Apocalipsis 15:2 - Chayahuita (Shahui)

² Coꞌhuara anquëniroꞌsaꞌ paꞌshatërasoihuëꞌ, inápaquë panca sonoꞌ niantarahuë. Isihuico pochin niponahuëꞌ, huënaratarin. Pën pochin yaꞌnorin. Sono yonsanquë naꞌa piyapiꞌsaꞌ quënanahuë, maꞌsha paꞌpi tëꞌhuatoroꞌ nininsoꞌ minsëpisopita. Isoroꞌpaquë yaꞌhuaponaꞌ, co mamanshinën moshapihuëꞌ. Co marcanën niacotopihuëꞌ. Parisitaponaraihuëꞌ: “Yosëíchin imarai,” taꞌtonaꞌ, imamiatopi. Iporasoꞌ Yosëꞌpaꞌ yaꞌhuatonaꞌ, noya yaꞌhuërapi. Arparoꞌsaꞌ Yosëri quëtërin piꞌniatonaꞌ cantacaiso marëꞌ.

Apocalipsis 15:2 ပူးပေါင်းရင်းမြစ်များ

Mateo 3:11

Co noyahuëꞌ yonquiramasopita naniantohuatamaꞌ, iꞌquë aporintaranquëmaꞌ. Ca piquëranso nipirinhuëꞌ aꞌna quëmapi huëꞌsarin. Inasoꞌ chini chiníquën nanantërin. Casoꞌ co piꞌpian tërantaꞌ ina pochin chiníquën nanantërahuëꞌ. Co maquëyancohuëꞌ niꞌto, co sapatën quëpacaꞌhuaso tërantaꞌ nanitarahuëꞌ. Inasoꞌ huëꞌpachin, aꞌnaquëmaꞌ Ispirito Santo ayaꞌcoancantarinquëmaꞌ. Aꞌnaquëmaso nipirinhuëꞌ pënquë chiníquën anaꞌintarinquëmaꞌ.

1 Pedro 1:7

Maꞌsha onpohuatëhuaꞌ, Yosë catahuararinpoaꞌ yaꞌipi cancanënpoa quëran imacaso marëꞌ. Oro tapacaiso marëꞌ aꞌirotopiso pochin nitarinpoaꞌ. Oro inapotohuachinara, noyápiachin pipirin. Yaꞌipi nëꞌhuë huiquitahuaton, orosachin ninin. Inapochachin iporasoꞌ Yosë nohuanton, pënquë ahuiquitërëso pochin maꞌsha onpotërinpoaꞌ noya noya acoinpoaso marëꞌ. Oro paꞌton niponahuëꞌ, co yaꞌhuëmiatërinhuëꞌ. Canpoaso nipirinhuëꞌ, Yosë natëhuatëhuaꞌ, nanpimiatarihuaꞌ. Napoaton naꞌcon yonquiaꞌahuaꞌ cancanënpoa quëran huarëꞌ natëcasoꞌ. Ina Yosë nohuantërinsoꞌ. Natëmiatohuatëhuaꞌ, Yosë noya noya niꞌsarinpoaꞌ. Quisocristo oꞌmantahuachin, noya noya acorarinpoaꞌ. Ina pochin yaꞌnoarihuaꞌ.

1 Pedro 4:12

Naꞌcon iyaroꞌsaꞌ, imoyaroꞌsaꞌ, nosororanquëmaꞌ. Iporasoꞌ chiníquën parisitohuatamaꞌ, ama paꞌyancosohuëꞌ. Co topinan quëran maꞌsha onporamahuëꞌ. Imaramaꞌ niꞌton, ina pochin parisitacasoꞌ yaꞌhuërin. Yosë nohuanton, napoaramaꞌ noya noya imacamaso marëꞌ.

Apocalipsis 12:11

Carniroaꞌhua chiminaton, huënainën quëran anoyacancantërinpoaꞌ niꞌton, sopai minsërëhuaꞌ. Nanamën shaꞌhuitatëhuaꞌ, minsërëhuaꞌ. Yatëpapirinënpoahuëntaꞌ, co aꞌporëhuahuëꞌ, tosapi.

Apocalipsis 13:1

Ina quëran huaꞌnarëso pochin niantarahuë. Aꞌna maꞌsha paꞌpi tëꞌhuatoroꞌ nininsoꞌ marë quëran pipiarin. Canchisë motohuan nisahuaton, shonca pomonën yaꞌhuëtërin. Aꞌnaya aꞌnaya pomonënquë yancotëꞌ yaꞌhuëtërin. Huaꞌan pochin chiníquën nanantërin niꞌton, naporin. Motënaquë nininënpita nani ninshitërin, Yosë pinorinsoꞌ. “Yosë quëran chini chiníquën nanantërahuë,” taꞌton, ninshitërin.

Apocalipsis 13:14

Nisha nisha acoarin, sacaiꞌ nininsoꞌ. Maꞌsha paꞌpi tëꞌhuatoroꞌ nininsoꞌ niꞌtonënquë naporin. Piyapiꞌsari niꞌpachinaꞌ: “Tëhuënchachin inasoꞌ Yosë,” tosapi. Notohuaroꞌ piyapiꞌsaꞌ nonpintarin. Ina quëran itapon: “Panca mamanshi niahuaꞌ. Sahuëniquë ahuëatonaꞌ shitëpapirinahuëꞌ, noyataantarinsoꞌ nonanatëhuaꞌ chinotahuaꞌ,” itohuachinaꞌ, nisapi.

Apocalipsis 13:17

Co marca niacotohuachinahuëꞌ, co huachi nanitapihuëꞌ maꞌsha paꞌanatonaꞌ canacaisoꞌ. Co paꞌanacaiso tërantaꞌ nanitapihuëꞌ. Maꞌsha marë quëran pipirinsoꞌ marcanën niacotëraꞌpiaponaꞌ. Aꞌnaquën nininën chachin niacotapi. Aꞌnaquënso nipirinhuëꞌ nomironën niacotapi.

Apocalipsis 21:18

Pairasoꞌ naꞌpi paꞌton ninin quëran nipi. Caspi itopisoꞌ. Ina ninanosoꞌ oro quëransáchin ninin. Oro niponahuëꞌ, iꞌhua iꞌhuanánshin quënantërëꞌ.

Apocalipsis 4:6

Shira notënanquë panca sono pochin yaꞌhuërin. Co iꞌsha pochinhuëꞌ. Isihuico pochin niponahuëꞌ, acopoquë huarëꞌ quënantërëꞌ. Yosë shiranën tahuirinquë catapini maꞌsharoꞌsa pochin nininsoꞌ yaꞌhuëpi, nanpirihuanpisoꞌ. Naꞌa yaꞌpirahuanatonaꞌ, itoparan itoparan quënantopi.

Apocalipsis 5:8

Nani maꞌpahuachina, maꞌsharoꞌsa pochin nininsopita isonahuatonaꞌ, Carniroaꞌhua chinotapi. Ansianoꞌsantaꞌ isonahuatonaꞌ, ina chinotapi. Aꞌnaya aꞌnaya arparoꞌsaꞌ sëꞌquëpi piꞌniatonaꞌ chinotacaiso marëꞌ. Sënaontaꞌ aꞌnaya aꞌnaya quëpapi, oro quëran nininsoꞌ. Inaquë yonarin pochin pimóchin nininsoꞌ yaꞌhuërin tomontacaso marëꞌ. Tomontërinso pochin imarëhuasopita Yosë nontërëhuaꞌ. “Nontohuatëhuaꞌ, noya nataninpoaꞌ,” taꞌtonaꞌ, Yosë chinotapi.