2 Timoteo 3:8 - Chayahuita (Shahui)

⁸ Iráca catoꞌ pënotonoꞌsari Moisësë chinitopi. Canisë, Canprisë inapita itopisoꞌ. Moisësë noꞌhuitonaꞌ, copirno nonpintopi ama natëcaso marëhuëꞌ. Inapochachin ipora nisha aꞌchinaꞌpiroꞌsaꞌ co noyahuëꞌ yonquiatonaꞌ, co Yosë nohuantopihuëꞌ. Noꞌtëquën noninsoꞌ co yanatanpihuëꞌ. Nisha nanan imatonaꞌ, co Yosë imasapihuëꞌ.

2 Timoteo 3:8 ပူးပေါင်းရင်းမြစ်များ

Éxodo 7:11

Copirnoso nipirinhuëꞌ, nitotonoꞌsaꞌ, pënotonoꞌsaꞌ, inapita amatërin. Inapitanta pënotatonaꞌ, inachachin nicacaiso marëꞌ amatërin.

Éxodo 7:22

Napoaponahuëꞌ, Iquipito pënotonoꞌsanta pënotatonaꞌ, ina chachin niantapi. Napoaton copirnosoꞌ, Yosë naporinso chachin, co yanatëtërinhuëꞌ. Co natëtatonhuëꞌ, yaꞌhuërinquë paantarin.

Éxodo 8:18

Iquipito pënotonoꞌsantaꞌ, pënotatona ico yaanaꞌatopirinahuëꞌ, co nanitopihuëꞌ. Icori, piyapiꞌsaꞌ, maꞌsharoꞌsaꞌ, inapita aparisitapi.

Éxodo 8:7

Napoaponahuëꞌ, Iquipito pënotonoꞌsanta pënotatonaꞌ, iꞌ quëran huarira ocoipi antaꞌ. Inapitanta yaꞌipi ina roꞌtë yanquëëtopi.

Hechos 15:24

Iꞌhua aꞌnaquën isëquëran paꞌpachinara, nisha aꞌchintërinënquëmaꞌ. ‘Co Moisësë pënëntërinsoꞌ natëhuatamahuëꞌ, co Yosë huëntonënquë yaꞌconaramahuëꞌ,’ itërinënquëmaꞌ. Co quiyari aꞌpapiraihuëꞌ, paꞌpi. Natanahuatomaꞌ, nisha nisha yonquiramaꞌ. Pirnapi Paonorë chachin huëcaton, nani shaꞌhuitirincoi. Ipora huarëꞌ nitotatoi, ninshitarainquëmaꞌ.

Romanos 1:28

Co Yosë yanatëpihuëꞌ niꞌton, inari aꞌporin co noyahuëꞌ nicacaiso marëꞌ. Nitapicancamiatopi.

Romanos 16:18

Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

Efesios 4:14

Ina quëran noꞌtëquën yonquiarihuaꞌ. Co huachi huaꞌhuaroꞌsa pochin cancantarihuahuëꞌ. Huaꞌhuaroꞌsasoꞌ co yonquiyatërapihuëꞌ niꞌton, nisha nisha natëtopi. Canpoaso nipirinhuëꞌ chinotënpoa pochin noꞌtëquën yonquiaꞌahuaꞌ. Niꞌcoꞌ. Panca ihuan huëꞌpachina, poti niquëran niquëran ohuërërin. Co noꞌtëquën yanponinhuëꞌ. Inapochachin aꞌnaquën nisha nisha nanan natanpachinara, nisha nisha yonquipi. Co Quisocristo nanamënáchin yonquipihuëꞌ. Aꞌnaquën nisha nisha aꞌchinapi. Noyá nitotopi nonpinacaisoꞌ. Nonpin nanan imatonaꞌ, yanonpintopirinënquëmahuëꞌ, ama piꞌpian tërantaꞌ natëcosohuëꞌ.

1 Timoteo 1:19

Inasáchin natëton, pënëntëquëꞌ. Quisocristo nohuantërinsoráchin yonquiaton, noya niquëꞌ. Noyápiachin cancantaton, piyapiꞌsaꞌ aꞌchintëquëꞌ. Aꞌnaquënso nipirinhuëꞌ cancanëna quëran noya nicacaisoꞌ nitotopirinahuëꞌ, co yanatëpihuëꞌ. Nani Yosë naniantatonaꞌ, co huachi yonquipihuëꞌ. Quisocristo aꞌpoatonaꞌ, co huachi imapihuëꞌ.

