Apocalipsis 2:14 - Chayahuita (Shahui)

¹⁴ co yaꞌipinquëmaꞌ noꞌtëquën imaramacohuëꞌ. Aꞌnaquëmaꞌ Paramo pochin cancantëramaꞌ. Iráca inasoꞌ Yosë nanamën nitotopirinhuëꞌ, Yosë piyapinënpita nonpintërin. Inimiconënpita huaꞌanën shaꞌhuitërin anishacancantacaiso marëꞌ, Paraco itopisoꞌ. Inari shaꞌhuitohuachina, anishacancantopi. Nisha cancantatonaꞌ, mamanshi moshapi. Moshatonaꞌ, nosha mamanshi marëꞌ acopisontaꞌ caꞌpi. Naporahuaton, monshihuanapi.

Apocalipsis 2:14 ပူးပေါင်းရင်းမြစ်များ

Jeremías 6:21

Napoaton Siniorosoꞌ inapita yonquiaton taantapon: “Isopitasoꞌ, piyapinëhuëpita nipirinahuëꞌ, ca nohuanton iꞌparahuatona anotopiso pochin nicaponaꞌ. Mashoroꞌsa huiꞌninpitarë chachin, niyaꞌyoranpisopita amiconënarë chachin, yaꞌipi inapita chiminaponaꞌ,” tënin.

Ezequiel 3:20

Aꞌna tahuëriso nipirinhuëꞌ, aꞌnaquën noya nicacaso noꞌquiponahuëꞌ, amirahuaton co noyahuëꞌ nisarin. Tënihuato cá quëran aꞌpotochináchin cancantarin. Inapoasoꞌ co quëmari shaꞌhuitohuatanhuëꞌ, chiminapon. Huaꞌqui noya nipirinhuë tërantaꞌ, co ina marëꞌ nichaꞌësarahuëꞌ. Oshanën marëꞌ chiminacaso yaꞌhuërin. Quëmaso napoaponahuëꞌ co shaꞌhuitëranhuë niꞌton, ina chimininsoꞌ, naꞌintarinquën.

Números 24:14

Iporasoꞌ mini quëma naporanso chachin, yaꞌhuërahuëquë paantarahuë. Napoaponahuëꞌ, coꞌhuara paꞌshátërasocohuëꞌ, maꞌsona pasopita aꞌna tahuëri onpotiinquëmaso shaꞌhuichinquën.

Mateo 18:7

Isoroꞌpaquë sacaiꞌ Yosë imacasoꞌ. Nisha nisha yaꞌhuërin piyapiꞌsaꞌ anishacancantacaisoꞌ. Ina marëꞌ oshahuanpi. Anishacancantonaꞌpiso nipirinhuëꞌ, naꞌcon naꞌcon oshahuanin. Yosëri chiníquën anaꞌintarin niꞌton, ¡maꞌhuantacha nisarin paya!

Hechos 15:29

Aꞌnaquën maꞌsha tëpapi mamanshi moshacaiso marëꞌ. Ina nosha tananpitocoꞌ, tënai. Naporahuaton, aꞌnaquën maconorahuatonaꞌ, maꞌsha tëpapi. Co huënainën noya inquipirinhuëꞌ, caꞌpi. Ina noshantaꞌ ama caꞌcosohuëꞌ. Naporahuaton, ama monshihuancosohuëꞌ. Moisësë naꞌcon pënëntopirinhuëꞌ, inaíchin natëcasoꞌ yaꞌhuërin, tënai. Cotasë, Sirasë, inapitantaꞌ inachachin pënënarinënquëmaꞌ. Natëhuatamaꞌ iyaroꞌsaꞌ, noya nisaramaꞌ. Nani huachi,” topi quiricatatonaꞌ.

Hechos 21:25

Nisha piyapiꞌsaso nipirinhuëꞌ nani ninshitërai. “Quisocristo imapatamaꞌ, co yaꞌipi iráca pënëntërinsoꞌ natëcamasoꞌ yaꞌhuërinhuëꞌ. Isoíchin shaꞌhuichinquëmaꞌ ama nicacamaso marëhuëꞌ. Aꞌnaquën maꞌsha tëpapi mamanshi moshacaiso marëꞌ. Ina nosha tananpitocoꞌ. Naporahuaton, aꞌnaquën maconorahuatonaꞌ, maꞌsha tëpapi. Co huënainën noya inquipirinahuëꞌ, caꞌpi. Ina noshantaꞌ ama caꞌcosohuëꞌ. Naporahuaton, ama monshihuancosohuëꞌ. Cotioroꞌsacoi pënëntëraisoꞌ naꞌcon yaꞌhuëpirinhuëꞌ, inaíchin natëcamasoꞌ yaꞌhuërin,” tënai, nisha piyapiꞌsaꞌ ninshitatoi, itërin Santiacori.

Romanos 11:9

Iráca Tapintaꞌ tapon: “Yosë noꞌhuipi niꞌquëhuarëꞌ, anaꞌinchin. Nani maꞌsha yaꞌhuëtopirinahuëꞌ, co Yosë yonquipihuëꞌ. Coshatatonaꞌ, capa cancantapirinahuëꞌ, ina quëran chachin nitapicancainaꞌ. Yosëri anaꞌinchin.

Romanos 14:13

Napoaton ama huachi ninocancosohuëꞌ. Aꞌnapita imapisopita catahuacoꞌ noya cancanchinaꞌ. Niꞌcona anishacancantotamaꞌ.

Romanos 14:21

Ama mantaꞌ aꞌnapita anishacancantacamasoꞌ yonquicosohuëꞌ. Caꞌnamaso marëꞌ, oꞌoramaso marëꞌ, ama inapita marëꞌ aꞌnapita anishacancantocosohuëꞌ. Iyaparin pochin nosoroatomaꞌ, catahuacoꞌ noya noya imacaiso marëꞌ.

