Apocalipsis 12:1 - Chayahuita (Shahui)

¹ Ina quëran Yosë nohuanton, huaꞌnarëso pochin niantarahuë ayonquiinpoaso marëꞌ. Aꞌna sanapi inápaquë quënanahuë. Aꞌmorinsoꞌ huënaráchin huënaráchin. Piꞌi pochin aꞌpinin. Nantëanaquë yoqui yaꞌhuërin. Shonca catoꞌ tayoraroꞌsari yancotë pochin motën tahuitërin.

Apocalipsis 12:1 ပူးပေါင်းရင်းမြစ်များ

Salmos 104:2

Quëmasoꞌ noyasáchin nicaton, tahuëri pochin cancantëran. Nëꞌmëtëquë paꞌshintërëso pochin piꞌiroꞌtënta acoran.

Salmos 84:11

Siniorosoꞌ Yosë niꞌton, paꞌpoyarinpoaꞌ. Aꞌpintatë pochin catahuarinpoa noꞌtëquën yonquicasoꞌ. Noyasáchin nipatëhuaꞌ, nosororinpoaꞌ. Noya nicatonpoaꞌ, noya nininsoꞌ co apiratërinpoahuëꞌ.

Isaías 61:10

¡Sinioro yonquiato, capa cancantërahuë! Inasoꞌ Yosënëhuë niꞌton, acapacancaninco. Nichaꞌërinco niꞌton, naporahuë. Noꞌtëquën yonquinaꞌpi pochin acorinco. Saꞌanaꞌpi yancotë ayancotopiso pochin ninahuë. Nanonta soꞌyacaso marëꞌ nisha nishaquë nitaparinso pochin ninahuë.

Zacarías 9:16

Maton maꞌsharoꞌsari ohuica huëntonën yamapachina, huaꞌanëni paꞌpoyarinso pochin ina tahuëri nanihuachin, Sinioronta piyapinënpita nichaꞌësarin. Ina quëran yaꞌhuëpiquë chachin yaꞌhuëantahuachinaꞌ, noya noya yaꞌhuëantaponaꞌ. Yancotë paꞌton naꞌpiraꞌhuaroꞌsa acotohuachinara, huënáporinso pochin noya noya yaꞌnoponaꞌ.

Malaquías 4:2

Noya nicatomaco natëramacosopitaso nipirinhuëꞌ, noya coisë pochin ninahuësoꞌ, niꞌsaramaꞌ. Piꞌi aꞌpinpachina aꞌninquëchin maꞌsha quënanëso pochin niꞌsaramaꞌ. Naporoꞌ canpitaso nichaꞌësaranquëma niꞌton, capa cancantaramaꞌ. Ohuacaꞌhuaroꞌsa oncorapipi quëran iꞌsohuatohuachinara, niirëꞌnachin taꞌapiso pochin cancantaramaꞌ.

Mateo 12:38

Ina quëran parisioroꞌsaꞌ, cotio maistroꞌsaꞌ, inapita huëꞌpachinara, Quisoso nontiipi: —Yosë pochin niquëꞌ niꞌiinquën. Ina niꞌpatoi, natëarainquën, itiipi.

Mateo 24:30

Naporoꞌ oꞌmantararahuë. Yosë quëran quëmapico niꞌto, inápa quëran oꞌmantararahuë huachi. Nisha nisha nananquë nonpisopita: ‘Anaꞌintarinpoaꞌ,’ taꞌtonaꞌ paꞌyanapi, naꞌnëapi, napoapi. Chiníquën nanantato, chitoroꞌ huáncana oꞌmantararahuë, niꞌsarinaco. Huënaráchin huënaráchin yaꞌnoarahuë.

Marcos 13:25

Naporahuaton, naꞌa tayoraroꞌsantaꞌ anotarin. Yaꞌipi inápaquë yaꞌhuërinsopitantaꞌ nacon nacontapon.

