonaꞌ, natëapi. Yaꞌipinpoaꞌ Yosë natërëhuaꞌ. Napoaton inasáchin chinotëquëꞌ,” itërinco.

Apocalipsis 3:14

—Ina quëran ansiano Naotisiaquë yaꞌhuërinsoꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Noꞌtëquën nonato, noꞌtën nanan aꞌchintëranquëmaꞌ. Co onporontaꞌ nonpintëranquëmahuëꞌ. Yosë nohuanton, yaꞌipi maꞌsha ninahuë. Napoaton, yaꞌipi piyapiꞌsaꞌ natëinacosoꞌ yaꞌhuërin.