Apocalipsis 21:3 - Chayahuita (Shahui)

³ Inápa quëran chiníquën noninsoꞌ natanahuë. —Iporaso huachi, Yosë piyapinënpitarë chachin yaꞌhuërarin. Co onporontaꞌ patarinhuëꞌ. Inapitarëꞌ yaꞌhuëmiatarin.

Apocalipsis 21:3 ပူးပေါင်းရင်းမြစ်များ

1 Reyes 8:27

Pëi mini nitopiranquënhuëꞌ, co quëmasoꞌ inaquë naniaranhuëꞌ. Co piꞌiroꞌtëquë tëranta naniranhuëꞌ nichinapon chachin, aquëtë huarëꞌ iso pëi nitëranquënquësoꞌ, co naniponhuëꞌ.

Jeremías 31:33

Naporo tahuëriꞌsa israiroꞌsarëꞌco anoyatohuato, iso pochin nisarahuë: Aꞌchintërahuësopita yonquinëna quëran anitotarahuë. Ina nitotohuachinaꞌ, noꞌtëquën natëtacaisoꞌ catahuararahuë. Casáchin chinotarinaco. Inapitanta piyapinëhuëpita nisapi.

Ezequiel 37:27

Inapita huáncana yaꞌhuëarahuë. Inapitasoꞌ piyapinëhuëpita nisapi. Caso inapita Yosënëna nisarahuë.

Números 9:16

Tahuëri nipachina, chinotacaso pëi aipi chitorori imotërin. Tashinta nipachina, ina chachin pën pochin huënaratárin. Nani tahuëri inaposárin. Co onporonta nishatërinhuëꞌ.

Juan 1:14

Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ.

Juan 14:23

Napotohuachina, Quisosori itërin: —Co yaꞌipi piyapiꞌsaꞌ nanitopihuëꞌ nohuitinacosoꞌ. Insosona nosorohuachinaco, natëarinaco. Natëhuachinaco, Tata Yosëri nosoroarin. Inaroꞌco yaꞌcoancantatoi, inaquë yaꞌhuëarai.

2 Corintios 6:16

Yosë chinotërëhuaquë noyasáchin nicacasoꞌ yaꞌhuërin. Co inaquësoꞌ mamanshi moshacasoꞌ yaꞌhuërinhuëꞌ. Inapochachin canpoantaꞌ Yosë imapatëhuaꞌ, yaꞌcoancantarinpoaꞌ niꞌton, ina pëinën pochin ninëhuaꞌ. Yosësoꞌ nanpiárin. Quiricanën quëran naporin: “Imapatamaco, yaꞌcoancantaranquëmaꞌ. Canpitaroꞌco yaꞌhuarahuë. Chinotohuatamaco, noya aꞌpaiaranquëmaꞌ. Piyapinëhuëpita pochin niꞌsaranquëmaꞌ,” tënin.

2 Corintios 6:18

Tataparinquëma pochachin noya nosoroaranquëmaꞌ. Huiꞌnahuëpita pochin cancantëranquëmaꞌ, itërinpoaꞌ Tata Yosë. Chini chiníquën nanantaton, yaꞌipiya huaꞌanëntërin,” tënin quiricanënquë.

1 Tesalonicenses 3:11

Tata Yosë chachin catahuaincoi onpopiontaꞌ paꞌii. Sinioro Quisosontaꞌ catahuahuachincoi, paꞌsarai nicapoinquëmaꞌ.

Hebreos 11:16

Nipirinhuëꞌ, co isoroꞌpaꞌ naꞌcon yonquipihuëꞌ. Yosë naꞌcon naꞌcon nohuantopi. Ina yaꞌhuërinquë chachin yaꞌhuëcaisoꞌ nohuantopi. Napoaton Yosë tapon: “Nóya yonquirinaco niꞌton, huiꞌnahuëpita pochin niꞌsarahuë. Aꞌna tahuëri inápaquë quëpantarahuë. Nani tapatërahuë yaꞌhuëcaisoꞌ,” tënin.

Hebreos 8:10

Ina quëran itantarin: “Tahuëri nanihuachin, nasha quëran anoyataantarahuë. Naporoꞌ anoyacancantarahuë noya yonquicaiso marëꞌ. Nasha cancan quëtarahuë ca pochin cancantacaiso marëꞌ. Casáchin chinotarinaco niꞌton, noya aꞌpaiarahuë. Ca pochin cancantatonaꞌ, piyapinëhuëpita chachin nisapi.

Hebreos 8:2

Iráca cotioroꞌsaꞌ chinotopiso pëiꞌ nipi Yosë chinotacaiso marëꞌ. Inápaquë yaꞌhuërinso chachin nonanpi. Inaquë corto huaꞌanoꞌsari piyapiꞌsa marëꞌ Yosë nontopi. Quisocristoso nipirinhuëꞌ inápaquë Yosëri acorinquë chachin canpoa marëꞌ ina nontárin. Inaquësoꞌ noya noya catahuarinpoaꞌ.

Apocalipsis 10:4

Nonpachinara, natanato quiricaquë yaninshitopirahuëꞌ, inápa quëran aꞌna shaꞌhuitërinco: “Ama naporinsoꞌ ninshitëquësohuëꞌ. Co aꞌnapita shaꞌhuitacasoꞌ yaꞌhuërinhuëꞌ,” itërinco.

Apocalipsis 10:8

Ipora huantaꞌ aꞌna nantën quëran marëquë iꞌnaitarin. Aꞌna quëraontaꞌ noꞌpaquë iꞌnarin. Ina quëran inápa quëran nontërincosoꞌ itantarinco: —Paaton, quiricaꞌhuaya sëꞌquërinsoꞌ maꞌpaquëꞌ,

Apocalipsis 12:10

Ina quëran inápaquë chiníquën noninsoꞌ natanahuë. “Tëhuënchachin sopai yaminsëpirinpoahuëꞌ, Yosë nichaꞌërinpoaꞌ. Quisocristorë chachin huaꞌanëntarinpoaꞌ. Sopairi Yosë nontaton, naꞌcon shaꞌhuirapirinpoaꞌ. ‘Oshahuanpi,’ itëraꞌpiarinpoaꞌ. Tahuërirë chachin tashirë chachin shaꞌhuirapiápirinpoahuëꞌ, nani Yosëri minsërin.

Apocalipsis 21:7

Sopai minsëhuatamaꞌ, yaꞌipi tapatëranquëmasopita quëchinquëmaꞌ. Huiꞌnahuëpita pochin niꞌsaranquëmaꞌ. Casáchin yonquiaramaco.

Apocalipsis 22:3

Inaquë co huachi anaꞌintinpoasoꞌ yaꞌhuaponhuëꞌ. Tata Yosë Carniroaꞌhuarë chachin huaꞌanëntarin huachi. Nani tahuëri piyapinënpoapita ina chinotáparihuaꞌ.

Apocalipsis 7:15

Napoaton Yosë yaꞌhuërinquë huëntapi. Tahuërirë chachin tashirë chachin ina chinotapi. Yosëri ichiyaꞌhuëaton, niꞌsarin.