Apocalipsis 17:17 - Chayahuita (Shahui)

¹⁷ Yosë nohuanton, copirnoroꞌsaꞌ yonquiapi maꞌsha tëꞌhuatoroꞌ nininsoꞌ natëcaiso marëꞌ. Napopianachin yonquiatonaꞌ, co noya sanapihuëꞌ nininsoꞌ ataꞌhuantapi. Yosë nohuantërinso chachin nisapi.

Apocalipsis 17:17 ပူးပေါင်းရင်းမြစ်များ

Esdras 7:27

Copirnori quirica quëtohuachina, Istrasësoꞌ Yosë nontaton tapon: “Yosparinquën Sinioro. Quëmaso Yosënquën. Shimashonëhuëpitanta chinotërinquën. Quëma nohuanton, Pirsia copirno noya yonquirin. Quirosarinquë chinotiinënso pëi noya nicaton, quëma marëꞌ sacataꞌhuaisoꞌ catahuarincoi. Quëma nohuanton copirno nosororinco. Ina ayonquipisopitantaꞌ, catahuarinaco. Aꞌnapita huaꞌanoꞌsanta napotërinaco. Ina marëꞌ chiníquën cancantërahuë. Inapita catahuarinaco niꞌton, chiníquën nanantopisopita israiroꞌsa ayontonahuë. Inapitarëꞌcoi pacaꞌhuaiso marëꞌ naporahuë,” itërin.

Salmos 105:25

Napoaponahuëꞌ, ina nohuanton chachin iquipitoroꞌsari shimashonënpoapita inimicotopi. Nonpintatonaꞌ, sacatopiso marëꞌ co pahuërëpihuëꞌ. Yosë piyapinënpita nipirinahuëꞌ, inapotopi.

Isaías 45:17

Israiroꞌsanpoaso nipirinhuëꞌ, Sinioro nichaꞌërinpoaꞌ. Yaꞌhuëmiatacaso marëꞌ nichaꞌërinpoaꞌ. Co onporonta taparo nisarëhuahuëꞌ.

Lucas 22:22

Yosë quëran quëmapico niporahuëꞌ, ina nohuanton, chiminarahuë. Napoaponahuëꞌ, shaꞌhuirapirincosoꞌ, chiníquën parisitapon. Yosëri anaꞌintarin, tënin Quisoso.

Lucas 22:3

Shonca catoyaꞌpiri Quisoso caꞌtanpirinahuëꞌ, aꞌnaraꞌ sopairi yaꞌcoancantërin, Cotasë Iscarioti itopisoꞌ. Sopairi yaꞌcoancantohuachina,

Lucas 22:37

Iráca Yosë quiricanën quëran ninorinaco. “Apiroꞌsarëꞌ acorapi,” tënin. Napopiso chachin apiroꞌsa pochin cancantatonaco, masarinaco. Yaꞌipi ninorinacosoꞌ nanicaso yaꞌhuërin, tënin.

Juan 10:35

Yosëri chachin huaꞌanoꞌsaꞌ acorinsoꞌ yonquiaton, napotërin. Yaꞌipi Yosë quiricanënsoꞌ noꞌtëquën. Co piꞌpisha tërantaꞌ nonpininhuëꞌ.

Juan 13:18

“Co yaꞌipinquëmaꞌ noya cancantëramahuëꞌ. Shonca catoyaꞌpinquëmaꞌ huayonanquëmaꞌ caꞌtanamacoso marëꞌ. Yaꞌipinquëmaꞌ noyá nohuitëranquëmaꞌ. Yosë quiricanënquë iráca naporin: ‘Aꞌnaraꞌ carëꞌ coshataponahuëꞌ, inimicotarinco,’ tënin. Ipora huarëꞌ ina pochin nisarin.

Juan 13:2

Inaroꞌcoi coshatarai. Sopai huaꞌani nani Cotasë ayonquirin Quisoso shaꞌhuirapicaso marëꞌ. Simon Iscarioti huiꞌnin inasoꞌ.

