Apocalipsis 21:8 - Chayahuita (Shahui)

⁸ Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 21:8 ပူးပေါင်းရင်းမြစ်များ

Malaquías 3:5

Naquëranchin Sinioro nontatënquëmaꞌ: “Caso Sinioroco, yaꞌipi nanitapato shaꞌhuitaantaranquëmaꞌ: ‘Naporoꞌ oꞌmahuato, coisë pochin nisarahuë. Noya nipatamaꞌ, noya acoaranquëmaꞌ. Co noyahuëꞌ cancantatona pënotohuachinasoꞌ, anaꞌintarahuë. Nitëhuananpitohuachinaꞌ, Yoscoarëꞌ taponahuë nonpinpachinaꞌ, patronoꞌsa piyapinënapita co noꞌtëquën pahuërëhuachinahuëꞌ, quëyoronoꞌsaꞌ, saꞌahuaroꞌsaꞌ, inapita co nitocatahuahuachinahuëꞌ, nisharoꞌsa aparisitohuachinaꞌ, co tëꞌhuatohuachinacohuëꞌ, inapitanta anaꞌintarahuë,’ tënahuë,” itërinquëmaꞌ.

Mateo 10:28

Ama piyapiꞌsaꞌ tëꞌhuatocosohuëꞌ. Tëpapirinënquëmaontaꞌ, co huaꞌyanëmaꞌ matarinënquëmahuëꞌ. Yosë tëhuënchinsoꞌ tëꞌhuatacasoꞌ yaꞌhuërin, tënahuë. Ina nohuanton, chiminëꞌ. Co noyahuëꞌ nipachinaꞌ, pënquë chachin aꞌpaarin huachi. Inatohuaꞌ huaꞌyanënarë chachin parisitomiatapi huachi. Napoaton Yosë naꞌcon naꞌcon tëꞌhuatacasoꞌ yaꞌhuërin. Co piyapiꞌsaꞌ tëꞌhuatacasoꞌ yaꞌhuërinhuëꞌ.

Mateo 25:25

Napoaton tëꞌhuatatënquën, co sacatërahuëꞌ. Coriqui quëtërancosoꞌ acoporoquë poꞌorahuë. Maꞌtana yaꞌhuarin,’ itahuaton, coriqui aꞌnotërin.

Mateo 8:26

—¿Onpoatomataꞌ tëꞌhuaramasoꞌ? ¿Co noya natëyatëraramacohuëꞌ ti? itërin. Ina quëran huënsëintarahuaton, ihuan aꞌparin. Sonontaꞌ nontërin. —Sanoquëꞌ, itohuachina, aꞌnaroáchin coꞌsacaiꞌ sanoirin.

Juan 8:44

Sopai huaꞌan mini tataparinquëmasoꞌ. Ina pochin cancantatomaꞌ, inasáchin natëaramaꞌ. Iráca quëran huarëꞌ piyapiꞌsaꞌ tëpanaꞌpi inasoꞌ. Co noꞌtëquën nitononinhuëꞌ niꞌton, co piꞌpisha tërantaꞌ natëcasoꞌ yaꞌhuërinhuëꞌ. Paꞌpi nonpintëꞌ inasoꞌ. Inachin, nonpinacasoráchin cancantërin. Ina nohuanton, nonpinëꞌ.

2 Tesalonicenses 2:9

Nipirinhuëꞌ, coꞌhuara ina oꞌmayatërasohuëꞌ, notohuaroꞌ piyapiꞌsaꞌ nonpintarin. Satanasëri catahuarin niꞌton, nani maꞌsha nanitapaarin nicacasoꞌ. Piyapi inaora co nanitërinhuëꞌ ina pochin nicacasoꞌ. Nonpintaton, nani maꞌsha sacaiꞌ nininsoꞌ aꞌnotohuachina, natërapi. Niꞌpachinaꞌ, paꞌyanapi.

