Apocalipsis 11:3 - Chayahuita (Shahui)

³ Naporo tahuëriꞌsaꞌ catoꞌ quëmapi aꞌpararahuë pënëntacaiso marëꞌ. Yaaꞌpahuato, chiníquën nanan quëtarahuë noꞌtëquën shaꞌhuicaiso marëꞌ. Piyapiꞌsaꞌ naꞌcon oshahuanpi niꞌton, catoꞌ quëmapi sëtapi. Sëtatonaꞌ saꞌcatën nininsoꞌ aꞌmosapi piyapiꞌsaꞌ oshanënaꞌ ayonquicaiso marëꞌ. Cara piꞌipi miria pënëntapi, itërinco Yosë.

Apocalipsis 11:3 ပူးပေါင်းရင်းမြစ်များ

Génesis 37:34

Napoapon pochin co napion cancantaton aꞌmorinso nioshatërin. Naporahuaton, saꞌcatën nininsoꞌ sëtohuachinara aꞌmopisoꞌ, aꞌmorin. Ina aꞌmorin quëran huiꞌnin chimininso marëꞌ huaꞌqui naꞌnërárin, ayanárin, naporárin.

1 Reyes 21:27

Iniasëri napotërinsoꞌ natanahuaton, Acaposo paꞌpi sëtërin. Aꞌmorinso osharahuaton, saꞌcatën nininsoꞌ aꞌmorin. Naporahuaton co huachi coshatatonhuëꞌ, Yosë yonquirin. Huëꞌëpachinantaꞌ, inanpi aꞌmorinquëranchin huëꞌërin. Oshanën marëꞌ sëtërinsoꞌ nitotacaiso marëꞌ naporin.

2 Reyes 19:1

Cara huaꞌanoꞌsarisoꞌ, Asiria huaꞌani napotërinsoꞌ Isiquiasë shaꞌhuitonpi. Ina natanaton, co napion cancantërin. Inapoaton aꞌmorinso osharin. Ina quëran saꞌcatën aꞌmosahuaton, Sinioro chinotacaso pëiquë Yosë nontacaso marëꞌ paꞌnin.

Nehemías 9:1

Naporoꞌ yoquiquë cato shonca catapini tahuëritahuasoꞌ, israiroꞌsaso naquëranchin niyontoantapi. Saꞌcatën aꞌmosahuatonaꞌ, moꞌshiquë nisëꞌmomotopi. Inapoatona co coshatatonaraihuëꞌ Yosë nontopi.

Jeremías 1:10

“Ca nohuanto nanamëhuë noꞌtëquën shaꞌhuiaran. Nisha nisha piyapiꞌsaꞌ, nisha nisha copirnoroꞌsari huaꞌanëntopisoꞌ, inapita pënënacaso marëꞌ nanan quëtaranquën. Pënënpatan co natëtohuachinahuëꞌ, pacatoro huaꞌtahuatë ataꞌhuantërëso pochin, noꞌpapi pëi ohuatahuatë ninomotërëso pochin anaꞌintarahuë. Noya natëhuachinaso nipirinhuëꞌ, sharoꞌsa shacatë pochin nitato, noya noya nicacaisoꞌ catahuararahuë,” itërinco.

Daniel 7:25

Yosëso chini chiníquën nanantopirinhuëꞌ, noꞌhuipon. Yosë piyapinënpitantaꞌ, shitiquiapon. Yosë pënëntërinsopita anishatacaso camaitapon. Yosë chinotatona niyontonacaiso tahuëriꞌsantaꞌ, inapotapon. Yosë piyapinënpita quëran huarëꞌ, cara piꞌipi miria nohuantërinsoꞌ nitapon.

Joel 1:13

Corto huaꞌanoꞌsanquëmaꞌ: Canpitasoꞌ Sinioro artaronënquë sacatëramaꞌ. Yosënënpoa chinotërëhuaso pëiquë, co huachi Sinioro marëꞌ cosharoꞌ, huino, inapita quëpihuëꞌ. Napoaton sëtonëmaquë saꞌcatën aꞌmosahuatomaꞌ, yaꞌipi tashi naꞌnëcoꞌ.

