Apocalipsis 14:2 - Chayahuita (Shahui)

² Ina quëran inápaquë chiníquën tënëntërinsoꞌ natanahuë. Panca soꞌpora pochin tënëntarin. Chiníquën huira pochin natanpirahuëꞌ, arparoꞌsaꞌ piꞌniatonaꞌ, naporapi.

Apocalipsis 14:2 ပူးပေါင်းရင်းမြစ်များ

2 Samuel 6:5

Tapisoꞌ, aꞌnapitarë chachin imatatonaꞌ, cantararapi. Nansararapi. Yaꞌipi cancanëna quëran naporarapi. Aꞌnaquën nisha nisha nininsopita piꞌnirarapi: Arpa, nisha quitara, pantirita, pirinan, huaꞌna shari shari, inapita piꞌnirasoiꞌ, naporarapi.

Salmos 33:2

Arpa piꞌniatoma Sinioro chinotocoꞌ. “Yosparinquën Sinioro,” taꞌtoma piꞌnicoꞌ. Shoncarin arpanta piꞌniatomaꞌ, cantanën cantacoꞌ.

Salmos 43:4

Artaronënquë huarëꞌ canconahuato chinotaranquën. Arpa piꞌniato: ‘Yosparinquën,’ itaranquën. Quëmasáchin yonquiatënquën capa cancantërahuë,” itërahuë.

Salmos 93:4

Quëmaso napoaponahuëꞌ, inápaquë yaꞌhuëran. Marëroꞌsa coꞌsacaitatona tënëntopi quëran chini chiníquën nanantëran.

Éxodo 19:16

Moisësë naporinso chachin naporo tahuëri nanihuachina, tashiramiachin chiníquën oꞌcoritaton, huirátarin. Yaráton chitoro nininso motopi imotërin. Naporahuaton carniro pomon chiníquën pihuipisoꞌ natanpi. Ina natanatonaꞌ, yaꞌipi israiroꞌsa yaꞌhuëpiquë paꞌyanpi. Paꞌyanatona ropa ropatapi.

Éxodo 20:18

Noninsoꞌ, huiratërinsoꞌ, carniro pomon pihuipisoꞌ, inapita natanahuatonaꞌ, israiroꞌsasoꞌ paꞌpi tëꞌhuatopi. Oꞌcoriꞌ, pën, conaiꞌ, inapitanta quënanatonaꞌ, paꞌpi paꞌyanpi. Paꞌyanatona co nohuantopihuëꞌ yaꞌcaritacaisoꞌ.

Zacarías 9:14

Piyapinënpita ahuëtacaiso marëꞌ paꞌpachinara, inapita yaꞌhuëapiso aipi Sinioro yaꞌnopon. Shinërënënpita quëran inantohuachin, oꞌcori pochin nisharápon. Tronpita pihuirahuaton, pëꞌnatë parti quëran ihuan huëꞌninso huáncana huëcapon.

1 Corintios 13:1

Nisha nananquë nonpiso pochin nitononarihuarahuëꞌ, co piyapiꞌsaꞌ nosorohuatëhuahuëꞌ, topinan quëran nonarihuaꞌ. Anquëni pochachin nonarihuarahuëntaꞌ, co nosorohuatëhuahuëꞌ, huaꞌna, canpana inapita irininso pochin Yosë nataninpoaꞌ.

Apocalipsis 1:10

Iꞌhua Tomio tahuëri Yosë chinotasoco, Ispirito Santo nohuanton, huaꞌnarëso pochin quënanahuë. Co huëꞌëpirahuëꞌ, pinëhuë quëran chiníquën nontërinco, natanahuë. Tronpita pihuirinso pochin natanahuë.

Apocalipsis 1:15

Nantëontaꞌ shaꞌpi huaꞌna pënquë aꞌpërëso pochin huënaráchin yaꞌnorin. Naporahuaton, chiníquën nonin. Panca soꞌpora tënëntërinso pochin natanahuë.