Romanos 9:32

¿Onpoatontaꞌ co noya niꞌninhuëꞌ? “Pënëntërinsoꞌ nanan noꞌtëquën natëhuatëhuaꞌ, nóya cancantarëhuaꞌ,” topirinahuëꞌ, co nanitopihuëꞌ. “Yosëíchin nanitërin anoyacancantinpoasoꞌ,” taꞌcaiso nipirinhuëꞌ, co Quisocristo nohuantopihuëꞌ. Inapoatonaꞌ, pancaraꞌpi iꞌpatërëso pochin niꞌpi. Ina marëꞌ Yosëri co noyahuëꞌ niꞌnin.

1 Corintios 1:23

Quiyaso nipirinhuëꞌ Quisocristo nanamënáchin aꞌchinai: “Corosëquë canpoa marëꞌ chiminin,” tënai. Cotioroꞌsasoꞌ co natëtopihuëꞌ: “Inasoꞌ Yosë huiꞌnin naporini, co chimiintonhuëꞌ,” toconpi. Nisha piyapiroꞌsarintaꞌ co nohuantatonaraihuëꞌ, tëhuapi.

1 Corintios 7:2

Napoaponahuëꞌ, naꞌa piyapiꞌsaꞌ monshihuanapi niꞌton, naꞌcon naꞌcon quëmapiꞌsaꞌ saꞌainaꞌ. Ama monshihuanacaiso marëhuëꞌ saꞌainaꞌ. Quëmapiꞌsaꞌ saꞌinaráchin yonquiꞌinaꞌ. Inapochachin sanapiꞌsantaꞌ soꞌináchin yonquiꞌinaꞌ.

Hebreos 13:4

Quëmapiꞌsaꞌ saꞌapachinaꞌ, ama aꞌna sanapi yonquiꞌinasohuëꞌ. Sanapiꞌsantaꞌ soꞌyahuachinaꞌ, ama soꞌinaꞌ tëhuananpichinasohuëꞌ. Ama mantaꞌ monshihuainasohuëꞌ. Monshihuanpatamaꞌ, Yosë chiníquën anaꞌintarinquëmaꞌ.

Josué 24:9

Sipor huiꞌnin Paraco itopisonta piyapinënpitarë chachin chinitërinënquëmaꞌ. Canainënquëmaso marëꞌ, inaso Pioro huiꞌnin Paramo itopiso amatërin: ‘Huëcaton, ama huachi noya yaꞌhuëcaiso marëhuëꞌ shaꞌhuitiiquëꞌ,’ itacaso marëꞌ amatërin.

1 Pedro 2:8

Quiricanën quëran itantarin: “Iratohuatëra, naꞌpi iꞌpatahuatëꞌ, anotërëꞌ,” tënin. Inapochachin aꞌnaquën co Quisocristo nanamën natëtonaraihuëꞌ, nisha cancantopi. Ina marëꞌ Yosë nohuanton, naꞌinpi huachi.

2 Pedro 2:15

Noꞌtën nanan aꞌporahuatonaꞌ, Yosë iranën quëran pëshonpi. Paramo pochin cancantopi. Pioro huiꞌnin inasoꞌ. Iráca pënëntopirinhuëꞌ, coriqui naꞌcon naꞌcon nohuantërin. “Nonpinacasoꞌ co noyahuëꞌ nipirinhuëꞌ, inapoato, naꞌcon canarahuë,” taꞌton, co noyahuëꞌ ninin.

Judas 1:11

¡Maꞌhuantacha nisapi paya! Nonpinaꞌpiroꞌsasoꞌ, Caino pochin cancantatonaꞌ co Yosë natëpihuëꞌ. Paramo pochin cancantopi. Iráca Paramosoꞌ coriquiráchin cancantaton, piyapiꞌsaꞌ anishacancantërin. Corintaꞌ iráca co noyahuëꞌ ninin. Co huaꞌanoꞌsaꞌ yanatërinhuëꞌ, noꞌhuirin. Ina marëꞌ Yosë nohuanton, chiminin. Inapita pochin cancantopisopita Yosëri chiníquën anaꞌintarin.

Apocalipsis 2:20

co yaꞌipi cancanëma quëran imaramacohuëꞌ. Aꞌna sanapi corto pëiquë chachin nonpin nanan aꞌchintopirinquëmahuëꞌ, co aꞌparamahuëꞌ. Iráca Quisapira paꞌpi co noyahuëꞌ sanapi niponahuëꞌ, chiníquën nanantaton, piyapinëhuëpita anishacancantërin. Inapochachin iporasoꞌ ina sanapi pënënarinquëmaꞌ co noyahuëꞌ nicacamasoꞌ. ‘Noya monshihuanacasoꞌ. Mamanshi moshacaso marëꞌ nosha acohuachina, noya capacasoꞌ. Caꞌcoꞌ,’ itohuachinquëmara, aꞌnaquëmaꞌ natëtomaꞌ, monshihuanamaꞌ. Nosha mamanshi marëꞌ acopisoꞌ caꞌnamaꞌ. Ina pochin ina sanapi nonpintërinquëmaꞌ.

Apocalipsis 2:4

Nipirinhuëꞌ, co huachi noya nosororamacohuëꞌ. Iráca yaꞌnan imapomaco, tëhuënchachin nóya nosororamaco. Canpita capinintaꞌ noya ninosororamaꞌ. Iporaso nipirinhuëꞌ co huachi iráca pochin noya ninosororamahuëꞌ. Co huachi cantaꞌ noya nosororamacohuëꞌ. Ina marëꞌ sëtato, co noya niꞌnanquëmahuëꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.