Apocalipsis 14:10 - Chayahuita (Shahui)

¹⁰ Chiníquën noꞌhuitënquëmaꞌ, main huino oꞌshitërëso pochin anaꞌintarinquëmaꞌ. Parisitopiquë aꞌpahuachinquëmaꞌ, pënquë parisitaramaꞌ. Carniroaꞌhua, anquëniroꞌsaꞌ inapita niꞌtërantapaquë noꞌtëquën anaꞌintarinquëmaꞌ.

Apocalipsis 14:10 ပူးပေါင်းရင်းမြစ်များ

Génesis 19:24

Naporoꞌ Siniorori, pën oꞌnan pochin aꞌpaimarin. Shaꞌpi moꞌshirë chachin, aꞌpaimarin. Sotoma, Comora, inapita ninanoroꞌsa aipi aꞌpaimarin.

Salmos 37:34

Quëmanta Sinioro natëton ina ninaquëꞌ. Inapohuatan Sinioro noya acoarinquën. Inari chachin iso noꞌpaꞌ huaꞌanëntacaso marëꞌ quëtarinquën. Inpioroꞌsa ataꞌhuantërinsoꞌ, quëmaora yaꞌpiran quëran chachin niꞌsaran.

Salmos 73:10

Napoaton naꞌa piyapiꞌsari paꞌyatopi. Yosë piyapinënpitanta inahua pochachin yacancantopi.

Salmos 91:8

Canpoara yaꞌpiranpoa quëran chachin co noyahuëꞌ nipisopita Yosëri anaꞌintërinsoꞌ niꞌsarëhuaꞌ.

Habacuc 2:16

Naporamaso marëꞌ co huachi piyapiꞌsa noya nicainëmasoꞌ yaꞌhuëaponhuëꞌ. Aꞌnapita niꞌtonënquë canpitanta taparo nisaramaꞌ. Sinioro chachin canpitanta noniatë pochin nitohuachinquëmaꞌ, co marcahuanhuëꞌ ninamasoꞌ, aꞌnapita aꞌnotarin: ‘Quiyasoꞌ chini chiníquën nanantërai,’ topiramahuëꞌ, paꞌpi taparo nitarinquëmaꞌ.

Mateo 20:22

—Canpitasoꞌ co yaꞌipi nitochátëraramahuëꞌ niꞌton, co noꞌtëquën yonquiramahuëꞌ. Máin oꞌorëso pochin chiníquën parisitarahuë. Canpitantaꞌ aparisitohuachinënquëmaꞌ, ¿ahuantapomaꞌ ti? itërin. —Ahuantarai, topi cato chachin.

Mateo 25:41

Ahuënanëhuë quëran acorahuësopitaso nipirinhuëꞌ, shaꞌhuitarahuë: ‘Yaꞌipinquëmaꞌ paco huachi. Tata Yosë co noyahuëꞌ niꞌninquëmaꞌ niꞌton, anaꞌintarinquëma huachi. Panca pën nani acorin sopairoꞌsaꞌ anaꞌintacaso marëꞌ. Inaquë pën co onporontaꞌ tacopiarinhuëꞌ. Inaquë pacoꞌ canpitantaꞌ.

Mateo 26:39

Amashamiachin paꞌsahuaton, isonconin. Noꞌpaquë huarëꞌ monshomarahuaton, Yosë nontërin: “Quëma nohuantohuatan Tata, nichaꞌëco ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantopirahuëꞌ, quëma nohuantohuatan, noya, tënahuë. Noꞌtëquën yanatëranquën,” itërin.

Marcos 8:38

Ipora tahuëriꞌsaꞌ yaꞌhuëpisopita co noyahuëꞌ nipi. Nitëhuananpitopisopita pochin cancantopi. Tapayatomaco aꞌpohuatamaco, aꞌna tahuëri carimantaꞌ tapayatënquëmaꞌ, aꞌpoaranquëmaꞌ. Nanamëhuë aꞌpohuatamaꞌ, carimantaꞌ oꞌmantahuato, aꞌpoaranquëmaꞌ. Yosë quëran quëmapico niꞌto, aꞌna tahuëri oꞌmantararahuë. Tatahuë pochin huënaratahuato, noya anquëniroꞌsapitaroꞌco oꞌmantararahuë, itërin.

Hechos 10:22

—Capitan Cornirio aꞌparincoi. Inasoꞌ nóya quëmapi. Nisha piyapi niponahuëꞌ, Yosë chinotërin. Yaꞌipi cotioroꞌsari noya niꞌpi. Iꞌhuara yaꞌhuasoꞌ, aꞌnanaya anquëniri yaꞌnotimarahuaton, shaꞌhuitimarin. “Piyapiꞌsaꞌ aꞌpaquëꞌ Pitro macontaꞌinaꞌ. Ina aꞌchintarinquën, noya natanquëꞌ,” itërin niꞌton, aꞌparincoi huëꞌnai, itërin.

2 Tesalonicenses 1:7

Quisocristo oꞌmantahuachin, co huachi parisitaramahuëꞌ. Noya yaꞌhuaramaꞌ. Quiyantaꞌ ipora aparisitapirinacoihuëꞌ, naporoꞌ yaꞌipi imarëhuasopita nóya cancantarihuaꞌ. Sinioro Quisocristo chachin inápa quëran oꞌmantararin. Pën huënaratërinso huáncana yaꞌnoarin. Anquëniroꞌsantaꞌ chiníquën nanantatonaꞌ, oꞌmantararin. Inapitarë chachin oꞌmantararin.