Apocalipsis 11:12

Naporoꞌ inápa quëran nontërinsoꞌ natanapi. —¡Isëquë huëntaco huachi! itarin. Napotohuachina, inimiconënpitari nicasoiꞌ, catoyaꞌpisoꞌ inápaquë paantapi. Chitororë chachin paantapi.

Apocalipsis 11:15

Ina quëran yaꞌnatontarinsoꞌ anquënintaꞌ, pihuiantarin. Pihuihuachina, inápaquë chiníquën nonsapi, natanahuë. “Iráca quëra huarëꞌ naꞌa copirnoroꞌsaꞌ yaꞌhuëpirinahuëꞌ, iporasoꞌ Yosëri yaꞌipiya huaꞌanëntarin. Quisocristorë chachin huaꞌanëntomiatarin. Co onporontaꞌ pipiapihuëꞌ,” tosapi.

Apocalipsis 15:2

Coꞌhuara anquëniroꞌsaꞌ paꞌshatërasoihuëꞌ, inápaquë panca sonoꞌ niantarahuë. Isihuico pochin niponahuëꞌ, huënaratarin. Pën pochin yaꞌnorin. Sono yonsanquë naꞌa piyapiꞌsaꞌ quënanahuë, maꞌsha paꞌpi tëꞌhuatoroꞌ nininsoꞌ minsëpisopita. Isoroꞌpaquë yaꞌhuaponaꞌ, co mamanshinën moshapihuëꞌ. Co marcanën niacotopihuëꞌ. Parisitaponaraihuëꞌ: “Yosëíchin imarai,” taꞌtonaꞌ, imamiatopi. Iporasoꞌ Yosëꞌpaꞌ yaꞌhuatonaꞌ, noya yaꞌhuërapi. Arparoꞌsaꞌ Yosëri quëtërin piꞌniatonaꞌ cantacaiso marëꞌ.

Apocalipsis 18:22

Iráca naꞌa arparoꞌsaꞌ piꞌnipi. Pirinanoꞌsaꞌ, tronpitaroꞌsaꞌ, inapitantaꞌ pihuipirinahuëꞌ, iporasoꞌ co huachi mosica natanapihuëꞌ. Co huachi sacatoroꞌsaꞌ inaquë sacatapihuëꞌ. Co huachi cosharoꞌ nipisoꞌ natanapihuëꞌ.

Apocalipsis 5:8

Nani maꞌpahuachina, maꞌsharoꞌsa pochin nininsopita isonahuatonaꞌ, Carniroaꞌhua chinotapi. Ansianoꞌsantaꞌ isonahuatonaꞌ, ina chinotapi. Aꞌnaya aꞌnaya arparoꞌsaꞌ sëꞌquëpi piꞌniatonaꞌ chinotacaiso marëꞌ. Sënaontaꞌ aꞌnaya aꞌnaya quëpapi, oro quëran nininsoꞌ. Inaquë yonarin pochin pimóchin nininsoꞌ yaꞌhuërin tomontacaso marëꞌ. Tomontërinso pochin imarëhuasopita Yosë nontërëhuaꞌ. “Nontohuatëhuaꞌ, noya nataninpoaꞌ,” taꞌtonaꞌ, Yosë chinotapi.

Apocalipsis 6:1

Yosë nohuanton, huaꞌnarëso pochin niantarahuë. Quirica soꞌnanpinan nininsoꞌ quënantarahuë, canchisë toꞌniquë achinpitërinsoꞌ. Naporoꞌ Carniroaꞌhuari yaꞌnan achinpitërinsoꞌ iꞌshotërin. Iꞌshotohuachina, aꞌna maꞌsha pochin nininsoꞌ chiníquën nonin, huira pochin natanahuë. —¡Huëquë huachi! itërin.

Apocalipsis 8:7

Yaꞌnan pihuirinsoꞌ irinpachina, Yosë nohuanton, ocaiꞌ, pën, inapita inápa quëran anotarin. Huënairë chachin anotarin. Pancana huiquitarin. Patoma pochin huiquitarin. [Cacharonquë un tercero, topisoꞌ.] Nararoꞌsaꞌ, panpatëroꞌ inapitanta napochachin huiquitarin.