Apocalipsis 10:5 - Chayahuita (Shahui)

⁵ Naporoꞌ panca anquëni marëquë, noꞌpaquë inaquëpita iꞌnarinsoꞌ inchinan tanpaquën anquiontarin.

Apocalipsis 10:5 ပူးပေါင်းရင်းမြစ်များ

Génesis 14:22

Napotopirinhuëꞌ, Apranisoꞌ itapon: —Yosë chini chiníquën nanantaton, piꞌiroꞌtëꞌ, isoroꞌpaꞌ, inapita acorin. Ina niꞌsárinco niꞌton, co piꞌshi tërantaꞌ, co sapatë nonin tëranta caora marëꞌ macapohuëꞌ: “Cari, Apran amaꞌhuanahuë.” Ama tëcamaso marëhuëꞌ, co macapohuëꞌ.

Nehemías 9:6

Istrasëntaꞌ, Yosë nontaton tapon: “Quëmasáchin Sinioronquën. Quëmari yaꞌipi piꞌiroꞌtë acoran. Yaꞌipi yaꞌhuërinsopitarë chachin ninan. Isoroꞌpaꞌ, marë, inapitanta ninan. Yaꞌipi inaquëpita yaꞌhuërinsopitarë chachin acoran. Quëma nohuanton yaꞌipi yaꞌhuëapi. Quëma nohuanton chachin yaꞌipi nanpiapi. Piꞌiroꞌtëquë yaꞌhuërinsopita chinotarinën.

Éxodo 20:11

Saota tahuëri quëran yaꞌipi acorahuësopita tënirahuë. Inápaquë, isoroꞌpaquë, marëquë, inaquëpita yaꞌhuërinso tënirahuë. Tahuëririnquë chinotërahuë. Napoaton, ina tahuëri noya nicato, chinoto tahuëri acorahuë: Naporo tahuëri chinotatomaꞌ, casáchin yonquico.

Hechos 14:15

—¿Onpoaramataꞌ iyaroꞌsaꞌ? Ama moshacoisohuëꞌ. Tëhuënchachin co quiyasoꞌ moshamacoiso yaꞌhuërinhuëꞌ. Quiyantaꞌ piyapicoi, canpita pochachin ninai. Noya nanan shaꞌhuitaꞌhuanquëmaso marëꞌ huëꞌnai. Quisoso nanamën, iyaroꞌsaꞌ, aꞌchinchinquëmaꞌ, natanco. Mamanshi topinan quëran mosharamaꞌ. Yosëso nipirinhuëꞌ nanpirárin. Ama huachi mamanshi moshacosohuëꞌ. Inapita naniantatomaꞌ, Yosë imaco huachi. Isoroꞌpaꞌ, inápaquë yaꞌhuërinsopita, marëroꞌsaꞌ, yaꞌipi maꞌsharoꞌsaꞌ, inapita inari ninin.

Hechos 17:23

Cachiquë paꞌpatora, yaꞌipi moshatëramasoꞌ niꞌnahuë. Aꞌna artaro quënanahuë. Inaquë ninshitëramaꞌ. ‘isoso yosë co nohuitopirëhuahuëꞌ, moshahuaꞌ,’ tënamaꞌ ninshitatomaꞌ. Co nohuitapomarahuëꞌ, mosharamaꞌ. Apira carinquëmaꞌ aꞌchinchinquëmaꞌ, nohuitocoꞌ.

Romanos 1:20

Isoroꞌpaꞌ ninin quëran huarëꞌ piyapiꞌsaꞌ nitotopi. Yosësoꞌ co quënanpirëhuahuëꞌ, nani maꞌsha ninin. Ina nicatonaꞌ, “Tëhuënchachin Yosë yaꞌhuërin. Yaꞌipiya nanitaparin niꞌton, ina chinotahuaꞌ,” taꞌcaso nipirinhuëꞌ, co nohuantopihuëꞌ. Napoaton naꞌinpi.

