Apocalipsis 10:11 - Chayahuita (Shahui)

¹¹ Ina quëran shaꞌhuitërinaco: —Naꞌa piyapiꞌsaꞌ pënëantaquëꞌ. Aꞌna tahuëri maꞌsona onpocaisoꞌ Yosë anitotarinquën. Nisha nisha piyapiꞌsaꞌ, nisha nisha nananquë nonpisopita, copirnoroꞌsaꞌ, inapita maꞌsona onpocaisoꞌ Yosë ninoton, anitotarinquën ninshitamaso marëꞌ, itërinaco.

Apocalipsis 10:11 ပူးပေါင်းရင်းမြစ်များ

Ezequiel 37:4

Napotohuatora, Sinioro itaantarinco: “Carinquën nanan quëtaranquën iso nansëroꞌsa nontaton: ‘Yaniransëroꞌsanquëmaꞌ. Sinioro naporinso natancoꞌ: “Ca nohuanton nanpiantamaso yaꞌhuëtarinquëma niꞌton, nanpiantaramaꞌ.

Ezequiel 37:9

Naporoꞌ Siniorosoꞌ nontaantatonco: “Carinquën nanan quëtaranquën niꞌton, niinëhuë përáquëꞌ: ‘Catapini parti quëran chachin huëꞌsahuaton isopita chimipiroꞌsa ananpiquëꞌ,’ itëquëꞌ,” itaantarinco.

Apocalipsis 10:10

Quiricaꞌhuaya masahuato, caꞌnahuë. Ninoi pochin cashin caꞌpirahuëꞌ. Nani niꞌipatëra, main natanahuë.

Apocalipsis 11:1

Ina quëran mitro pochin nininsoꞌ quëtërinaco aꞌnicaꞌhuaso marëꞌ. —Yosë chinotopiso pëiꞌ aꞌniconquëꞌ. Artarontaꞌ aꞌniquëꞌ. Nani aꞌnihuatan, piyapiꞌsantaꞌ Yosë chinotopisopita onposona yaꞌhuëpisoꞌ nitotacaso marëꞌ pichiquëꞌ.

Apocalipsis 11:9

Cara tahuëri miria pochin nisha nisha piyapiꞌsaꞌ, nisha nisha nananquë nonpisopita inapitari niꞌsapi. Nicaponaraihuëꞌ, co nohuantapihuëꞌ paꞌpitacaisoꞌ.

Apocalipsis 14:6

Ina quëran aꞌna anquënintaꞌ quënanahuë. Inápaquë yanponarin noya nanan shaꞌhuicaso marëꞌ. Nisha nisha piyapiꞌsaꞌ, nisha nisha nananquë nonpisopita, yaꞌipiya shaꞌhuitarin.

Apocalipsis 17:10

Aꞌnatërápo nani iráca huaꞌanëntëraꞌpiapirinahuëꞌ, chiminaꞌpiapi. Iporasoꞌ aꞌnari huaꞌanëntantarin. Aꞌnaíchin pahuanarin yaꞌipiroꞌpaꞌ huaꞌanëntacasoꞌ. Aꞌna tahuëri yaꞌnoarin. Nipirinhuëꞌ, co huaꞌquiꞌ huaꞌanëntaponhuëꞌ.

Apocalipsis 17:12

Shonca pomontërinso pochin shonca copirnoroꞌsaꞌ yaꞌhuaponaꞌ. Inapitasoꞌ co huaꞌanënchatërapihuëꞌ. Tahuëri nanihuachin, nisha nisha piyapiꞌsaꞌ huaꞌanëntaponaꞌ. Naporo chachin maꞌsha paꞌpi tëꞌhuatoroꞌ nininsontaꞌ huaꞌanëntapon. Napoaponahuëꞌ, co huaꞌqui huaꞌanëntapihuëꞌ.

Apocalipsis 17:15

Ina quëran aꞌchintaantarinco. —Panca iroꞌsantaꞌ niꞌnan, ina aipi sanapi huënsërinsoꞌ. Inantaꞌ aꞌchinchinquën nitotëquëꞌ. Inapochachin aꞌna tahuëri nisha nisha piyapiꞌsaꞌ yaꞌhuaponaꞌ, nisha nisha nananquë nonpisopita. Huaꞌhuayatërahuëꞌ yaꞌhuaponaꞌ. Nisha nisha copirnori huaꞌanëntërinsopita.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.