Amós 4:7 - Chayahuita (Shahui)

⁷ Naquëranchin Sinioro taantarin: “Ca nohuanton oꞌnaonta pahuantërinquëmaꞌ. Shaꞌtëramasoꞌ nanitacaso marëꞌ cara yoqui pahuanapirinhuëꞌ, aꞌnaquën ninanonëmaquë aoꞌnanahuë. Aꞌnaquëso nipirinhuëꞌ, co oꞌnaninhuëꞌ. Aꞌna iminquësoꞌ oꞌnanin. Aꞌnaquëso nipirinhuëꞌ, oꞌnan pahuanin quëran noꞌpaꞌ yanirin.

Amós 4:7 ပူးပေါင်းရင်းမြစ်များ

Éxodo 10:22

Yosë natëton Moisësë tanpaquën ihuëpachina, yaꞌipi Iquipitoquë tashitopi. Cara tahuëri naporin. Paꞌpi tashi niꞌton, iquipitoroꞌsa co nanitopihuëꞌ niquënanacaisoꞌ. Co pacacasonta nanitopihuëꞌ. Israiroꞌsa yaꞌhuëpiquëso nipirinhuëꞌ, inachachin tahuëri nisarin.

Éxodo 8:22

Cosin partiso nipirinhuëꞌ, co tonca aꞌparahuëꞌ. Inaquëso piyapinëhuëpita yaꞌhuëpi niꞌton, co aꞌparahuëꞌ. Canpitaráchin aparisitaponquëmaꞌ. Israiroꞌsasoꞌ, co aparisitapihuëꞌ,’ tënin. Tashiraya chachin napoarin. Inapohuachin: ‘Tëhuënchachin Siniorosoꞌ, chiníquën nanantaton anaꞌintarincoi,’ tapon,” itërin.

Éxodo 9:26

Sharoꞌsa ocairi paꞌpitërin: Rino, sipata, inapita itopiso tapirin. Rinosoꞌ, nani yancon, sipatanta nani huënshara nipirinhuëꞌ, tapirin. Trico, sintino, inapitaso pahuanasoi niꞌton, noya chaꞌëchachinpi. Napoaponahuëꞌ, israiroꞌsa yaꞌhuëpiquësoꞌ, co manta ocai anotërinhuëꞌ. Napoaton copirnori, Moisësë, Aaron, inapita amataantarin. Huëꞌpachinara itapon: —Tëhuënchachin co noyahuëꞌ nicato oshahuanahuëꞌ. Co Yosëso tëhuërinhuëꞌ. Quiya tëhuëraisoꞌ. Co huachi yaꞌcopiaponquëmahuëꞌ, noya paꞌsarama huachi. Ina pochin shaꞌhuitocoꞌ. ¡Ocai, huira, inapita co huachi ahuantëraihuëꞌ! itërin. —Tëhuënchachin Yosë chinotëraisoꞌ, yaꞌipiroꞌpaꞌ huaꞌanëntërin. Ina anitotaꞌhuanquënso marëꞌ ninano quëran pipiso chachin Yosë nontarahuë. Ama huachi ocai, huira, inapita anotacaso marëhuëꞌ nontarahuë. Co mini quëmasoꞌ, Yosë tëꞌhuachátëraranhuëꞌ. Catahuarinënquënsopita huaꞌanoꞌsantaꞌ, co ina tëꞌhuachátërapirinahuëꞌ, Yosë nontarahuë, itërin.

Éxodo 9:4

Israiroꞌsa pëꞌtahuapisopitaso nipirinhuëꞌ, co maꞌsha tëranta onpotarahuëꞌ. Napoaton co aꞌnaya tëranta inaquësoꞌ, chiminaponhuëꞌ.

Isaías 5:6

Inapotahuato patarahuë. Co incari pacarapiponhuëꞌ. Co incari yaquisëꞌpaponhuëꞌ. Nahuanoꞌsaꞌ, pacatoroꞌ, inapitari imotapon. Chitoronta camaihuato, co inaquë oꞌnanaponhuëꞌ,” tënin nosororahuësoꞌ.

