Apocalipsis 11:8 - Chayahuita (Shahui)

⁸ Quirosarinquë chachin tëpararin. Inaquë iráca Quisosontaꞌ tëpapi. Inaquë yaꞌhuëpisopita paꞌpi co noyahuëꞌ cancantopi. Sotomaquë, Iquipitoquë inaquëpita yaꞌhuëpisopita pochin cancantatonaꞌ, oshahuanacaisoáchin yonquipi. Catoyaꞌpi tëpahuachinaꞌ, cachiquë tëꞌyatapi. Co paꞌpitapihuëꞌ.

Apocalipsis 11:8 ပူးပေါင်းရင်းမြစ်များ

Génesis 13:13

Inaquësoꞌ, yaꞌhuëhuanoꞌsa paꞌpi co noyahuëꞌ nipi. Inapoatona oshahuanpi niꞌton, Yosëri noꞌhuípiro niꞌnin.

Génesis 19:24

Naporoꞌ Siniorori, pën oꞌnan pochin aꞌpaimarin. Shaꞌpi moꞌshirë chachin, aꞌpaimarin. Sotoma, Comora, inapita ninanoroꞌsa aipi aꞌpaimarin.

Éxodo 20:2

“Ca Sinioroco huaꞌanëntaranquëmaꞌ. Iquipitoquë chiníquën asacatopirinënquëmahuëꞌ, nani ocoiranquëma huachi. Apira noya natëamacoso marëꞌ shaꞌhuichinquëma natancoꞌ.

Éxodo 3:7

Napoaponahuëꞌ, Yosëri aquëtë chachin shaꞌhuitaantarin: —Piyapinëhuëpita israiroꞌsa itopisoꞌ, Iquipitoroꞌsari chiníquën asacatatona aparisitomiatapi. Sacato huaꞌanoꞌsari, ahuëanaquëranchin asacatapi. Napoaton catahuaꞌhuaso marëꞌ chiníquën nontërinaco. Ina natanato, inapita nichaꞌëcaꞌhuaso marëꞌ oꞌmarahuë. Iquipitoroꞌsari huaꞌanëntopirinahuëꞌ, ocoirahuato panca noꞌpaꞌ nininquë quëparahuë. Inaquësoꞌ, co manta pahuaninhuëꞌ. Iporasoꞌ inaquë: Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, iporoꞌsaꞌ, quiposoroꞌsaꞌ, inapita yaꞌhuërapi. Ina huëntonoꞌsasoꞌ, co chinotërinacohuëꞌ.

Jeremías 23:14

Quirosarinquë pënëntonaꞌpiroꞌsa yaꞌhuërinsontaꞌ, napopisoꞌ niꞌnahuë. Paꞌpi co noyahuëꞌ nicatona saꞌina tëhuananpitopi, nonpinpi, napopi. Co noyahuëꞌ nipisopita achinicancanpi niꞌton, co insonta co noyahuëꞌ nininsoꞌ yaaꞌporinhuëꞌ. Ina pënëntonaꞌpiroꞌsaꞌ, yaꞌhuëhuanoꞌsaꞌ, inapitaso sotomaroꞌsaꞌ, comoraroꞌsaꞌ, inapita pochin niꞌnahuë.

Jeremías 26:23

Inapitari Iquipito quëran mamarahuatonaꞌ, copirnoquë quëpi. Inari atëpatahuaton, chimipiroꞌsa tëꞌyatopisoꞌ naninquë atëꞌyatërin.

Ezequiel 37:11

Naporoꞌ Sinioro nontaantatonco: “Israiroꞌsasoꞌ, nansëroꞌsa niꞌnanso pochin nipi. Ninontohuachinara: ‘Nansëquënpoasoꞌ, noyá yanirinso pochin niconin. Co huachi maꞌmarë tëranta paꞌtërëhuahuëꞌ. Co huachi nimiriohuanhuë pochin niconëhuaꞌ,’ niitopi.

Amós 4:11

Naquëranchin Sinioro taantarin: “Sotoma, Comora, inapita ninanoroꞌsaꞌ, huëhuëpiro nitato iráca ataꞌhuantërahuë. Inapochachin canpitantaꞌ, naꞌaquëma ataꞌhuantëranquëmaꞌ. Ina quëran chaꞌëramasopitasoꞌ, pënaya pën quëran ocoipiso pochin ninamaꞌ. Inapoápomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

Mateo 10:15

Tëhuënchachin itëranquëmaꞌ. Ayaroꞌ tahuëri nanihuachin, inapitasoꞌ chiníquën parisitapi. Iráca Sotomaroꞌsaꞌ, Comoraroꞌsaꞌ, inapita paꞌpi co noyahuëꞌ cancantopi niꞌton, Yosëri chiníquën anaꞌintërin. Co natërincosopitasohuëꞌ nipirinhuëꞌ, chini chiníquën anaꞌintarin huachi,” itërin Quisosori.

