Apocalipsis 17:6 - Chayahuita (Shahui)

⁶ Tëhuënchachin ina sanapi paꞌpi co noyahuëꞌ cancantërin. Quisoso imapisopita co quëꞌyarinhuëꞌ. “Quisoso imarai,” topachinara, atëpatërin. Notohuaroꞌ atëpatahuaton, noꞌpirinso pochin paꞌyatërin. Ina nicato, panca paꞌyanahuë. Ina quëran anquëni itërinco:

Apocalipsis 17:6 ပူးပေါင်းရင်းမြစ်များ

Daniel 7:25

Yosëso chini chiníquën nanantopirinhuëꞌ, noꞌhuipon. Yosë piyapinënpitantaꞌ, shitiquiapon. Yosë pënëntërinsopita anishatacaso camaitapon. Yosë chinotatona niyontonacaiso tahuëriꞌsantaꞌ, inapotapon. Yosë piyapinënpita quëran huarëꞌ, cara piꞌipi miria nohuantërinsoꞌ nitapon.

Habacuc 1:13

Quëmasoꞌ noyasáchin nicaton, co piꞌpian tëranta co noyahuëꞌ nipisoꞌ noya niꞌnanhuëꞌ. Paꞌpi co noyahuëꞌ nipisoꞌ co onporonta costaranhuëꞌ. ¡Tëpatoroꞌsasoꞌ, anaꞌintamaso yaꞌhuërin! Co noyahuëꞌ nipisopitari noyamiachin nisapisopita ataꞌhuantahuachinaꞌ, ¡co topinan niꞌsápamaso yaꞌhuërinhuëꞌ!

Juan 2:10

Huëꞌpachina, itërin: —¡Maꞌpitacha ninan paya! Iso huinosoꞌ noya noya, yashin yashin oꞌocasoꞌ. Yaꞌipi piyapiꞌsaꞌ noya noya huino nininsoꞌton oꞌshipi. Ina quëran nani natëhuachinara, co onpopinchin noyahuëꞌ nininsoꞌ oꞌshiantarapi. Quëmaso nipirinhuëꞌ ipora huarëꞌ noya noya huino oꞌshitërancoi, itërin. Quisoso naporinsoꞌ co nitotatonhuëꞌ, naporin.

Hechos 22:20

Istipan quëma nanamën aꞌchininso marëꞌ tëpahuachinara, cantaꞌ niꞌnahuë. “Tëpacoꞌ,” itërahuë carintaꞌ. Tëpatonaꞌpiroꞌsaꞌ aꞌmopisoꞌ ocoirahuatonaꞌ, quëtërinaco, aꞌpairahuë. Yaꞌipiya nohuitërinaco,’ itërahuë.

Apocalipsis 12:11

Carniroaꞌhua chiminaton, huënainën quëran anoyacancantërinpoaꞌ niꞌton, sopai minsërëhuaꞌ. Nanamën shaꞌhuitatëhuaꞌ, minsërëhuaꞌ. Yatëpapirinënpoahuëntaꞌ, co aꞌporëhuahuëꞌ, tosapi.

Apocalipsis 13:15

Ina quëran aquëtë chachin piyapiꞌsaꞌ nonpintarin. Ina nohuanton, mamanshi nanpirinso pochin yaꞌnoarin. Noninso pochin natanapi. “Insosona co moshahuachincohuëꞌ tëpacoꞌ,” tosarin.

Apocalipsis 13:7

Yosë imapisopita co quëꞌyarinhuëꞌ. Sopai nohuanton, aparisitarin. Quira nisahuaton, canatarin. Notohuaroꞌ piyapiꞌsaꞌ nisha nisha parti yaꞌhuëpisopita huaꞌanëntarin. Nisha nisha nananquë nonpisopita huaꞌanëntarin.

Apocalipsis 16:6

Naꞌa imarinënsopita tëpapi. Noya pënëntopirinahuëꞌ, tëpapi niꞌton, iꞌhuërëtaton, anaꞌintaran. Iiroꞌsaꞌ huënaiꞌ atarantëran niꞌton, ina tërantaꞌ oꞌocaisoꞌ yaꞌhuërin. Noꞌtëquën anaꞌintaran,” itërin.

Apocalipsis 2:13

Canpita yaꞌhuëramaquë nohuitërahuë. Inaquë naꞌa piyapiꞌsaꞌ co noyahuëꞌ cancantopi. Satanasëri huaꞌanëntopirinhuëꞌ, canpitasoꞌ noya imaramaco. Antipasë natëtonco, noya pënëntopirinhuëꞌ, ina marëꞌ tëpapi, niꞌnamaꞌ. Satanasë chachin inaquë yaꞌhuërin, tënahuë. Parisitapomarahuëꞌ, co aꞌporamacohuëꞌ. Ina marëꞌ noya niꞌpiranquëmahuëꞌ,