Apocalipsis 17:8 - Chayahuita (Shahui)

⁸ Iráca isoroꞌpaquë yaꞌhuërin. Iporasoꞌ co yaꞌhuërinhuëꞌ. Aꞌna tahuëriso nipirinhuëꞌ yaꞌnoantarin. Acoporoꞌ quëran huëantarin. Ayaroꞌ tahuëri nanihuachin, parisitopiquë paꞌsarin. Nipirinhuëꞌ, coꞌhuara paꞌshátërasohuëꞌ, aꞌnanaya yaꞌnoantahuaton, piyapiꞌsaꞌ aꞌpayanarin. Co Quisoso imapihuëꞌ niꞌton, paꞌyanapi. Quisoso imapi naporini, iráca quëran huarëꞌ nininënpita nanpirin quiricaquë ninshichitonhuëꞌ.

Apocalipsis 17:8 ပူးပေါင်းရင်းမြစ်များ

Salmos 69:28

Nanpipisopita quiricanënquë nininëna ninshitëransoꞌ, tapiquëꞌ. Ama noya piyapiꞌsa nininënpitarëꞌ nininëna ninshitëquësohuëꞌ.

Daniel 7:11

Pomonaꞌhuaya pipihuachina, nocantaton noninsoꞌ natanárahuë. Ina nicasoco chachin maꞌsha shonca pomon yaꞌhuëtërinso tëparahuatonaꞌ, yáquiraꞌpiapi. Inapotahuatona huiquitacaso marëꞌ pënquë tëꞌyatopi.

Daniel 7:26

Napopirinhuëꞌ, coisëroꞌsaso piyapiroꞌsa natanapi. Ina copirno ocoirahuatonaꞌ, ataꞌhuantapi huachi. Inapotahuatona Yosë piyapinënpita yaꞌhuërëꞌ, isoroꞌpaꞌ huaꞌanëntacaiso marëꞌ quëtaponaꞌ. Inapitasoꞌ huaꞌanëntohuachinaꞌ, noya noya nisapi huachi. Huaꞌanëntopiso yaꞌhuëmiatarin. Nisha nisha piyapiroꞌsa isoroꞌpaquë yaꞌhuëpisopita piyapitaponaꞌ. Camaihuachina natëponaꞌ,’ itërinco.

Daniel 7:3

Aꞌnanaya niꞌpirahuëꞌ, catapini panca maꞌsharoꞌsa nisha nisha yaꞌnopisoꞌ, marë quëran pipirapi. Inapitasoꞌ, co napopináchin niꞌtopihuëꞌ. Nisha nisha niꞌtopi.

Daniel 7:7

Piquëran nininsosoꞌ, paꞌpi tëꞌhuatoro yaꞌnorin niꞌnahuë. Naporahuaton paꞌpi chiníquën. Panca natëroꞌsa huaꞌnamia quëran yaꞌhuëtërin. Nani maꞌsha quënaninsopita pëꞌyaraꞌpiarin. Oshitë oshitëtëraꞌpiarin. Pëꞌsotërinsopitanta toꞌpi toꞌpitëraꞌpiarin. Inasoꞌ, co aꞌnapita maꞌsharoꞌsa huëꞌëhuëquë niꞌnahuëso pochin yaꞌnorinhuëꞌ. Shonca pomonënpita motënquë yaꞌhuëtërin.

Mateo 25:34

Ina quëran inchinanëhuë quëran acorahuësopita itarahuë: ‘Yaꞌipinquëmaꞌ huëcatomaꞌ, Yosë huaꞌanëntërinquë yaꞌconquicoꞌ. ¡Ma noyacha Tata Yosë nosororinquëma paya! Isoroꞌpaꞌ ninin quëran huarëꞌ yonquirinquëmaꞌ huaꞌanëntërinquë ayaꞌcoinquëmaso marëꞌ.

Lucas 10:20

Sopairoꞌsaꞌ aꞌpapiramahuëꞌ, ama ina marëáchin noya cancantocosohuëꞌ. Imaramaco niꞌton, Yosëꞌpaꞌ paꞌsaramaꞌ. Inatohuaꞌ nininëmaꞌ nani ninshitërinquëmaꞌ. Ina marëꞌ tëhuënchinsoꞌ nóya cancantocoꞌ, itërin.

Lucas 8:31

“Ama parisitopiquë aꞌpacoisohuëꞌ,” itantapi.

Juan 17:24

Quëma nohuanton Tata, isopitasoꞌ imasarinaco. Inapita nohuantërahuë carëꞌ yaꞌhuëcaisoꞌ. Iráca quëran huarëꞌ quëma nosororanco. Coꞌhuara isoroꞌpaꞌ yaꞌhuëyátërasohuëꞌ, nosoroatonco, nóya acoranco. Inatohuaꞌ inapitantaꞌ pantahuachinaꞌ, noya noya niꞌsarinaco. Ina naꞌcon nohuantërahuë.

Hechos 15:18

tënin Yosë. Iráca quëran huarëꞌ yonquirin nisha nisha piyapiꞌsaꞌ nichaꞌëcasoꞌ. Ina yonquiaton, anitotërinpoaꞌ,” tënin pënëntonaꞌpi.