Hechos 9:4

Noꞌpaquë anotahuaton, inápa quëran nontërinsoꞌ natanin. “Saono, Saono, ¿onpoatontaꞌ aparisitaranco?” itërin.

Hebreos 13:12

Quisocristontaꞌ ninanoꞌ aquëcha quëparahuatonaꞌ, aparisitopi. Inaquë chiminin oshanënpoaꞌ inquitinpoaso marëꞌ. Inaora huënainën quëran anoyacancantërinpoaꞌ.

Hebreos 6:6

Quisocristo aꞌpohuachinaꞌ, ¿incaricha anoyacancantërëꞌpoiya? Co huachi nanitapihuëꞌ chaꞌëcaisoꞌ. Yosë huiꞌnin chachin canpoa marëꞌ chiminin. Co ina nohuantohuachinahuëꞌ, naquëranchin corosëquë patanantopiso pochin cancantapi. Ina aꞌpohuachinaꞌ, piyapisari Quisoso tëhuaponaꞌ.

2 Pedro 2:6

Ina quëran Sotomaquë yaꞌhuëpisopitantaꞌ anaꞌintërin. Co noyahuëꞌ cancantohuachinara, Sotoma, Comora, catoꞌ ninano chachin noyá ahuiquitërin. Yaꞌipiya chiminpi. Ayonquiinpoaso marëꞌ inapita aninshitërin. “Co noyahuëꞌ nipatëhuaꞌ, chiníquën anaꞌintarinpoaꞌ,” tënëhuaꞌ.

Judas 1:7

Iráca Sotomaquë yaꞌhuëpisopitantaꞌ paꞌpi co noyahuëꞌ yonquipi. Monshihuanacaisoáchin cancantopi. Aꞌnaratipita taparoꞌ nipi. Co ina pochin nicacasohuëꞌ nipirinhuëꞌ, napopi. Ina marëꞌ Yosëri chiníquën anaꞌintërin. Pën inápa quëran aꞌpaimarin ahuiquitacaso marëꞌ. Sotoma, Comora, inapita huiquitopi. Yaꞌcariya ninanoroꞌsantaꞌ huiquitopi. Ayonquiinpoaso marëꞌ ninshitërinpoaꞌ. Inapita yonquiatëhuaꞌ, “Aꞌna tahuëri oshahuanoꞌsaꞌ pënquë parisitomiatapi huachi,” tënëhuaꞌ.

Apocalipsis 11:13

Naporo chachin panca ocohua paꞌsarin. Paꞌpachina, notohuaroꞌ pëiroꞌsaꞌ ohuatarin. Canchisë huaranca piyapiꞌsaꞌ chiminapi huachi. Aꞌnapitasoꞌ paꞌpi tëꞌhuatapi. “Yosë nohuanton, naporin. ¡Maꞌpitacha nanitaparin paya!” tosapi.

Apocalipsis 11:9

Cara tahuëri miria pochin nisha nisha piyapiꞌsaꞌ, nisha nisha nananquë nonpisopita inapitari niꞌsapi. Nicaponaraihuëꞌ, co nohuantapihuëꞌ paꞌpitacaisoꞌ.

Apocalipsis 14:20

Niꞌcoꞌ. Oparoꞌsaꞌ mapachinara, ninano aipiran quëparapi. Inaquë panca nanpiquë toꞌpoipi. Opaiꞌ pipihuachina, quëhuain ninin. Huënai pochin yaꞌnorin. Inapochachin anaꞌintohuachina, panca huënaiꞌ paꞌsarin, niꞌnahuë. Cara pasa quiromitro pochin pancaitërinsoꞌ. Cahuario motën yaꞌcari huarëꞌ anpotarin huachi.

Apocalipsis 14:8

Ina quëran aꞌna anquënintaꞌ paaton, shaꞌhuirarin: —Iráca naꞌa oshahuanoꞌsaꞌ Papironiaquë yaꞌhuëpi. Panca ninanoꞌ nipirinhuëꞌ, Yosë nohuanton, taꞌhuantopi. Inapita pochin cancantopisopita yaꞌhuantapirinahuëꞌ, Yosëri anaꞌintarin. Paꞌpi co noyahuëꞌ yonquiatonaꞌ, naꞌa piyapiꞌsaꞌ anishacancantopi niꞌton, taꞌhuantapi. Noyá taꞌhuantapi, tënin.

