Apocalipsis 21:22 - Chayahuita (Shahui)

²² Inaquësoꞌ co Yosë chinotacasoꞌ pëiꞌ yaꞌhuërinhuëꞌ. Yosë chini chiníquën nanantërinso chachin yaꞌipi parti yaꞌhuarin. Carniroaꞌhuantaꞌ yaꞌhuarin niꞌton, noya noya chinotarihuaꞌ.

Apocalipsis 21:22 ပူးပေါင်းရင်းမြစ်များ

1 Reyes 8:27

Pëi mini nitopiranquënhuëꞌ, co quëmasoꞌ inaquë naniaranhuëꞌ. Co piꞌiroꞌtëquë tëranta naniranhuëꞌ nichinapon chachin, aquëtë huarëꞌ iso pëi nitëranquënquësoꞌ, co naniponhuëꞌ.

Isaías 66:1

Naquëranchin Sinioro taantarin: “Piꞌiroꞌtësoꞌ, huaꞌanëntërahuëso shiranëhuë pochin ninin. Isoroꞌpantaꞌ, nantëhuë ayaꞌnanahuëquë pochin ninin. Ina pochin niꞌton, ¡co insëquë tërantaꞌ, pëi nitamacoso marëꞌ nanirinhuëꞌ! ¡Co insëquë tëranta chinotaꞌhuaso marëꞌ nitamacosoꞌ nanitëramahuëꞌ!

Mateo 24:2

—Iporasoꞌ yaꞌipiya noyápiachin niꞌpiramahuëꞌ, aꞌna tahuërisoꞌ yaꞌipiya ohuatapi. Co aꞌna naꞌpiya tërantaꞌ niyaꞌhuiritarinhuëꞌ, itërin Quisosori.

Juan 10:30

Caso Tatahuëroꞌco napopináchin cancantërahuë, itërin Quisosori.

Juan 13:32

Ina huiꞌninco chachin niꞌton, piyapiꞌsaꞌ nitotatonaꞌ, naꞌcon naꞌcon Yosë yonquiapi. Ina quëran Yosë noya noya acoantarinco. Co huaꞌquiya quëranhuëꞌ inapotarinco.

Juan 4:21

—Natanco imoya. Nani tahuëri naniarin. Yosë yachinotohuatamaꞌ, co paso motopiquë paꞌsaramahuëꞌ. Co Quirosarinquë tërantaꞌ pacacaso yaꞌhuërinhuëꞌ.

Juan 4:23

Ipora quëran huarëꞌ Yosë yachinotohuatamaꞌ, yaꞌipi cancanëma quëran huarëꞌ chinotocoꞌ. Ispirito Santo catahuarinquëmaꞌ niꞌton, noꞌtëquën yonquiatomaꞌ, Yosë chinotocoꞌ. Ina pochin nohuantërin chinotacasoꞌ.

Colosenses 1:19

Quisocristosoꞌ Yosë huiꞌnin niꞌton, Yosë chachin antaꞌ. Co piꞌpisha tërantaꞌ pahuantërinhuëꞌ paꞌpin pochin nicacasoꞌ. Tata Yosë nohuanton, naporin.

Colosenses 2:9

Quisocristoíchin natëcasoꞌ yaꞌhuërin. Piyapi chachin niponahuëꞌ, Yosë chachin ninin antaꞌ. Co mantaꞌ pahuantërinhuëꞌ Yosë pochin nicacasoꞌ.

Apocalipsis 1:8

Yosë chachin shaꞌhuitërinpoaꞌ: “Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuërahuë. Ipora huantaꞌ nanpiárahuë. Co onporontaꞌ taꞌhuantapohuëꞌ, yaꞌhuërápo. Chini chiníquën nanantërahuë,” tënin.

Apocalipsis 14:4

Noyápiachin cancantapi. Co piꞌpisha tërantaꞌ monshihuanaꞌpi pochin cancantopihuëꞌ. Yosëíchin yonquiapi. Insëquësona Carniroaꞌhua paꞌpachin, imasapi. Isoroꞌpaquë yaꞌhuëpirinahuëꞌ, nani Yosëri nichaꞌërin. Yaꞌnan cayarinso macatëꞌ Yosë quëtërëso pochin nicatonaꞌ, inasáchin chinotapi. Nani tahuëri Carniroaꞌhuantaꞌ chinotapi.