1 Timoteo 4:2

Naporoꞌ nonpinaꞌpiroꞌsaꞌ yaꞌhuaponaꞌ piyapiꞌsaꞌ nonpintacaiso marëꞌ. “Quiyantaꞌ Yosë imarai,” topirinahuëꞌ, co noꞌtëquën nonsapihuëꞌ. Nitotaponaraihuëꞌ, co cancanhuanhuë pochin nicatonaꞌ, co natëtochináchinhuëꞌ cancantapi. Huaꞌquiꞌ sopai natëtonaꞌ, co huachi nanitapihuëꞌ Yosë natëcaisoꞌ. Inapitasoꞌ nisha aꞌchinapi.

Tito 1:16

“Yosë nohuitërahuë,” topirinahuëꞌ, co noyahuëꞌ nipi. Ina marëꞌ co tëhuënchachin imapihuëꞌ, tënahuë. Co Yosëri noya niꞌninhuëꞌ. “Napoonpi,” tënin. Co mantaꞌ yanatëpihuëꞌ. Yosë aꞌpoatonaꞌ, co piꞌpisha tërantaꞌ nanitopihuëꞌ noya nicacaisoꞌ.

Hebreos 12:24

Quisocristo chachin nohuitarihuaꞌ. Inasoꞌ nasha quëran anoyatërinso shaꞌhuitërinpoaꞌ imacaso marëꞌ. Huënainën quëran anoyacancantërinpoaꞌ. Iráca Apiri huënainën paꞌnin. Iini tëpahuachina, huënainën paꞌnin niꞌton, anaꞌintacasoꞌ yaꞌhuërin. Quisocristo chimininsosoꞌ nipirinhuëꞌ, noya noya. Huënainën paꞌnin niꞌton, nanan anoyatërinpoaꞌ.

Hebreos 13:4

Quëmapiꞌsaꞌ saꞌapachinaꞌ, ama aꞌna sanapi yonquiꞌinasohuëꞌ. Sanapiꞌsantaꞌ soꞌyahuachinaꞌ, ama soꞌinaꞌ tëhuananpichinasohuëꞌ. Ama mantaꞌ monshihuainasohuëꞌ. Monshihuanpatamaꞌ, Yosë chiníquën anaꞌintarinquëmaꞌ.

1 Juan 2:22

Tëhuënchachin nonpin nanan shaꞌhuitarinënquëmaꞌ. “Quisososoꞌ co Cristohuëꞌ. Co Yosë huiꞌninhuëꞌ,” taꞌtonaꞌ, yanonpintërinënquëmaꞌ. Inapoatonaꞌ, Quisocristo inimicotapi. Tata Yosëntaꞌ aꞌpopi.

1 Juan 3:15

Aꞌna piyapi noꞌhuihuatamaꞌ, tëpatonaꞌpiroꞌsa pochin Yosë niꞌsarinquëmaꞌ. Tëpatonapiroꞌsasoꞌ, co Yosë pochin nanpimiatacaiso yaꞌhuërinhuëꞌ.

1 Juan 5:10

Yosë nani shaꞌhuitërinpoaꞌ niꞌton, imarëhuasopita nitotërëhuaꞌ. Cancanënpoa quëran anitotërinpoaꞌ. Aꞌnapitaso nipirinhuëꞌ, co Yosë natëpihuëꞌ. “Quisoso co Yosë huiꞌninhuëꞌ. Co nichaꞌësarinpoahuëꞌ,” taꞌtonaꞌ, Yosëri nonpintërinso pochin cancantopi. Noꞌtëquën shaꞌhuitopirinpoahuëꞌ, co natëpihuëꞌ.

Apocalipsis 14:10

Chiníquën noꞌhuitënquëmaꞌ, main huino oꞌshitërëso pochin anaꞌintarinquëmaꞌ. Parisitopiquë aꞌpahuachinquëmaꞌ, pënquë parisitaramaꞌ. Carniroaꞌhua, anquëniroꞌsaꞌ inapita niꞌtërantapaquë noꞌtëquën anaꞌintarinquëmaꞌ.