Apocalipsis 16:19

Co Yosë natëpisopitahuëꞌ yaꞌhuëpiquë nocharotarin. Panca ninanoꞌ niponahuëꞌ, huëncharoaton, cararoꞌtë huarëꞌ niacoarin. Nisha nisha ninanoroꞌsaquë taꞌhuantapi. Co Yosëri naniantërinhuëꞌ anaꞌintacasoꞌ. Papironiaquë naꞌa piyapiꞌsaꞌ yaꞌhuëpirinahuëꞌ, co noyahuëꞌ nicacaisoráchin yonquipi niꞌton, anaꞌintërin. Inapochachin aꞌna tahuëri chiníquën noꞌhuiton, ataꞌhuantarin.

Apocalipsis 17:1

Ina quëran aꞌna anquëni minëꞌ sëꞌquënaꞌpi nininsoꞌ huëcapairahuatonco, itërinco: “Huëquëꞌ paꞌa piyapiꞌsaꞌ anaꞌintacasoꞌ yaꞌhuërinsoꞌ aꞌnochinquën. Pasëquë aꞌna sanapi panca iiroꞌsaꞌ aipi huënsëárin. Inasoꞌ paꞌpi co noyahuëꞌ. Monshihuanaꞌpi pochin piyapiꞌsaꞌ anishacancantërin.

Apocalipsis 17:18

Sanapi panca iiroꞌsaꞌ aipi huënsërinso pochin panca ninanoꞌ yaꞌhuapon. Yaꞌhuëhuanoꞌsaꞌ paꞌpi co noyahuëꞌ cancantapi. Naꞌa piyapiꞌsaꞌ, copirnoroꞌsaꞌ, inapita anishacancantaponaꞌ maꞌsharáchin yonquicaiso marëꞌ. Yosë aꞌpocaiso marëꞌ yanonpintapi. Nonpintápirinahuëꞌ, Yosë nohuanton, ataꞌhuantapi antaꞌ.

Apocalipsis 17:5

Nininën pochin nininsoꞌ tëꞌinquë ninshitopi. Ninshitopirinahuëꞌ, maꞌtaꞌ tapon naporinsoꞌ co piyapiꞌsaꞌ nitotopihuëꞌ. iso sanapisoꞌ papironiaquë yaꞌhuëpisopita pochin cancantërin. paꞌpi monshihuantëꞌ niꞌton, ina aꞌchinin quëran monshihuanpi. nisha nisha co noyahuëꞌ yonquipi topi, ninshitatonaꞌ.

Apocalipsis 18:10

Aquë quëran quënanpachinaꞌ, paꞌpi tëꞌhuatapi. “¡Maꞌhuantacha ninin paya! Papironia panca ninanoꞌ niponahuëꞌ, aꞌnaroáchin ataꞌhuantopi. Yosëri anaꞌintërin,” tosapi.

Apocalipsis 18:18

Pëiroꞌsaꞌ huiquitohuachinaꞌ, panca conaitarinsoꞌ quënanapi. Quënanpachinaꞌ, paꞌyanapi. “Co onporontaꞌ aꞌna ninanoꞌ iso pochin niꞌchinëhuahuëꞌ. Ma notohuaroꞌ maꞌshanënpita yaꞌhuëtopirinahuëꞌ, taꞌhuantopi,” tosapi.

Apocalipsis 18:2

Oꞌmarahuaton, chiníquën nonin. “Nani huachi Papironia taꞌhuantarin. Panca ninanoꞌ niponahuëꞌ, taꞌhuantarin. Inaquë nisha nisha sopairoꞌsaꞌ yaꞌhuaponaꞌ. Nisha nisha chanaroꞌ caꞌtëroꞌsantaꞌ inaquë paꞌsapi.

Apocalipsis 18:21

Ina quëran huaꞌnarëso pochin niantarahuë. Aꞌna anquënintaꞌ yaꞌnoantarin, chiníquën nanantërinsoꞌ. Pancaraꞌpi masahuaton, marëquë tëꞌyaitërin. “Pancaraꞌpi tëꞌyaitërahuëso pochachin Papironia taꞌhuantarin. Panca ninanoꞌ niponahuëꞌ, taꞌhuantarin. Yosëri chiníquën anaꞌintarin. Co huachi yaꞌhuaponhuëꞌ.

Apocalipsis 18:24

Iráca quëran huarëꞌ inaquë Yosë imapisopita, pënëntonaꞌpiroꞌsaꞌ, inapita tëpapi. Ina marë antaꞌ chiníquën anaꞌintarin huachi.