Judas 1:7

Iráca Sotomaquë yaꞌhuëpisopitantaꞌ paꞌpi co noyahuëꞌ yonquipi. Monshihuanacaisoáchin cancantopi. Aꞌnaratipita taparoꞌ nipi. Co ina pochin nicacasohuëꞌ nipirinhuëꞌ, napopi. Ina marëꞌ Yosëri chiníquën anaꞌintërin. Pën inápa quëran aꞌpaimarin ahuiquitacaso marëꞌ. Sotoma, Comora, inapita huiquitopi. Yaꞌcariya ninanoroꞌsantaꞌ huiquitopi. Ayonquiinpoaso marëꞌ ninshitërinpoaꞌ. Inapita yonquiatëhuaꞌ, “Aꞌna tahuëri oshahuanoꞌsaꞌ pënquë parisitomiatapi huachi,” tënëhuaꞌ.

Apocalipsis 15:7

Ina marëꞌ canchisë minëroꞌsa pochin nininsoꞌ yaꞌhuërin, oro quëran nipisoꞌ. Aꞌnaraꞌ maꞌsha pochin nininsoꞌ minëroꞌsaꞌ masahuaton, anquëniroꞌsaꞌ quëtërin. “Paatomaꞌ, minëroꞌsaquë yaꞌhuërinsoꞌ tëꞌyanantocoꞌ. Aꞌnaya aꞌnaya tëꞌyanantohuatamaꞌ, Yosëri chiníquën anaꞌintarin huachi,” taꞌton, aꞌnaya aꞌnaya quëtërin. Yosësoꞌ co onporontaꞌ chimianinhuëꞌ, niꞌsárinpoaꞌ.

Apocalipsis 16:19

Co Yosë natëpisopitahuëꞌ yaꞌhuëpiquë nocharotarin. Panca ninanoꞌ niponahuëꞌ, huëncharoaton, cararoꞌtë huarëꞌ niacoarin. Nisha nisha ninanoroꞌsaquë taꞌhuantapi. Co Yosëri naniantërinhuëꞌ anaꞌintacasoꞌ. Papironiaquë naꞌa piyapiꞌsaꞌ yaꞌhuëpirinahuëꞌ, co noyahuëꞌ nicacaisoráchin yonquipi niꞌton, anaꞌintërin. Inapochachin aꞌna tahuëri chiníquën noꞌhuiton, ataꞌhuantarin.

Apocalipsis 18:3

Papironiaroꞌsari notohuaroꞌ piyapiꞌsaꞌ anishacancantopi. Ina pochin cancantatonaꞌ, copirnoroꞌsaꞌ, piyapinënpita, inapita co noyahuëꞌ nisapi. Monshihuaninso pochin nicatonaꞌ, Yosë naniantopi. Maꞌhuanoꞌsantaꞌ inaquë paꞌanatonaꞌ, nani maꞌsha canapirinahuëꞌ,” tënin anquëni.

Apocalipsis 18:6

Aꞌnapita aparisitopi niꞌton, noꞌtëquën anaꞌintacasoꞌ yaꞌhuërin. Naꞌcon naꞌcon iꞌhuërëtacasoꞌ yaꞌhuërin. Paꞌpi co noyahuëꞌ nipi.

Apocalipsis 19:15

Quëmapi quëchitërinsoꞌ nanamën quëran sahuëni pochin nininsoꞌ yaꞌhuëtërin. Chiníquën nanantaton, nanamën quëran chachin inimiconënpita minsëarin. Noninsoꞌ sahuëni pochin nicaton, topinan noncharapirinhuëꞌ, co noyahuëꞌ nipisopita minsëarin. Piyapiꞌsaꞌ noꞌtëquën anaꞌintarin. Yosëri noꞌhuirin niꞌton, oparoꞌsaꞌ toꞌpoirëso pochin oshahuanoꞌsaꞌ chiníquën anaꞌintarin.

Apocalipsis 19:20

Quira nipachinara, huiri cahuario aipi huënsërinsoari canarin. Canarahuaton, maꞌsha paꞌpi tëꞌhuatoroꞌ nininsoꞌ masarin. Nonpin nanan pënëntonaꞌpintaꞌ, masarin. Inasoꞌ, sacaiꞌ nininsoꞌ nicaton, notohuaroꞌ piyapiꞌsaꞌ nonpintërin maꞌsha paꞌpi tëꞌhuatoroꞌ nininsoꞌ imacaiso marëꞌ. Marcanën niacotahuatonaꞌ, mamanshinën moshapirinahuëꞌ, minsëarin huachi. Minsërahuaton, cato chachin masahuaton, anaꞌintomiatarin. Nanpirapirinahuëꞌ, parisitopiquë tëꞌyatarin huachi. Inaquë panca sono shaꞌpimoꞌshirë chachin pën tënëntápon. Co onporontaꞌ pipiapihuëꞌ.

Apocalipsis 20:10

Ina quëran sopai anaꞌintomiatarin. Huaꞌquiꞌ piyapiꞌsaꞌ nonpintërin niꞌton, Yosëri anaꞌintarin. Panca sono shaꞌpimoꞌshirë chachin pën orotërinquë tëꞌyatarin. Co onporontaꞌ pipiarinhuëꞌ. Inaquë maꞌsha paꞌpi tëꞌhuatoroꞌ nininsontaꞌ parisitarin. Nonpin nanan pënëntonaꞌpintaꞌ inaquë chachin parisitarin. Tahuërirë chachin, tashirë chachin chiníquën parisitapi. Co onporontaꞌ sanoarinhuëꞌ. Co onporontaꞌ pipiapihuëꞌ.

Apocalipsis 20:14

Chimirin, chiminpisopita yaꞌhuëpiquë, inapita panca sono pën orotárinquë tëꞌyatapi. Inaquë parisitomiatáponaꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.