Apocalipsis 13:15 - Chayahuita (Shahui)

¹⁵ Ina quëran aquëtë chachin piyapiꞌsaꞌ nonpintarin. Ina nohuanton, mamanshi nanpirinso pochin yaꞌnoarin. Noninso pochin natanapi. “Insosona co moshahuachincohuëꞌ tëpacoꞌ,” tosarin.

Apocalipsis 13:15 ပူးပေါင်းရင်းမြစ်များ

Génesis 2:7

Naporoꞌ Sinioroso Yosë niꞌton, yaniroꞌpaꞌ amocan quëran quëmapi ninin. Nani nisahuaton, nanpicaso marëꞌ pihuinitërin. Inapotohuachina, niirahuaton nanpirin huachi.

Salmos 115:5

Inapitasoꞌ nanamëna yaꞌhuëtaponaraihuëꞌ, co nanitopihuëꞌ nonacaisoꞌ. Yaꞌpirahuanponaraihuëꞌ, co nanitopihuëꞌ quënantacaisoꞌ.

Daniel 7:25

Yosëso chini chiníquën nanantopirinhuëꞌ, noꞌhuipon. Yosë piyapinënpitantaꞌ, shitiquiapon. Yosë pënëntërinsopita anishatacaso camaitapon. Yosë chinotatona niyontonacaiso tahuëriꞌsantaꞌ, inapotapon. Yosë piyapinënpita quëran huarëꞌ, cara piꞌipi miria nohuantërinsoꞌ nitapon.

Habacuc 2:19

Mamanshi nara quëranhuë nipon, naꞌpi quëranhuë nipon ninamasoꞌ nontatomaꞌ: ‘Nichaꞌëcoi quiyantaꞌ,’ itëramaꞌ. Napotopiramahuëꞌ, ¡inapitaso co manta aꞌpaniponquëmahuëꞌ! Oro quëran, prata quëran inaquëranpita pashitopirinahuëꞌ, co manta pacaritaponahuëꞌ. Naporamaso marëꞌ carinquëma anaꞌintaranquëma niꞌton, ¡maꞌhuantacha nisarama paya!

Santiago 2:26

Huaꞌyanënpoꞌ capa nipachina, co nanpirëhuëꞌ. Inapochachin topinan quëran nonpatëhuaꞌ, co noya cancantohuatëhuahuëꞌ, co Yosë natërëhuahuëꞌ. Chimipi pochin cancantatëhuaꞌ, co tëhuënchachin imarëhuahuëꞌ.

Apocalipsis 13:1

Ina quëran huaꞌnarëso pochin niantarahuë. Aꞌna maꞌsha paꞌpi tëꞌhuatoroꞌ nininsoꞌ marë quëran pipiarin. Canchisë motohuan nisahuaton, shonca pomonën yaꞌhuëtërin. Aꞌnaya aꞌnaya pomonënquë yancotëꞌ yaꞌhuëtërin. Huaꞌan pochin chiníquën nanantërin niꞌton, naporin. Motënaquë nininënpita nani ninshitërin, Yosë pinorinsoꞌ. “Yosë quëran chini chiníquën nanantërahuë,” taꞌton, ninshitërin.

Apocalipsis 13:12

Inantaꞌ chiníquën nanantapon. Chiníquën nanantaton, yaꞌipi piyapiꞌsaꞌ camaiarin maꞌsha marë quëran pipirinsoꞌ chinotacaiso marëꞌ. Inasoꞌ motën ahuëtohuachinara, chiminatë pochin niponahuëꞌ, noyatantarinsoꞌ niꞌton, piyapiꞌsari chinotapi.

Apocalipsis 13:14

Nisha nisha acoarin, sacaiꞌ nininsoꞌ. Maꞌsha paꞌpi tëꞌhuatoroꞌ nininsoꞌ niꞌtonënquë naporin. Piyapiꞌsari niꞌpachinaꞌ: “Tëhuënchachin inasoꞌ Yosë,” tosapi. Notohuaroꞌ piyapiꞌsaꞌ nonpintarin. Ina quëran itapon: “Panca mamanshi niahuaꞌ. Sahuëniquë ahuëatonaꞌ shitëpapirinahuëꞌ, noyataantarinsoꞌ nonanatëhuaꞌ chinotahuaꞌ,” itohuachinaꞌ, nisapi.

Apocalipsis 14:11

Co onporontaꞌ pën tacopiaponhuëꞌ. Inaquë conaintaꞌ tomontápon. Parisitápona. Co sanoarinhuëꞌ. Insopitasona maꞌsha paꞌpi tëꞌhuatoroꞌ nininsoꞌ natëtonaꞌ, mamanshinën moshahuachinaꞌ, tahuërirë chachin, tashirë chachin chiníquën parisitáponaꞌ. Co marcanën niacotacasoꞌ yaꞌhuërinhuëꞌ, tënin.

Apocalipsis 14:9

Ina piquëran aꞌna anquënintaꞌ paaton, chiníquën nonsarin. —Ama maꞌsha paꞌpi tëꞌhuatoroꞌ nininsoꞌ natëcosohuëꞌ. Ama mamanshinën moshacosohuëꞌ. Tëꞌyamaquë marcanën yaacotarinquëmaꞌ huaꞌanëntinquëmaso marëꞌ. Ama natëcosohuëꞌ. Ina chinotohuatamaꞌ, Yosë anaꞌintarinquëmaꞌ.

