Amós 5:2 - Chayahuita (Shahui)

² Canpitaso israiroꞌsanquëma poꞌnamaꞌ: Nanon co soꞌyayátëraponahuëꞌ aꞌnanaya yaꞌhuërinquë chiminaton, co macari ananpitaantarinsohuë pochin niconamaꞌ.

Amós 5:2 ပူးပေါင်းရင်းမြစ်များ

Isaías 43:17

Ina nohuanton panca sontaroꞌsa huënton ina paꞌtopi. Cahuarioroꞌsaꞌ, toronanoꞌsaꞌ, inapitarë chachin paꞌsapirinahuëꞌ, ataꞌhuantërin. Marë huancoanaiꞌ iiri imotohuachina, yaꞌipi taquiitopi. Nanparin tacopirinso pochin nipi.

Jeremías 14:17

Isontaꞌ, piyapinëhuëpita shaꞌhuitacaso marëꞌ nanan quëtaranquën: ‘Piyapinëhuëpita nosororahuësoꞌ, panca maꞌsha onpopi. Paꞌpi huëhuëpiro maꞌsha onporëso pochin nipi. Ina marëꞌ tahuëri tashirë chachin, naꞌnërápahuaso yaꞌhuërin.

Jeremías 18:13

Napopiso marëꞌ Sinioro tënin: “¿Inso nacionquë tëranta taꞌma ina pochin nonpiso natanama nicaya? Israiroꞌsasoꞌ, paꞌpi co noyahuëꞌ nipi.

Jeremías 2:27

Nara nipirinhuëꞌ, ‘quëmaso tatahuëinquën,’ itëramaꞌ. Naꞌpinta nipirinhuëꞌ, ‘quëmasoꞌ mamahuëinquën,’ itëramaꞌ. Inapoatoma caso co huachi tahuërëtëramacohuëꞌ. Napoapomarahuëꞌ maꞌsha onpohuatamara: ‘¡Nichaꞌëcoi Sinioro!’ itaantaramaco.

Jeremías 31:4

Nasha quëran chachin noya acoantaranquëmaꞌ. Capa cancantatoma nansapomaꞌ. Shari shari piꞌniatomaꞌ, nansapomaꞌ.

Jeremías 9:21

Sëtatona oshaahuachina napoꞌinaꞌ: ‘Pëinënpoapitaquë chimirin yaꞌcotërinpoaꞌ. Noya noya pëiroꞌsaquënta yaꞌconin. Cachiroꞌsaquë notohuaroꞌ huaꞌhuaroꞌsa tiquipi. Prasaroꞌsaquënta huiꞌnapiroꞌsa inapotopi.

Jeremías 9:9

¡Napopiso marëꞌ onpopionta anaꞌintaꞌhuaso yaꞌhuërin! Caso Sinioroco shaꞌhuitaranquëmaꞌ.

Oseas 14:1

Israiroꞌsanpoaꞌ. Sinioroso Yosënënpoa niꞌton, ina chachin tahuërëtaantaꞌahuaꞌ. Naꞌcon oshahuanëhua niꞌton, Yosë aꞌporëhuaꞌ. Inapopirëhuahuëꞌ, huëco naquëranchin Sinioro chinotaantaꞌahuaꞌ. Ina nontatëhuaꞌ: “Yaꞌipi co noyahuëꞌ ninaisoꞌ inquitocoi. Ina quëran chinotohuatëinquën, noya niꞌcoi.

Amós 8:14

Samariaquë mamanshiroꞌsa chinotatonaꞌ: ‘Noꞌtëquën nontaranquën. Tano mamanshiantaꞌ,’ topi aꞌnaquën. Piirsipaquënta mamanshiroꞌsa yaꞌhuërinso chinotatonaꞌ: ‘Noꞌtëquën nontaranquën. Piirsipa mamanshiantaꞌ,’ topi aꞌnaquëontaꞌ. Napopisopitasoꞌ, ca nohuanton anotërëso pochin nipachinaꞌ, co huachi huënsëaponahuëꞌ,” tënin Sinioro.

Amós 9:11

Naquëranchin Sinioro taantarin: “Co huaꞌquiya quëranhuëꞌ israiroꞌsa noya acoantarahuë. Iráca Tapi copirnori huaꞌanëntapon naporinso pochachin acoantarahuë.