Jonás 3:5

Yaꞌhuëhuanoꞌsaso ina natanahuatonaꞌ, yaꞌipiya quëran natëpi: “Tëhuënchachin Yosë napotarinpoaꞌ. Huëco paꞌahua ayono nicatëhua Yosë nontahuaꞌ. Co noyahuëꞌ nicatëhua oshahuanëhuasoꞌ, aꞌpoaꞌahuaꞌ. Paꞌpi sëtërëhuaso aꞌnocaso marëntaꞌ, saꞌcatën nininso aꞌmoahuaꞌ,” niitopi.

Jonás 3:8

Yaꞌipiya quëran saꞌcatën nininso aꞌmoinaꞌ. Pëꞌtahuanëna quëran huarëꞌ, ina pochin aꞌmochinaꞌ. Co napion ancantërëhuasoꞌ, aꞌnocaso marëꞌ inapoaꞌahuaꞌ. Naporahuatëhua yaꞌipi cancanënpoa quëran Yosë nontahuaꞌ. Yaꞌipi co noyahuëꞌ ninëhuasopita, noꞌhuitërayanpoa nicatëhuaꞌ, co tënorotochináchinhuëꞌ cancantërëhuasopita, inapita yaꞌipi aꞌpoaꞌahuaꞌ.

Números 11:26

Cato yaꞌpinta Moisësëri huayonpirinhuëꞌ, co chinotopiso pëiquë paꞌpihuëꞌ. Inapitasoꞌ, Iritato, Mitato, inapita itopi. Inapitanta ispiritori yaꞌcoancantërin niꞌton, yaꞌhuëpiquëranchin caniaritopi Yosë yonquirinsoꞌ shaꞌhuicaisoꞌ.

Mateo 11:21

Corasinoquë yaꞌhuëpisopita, Pitsaitaquë yaꞌhuëpisopita, inapita yonquiaton, itapon: “¡Maꞌhuántacha canpitasoꞌ nisarama paya! Naꞌcon pënënpiranquëmahuëꞌ, co natëramacohuëꞌ. Ina marëꞌ parisitaramaꞌ. Naꞌcon nitotopiramahuëꞌ, co yaimaramacohuëꞌ. Tiroquë, Sitonquë, inaquëpitaso nipirinhuëꞌ co pënëntërahuëꞌ. Co inaquë caniaꞌpiroꞌsaꞌ aꞌnaroáchin anoyatërahuëꞌ. Inaquë naporahuë naporini, oshanëna marëꞌ sëchitonahuëꞌ. Saꞌcatën nininso aꞌmotonaꞌ, huarianoquë nipashimotochitonahuëꞌ. Co noyahuëꞌ yonquipisopitantaꞌ, nanianchitonahuëꞌ.

Mateo 18:16

Nipirinhuëꞌ, co yanatëhuachinquënhuëꞌ, aꞌna yaꞌpihuë nipon, catohuë nipon pënënanso natanacaiso marëꞌ quëparahuaton, nontoantaquëꞌ. Iyaroꞌsaꞌ quëparansopitantaꞌ noya natainaꞌ ama piꞌpian tërantaꞌ nonpinacaso marëhuëꞌ. Inapitarintaꞌ pënëinaꞌ.

Lucas 10:13

Ina quëran Quisoso taantarin: “Corasinoquë, Pitsaitaquë inaquëpita yaꞌhuëramasoꞌ, ¡maꞌhuantacha nisarama paya! Naꞌcon pënënpiranquëmahuëꞌ, co natëramacohuëꞌ. Ina marëꞌ parisitaramaꞌ. Tiroquë, Sitonquë, inaquëpitaso nipirinhuëꞌ co pënëntërahuëꞌ. Co inaquë caniaꞌpiroꞌsaꞌ aꞌnaroáchin anoyatërahuëꞌ. Inaquë naporahuë naporini, oshanëna marëꞌ sëtatonaꞌ, saꞌcatën nininsoꞌ aꞌmoitonahuëꞌ. Huarianoquënta nipaꞌsamototatonaꞌ co noyahuëꞌ yonquipisopita nanianchitonahuëꞌ.

Lucas 24:48

Canpitasoꞌ niꞌnamaco. Natanamaco. Yaꞌipiya shaꞌhuitoncoꞌ.

Juan 15:27

Canpitantaꞌ aꞌchinaramaꞌ aꞌnapitantaꞌ nohuitinacoso marëꞌ. Yaꞌnan aꞌchinahuë quëran huarëꞌ nohuitëramaco niꞌton, naporahuësoꞌ shaꞌhuitaramaꞌ.

