Apocalipsis 16:2 - Chayahuita (Shahui)

² Ina natanahuaton, aꞌnaraꞌ paꞌnin. Isoroꞌpaꞌ nocorahuaton, minëquë yaꞌhuërinsoꞌ tëꞌyanantërin. Tëꞌyanantohuachina, naꞌa piyapiꞌsaꞌ panca taꞌtarapi. Sëncopi pochin pipitëraꞌpiaponaꞌ. Co noyatochináchinhuëꞌ nisapi. Maꞌsha paꞌpi tëꞌhuatoroꞌ nininsoꞌ imapisopita parisitapi. Marcanën niacotopi niꞌton, Yosë nohuanton, taꞌtaráchin nisapi. Mamanshinëntaꞌ moshapi niꞌton, parisitáponaꞌ. Aꞌna tahuëri maꞌsha onpocasoꞌ ninoton, aꞌnotërinco, niꞌnahuë.

Apocalipsis 16:2 ပူးပေါင်းရင်းမြစ်များ

Hechos 12:23

Topinan piyapi niponahuëꞌ natanahuaton huaꞌan nipaꞌyatërin. Yosëíchin chinotacaso nipirinhuëꞌ naporinso marëꞌ, aꞌnaroáchin Sinioro anquëninëni acaniorin. Chiníquën canioton, shonari pëꞌyarin. Parisitërarin quëran chiminin.

Deuteronomio 7:15

Sinioro paꞌpoyarinquëma niꞌton, co manta canio masarinquëmahuëꞌ. Iquipitoroꞌsasoꞌ, iráca nisha nisha quëran anaꞌintërin. Nani canpita ina nitotëramaꞌ. Co canpitaso ina pochin anaꞌintarinquëmahuëꞌ. Yaꞌipi inimiconëma tëhuënchinsoꞌ ina pochin anaꞌintapon.

Apocalipsis 13:12

Inantaꞌ chiníquën nanantapon. Chiníquën nanantaton, yaꞌipi piyapiꞌsaꞌ camaiarin maꞌsha marë quëran pipirinsoꞌ chinotacaiso marëꞌ. Inasoꞌ motën ahuëtohuachinara, chiminatë pochin niponahuëꞌ, noyatantarinsoꞌ niꞌton, piyapiꞌsari chinotapi.

Apocalipsis 14:16

Itohuachina, manin. Cayarinsoꞌ manëso pochachin manin huachi.

Apocalipsis 14:9

Ina piquëran aꞌna anquënintaꞌ paaton, chiníquën nonsarin. —Ama maꞌsha paꞌpi tëꞌhuatoroꞌ nininsoꞌ natëcosohuëꞌ. Ama mamanshinën moshacosohuëꞌ. Tëꞌyamaquë marcanën yaacotarinquëmaꞌ huaꞌanëntinquëmaso marëꞌ. Ama natëcosohuëꞌ. Ina chinotohuatamaꞌ, Yosë anaꞌintarinquëmaꞌ.

Apocalipsis 16:1

Naporoꞌ chinotopiso pëiꞌ inápaquë yaꞌhuërinso quëran chiníquën noninsoꞌ natanahuë. —Piyapiꞌsaꞌ yaꞌhuërinquë paatomaꞌ, minëroꞌsaquë yaꞌhuërinsoꞌ tëꞌyanantocoꞌ. Tëꞌyanantohuatamaꞌ, parisitapi. Paꞌpi co noyahuëꞌ cancantopi niꞌton, Yosëri chiníquën noꞌhuiton, anaꞌintarin, itërin anquëniroꞌsaꞌ.

Apocalipsis 16:11

Yosësoꞌ chini chiníquën nanantopirinhuëꞌ, piyapiꞌsari taꞌtaráchin nicatonaꞌ, noꞌhuipi. “Paꞌpi co noyahuëꞌ niꞌton, aparisitarinpoaꞌ,” topi pinotonaꞌ. Co naporo tërantaꞌ oshanënaꞌ yaaꞌpoapihuëꞌ.

Apocalipsis 8:7

Yaꞌnan pihuirinsoꞌ irinpachina, Yosë nohuanton, ocaiꞌ, pën, inapita inápa quëran anotarin. Huënairë chachin anotarin. Pancana huiquitarin. Patoma pochin huiquitarin. [Cacharonquë un tercero, topisoꞌ.] Nararoꞌsaꞌ, panpatëroꞌ inapitanta napochachin huiquitarin.

1 Samuel 5:6

Ina piquëran Siniorori Asototoquë yaꞌhuëpisopita anaꞌintaton paꞌpi aꞌpayanin. Inainpichin noꞌpaquë yaꞌhuëpisopitanta napotërin. Panca piꞌpiraꞌpiatona parisitápi.

1 Samuel 5:9

Quëpapirinahuëꞌ, Siniororiso ina ninanoquë yaꞌhuëpisopita yaꞌhuërëꞌ, chiníquën anaꞌintërin. Huaꞌhuaroꞌsa quëran mashoroꞌsaquë huarëꞌ panca piꞌpiraꞌpiapi. Inapoatona chiníquën parisitapi. Napoaton inahuanta panca paꞌyanpi.