Lucas 21:11

Aꞌna parti aꞌna parti panca ocohua paꞌsarin. Cosharori pahuantohuachinaꞌ, piyapiꞌsaꞌ tanari tiquirarin. Nisha nisha parti chiníquën canio matarin. Naꞌa taquirapi. Yosë nohuanton, nisha nisha maꞌsha inápaquë yaꞌnoarin. Quënanahuatonaꞌ, piyapiꞌsaꞌ paꞌyanapi. Yaꞌipiya tëꞌhuatapi. Ayaroꞌ tahuëri yaꞌcaritohuachin, ayonquicaiso marëꞌ napoarin.

Lucas 21:25

Ina quëran Yosë nohuanton, piꞌi tashiarin. Co huachi yoqui aꞌpianinhuëꞌ. Tayoraroꞌsaꞌ inápa quëran anotarin. Marëntaꞌ panca coꞌsacaitapon niꞌton, tënëntapon. Yaꞌipi piyapiꞌsaꞌ paꞌyanaponaꞌ.

Juan 3:29

Niꞌcoꞌ. Quëmapi saꞌapachina, amiconëontaꞌ noya cancantërin. Noya nipayapi niꞌton, naporinsoꞌ natantaton, nóya cancantërin. Inapochachin cantaꞌ ninahuë. Naꞌcon piyapiꞌsaꞌ Quisoso imasapi niꞌton, nóya cancantërahuë.

Hechos 2:19

Inápaquë nani maꞌsha acoarahuë. Piyapiꞌsaꞌ quënanpachinaꞌ, paꞌyanapi. Isoroꞌpaquëntaꞌ, maꞌsha acoarahuë piyapiꞌsaꞌ yonquicaiso marëꞌ. Huënaiꞌ, pën, conaiꞌ tomontarinsoꞌ, inapita niꞌsapi, tënin Yosë.

Romanos 13:14

Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.

Romanos 3:22

Quisocristo imapatëhuaꞌ, Yosë noya niꞌsarinpoaꞌ. Insosona natëhuachin, anoyacancantarin. Co nisha nisha nontërinpoahuëꞌ.

2 Corintios 11:2

Yosë nohuanton, naꞌcon nosororanquëmaꞌ. Nosoroatënquëmaꞌ, aꞌpitëranquëmaꞌ. Co nohuantërahuëꞌ nisha cancantacamasoꞌ. Nanon soꞌyarinso pochin ninin. Niꞌcoꞌ. Quëmapiri mapachina, soꞌináchin yonquicasoꞌ yaꞌhuërin. Inapochachin carinquëmantaꞌ aꞌchintëranquëmaꞌ Quisocristoíchin yonquicamaso marëꞌ.

Gálatas 3:27

Yaꞌipinpoaꞌ Quisocristo natëhuatëhuaꞌ, huëntonënquë chachin ayaꞌconinpoaꞌ. Yaꞌconpatëhuara, “Quisocristoíchin imasarahuë huachi,” taꞌtëhuaꞌ, aporihuanëhuaꞌ. Nasha aꞌmorëso pochin ninëhuaꞌ niꞌton, Quisocristo pochin yonquiarihuaꞌ.

Gálatas 4:26

Apraan saꞌinso nipirinhuëꞌ co ina pochinhuëꞌ. Soꞌini noya noya niꞌnin. Co huaꞌanën pochin camairinhuëꞌ. Inapochachin inápaquë nasha Quirosarin yaꞌhuërin. Inatohuaꞌ co nisha nisha natëcasoꞌ yaꞌhuërinhuëꞌ. Quisocristo imapatëhuaꞌ, Sara huaꞌhuin pochin ninëhuaꞌ.

