3 Juan 1:8 - Chayahuita (Shahui)

⁸ Napoaton canpoaꞌ inapopisopita catahuahuaꞌ ama pahuanchinasohuëꞌ. Inapitasoꞌ noꞌtën nanan aꞌchinapi. Cosharoꞌ, maꞌsha inapita pahuantopisoꞌ quëtohuatëhuaꞌ, canpoarintaꞌ aꞌnapita catahuarihuaꞌ Yosë nohuitacaiso marëꞌ. Catahuahuatëhuaꞌ, naꞌcon naꞌcon piyapiꞌsaꞌ imasapi.

3 Juan 1:8 ပူးပေါင်းရင်းမြစ်များ

Mateo 10:14

Insëquësona paꞌpatamaꞌ, ‘Ama isëquë huëcosohuëꞌ. Co yanatanainquëmahuëꞌ,’ itohuachinënquëmaꞌ, patocoꞌ. Yapaꞌpatamaꞌ, pënëncoꞌ. ‘Nani shaꞌhuitopiranquëmahuëꞌ. Co nohuantëramahuëꞌ niꞌton, canpitaora tëhuënëmaquë ninaꞌintaramaꞌ,’ itocoꞌ. Ina quëran aꞌna parti paco huachi.

Mateo 10:40

Ina quëran pënëantarin: “Insosona noya natanpachinquëmaꞌ, noya natanarinaco cantaꞌ. Yosë aꞌpaimarinco niꞌton, Yosë nanamën chachin imasapi huachi.

Lucas 11:7

Yono tashiꞌ niꞌton, co nohuantaponhuëꞌ nimara. “Paquëꞌ iyasha. Nani yaꞌcoana oncotërahuë. Huiꞌnahuëpitantaꞌ huëꞌësápi. Co nanitërahuëꞌ quëtaꞌhuanquënsoꞌ,” tapon nimara.

2 Corintios 6:1

Yosë acorincoi nanamën aꞌchinaꞌhuaiso marëꞌ. Acoatoncoi, catahuarincoi aꞌchintaꞌhuainquëmaso marëꞌ. “Yosë nosoroatonpoaꞌ, yanichaꞌërinpoaꞌ,” itërainquëmaꞌ. Ama topinan quëran natancosohuëꞌ. Imaco huachi.

2 Corintios 8:23

“¿Intaꞌ Titosoꞌ?” itohuachinënquëmaꞌ, shaꞌhuitocoꞌ. “Coꞌta Paonorëꞌ aꞌchininsoꞌ. Inantaꞌ piyapiꞌsaꞌ catahuarin noya imacaiso marëꞌ,” itocoꞌ. “¿Maꞌmarëtaꞌ aꞌnapitantaꞌ huëꞌpi?” itohuachinënquëmaꞌ, “Nisha nisha ninano quëran aꞌpaipisoꞌ. Quisocristo noya imapi inapitantaꞌ,” itocoꞌ.

Filipenses 4:3

Quëmantaꞌ iyasha naꞌcon catahuaranco niꞌton, inapita catahuaquëꞌ noya ninonchinaꞌ. Cato chachin nóya sanapiꞌsaꞌ. Naꞌcon catahuarinaco Quisoso nanamën aꞌchinaꞌhuaso marëꞌ. Iya Crimintintaꞌ noya catahuarinco. Aꞌnapitantaꞌ catahuarinaco aꞌchinaꞌhuaso marëꞌ. Co nininënpita isëquë ninshitopirahuëꞌ, Yosëri nohuitërin. Nanpirin quiricaquë nininënpita nani ninshitërin. Inaquë ninshitohuachinpoaꞌ, nanpimiatarihuaꞌ.

Colosenses 4:11

Quisoso Costo itopisontaꞌ yonquiatënquëmaꞌ, saludos aꞌpatarinquëmaꞌ. Inapitasoꞌ cotio piyapiꞌsaꞌ niponaraihuëꞌ, Quisocristo imasapi. Ca pochin aꞌchinapi aꞌnapitantaꞌ Yosë huaꞌanëntërinquë yaꞌconacaiso marëꞌ. Ina marëꞌ nóya cancantërahuë. Inapitasoꞌ achinicancaninaco. Aꞌnapita cotioroꞌsaso nipirinhuëꞌ co catahuarinacohuëꞌ.

1 Tesalonicenses 3:2

Timotio aꞌpatërainquëmaꞌ nitotacaso marëꞌ. Inantaꞌ noya imarin. Yosëri acorin Quisocristo nanamën aꞌchinacaso marëꞌ. Achinicancainquëmaso marëꞌ aꞌpatërainquëmaꞌ.

Filemón 1:2

Imoya Apiantaꞌ yonquiato, ninshitaranquëmaꞌ. Arquipontaꞌ yonquirai. Yosë nanamën aꞌchinpatora, inantaꞌ naꞌcon catahuarincoi. Parisitaponahuëꞌ, noya ahuantërin. Yaꞌipi imapisopita quëma pëinënquë niyontonpisoꞌ naꞌcon yonquirai. Iso quirica nontëquëꞌ inapitantaꞌ natainaꞌ.

Filemón 1:24

Marco, Aristarco, Timasë, Nocasë, inapitantaꞌ yonquiatënënquën, saludos aꞌpatarinënquën. Inapitasoꞌ catahuarinaco Yosë nanamën aꞌchinacasoꞌ.

3 Juan 1:10

Napoaton yaꞌhuëramaquë paꞌpato, co noyahuëꞌ nininsopita aꞌninquëchin shaꞌhuitarahuë. Inasoꞌ naꞌcon pinorincoi, nonpinapirincoi. Naporahuaton, iyaroꞌsaꞌ aꞌchinacaiso marëꞌ canconpachinara, co noya nontërinhuëꞌ. Co pëinënquë ayaꞌconinhuëꞌ. Aꞌnapitari aꞌchinaꞌpiroꞌsaꞌ yacatahuapirinahuëꞌ, co ina tërantaꞌ nohuantërinhuëꞌ. “Ama pëinëmaquë ayaꞌconcosohuëꞌ,” itopirinhuëꞌ. Ayaꞌconpachinara, noꞌhuiton, inapitantaꞌ niyontonpi quëran yaocoirin. “Ama huachi canpita tërantaꞌ niyontonpiso pëiquë yaꞌconcosohuëꞌ,” toconin. Paꞌpi co noyahuëꞌ yonquirin inasoꞌ.

3 Juan 1:7

Quisocristo noninsoꞌ aꞌchinápi. Ina marëꞌ paꞌsápi. Co Yosë imapisopitahuëꞌ aꞌchintaponaraihuëꞌ, co mantaꞌ ina marëꞌ maꞌpatopihuëꞌ.

3 Juan 1:9

Yaꞌipi yaꞌhuëramaquë imaramasopita quirica nani ninshitëranquëmaꞌ. Tiotripisëso nipirinhuëꞌ, co yanatërincohuëꞌ. Inasoꞌ huaꞌan pochin yaninin.