Deuteronomio 32:40

Inápaquë anquirahuato shaꞌhuitaranquëmaꞌ: Caso yaꞌhuëmiatërahuë niꞌto, noꞌtëquën shaꞌhuitaranquëmaꞌ. Sahuëni huënaráchin yaꞌhuëtërincoso toꞌnahuato, noya coisë pochin nisarahuë. Inimiconëhuëpita noꞌtëquën iꞌhuërëtarahuë. Noꞌhuirinacosopita, nanirinso chachin anaꞌintarahuë.

Hebreos 6:13

Apraan yonquicoꞌ. Iráca Yosëri itërin: “Casoꞌ Yosëco niꞌto, noꞌtëquën nontëranquën. Quëma naꞌcon catahuaaranquën. Ca nohuanto, aꞌna tahuëri huiꞌnan yaꞌhuëtarinquën. Naporahuaton, oshaquëran notohuaroꞌ shiparinpitantaꞌ yaꞌhuëtarinquën,” itërin. Yosësoꞌ chini chiníquën nanantërin. Co aꞌnaꞌ yaꞌhuërinhuëꞌ ina quëran chini chiníquën nanantërinsoꞌ. Napoaton: “Casoꞌ Yosëco niꞌto, noꞌtëquën nontëranquën,” itërin.

Apocalipsis 1:18

Nanpiárahuë. Chiminaporahuëꞌ, nanpiantarahuë. Casoꞌ chini chiníquën nanantërahuë. Onporosona chiminacaisoꞌ cari shaꞌhuitarahuë. Ca nohuantohuato, nanpiapi. Ca nohuantohuato, chiminaponaꞌ. Co imarinacosopitahuëꞌ chiminpachinaꞌ, parisitopiquë aꞌpararahuë.

Apocalipsis 10:2

Quiricaꞌhuaya sëꞌquërin. Soꞌnanpinan nipirinhuëꞌ, nani oporininsoꞌ sëꞌquërin. Oꞌmarahuaton, inchinan nantën quëran marëquë iꞌnaitarin. Ahuënan nantën quëran isoroꞌpaquë iꞌnarin. Panca masho niꞌton, naporin.

Apocalipsis 14:7

—Yosë tëꞌhuatatomaꞌ, natëcoꞌ. Anaꞌintacasoꞌ tahuëri nani naniriarin niꞌton, inasáchin imacoꞌ. Yaꞌipi isoroꞌpaꞌ, inápaquë yaꞌhuërinsoꞌ, marë, iiroꞌsaꞌ, yaꞌipiya ninin niꞌton, chinotocoꞌ, itarin anquëniri chiníquën nontaton.

Apocalipsis 16:17

Aꞌnaíchin anquëni pahuanarin pacacasoꞌ. Ina paꞌsahuaton, minëquë yaꞌhuërinsoꞌ tëꞌyanantarin. Ihuanquë tëꞌyanantohuachina, inápaquë Yosë chinotopiso pëi quëran chiníquën nonin. Huaꞌanëntërinso shiranën quëran “¡nani huachi!” tosarin.

Apocalipsis 4:11

“Quëmasáchin Sinioro imarainquën. Noya noyanquën niꞌton, yaꞌipi piyapiꞌsaꞌ chinochinënquën. Nani tahuëri natëinënquën. Yaꞌipi nanitaparan. Yaꞌipi maꞌsha ninan. Quëma nohuanton, ipora huantaꞌ yaꞌhuarin,” itopi.

Apocalipsis 4:9

Apira apira chinotapi. “¡Ma noyacha Yosëso paya! Yaꞌipi piyapiꞌsari chinochinaꞌ. Naꞌcon catahuarinpoaꞌ niꞌton, ‘Yosparinquën Sinioro,’ itahuaꞌ. Inasoꞌ huaꞌanëntomiatarinpoaꞌ. Co onporontaꞌ taꞌhuantarinhuëꞌ,” topachinara,