Apocalipsis 16:2

Ina natanahuaton, aꞌnaraꞌ paꞌnin. Isoroꞌpaꞌ nocorahuaton, minëquë yaꞌhuërinsoꞌ tëꞌyanantërin. Tëꞌyanantohuachina, naꞌa piyapiꞌsaꞌ panca taꞌtarapi. Sëncopi pochin pipitëraꞌpiaponaꞌ. Co noyatochináchinhuëꞌ nisapi. Maꞌsha paꞌpi tëꞌhuatoroꞌ nininsoꞌ imapisopita parisitapi. Marcanën niacotopi niꞌton, Yosë nohuanton, taꞌtaráchin nisapi. Mamanshinëntaꞌ moshapi niꞌton, parisitáponaꞌ. Aꞌna tahuëri maꞌsha onpocasoꞌ ninoton, aꞌnotërinco, niꞌnahuë.

Apocalipsis 16:5

Napohuachina, anquëni iiꞌ aꞌpairinsoari Yosë nontaton tapon: “Noꞌtëquën Sinioro anaꞌintaran. Iráca quëra huarëꞌ yaꞌhuaton, ipora huantaꞌ nanpiaran. Noyasáchin ninan.

Apocalipsis 17:14

Inapitasoꞌ Carniroaꞌhua yaminsëatonaꞌ, quira nisapirinahuëꞌ, co nanitapihuëꞌ minsëcaisoꞌ. Inari minsëapon. Inasoꞌ Quisocristo chachin. Chini chiníquën nanantarin niꞌton, yaꞌipiya huaꞌanëntarin. Inasáchin natëcasoꞌ yaꞌhuërin. Piyapinënpitari imasapi. Yosëri huayonin niꞌton, natëmiatapi,” itërinco anquëni.

Apocalipsis 17:17

Yosë nohuanton, copirnoroꞌsaꞌ yonquiapi maꞌsha tëꞌhuatoroꞌ nininsoꞌ natëcaiso marëꞌ. Napopianachin yonquiatonaꞌ, co noya sanapihuëꞌ nininsoꞌ ataꞌhuantapi. Yosë nohuantërinso chachin nisapi.

Apocalipsis 17:6

Tëhuënchachin ina sanapi paꞌpi co noyahuëꞌ cancantërin. Quisoso imapisopita co quëꞌyarinhuëꞌ. “Quisoso imarai,” topachinara, atëpatërin. Notohuaroꞌ atëpatahuaton, noꞌpirinso pochin paꞌyatërin. Ina nicato, panca paꞌyanahuë. Ina quëran anquëni itërinco:

Apocalipsis 18:20

Yaꞌipi inápaquë yaꞌhuëramasopitaso nipirinhuëꞌ, ama ina marëꞌ sëtocosohuëꞌ. Imaramaꞌ niꞌton, noya cancantocoꞌ. Aparisitopirinënquëmahuëꞌ, nani Yosëri anaꞌintërin huachi. Ina marëꞌ Quisoso caꞌtaninsopita, pënëntonaꞌpiroꞌsaꞌ, inapitantaꞌ noya cancanchinaꞌ.

Apocalipsis 18:24

Iráca quëran huarëꞌ inaquë Yosë imapisopita, pënëntonaꞌpiroꞌsaꞌ, inapita tëpapi. Ina marë antaꞌ chiníquën anaꞌintarin huachi.

Apocalipsis 19:20

Quira nipachinara, huiri cahuario aipi huënsërinsoari canarin. Canarahuaton, maꞌsha paꞌpi tëꞌhuatoroꞌ nininsoꞌ masarin. Nonpin nanan pënëntonaꞌpintaꞌ, masarin. Inasoꞌ, sacaiꞌ nininsoꞌ nicaton, notohuaroꞌ piyapiꞌsaꞌ nonpintërin maꞌsha paꞌpi tëꞌhuatoroꞌ nininsoꞌ imacaiso marëꞌ. Marcanën niacotahuatonaꞌ, mamanshinën moshapirinahuëꞌ, minsëarin huachi. Minsërahuaton, cato chachin masahuaton, anaꞌintomiatarin. Nanpirapirinahuëꞌ, parisitopiquë tëꞌyatarin huachi. Inaquë panca sono shaꞌpimoꞌshirë chachin pën tënëntápon. Co onporontaꞌ pipiapihuëꞌ.

Apocalipsis 20:4

Ina quëran huaꞌnarëso pochin niantarahuë. Naꞌa piyapiꞌsaꞌ quënanahuë. Yosëri nani acorin coisë pochin nicacaiso marëꞌ. Aꞌnapitantaꞌ niꞌnahuë. Isoroꞌpaquë yaꞌhuaponaꞌ, Quisosoíchin imapi. Yosë nanamën aꞌchinpi niꞌton, tëpapi. Co maꞌsha paꞌpi tëꞌhuatoroꞌ nininsoꞌ chinotopihuëꞌ. Co nonanpisoꞌ moshapihuëꞌ. Co marcanën niacotopihuëꞌ. “Quisosoíchin imarai,” topachinara, nishitëconotëraꞌpiapi. Inapotopirinahuëꞌ, Quisosori ananpitaantarahuaton, ichihuaꞌanëntarin. Huaranca piꞌipi huaꞌanëntapi.