1 Timoteo 4:2

Naporoꞌ nonpinaꞌpiroꞌsaꞌ yaꞌhuaponaꞌ piyapiꞌsaꞌ nonpintacaiso marëꞌ. “Quiyantaꞌ Yosë imarai,” topirinahuëꞌ, co noꞌtëquën nonsapihuëꞌ. Nitotaponaraihuëꞌ, co cancanhuanhuë pochin nicatonaꞌ, co natëtochináchinhuëꞌ cancantapi. Huaꞌquiꞌ sopai natëtonaꞌ, co huachi nanitapihuëꞌ Yosë natëcaisoꞌ. Inapitasoꞌ nisha aꞌchinapi.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

2 Timoteo 4:15

Yosë nanamën aꞌchinahuë niꞌton, chiníquën noꞌhuirinco. “Nonpiánin,” tënin. Napoaton niꞌquëna quëmanta inapotochinquën.

Tito 1:10

Naꞌa quëmapiꞌsaꞌ co natëtochináchinhuëꞌ cancantopi. Inahuara yonquinëna quëran aꞌchinapi niꞌton, topinan quëran nonsápi. Cotioroꞌsaꞌ pënëntërinsoꞌ imatonaꞌ, napopi. Nisha nisha nonatonaꞌ, yanonpinapi.

Tito 1:16

“Yosë nohuitërahuë,” topirinahuëꞌ, co noyahuëꞌ nipi. Ina marëꞌ co tëhuënchachin imapihuëꞌ, tënahuë. Co Yosëri noya niꞌninhuëꞌ. “Napoonpi,” tënin. Co mantaꞌ yanatëpihuëꞌ. Yosë aꞌpoatonaꞌ, co piꞌpisha tërantaꞌ nanitopihuëꞌ noya nicacaisoꞌ.

2 Pedro 2:14

Sanapi quënanpachinara, monshitacaisoráchin yonquipi. Co nanitopihuëꞌ naniantacaisoꞌ. Co chiníquën cancantopisopitahuëꞌ nonpintatonaꞌ, anishacancantapi. Huënsonquë maꞌsha manëso pochin nonpintapi. Maꞌsharáchin yonquiatonaꞌ, noyapatopi. Napoaton Yosëri anaꞌintarin.

1 Juan 2:18

Co huaꞌquiya quëranhuëꞌ, apiaꞌhuaroꞌsaꞌ, Quisocristo oꞌmantararin. “Cristo yaoꞌmahuachin, inimiconën huëꞌsarin,” itërinënpoaꞌ. Nani natantëramaꞌ canpitantaꞌ. Iporasoꞌ naꞌa piyapiꞌsari Cristo yainimicotopi. Napoaton oꞌmantacasoꞌ tahuëri naniriarin, tënëhuaꞌ.

1 Juan 4:1

Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ.

Apocalipsis 2:20

co yaꞌipi cancanëma quëran imaramacohuëꞌ. Aꞌna sanapi corto pëiquë chachin nonpin nanan aꞌchintopirinquëmahuëꞌ, co aꞌparamahuëꞌ. Iráca Quisapira paꞌpi co noyahuëꞌ sanapi niponahuëꞌ, chiníquën nanantaton, piyapinëhuëpita anishacancantërin. Inapochachin iporasoꞌ ina sanapi pënënarinquëmaꞌ co noyahuëꞌ nicacamasoꞌ. ‘Noya monshihuanacasoꞌ. Mamanshi moshacaso marëꞌ nosha acohuachina, noya capacasoꞌ. Caꞌcoꞌ,’ itohuachinquëmara, aꞌnaquëmaꞌ natëtomaꞌ, monshihuanamaꞌ. Nosha mamanshi marëꞌ acopisoꞌ caꞌnamaꞌ. Ina pochin ina sanapi nonpintërinquëmaꞌ.

Apocalipsis 2:6

Napoaponahuëꞌ, nisha aꞌchinaꞌpiroꞌsaꞌ co piꞌpian tërantaꞌ nohuantëramahuëꞌ, Nicoraitaroꞌsaꞌ itopisoꞌ. Co noyahuëꞌ nicacasoꞌ aꞌchintopirinënquëmahuëꞌ, co nohuantëramahuëꞌ natëcamasoꞌ. Carintaꞌ co costarahuëꞌ.