Amós 6:2 - Chayahuita (Shahui)

² Paapahuachinara, huaꞌanoꞌsari: “Carini ninanoquë paꞌsahuatomaꞌ, onpopinsona yaꞌhuëhuanoꞌsa yaꞌhuëpisoꞌ, niꞌconcoꞌ. Ina quëran Amato ninanoquë paantacoꞌ. Inasoꞌ, panca ninanoꞌ. Amato quëran Cato ninanoquë paꞌmantacoꞌ. Inasoꞌ, huiristinoꞌsa ninanonënaꞌ. Inaquëpita paꞌsahuatomaꞌ, onpopinsona yaꞌhuëpisoꞌ, niꞌconcoꞌ. ¡Inapita ninanoroꞌsasoꞌ, co Israiro noꞌpaquë pochin yaꞌhuëpihuëꞌ! ¡Apinapichin noꞌpaquë yaꞌhuëpi!” itopi.

Amós 6:2 ပူးပေါင်းရင်းမြစ်များ

Génesis 10:10

Nimoroto huaꞌanëntërinso noꞌpaquë, ninanoroꞌsa panca panca nipisopita, isopita yaꞌhuërin: Papiri, Irico, Acato, Carini, inapita. Inapita ninanoroꞌsasoꞌ, Sinaro parti yaꞌhuëpi.

1 Reyes 8:65

Naporoꞌ Saromonso israiroꞌsapitarëꞌ, huaꞌhuayátërahuë niyontonpi. Amato ninano quëran huarëꞌ oꞌmapi. Inaso ninanoꞌ, pëtëtë parti yaꞌhuërin. Iquipito iꞌsha itopi quëraontaꞌ, huëntapi. Inasoꞌ iꞌsha pëꞌnatë parti yaꞌhuërin. Iquipitoroꞌsa noꞌpaꞌ mapisoꞌ nanirinquë yaꞌhuërin. Imënamëaꞌhuaroꞌsa pita itopiquë napopi. Sinioro chinotatona capa cancantacaiso marëꞌ napopi. Ina pita naꞌhuëhuachinara, Yosë pëinën Sinioro marëꞌ acoatonaꞌ, canchisë tahuëri chachin pita niantapi. Yaꞌipiya quëran shonca catapini tahuëri pita naꞌhuëpi.

2 Reyes 18:34

Amatoquë, Arohuatoquë, Sihuaropaimoquë, Inanquë, Ipaquë, inaquëpita nisha nisha mamanshi moshapi. ¡Moshapirinahuëꞌ, ahuëhuatoira co mamanshinënari nichaꞌërinhuëꞌ! Samariaquë yaꞌhuëpisopita tëranta co yosënënari nichaꞌërinhuëꞌ.

2 Reyes 19:13

Amatoquë, Arohuatoquë, Sihuaropaimoquë, Inanquë, Ipaquë, ¡inaquëpita copirnoroꞌsa huaꞌanëntopisoꞌ, nani taꞌhuantopi!” tënin ninshitaton.

1 Samuel 17:23

Nontapirinhuëꞌ, huiristino sontaroꞌsa panshinpi quëran, Coriato chachin pipiantarin. Pipirahuaton naquëranchin Israiro sontaroꞌsa noꞌhuiantarin. Noꞌhuitërinsoꞌ Tapinta natanin.

1 Samuel 17:4

Huiristino sontaroꞌsa quëran, ahuëtacaso caniaritacaso marëꞌ aꞌnara sontaro pipirin. Cara mitro pochin naporopitërinsoꞌ. Inaso Coriato itopi. Cato ninano itopiquë yaꞌhuërin.

1 Samuel 5:10

Naporoꞌ aꞌnaquëni, Icoron ninano itopiquë Yosë caposonën quëpaantapi. Inaquë quëꞌcanpachinara yaꞌipi ina ninanoquë yaꞌhuëpisopita chiníquën noncaropi: “¡Israiroꞌsa Yosë chinotopiso caposonën quëshiantërinënpoaꞌ! ¡Yaꞌipinpoa tiquiinpoaso marëꞌ napotarinënpoaꞌ!” topi.

1 Samuel 5:8

Napoaton huaꞌanëni, aꞌnapita huiristino huaꞌanoꞌsa amatërin. Huëꞌpachinara itapon: —Israiroꞌsa Yosë chinotopiso caposonën ¿maꞌta onpotahuaꞌ? itërin. —Cato ninanoquë quëpacoꞌ, itopi inapitari. Napohuachinara, aꞌnaquëni ina ninanoquë quëpapi.