Juan 3:27

—Co Yosë nohuantërinhuëꞌ naporini, co napoꞌitonahuëꞌ. Yaꞌipinpoaꞌ Yosë acorinpoaꞌ maꞌsona nicacasoꞌ.

Hechos 1:8

Iporaso nipirinhuëꞌ Ispirito Santo naꞌcon catahuarinquëmaꞌ. Yaꞌcoancantohuachinquëmaꞌ, nóya pënëntaramaꞌ. Ina nohuanton, nani maꞌsha nanitaparamaꞌ. Yaꞌipi naporahuësoꞌ niꞌnamaꞌ, nani nitotëramaꞌ. Aꞌnapitantaꞌ shaꞌhuitocoꞌ. Quirosarinquë chachin shaꞌhuitocoꞌ. Ina quëran yaꞌipi Cotia parti paatomaꞌ, shaꞌhuitoncoꞌ. Samaria partintaꞌ shaꞌhuitoncoꞌ. Yaꞌipi parti paatomaꞌ, shaꞌhuitëraꞌpiacoꞌ, itërin Quisosori.

Hechos 13:31

Nanpiantarahuaton, aꞌna yoqui miria pochin yaꞌhuantarahuaton, caꞌtanoꞌsanënpita yaꞌnotëraꞌpiarin. Coꞌhuara chimiyantërasohuëꞌ, naꞌa Caririaquë yaꞌhuëpisopitari caꞌtanpi. Quirosarinquë huarëꞌ imapi. Quisoso nanpiantahuachina, inapitarintaꞌ quënanpi. Quënanahuatonaꞌ, yaꞌipi piyapi shaꞌhuitapi: ‘Nanpiantarin mini. Quiyari niꞌnai,’ tosapi.

Hechos 2:32

Iporasoꞌ Quisoso chachin Yosëri ananpitaantarin. Quiyari niꞌnai.

Hechos 3:15

Quisoso mini ananpirinpoaso nipirinhuëꞌ, atëpatëramaꞌ. Tëpapirinahuëꞌ, Yosëri ananpitaantarin. Quiyasoꞌ niꞌnai.

1 Corintios 12:28

Yosë nisha nisha acorinpoaꞌ imarëhuasopita capini nicatahuacaso marëꞌ. Quisocristo isoroꞌpaquë nipon, aꞌnaquën acorin paatonaꞌ nanamën aꞌchinacaiso marëꞌ. Inapitaꞌton Yosëri acorin. Ina quëran aꞌnapitantaꞌ acorin pënëntacaiso marëꞌ. Naporahuaton, aꞌnaquëontaꞌ acorin Quisocristo nanamën aꞌchinacaiso marëꞌ. Yosë nohuanton, aꞌnaquën sacaiꞌ nininsoꞌ nanitaparin. Aꞌnaquën acorin caniaꞌpiroꞌsaꞌ anoyatacaso marëꞌ. Aꞌnaquën acorin aꞌnapita catahuacaso marëꞌ. Aꞌnaquën acorin huaꞌan pochin nicacaso marëꞌ. Aꞌnaquën Yosë nohuanton, nisha nananquë nonpiso pochin nonin.

2 Corintios 13:1

Nani catoroꞌ niꞌconanquëmaꞌ. Iporasoꞌ naquëranchin nicaponquëmaꞌ paꞌsarahuë. Yosë quiricanën quëran shaꞌhuitërinpoaꞌ. “Ama topinan quëran anaꞌintocosohuëꞌ. Natantacasoꞌ yaꞌhuërin. Catoꞌ piyapihuë nipon, cara piyapihuë nipon, inachachin shaꞌhuitohuachinpoaꞌ, naporo huarëꞌ anaꞌintacasoꞌ yaꞌhuërin,” topi. Napoaton paꞌpato, ina pochin natantarahuë noꞌtëquën nitotaꞌhuaso marëꞌ.

Efesios 4:11

Naporahuaton, nisha nisha acorinpoaꞌ nicatahuacaso marëꞌ. Aꞌnaquën Quisocristori chachin aꞌparin aꞌchinacaso marëꞌ. Aꞌnaquëontaꞌ Ispirito Santo nohuanton, Yosë yonquirinso chachin shaꞌhuirin. Aꞌnaquëontaꞌ nisha nisha parti paaton, Yosë nanamën aꞌchinaꞌpiarin. Aꞌnaquëontaꞌ ina nohuanton, yaꞌhuëpiquë yaꞌhuëhuanoꞌsaꞌ nani tahuëri catahuapi noya imacaiso marëꞌ. Aꞌnaquëontaꞌ yaꞌipi Yosë nanamën aꞌchintapi.