Efesios 1:4

Coꞌhuara isoroꞌpaꞌ yaꞌhuëyátërasohuëꞌ, yonquiatonpoaꞌ, huayoninpoaꞌ nóya cancantacaso marëꞌ. Quisocristo imapatëhuaꞌ, oshanënpoaꞌ inquitatonpoaꞌ, Yosë nóya niꞌninpoaꞌ.

Tito 1:2

Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

1 Pedro 1:20

Iráca coꞌhuara isoroꞌpaꞌ yaꞌhuëyátërasohuëꞌ, Yosë yonquirin huiꞌnin aꞌpaimacaso marëꞌ. Ipora huarëꞌ yaꞌnorin canpitantaꞌ nichaꞌëinquëmaso marëꞌ. Nani ayaroꞌ tahuëri yaꞌcaritapon chachin yaꞌnorin.

Apocalipsis 11:7

Nani yaꞌipi noyá pënëntohuachinaꞌ, co huachi aquëtëꞌ pënëntacasoꞌ yaꞌhuaponhuëꞌ. Naporoꞌ maꞌsha paꞌpi tëꞌhuatoro nininsoꞌ yaꞌnoarin. Acoporoꞌ quëran huëꞌsarin. Huëꞌsahuaton, cato yaꞌpi ahuëquiarin. Ina quëran minsërahuaton, tëpararin.

Apocalipsis 17:11

Ina piquëran maꞌsha paꞌpi tëꞌhuatoroꞌ nininsoari huaꞌanëntapon. Nani canchisë copirnoroꞌsaꞌ ayaponahuëꞌ, inapita pochin nicaton, huaꞌanëntapirinhuëꞌ, aꞌna tahuëri Yosëri ocoiarin. Ocoirahuaton, parisitopiquë aꞌpararin.

Apocalipsis 17:2

Yaꞌipi copirnoroꞌsaꞌ ina natëtonaꞌ, co noyahuëꞌ nisapi. Monshihuaninso pochin cancantatonaꞌ, Yosë naniantapi. Piyapinënpitantaꞌ ina imatonaꞌ, co noyahuëꞌ nicacaisoáchin yonquiapi,” itërinco.

Apocalipsis 20:10

Ina quëran sopai anaꞌintomiatarin. Huaꞌquiꞌ piyapiꞌsaꞌ nonpintërin niꞌton, Yosëri anaꞌintarin. Panca sono shaꞌpimoꞌshirë chachin pën orotërinquë tëꞌyatarin. Co onporontaꞌ pipiarinhuëꞌ. Inaquë maꞌsha paꞌpi tëꞌhuatoroꞌ nininsontaꞌ parisitarin. Nonpin nanan pënëntonaꞌpintaꞌ inaquë chachin parisitarin. Tahuërirë chachin, tashirë chachin chiníquën parisitapi. Co onporontaꞌ sanoarinhuëꞌ. Co onporontaꞌ pipiapihuëꞌ.

Apocalipsis 20:12

Ayaroꞌ tahuëri nani nanirin niꞌton, yaꞌipi chiminpisopita inatohuaꞌ huaniáponaꞌ. Huaꞌanoꞌsaꞌ, topinan piyapiꞌsaꞌ, inapita yaꞌipiya inaquë paꞌsapi. Yosëri anaꞌintacaso marëꞌ ayontonarin. Naporoꞌ quiricaroꞌsaꞌ inápaquë ninshitërinsoꞌ aꞌnaya aꞌnaya oniriarin. Aꞌnasoꞌ nanpirin quirica itopisoꞌ. Inaquë Yosë imapisopita nininënpita nani ninshitopi. Aꞌna quiricantaꞌ yaꞌhuërin. Inaquë yaꞌipi ninëhuasopita ninshitërinpoaꞌ. Noya ninëhuasopita, co noyahuëꞌ ninëhuasopita, yaꞌipiya nani ninshitërinpoaꞌ. Ina nontaton, Yosëri anaꞌintarin.

Apocalipsis 20:15

Co nanpirin quiricaquë nininënpita yaꞌhuëhuachinahuëꞌ inaquë chachin aꞌpararin.

Apocalipsis 3:10

Chiníquën cancantatomaꞌ, imamiatoco, itëranquëmaꞌ. Natëramaco niꞌton, carinquëmantaꞌ naꞌcon catahuaranquëmaꞌ. Aꞌna tahuëri yaꞌipi isoroꞌpaquë yaꞌhuëpisopita chiníquën aparisitarahuë tënicaꞌhuaso marëꞌ. Co naporoꞌ parisitaramahuëꞌ. Nichaꞌësaranquëmaꞌ.

Apocalipsis 3:5

Inquëmasoꞌ sopai minsëhuatamaꞌ, Yosëꞌpaꞌ paꞌsaramaꞌ. Noyápiachin cancantaramaꞌ niꞌton, huiríchin aꞌmocontaramaꞌ. Inatohuaꞌ yaꞌhuëmiataramaꞌ. Nanpirin quiricaquë nininëmaꞌ nani ninshitëranquëmaꞌ. Co onporontaꞌ tapiarahuëꞌ. Tata Yosë shaꞌhuitarahuë: ‘Isopita imamiatërinaco,’ itarahuë. Anquëniroꞌsantaꞌ natanapi.