Amós 6:8 - Chayahuita (Shahui)

⁸ Ina quëran Yosëso taantapon: “Caso Yosëco yaꞌipi nanitaparahuë. Caso Sinioroco niꞌto, noꞌtëquën shaꞌhuitaranquëmaꞌ: ‘Israiroꞌsasoꞌ, yanocantopi. Inapopiso co quëꞌyarahuëꞌ. Noya pëiroꞌsa yaꞌhuëtopi niꞌton, “co manta onpoaraihuëꞌ” topisontaꞌ, co quëꞌyarahuëꞌ. Ca nohuanton inimiconënapitari Samariaquë yaꞌhuëpisopita minsëaponaꞌ. Inapotatonaꞌ, yaiꞌpi maꞌshanënapita mataponaꞌ,’ tënahuë,” tënin.

Amós 6:8 ပူးပေါင်းရင်းမြစ်များ

Salmos 47:4

Ina huayontërinpoa noꞌpaꞌ huaꞌanëntacasoꞌ. Ina huaꞌanëntatëhua Cacopo shinpitanpoasoꞌ: “Ma noyacha noꞌpaꞌ huaꞌanëntërëhua paya. Nosoroatonpoa ahuaꞌanëntërinpoaꞌ,” tënëhuaꞌ.

Proverbios 8:13

Sinioro noya nicatoma natëhuatamaꞌ, co noyahuëꞌ ninamasopita co quëꞌyamaso yaꞌhuërinhuëꞌ. ‘Caso noya noyaco,’ topachinara, co quëꞌyarahuëꞌ. Nocantohuachinaꞌ, co noyahuëꞌ nipachinaꞌ, nonpinpachinaꞌ, inapohuachinarantaꞌ, co quëꞌyarahuëꞌ.

Isaías 28:1

¡Maꞌhuántacha Samaria ninanoquë yaꞌhuëpisopita nisapi paya! Inaquë Israiro copirno huaꞌanëntërin. Yanco ahuirin quëran yancotë nipiso pochin nipirinhuëꞌ, ina ninanosoꞌ, israiroꞌsari paꞌyatërin. Inapitasoꞌ noꞌpicaisoráchin cancantatonaꞌ, co noyahuëꞌ nipi. Noyaroꞌpaꞌ motopiana inapatontarinquë ina ninanoso acopirinahuëꞌ, yaꞌhuëhuanoꞌsasoꞌ, huino oꞌotona noꞌpicaisoráchin cancantopi. Napoaton inapita anaꞌintacaso marëꞌ Siniorori aꞌnara chiníquën quëmapi acorin. Inari ocai anotërinso pochin chiníquën nanantaton anoantarin. Panca ihuan maꞌsha quiquirinso pochin, ihuaiꞌ sharoꞌsa inquirinso pochin, pacon huëhuëpiro paꞌninso pochin, yaꞌipi atatahuaton toꞌpi toꞌpitarinso pochin, ina quëmapiri nitapon. Samariaquë noꞌpicaisoráchin cancantopisopita ataꞌhuantapon. Noyápiachin yancotë yaꞌhuëtohuachinara nipaꞌyatopiso pochin ina ninanosoꞌ israiroꞌsari paꞌyatopirinahuëꞌ, inapotapon. Iquira huayo yaꞌnan cayarinsopita quënanpachinara, co oshatapihuëꞌ macatona capacaisoꞌ. Inapochachin ina quëmapintaꞌ, canquihuachin co oshataponhuëꞌ ina ninano ataꞌhuantacasoꞌ.

Oseas 11:6

Ninanonënapitaquëntaꞌ, inimicoroꞌsari yaꞌcontatona ahuëaponaꞌ. Noyá niacorapipirinahuëꞌ, ataꞌhuantaponaꞌ. Maꞌpitaso nicacaisoꞌ yonquipirinahuëꞌ, inari naꞌintarin taꞌhuantaponaꞌ.

Amós 3:10

Inapitasoꞌ, noya nicacaisoꞌ co nitotopihuëꞌ. Ahuëtatona maꞌsha mapisoꞌ, noya pëinënaquë tapapi,’ itoncoꞌ,” tënin.

Amós 3:11

Ina quëran Sinioro taantarin: “Samariaroꞌsa ina pochin cancantopiso marëꞌ, inimiconënapitari yaꞌhuëpiso noꞌpaꞌ tahuirapitapi. Noyá niacorapipisoꞌ ninanoroꞌsa ohuataponaꞌ. Noya pëinënapitaquë yaꞌconatonaꞌ, maꞌshanëna mataponaꞌ. Paꞌpiniꞌ ohuica caꞌpachina, aꞌpaitonaꞌpisoꞌ pëꞌsotërinsoꞌ manin. Huëratënhuë nipon, paꞌhuëquënpitahuë nipon, huaꞌanën aꞌnotacaso marëꞌ manin. Inapochachin Samariaquë yaꞌhuëpiso israiroꞌsantaꞌ, Tamascoquë, noya huënsënanoꞌsa paꞌanatona huënsëtopirinahuëꞌ, caraíchin chaꞌëtona taꞌaponaꞌ,” tënin.

Amós 4:2

Siniorosoꞌ Yosë niꞌton, shaꞌhuitatënquëma naporin: “Co huaꞌquiya quëranhuë canpitasoꞌ, arponoꞌsaquë aꞌtëntatë pochin nitatënënquëmaꞌ, inimiconëmapita quëpaponënquëmaꞌ. Huaꞌhuamapitantaꞌ, yoꞌnanaroꞌsaquë sami pochin aꞌtëntahuatonaꞌ, quëpaponaꞌ. Ninano pairanën pacoantopi quëran inimiconëma apanshinahuatënënquëmaꞌ, ocoiarinënquëmaꞌ. Irmon motopi parti inapo quëpataponënquëmaꞌ. Caso Sinioroco noyasáchin nicato inapotiinëmasoꞌ, noꞌtëquën shaꞌhuitaranquëmaꞌ,” tënin.

Amós 5:21

Naquëranchin Sinioro taantarin: “Chinotamacoso marëꞌ pita ninamasopita, co quëꞌyarahuëꞌ. Niyontonpatamara paꞌyápiro nipiramahuëꞌ, co costarincohuëꞌ.

Amós 8:3

Ina tahuëri nanihuachin, copirno noyápiachin pëinënquë cantayantopisoꞌ, copi tapon. Naꞌnëroꞌsa yaꞌhuërëꞌ, oshaatona noncarorantaponaꞌ. Notohuaroꞌ piyapi naporo chiminapon niꞌton, co huachi paꞌpitaponahuëꞌ. Onpopinquë tëranta topinan tëꞌyataponaꞌ. Co manta tëcaponaraihuëꞌ, tëꞌyataponaꞌ. Ca Sinioroco noꞌtëquën shaꞌhuitaranquëmaꞌ, tënin.

Amós 8:7

Inaporamaso marëꞌ Sinioro tapon: “Caso Sinioroco niꞌto, israiroꞌsanquëma chinotopiramacohuëꞌ, co onporonta naporamaso naniantarahuëꞌ.

Deuteronomio 32:19

Naporamaso nicaton, Yosëso noꞌhuitërin huachi. Huiꞌninpita pochin nipiramahuëꞌ, noꞌhuirinquëmaꞌ.