Apocalipsis 19:20

Quira nipachinara, huiri cahuario aipi huënsërinsoari canarin. Canarahuaton, maꞌsha paꞌpi tëꞌhuatoroꞌ nininsoꞌ masarin. Nonpin nanan pënëntonaꞌpintaꞌ, masarin. Inasoꞌ, sacaiꞌ nininsoꞌ nicaton, notohuaroꞌ piyapiꞌsaꞌ nonpintërin maꞌsha paꞌpi tëꞌhuatoroꞌ nininsoꞌ imacaiso marëꞌ. Marcanën niacotahuatonaꞌ, mamanshinën moshapirinahuëꞌ, minsëarin huachi. Minsërahuaton, cato chachin masahuaton, anaꞌintomiatarin. Nanpirapirinahuëꞌ, parisitopiquë tëꞌyatarin huachi. Inaquë panca sono shaꞌpimoꞌshirë chachin pën tënëntápon. Co onporontaꞌ pipiapihuëꞌ.

Apocalipsis 2:11

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, co parisitopiquë paatomaꞌ, parisitomiataramahuëꞌ. Nani huachi,” itëquëꞌ, ninshitohuatan, itërinco.

Apocalipsis 2:2

Nani nohuitëranquëmaꞌ. Yaꞌipi ninamasopita nitotërahuë. Chiníquën ca marëꞌ sacatëramaꞌ. Co amiatomacohuëꞌ, noya ninamaꞌ. Aꞌnaquën co noyahuëꞌ nipachinara, co noya niꞌnamahuëꞌ. Nonpin nanan aꞌchinaꞌpiroꞌsantaꞌ co noya niꞌnamahuëꞌ. ‘Yosë aꞌparincoi, aꞌchinarai,’ itopirinënquëmahuëꞌ, nonpinapi. Inapita natanpatamaꞌ: ‘Co noꞌtëquën aꞌchinpihuëꞌ,’ taꞌtomaꞌ, co natëramahuëꞌ.

Apocalipsis 21:27

Noyasáchin inaquë yaꞌhuaponaꞌ. Co mantaꞌ osha yaꞌhuërarinhuëꞌ. Co noyahuëꞌ nipisopitasoꞌ, co yaꞌconaponahuëꞌ. Aꞌnaquën nonpinatonaꞌ: “Imarai quiyantaꞌ,” topirinahuëꞌ, co inapitasoꞌ yaꞌconaponahuëꞌ. Carniroaꞌhua imarëhuasopitaráchin inaquë yaꞌhuëcontarihuaꞌ. Nanpirin quiricaquë nininënpoapita nani ninshitërinpoaꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.

Apocalipsis 9:17

Huaꞌnarëso pochin aꞌninquëchin quënanahuë. Aꞌna tahuëri maꞌsha onpocasoꞌ quënantarahuë. Huaꞌna coton sontaroꞌsaꞌ aꞌmopiso pochin aꞌmopi. Pënsha pochin huënaráchin nipi. Aꞌnaquën caninchin. Aꞌnantaꞌ shaꞌpíchin. Cahuarioroꞌsantaꞌ nisha yaꞌnopi. Paꞌpiniꞌ pochin mototopi. Nanamën quëran pën, conaiꞌ, shaꞌpi moꞌshiꞌ, inapita pipiapi.

Apocalipsis 9:21

Paꞌpi co noyahuëꞌ cancantatonaꞌ, tëpatapi, pënotapi, monshihuanapi, maꞌsha ihuatapi. Yosëri anaꞌintërinsoꞌ niꞌsáponaraihuëꞌ, co naporo tërantaꞌ nohuantapihuëꞌ oshanënaꞌ aꞌpocaisoꞌ.

Jueces 7:3

Napoaton napotëquëꞌ: ‘Inquëmaso tëꞌhuahuatamaꞌ, yaꞌhuëramaquë panantacoꞌ,’ itëquëꞌ,” itërin. Quitionori tëniton napotohuachina, cato shonca cato huaranca sontaroꞌsa yaꞌhuëpiꞌpaꞌ panantapi. Shonca huarancaraꞌ, quëparitopi.