Amós 4:9 - Chayahuita (Shahui)

⁹ Naquëranchin Sinioro taantarin: “Ca nohuanton ihuaonta huëya pihuirinquëmaꞌ. Napoaton shaꞌtëramasopitanta ahuiánahuanin. Sëquërënta aꞌpatëranquëma niꞌton, oparonëma pëꞌyarin. Iquiraroꞌsaꞌ, oriporoꞌsaꞌ, inapitanta pëꞌyarin. Nisha nisha cosharo shaꞌnamasopitanta ahuirin. Inapoatoma parisitápomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

Amós 4:9 ပူးပေါင်းရင်းမြစ်များ

1 Reyes 8:37

Piyapinënpita co natëtënënhuëꞌ oshahuaantahuachinaꞌ, quëmari anaꞌintaran. Quëma nohuanton shaꞌtopisopita co manta nitaponahuëꞌ. Piꞌi quëranhuë nipon, taquiapon. Sëquërërihuë nipon, chaꞌchorihuë nipon, pëꞌyapon. Pëtoratërin quëranhuë nipon, chanatapon. Aꞌna tahuëriso inimiconënpitarihuë nipon, ninanonëna tancapitahuatona ahuëaponaꞌ. Chiníquën caniohuë nipon yaꞌconaton, tiquiapon. Inapoatona parisitaponaꞌ.

Isaías 1:5

Canpitaso co natantochináchinhuëꞌ cancantëramasoꞌ, co yaaꞌporamahuëꞌ. Ina marëꞌ noꞌhuitënquëma anaꞌintëranquëmaꞌ. Co máquëma tëranta noyatërinso yaꞌhuërinhuëꞌ. Motëma quëran nantëranëmaquë huarëꞌ, piꞌniosáchin pochin, pomato pomato toconinso pochin, taꞌtaráchin niconinso pochin, niconamaꞌ. Naporamasoꞌ, co inso tëranta nonëninquëmahuëꞌ. Co tomaquë tëranta pashitatënënquëma asanorinënquëmahuëꞌ. Inapoatoma co huachi manta chiniramahuëꞌ.

Joel 1:4

Yaꞌhuërëhuaso noꞌpaquë sëquërëꞌ huëꞌsahuaton, yaꞌipi cosharo pëꞌyatërinpoaꞌ. Nisha nisha nipisopitari niyaꞌhuërëton huëcatonaꞌ, napotërinënpoaꞌ.

Joel 1:7

Yaꞌipi oparonënpoapita pëꞌyapi. Yaꞌipi iquiraroꞌsanta pëꞌyapi. Shaꞌhuëtën quëran huarëꞌ capatonaꞌ, ironantërin. Sëꞌpainpitantaꞌ, huirinantaquë huarëꞌ aꞌporin.

Joel 2:25

Ina quëran Sinioro taantarin: “Sëquërëroꞌsa aꞌpatáponquëmaꞌ, naꞌa piꞌipi co manta manamahuëꞌ. Inapitasoꞌ sontaroꞌsa huënton ataꞌhuantacaiso marëꞌ aꞌpapiso pochin carima aꞌpatëranquëmaꞌ. Ina piꞌipiroꞌsaquë co manta manamasohuëꞌ iꞌhuërëtaꞌhuanquëmaso marëꞌ naꞌcon naꞌcon quëtaantaponquëmaꞌ.

Amós 4:6

Naquëranchin Sinioro taantarin: “Ca nohuanton yaꞌipi yaꞌhuëramaquë cosharo pahuanin. Inapoapomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

Amós 4:8

Naporoꞌ iꞌsha pahuanin niꞌton, aꞌna ninanoquë aꞌna ninanoquë iꞌsha yonípoma paꞌnamaꞌ. Pacapomarahuëꞌ, piꞌpisha manama niꞌton, co yamoro inquiramahuëꞌ. Inapoatoma nosorotápomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

Habacuc 3:17

Inapotohuachina cantaꞌ, capa cancantarahuë. “Sinioro nichaꞌërinco huachi,” taꞌto napoarahuë. Iquiraroꞌsa co yancotopirinahuëntaꞌ, Sinioro chinotarahuë. Shaꞌtërëhuasopita co nitopirinahuëntaꞌ, napoarahuë. Ohuica huëntonoꞌsa capa nipirinahuëꞌ, ohuacaroꞌsanta pëinënaquë capa nipirinahuëꞌ, naporonta ina chinotarahuë.

Malaquías 3:11

Shaꞌtohuatamara, nisha nisha nipisopitari shaꞌtëramasopita tapirin. Oparonëmantaꞌ, napotërin. Napotëranquëmaso chachin nipatamaꞌ, co huachi inapita apiponquëmahuëꞌ.