Jeremías 14:22

Inpioroꞌsasoꞌ, nisha nisha mamanshiroꞌsa moshapi. Co inapita nohuanton oꞌnaninhuëꞌ. ¡Co piꞌiroꞌtë tëranta nohuanton oꞌnaninhuëꞌ! Quëma Sinioro Yosënëhuëinquën niꞌton, oꞌnan aꞌpaimaran. Quëma nohuanton yaꞌipi inapita yaꞌhuërin. Napoaton quëmasáchin ninarainquën, itërahuë.

Jeremías 14:3

Maꞌhuanoꞌsasoꞌ, piyapinënpita iꞌsha macai marëꞌ aꞌpapi. Inapitasoꞌ iꞌsha tapainanoꞌsaquë paꞌpirinahuëꞌ, co quënanpihuëꞌ. Yonshanënaquë co manta iꞌsha quëpihuëꞌ. Napohuachina co napion ancantatonaꞌ, motoꞌ sëꞌmopi.

Jeremías 14:4

Imin camayoroꞌsantaꞌ, co napion ancantopi. Oꞌnan pahuanin quëran noꞌpaꞌ huëncharo huëncharo toconin. Napoaton inapitanta motoꞌ sëꞌmopi.

Joel 2:23

Quirosarinquë yaꞌhuëramasopitantaꞌ, capa cancantocoꞌ. Yaꞌipi Cota huëntonquë yaꞌhuëramasopita, noya cancantocoꞌ. Sinioroso Yosënënpoa niꞌton, ina yonquiatoma noya cancantocoꞌ. Ina nohuanton nohuantasëhua chachin oꞌnaantarin. Iráca, tahuërinënquë chachin oꞌnaninso pochin niaantarin.

Juan 4:35

“Catapini yoqui pahuanarin cayarinsoꞌ macacasoꞌ,” topiramahuëꞌ. Ipora chachin cayarinso pochin nininsoꞌ macacasoꞌ yaꞌhuërin, tënahuë casoꞌ. ¡Niꞌcochi! Isoroꞌpaꞌ panca imin pochin ninin. Cayarinsoꞌ manëso pochachin piyapiꞌsaꞌ manëꞌ Yosë imacaiso marëꞌ. Ipora tahuëriꞌsa chachin naꞌa piyapiꞌsaꞌ yaꞌhuërarin Yosë imacaiso marëꞌ. Inapita aꞌchintacasoꞌ yaꞌhuërin.

1 Corintios 4:7

Yosë nohuanton, nisha nisha nitotërëhuaꞌ. Co canpoara nohuanton, nitotërëhuahuëꞌ. Yosëíchin catahuarinpoaꞌ noya noya nicacasoꞌ. Co catahuarinpoahuëꞌ naporini, co mantaꞌ nitochitërihuahuëꞌ. Napoaton co nocantacasoꞌ yaꞌhuërinhuëꞌ.

Santiago 5:17

Niꞌcoꞌ. Iniasë canpoa pochachin niponahuëꞌ, chiníquën Yosë nontohuachina, natanin. “Naꞌa piyapiꞌsaꞌ Sinioro co imarinënquënhuëꞌ. Quëma nohuanton, ama oꞌnainsohuëꞌ,” itohuachina, cara piꞌipi naꞌcon co piꞌpisha tërantaꞌ oꞌnaninhuëꞌ.

Apocalipsis 11:6

Iráca pënëntonaꞌpiroꞌsaꞌ nani maꞌsha nipi piyapiꞌsaꞌ ayonquicaiso marëꞌ. Inapochachin catoyaꞌpi Yosëri aꞌparinsoꞌ, nani maꞌsha nanitapaapi. Yosë nontahuachinaꞌ, co oꞌnanaponhuëꞌ. Inapotatonaꞌ, pënëntáponaꞌ. Tëquëiontaꞌ nontahuachinaꞌ, huënaiꞌ taranapon. Ina quëran Yosë nohuanton, nisha nisha canioroꞌsaꞌ acorapi Yosë yonquicaiso marëꞌ.