Juan 19:24

—Ama oshahuasohuëꞌ. Huëcoꞌ yaꞌnipitëhuaꞌ nicanahuaꞌ, taꞌtonaꞌ yaꞌnipirapi. Inaporahuatonaꞌ, aꞌnari manin. Iráca Yosë quiricanënquë ninoton, tapon: “Aꞌmorahuësoꞌ nipatomatapi. Acopotërahuëso macacaiso marëntaꞌ nicanarapi,” tënin ninshitaton. Naporinso chachin mapi.

Juan 19:28

Quisoso nontahuatoncoi: “Nani yaꞌipi Yosë shaꞌhuitërincosoꞌ natërahuë,” tënin yonquinënquë. Ina quëran, Yosë quiricanënquë ninorinso nanicaso marëꞌ: —Yamororahuë, tënin.

2 Corintios 8:16

Titontaꞌ naꞌcon yonquirinquëmaꞌ. Ina marëꞌ noya cancantato, “Yosparinquën, Sinioro,” itërahuë.

Apocalipsis 10:7

Aꞌnaíchin anquëni pahuanarin tronpita pihuicasoꞌ. Ina pihuiantahuachina, oshahuanoꞌsaꞌ anaꞌintahuaton, yaꞌipiya Yosëri huaꞌanëntarin. Piyapiꞌsaꞌ inahuara co nitotopihuëꞌ. Iráca quëran huarëꞌ Yosë nohuanton, pënëntonaꞌpiroꞌsaꞌ ninopirinahuëꞌ, ipora huarëꞌ nanirin. Inimiconënpita anaꞌintahuaton, huaꞌanëntarin,” tënin panca anquëni.

Apocalipsis 15:1

Ina quëran Yosë nohuanton, huaꞌnarëso pochin niantarahuë. Aꞌna tahuëri oshahuanoꞌsaꞌ chiníquën anaꞌintarin. Ina anitotincoso marëꞌ nani maꞌsha aꞌnotërinco. Paꞌpi huëhuëpiroꞌ niꞌnahuë. Canchisë anquëni yaꞌhuarin. Aꞌnaya aꞌnaya Yosëri yaaꞌparin piyapiꞌsaꞌ anaꞌintacaso marëꞌ. Ina nohuanton, isoroꞌpaquë nani maꞌsha onpocaisoꞌ yaꞌhuapon. Inapoaton, anaꞌintërinsoꞌ naniarin.

Apocalipsis 17:13

Shonca copirnoroꞌsasoꞌ napopianachin yonquiatonaꞌ, maꞌsha paꞌpi tëꞌhuatoroꞌ nininsoꞌ natëponaꞌ. Piyapinënpitantaꞌ camaiaponaꞌ ina natëcaiso marëꞌ.

Apocalipsis 19:9

Ina quëran anquëni shaꞌhuitërinco ninshitaꞌhuaso marëꞌ: “Carniroaꞌhua saꞌacasoꞌ pita nininquë përapachinquëmaꞌ, nóya cancantaramaꞌ,” itërinco. Ina quëran itaantarinco: “Yosë chachin noꞌtëquën shaꞌhuitërinquën niꞌton, ina ninshitëquëꞌ,” itërinco.

Apocalipsis 6:11

Napotohuachinara, Yosëri itërin: —Ninatacoꞌ. Oshaquëran anaꞌintarahuë. Co tahuëri naniyatërarinhuëꞌ. Aꞌnapita imarinacosopita ipora huantaꞌ pënëntapi. Aꞌnaquën tëpaantahuachinaꞌ, isëquë chachin huëantapi antaꞌ. Naporo huarëꞌ tëparinënquëmasopita noꞌtëquën anaꞌintarahuë, itërin. Itahuaton, huiríchin aꞌmocaisoꞌ quëtërin. Noyápiachin cancantopi niꞌton, huiríchin aꞌmotërin.