Apocalipsis 15:3

Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

Apocalipsis 16:14

Sopairoꞌsaꞌ niꞌton, nani maꞌsha nanitapapi. Sacaiꞌ nininsopita nisapi piyapiꞌsari natëcaiso marëꞌ. Nonpintatonaꞌ, napoapi. Nisha nisha copirnoroꞌsaꞌ camairaꞌpiaponaꞌ quira nicacaiso marëꞌ. Anaꞌintacasoꞌ tahuëri nani yaꞌcaritëriarin niꞌton, niyontonaponaꞌ. “Canpoari Yosë minsëahuaꞌ,” taꞌtonaꞌ, napoaponaꞌ.

Apocalipsis 16:7

Artaro quëraontaꞌ noninsoꞌ natanahuë: “Tëhuënchachin Sinioro quëmasáchin yaꞌipi huaꞌanëntëran. Chini chiníquën nanantaton, noꞌtëquën nonan. Noꞌtëquën anaꞌintaran,” tënin.

Apocalipsis 19:15

Quëmapi quëchitërinsoꞌ nanamën quëran sahuëni pochin nininsoꞌ yaꞌhuëtërin. Chiníquën nanantaton, nanamën quëran chachin inimiconënpita minsëarin. Noninsoꞌ sahuëni pochin nicaton, topinan noncharapirinhuëꞌ, co noyahuëꞌ nipisopita minsëarin. Piyapiꞌsaꞌ noꞌtëquën anaꞌintarin. Yosëri noꞌhuirin niꞌton, oparoꞌsaꞌ toꞌpoirëso pochin oshahuanoꞌsaꞌ chiníquën anaꞌintarin.

Apocalipsis 4:8

Nisha nisha niponaraihuëꞌ, yaꞌipiya anpiantëhuanpi. Saota saota yaꞌhuëtopi. Ina aipi, ina acopoꞌ, cato quëran chachin yaꞌpirin yaꞌhuëtopi. Inapitasoꞌ tahuërirë chachin, tashirë chachin Yosë chinotápi. Co taꞌtopihuëꞌ. Napopianachin naporapi: “¡Ma noyacha Tata Yosëso paya! ¡Noyasáchin ninin! Chini chiníquën nanantaton, yaꞌipiya huaꞌanëntarin. Iráca quëra huarëꞌ yaꞌhuërin. Ipora huantaꞌ nanpiárin. Inasoꞌ yaꞌhuërárin. ¡Ma noyacha inaso paya!” tosapi.

Apocalipsis 5:6

Itohuachincora, Quisoso quënanahuë. Huancanachin Yosë huënsërinso yaꞌcariya huaniarin. Ansianoꞌsaꞌ, catapini maꞌsharoꞌsa pochin nininsopita, inapitari tancapitopi. Quisoso chachin niponahuëꞌ, carniroaꞌhua nani tëpapiso pochin yaꞌnorin. Canchisë pomohuan nisahuaton, canchisë yaꞌpirin yaꞌhuëtërin. Chiníquën nanantaton, canchisë ispiritoroꞌsaꞌ aꞌparin yaꞌipiroꞌpaquë nicainpoaso marëꞌ.

Apocalipsis 7:15

Napoaton Yosë yaꞌhuërinquë huëntapi. Tahuërirë chachin tashirë chachin ina chinotapi. Yosëri ichiyaꞌhuëaton, niꞌsarin.

Apocalipsis 7:17

Niꞌcoꞌ. Huaꞌanëni ohuicanënpita noya aꞌpaiarin. Quëchitërahuaton, noya iiꞌ aꞌnotërin oꞌocaiso marëꞌ. Inapochachin Carniroaꞌhuari imapisopita aꞌpaiarin. Yosëꞌpaꞌ noya noya nanpiapi. Yosëri chachin naꞌnëiꞌ amitarin niꞌton, co huachi sëtaponahuëꞌ, itërinco.