Deuteronomio 19:15

Naquëranchin Moisësëri israiroꞌsa nontaantarin: “Aꞌna tahuëri yaꞌhuëramaquë co noyahuëꞌ nicatonaꞌ, tëpataponahuë nipon, ihuataponahuë nipon. Ina marëꞌ aꞌna piyapi aꞌpiramaꞌ. Napoaponahuëꞌ, aꞌna yaꞌpiriáchin shaꞌhuirapihuachin, co anaꞌintacaso yaꞌhuërinhuëꞌ. Cato yaꞌpihuë nipon, cara yaꞌpihuë nipon ina chachin shaꞌhuirapihuachinaꞌ, naporo huarëꞌ anaꞌintacaso yaꞌhuërin.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 11:2

Iꞌiratëso nipirinhuëꞌ, ama aꞌniquësohuëꞌ. Inaquë nisha piyapiꞌsaꞌ yaꞌconapi. Co Yosë imaponaraihuëꞌ, inaquë yaꞌconahuatonaꞌ, tapirapi. Yosë ninanonëontaꞌ tapirapi. Cara piꞌipi miria pochin napotapi.

Apocalipsis 11:6

Iráca pënëntonaꞌpiroꞌsaꞌ nani maꞌsha nipi piyapiꞌsaꞌ ayonquicaiso marëꞌ. Inapochachin catoyaꞌpi Yosëri aꞌparinsoꞌ, nani maꞌsha nanitapaapi. Yosë nontahuachinaꞌ, co oꞌnanaponhuëꞌ. Inapotatonaꞌ, pënëntáponaꞌ. Tëquëiontaꞌ nontahuachinaꞌ, huënaiꞌ taranapon. Ina quëran Yosë nohuanton, nisha nisha canioroꞌsaꞌ acorapi Yosë yonquicaiso marëꞌ.

Apocalipsis 12:6

Aꞌshinso nipirinhuëꞌ, co piyapi yaꞌhuërinquëhuëꞌ taꞌarin. Inaquë Yosëri nani tapatërin yaꞌhuëcaso marëꞌ. Cara piꞌipi miria pochin inaquë yaꞌhuarin niꞌton, cosharoꞌ quëtapi.

Apocalipsis 13:5

Sopai nohuanton, maꞌsha marë quëran pipirinsoꞌ naꞌcon Yosë pinosarin. “Yosë quëran chini chiníquën nanantërahuë. Co ina chinotacasoꞌ yaꞌhuërinhuëꞌ,” tosarin. Sopairi catahuarin niꞌton, copirno yaꞌconarin. Chini chiníquën nanantarin niꞌton, yaꞌipi copirnoroꞌsaꞌ camaiarin. Cara piꞌipi miria yaꞌipiya huaꞌanëntarin.

Apocalipsis 19:10

Naporoꞌ isonahuato, yachinotopirahuëꞌ. “Ama chinotocosohuëꞌ. Casoꞌ anquënico. Co Yosëcohuëꞌ. Canpita pochachin cantaꞌ Yosë natërahuë. Quisoso nanamën imaramaꞌ niꞌton, Yosëíchin yonquiquëꞌ,” itërinco. Quisoso nanamënáchin aꞌchinpatëhuaꞌ, noꞌtëquën pënëntarëhuaꞌ.

Apocalipsis 20:4

Ina quëran huaꞌnarëso pochin niantarahuë. Naꞌa piyapiꞌsaꞌ quënanahuë. Yosëri nani acorin coisë pochin nicacaiso marëꞌ. Aꞌnapitantaꞌ niꞌnahuë. Isoroꞌpaquë yaꞌhuaponaꞌ, Quisosoíchin imapi. Yosë nanamën aꞌchinpi niꞌton, tëpapi. Co maꞌsha paꞌpi tëꞌhuatoroꞌ nininsoꞌ chinotopihuëꞌ. Co nonanpisoꞌ moshapihuëꞌ. Co marcanën niacotopihuëꞌ. “Quisosoíchin imarai,” topachinara, nishitëconotëraꞌpiapi. Inapotopirinahuëꞌ, Quisosori ananpitaantarahuaton, ichihuaꞌanëntarin. Huaranca piꞌipi huaꞌanëntapi.