Amós 8:3 - Chayahuita (Shahui)

³ Ina tahuëri nanihuachin, copirno noyápiachin pëinënquë cantayantopisoꞌ, copi tapon. Naꞌnëroꞌsa yaꞌhuërëꞌ, oshaatona noncarorantaponaꞌ. Notohuaroꞌ piyapi naporo chiminapon niꞌton, co huachi paꞌpitaponahuëꞌ. Onpopinquë tëranta topinan tëꞌyataponaꞌ. Co manta tëcaponaraihuëꞌ, tëꞌyataponaꞌ. Ca Sinioroco noꞌtëquën shaꞌhuitaranquëmaꞌ, tënin.

Amós 8:3 ပူးပေါင်းရင်းမြစ်များ

Joel 1:11

Imin camayonquëmaꞌ, shaꞌtëramasopita tapitërinënquëmaꞌ. Trico, sipata, inapita shaꞌpiramahuëꞌ, co huachi nitërinsoꞌ masaramahuëꞌ. Napoaton co napion ancantatomaꞌ, naꞌnëcoꞌ.

Joel 1:13

Corto huaꞌanoꞌsanquëmaꞌ: Canpitasoꞌ Sinioro artaronënquë sacatëramaꞌ. Yosënënpoa chinotërëhuaso pëiquë, co huachi Sinioro marëꞌ cosharoꞌ, huino, inapita quëpihuëꞌ. Napoaton sëtonëmaquë saꞌcatën aꞌmosahuatomaꞌ, yaꞌipi tashi naꞌnëcoꞌ.

Joel 1:5

Noꞌpirahuëtënquëmaꞌ, ¡huënsëco huachi! Huino paꞌyatëramasopita, sëtatoma naꞌnëcoꞌ. Oparoroꞌsa sëquërëri pëꞌyarin niꞌton, co huachi huino nicacaiso yaꞌhuërinhuëꞌ.

Levítico 10:3

Ina quëran Moisësëri Aaron itapon: —Pocamasoꞌ mini apiratatënquëma iꞌhua Sinioro naporin: “Yaꞌcaririnacosopita, noya noya ninahuëso aꞌnotarahuë. Israiroꞌsanta huënaratërahuësoꞌ, aꞌnotarahuë,” tënin. Aaronso nipirinhuëꞌ, co manta tëninhuëꞌ.

Amós 4:10

Naquëranchin Sinioro taantarin. “Iráca iquipitoroꞌsa nisha nisha quëran aparisitërahuë. Inapita aparisitërahuëso pochachin canpitanta aparisitëranquëmaꞌ. Huiꞌnapinëmapita ahuëtopiquëranchin chiminpi. Cahuarionëmapitantaꞌ, inimiconëmapitari matërinënquëmaꞌ. Chinotëramaso nëꞌmëtë pëiroꞌsaquë chiminpisopita anarinsoꞌ, aimëtëranquëmaꞌ. Inapotëranquëmaꞌ. Inapotápiranquëmahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

Amós 5:16

Isonta Sinioro shaꞌhuitaantarinquëmaꞌ: “Ca nohuanton nani prasaquë naꞌnëpomaꞌ. Nani cachiquë co napion ancantatomaꞌ, noncaropomaꞌ. Notohuaroꞌ chimipiroꞌsa yaꞌhuëapon niꞌton, canacaiso marëꞌ naꞌnëroꞌsa nipisopita, imin camayoroꞌsaꞌ, inapita naꞌnëcaiso marëꞌ amatapomaꞌ. Yaiꞌpi oparoroꞌsaquë naꞌnëpomaꞌ. Anaꞌintaꞌhuanquëmaso marëꞌ oꞌmahuato, napoaramaꞌ. Ca Sinioroco napotaranquëmaꞌ. Caso Yosëco yaipi nanitaparahuë, tënahuë,” tënin.

Amós 5:23

Chinotatomaco cantahuatamara, nonca noncatoconamaꞌ. Naporamaso amirahuë niꞌton, ¡taꞌtoco huachi! Chinotatomaco arparoꞌsanta piꞌniramasoꞌ, ¡co huachi yanatanahuëꞌ!

Amós 6:5

Pirinan pihuipoma pochin manta tëranta cantaramaꞌ. Tapi copirno pochin co niꞌchinpisohuëꞌ piꞌnicaisoꞌ, pihuicaisoꞌ, inapita ocoipitëraramaꞌ.

Amós 6:8

Ina quëran Yosëso taantapon: “Caso Yosëco yaꞌipi nanitaparahuë. Caso Sinioroco niꞌto, noꞌtëquën shaꞌhuitaranquëmaꞌ: ‘Israiroꞌsasoꞌ, yanocantopi. Inapopiso co quëꞌyarahuëꞌ. Noya pëiroꞌsa yaꞌhuëtopi niꞌton, “co manta onpoaraihuëꞌ” topisontaꞌ, co quëꞌyarahuëꞌ. Ca nohuanton inimiconënapitari Samariaquë yaꞌhuëpisopita minsëaponaꞌ. Inapotatonaꞌ, yaiꞌpi maꞌshanënapita mataponaꞌ,’ tënahuë,” tënin.

Amós 8:10

Pita tahuëriꞌsa naꞌhuëyantëramasoꞌ, acopitarahuë. Pita yaꞌhuërënamën, chiminpisopita marëꞌ naꞌnëtoma oshaarápomaꞌ. Sëtohuachinara aꞌmopisoꞌ, canpitanta aꞌmosaramaꞌ. Co napion ancatohuachinara noyá niyaꞌitopiso pochin niyaꞌitaramaꞌ. Aꞌnaíchin huiꞌnin yaꞌhuëtopirinhuëꞌ, chiminpachina naꞌnëpiso pochin nisaramaꞌ.