Gálatas 6:14

Caso nipirinhuëꞌ piyapiꞌsaꞌ paꞌyataꞌhuasoꞌ co yonquirahuëꞌ. Quisocristo chimininsoáchin yonquirahuë. Corosëquë chiminaton, anoyacancantërinpoaꞌ. Niꞌton, inaroꞌco chiminahuëso pochin co maꞌsha isoroꞌpaquë yaꞌhuërinsoꞌ yonquirahuëꞌ. Naporahuaton, isoroꞌparáchin paꞌyatopisopita co huachi noya niꞌninacohuëꞌ.

Efesios 5:32

Inasoꞌ sacaiꞌ nitotacasoꞌ. Caso nipirinhuëꞌ Quisocristo noya yonquirinpoasoꞌ shaꞌhuitaranquëmaꞌ. Yaꞌipi imarëhuasopita inarëꞌquënpoaꞌ nichinpitërëhuaꞌ niꞌton, aꞌnaíchin pochin Yosë niꞌninpoaꞌ.

Apocalipsis 1:20

Niꞌnansoꞌ co quëmaora nitotopiranhuëꞌ, aꞌchinchinquën nitotëquëꞌ. Canchisë sëꞌparahuan nanparinoꞌsasoꞌ noya aꞌpinin. Inapochachin canchisë ninanoroꞌsaquë imarinacosopita yaꞌhuapi. Niyontonatonaꞌ, chinotarinaco. Canchisë tayoraroꞌsaꞌ sëꞌquërahuëso pochin ansianoꞌsaꞌ aꞌpaiarahuë, itërinco.

Apocalipsis 11:19

Ina quëran huaꞌnarëso pochin nicasoco, Yosë pëinën inápaquë yaꞌhuërinsoꞌ niꞌsoatërin niꞌnahuë. Iráca chinotopiso pëi acohuana Yosë caposonën yaꞌhuërin. Ina pochin nininsoꞌ inápaquë niꞌnahuë. Nicasoco, oꞌcoritërin, tënëntërin, huiratërin, ocohua paꞌnin, ocaiꞌ anotërin, naporin. Yosë chiníquën nanantërin niꞌton, naporin.

Apocalipsis 12:3

Ina quëran aꞌna maꞌsha inápaquë yaꞌnorin, niantarahuë. Panca yaꞌhuan pochin niponahuëꞌ, ina quëran panca panca ninin. Quëhuashin nisahuaton, canchisë motën yaꞌhuëtërin, shonca pomohuanin. Aꞌnaya aꞌnaya motënquë huaꞌan pochin yancotë yancorin.

Apocalipsis 15:1

Ina quëran Yosë nohuanton, huaꞌnarëso pochin niantarahuë. Aꞌna tahuëri oshahuanoꞌsaꞌ chiníquën anaꞌintarin. Ina anitotincoso marëꞌ nani maꞌsha aꞌnotërinco. Paꞌpi huëhuëpiroꞌ niꞌnahuë. Canchisë anquëni yaꞌhuarin. Aꞌnaya aꞌnaya Yosëri yaaꞌparin piyapiꞌsaꞌ anaꞌintacaso marëꞌ. Ina nohuanton, isoroꞌpaquë nani maꞌsha onpocaisoꞌ yaꞌhuapon. Inapoaton, anaꞌintërinsoꞌ naniarin.

Apocalipsis 21:14

Pairatopisoꞌ shonca catoꞌ naꞌpiquë paquëërin, panca nininsoꞌ. Aꞌnaya aꞌnaya naꞌpiquë Quisoso caꞌtanoꞌsanënpita nininënaꞌ ninshitopi. Shonca catoꞌ yaꞌhuërin niꞌton, yaꞌipi nanitopi.

Apocalipsis 21:23

Inatohuaꞌ paꞌpatëhuaꞌ, co huachi piꞌi, yoqui, inapita nohuantarihuahuëꞌ. Tata Yosë chachin huënaráchin aꞌpintarinpoaꞌ. Carniroaꞌhuantaꞌ aꞌpintarinpoaꞌ.