2 Timoteo 2:6 - Chayahuita (Shahui)

⁶ Iminquë chiníquën sacatërinso pochin Yosë marëꞌ chiníquën sacatacasoꞌ yaꞌhuërin. Shaꞌtonaꞌpi noya sacatohuachina, cosharoꞌ yaꞌhuëtërin. Cayahuachina, inariꞌton manin.

2 Timoteo 2:6 ပူးပေါင်းရင်းမြစ်များ

Mateo 20:1

“Natanco iyaroꞌsaꞌ, Yosë huaꞌanëntërinsoꞌ aꞌchintaantaꞌinquëmaꞌ. Aꞌna quëmapi yaꞌhuërin, pancana noꞌpaꞌ huaꞌanëntërinsoꞌ. Inaquë opasáchin shaꞌnin. Panca imin yaꞌhuëtërin niꞌton, piyapiꞌsaꞌ nohuantërin iminënquë asacatacaso marëꞌ. Tashiramiachin paꞌnin sacatoroꞌsaꞌ yonípon.

Mateo 25:16

Aꞌnatërápo huaranca maꞌpatonaꞌpisoꞌ aꞌnaroáchin natërin. Paaton, naꞌa maꞌsha paꞌanin. Ina quëran inapita paꞌanaton, naꞌcon naꞌcon coriqui canarin. Nani tahuëri inapoaton, oshaquëran aꞌnatërápo huaranca aquëtëꞌ canaantarin.

Lucas 10:2

“Tëhuënchachin iyaroꞌsaꞌ, isoroꞌpaꞌ panca imin pochin ninin. Cayarinsoꞌ manëso pochachin piyapiꞌsaꞌ manëꞌ Yosë imacaiso marëꞌ. Naꞌa piyapiꞌsaꞌ yaꞌhuëpirinahuëꞌ, caraíchin pënëntarin. Napoaton Yosë nontocoꞌ aꞌnapitantaꞌ aꞌpaꞌin pënënchinaꞌ. Inasoꞌ yaꞌipiya huaꞌanëntarin.

1 Corintios 9:23

Ina pochin Yosë nanamën aꞌchinpato, naꞌcon naꞌcon piyapiꞌsari ina nohuitapi antaꞌ. Ina marëꞌ cantaꞌ noya cancantërahuë.

2 Timoteo 2:7

Aꞌchintaranquënsoꞌ api yonquiráquëꞌ. Quisocristo catahuaarinquën noya noya yonquicamaso marëꞌ.

Hebreos 10:36

Maꞌsha onpopiramahuëntaꞌ, noya ahuantocoꞌ. Noya natëhuatamaꞌ, naꞌcon catahuarinquëmaꞌ. Nani shaꞌhuitërinquëmaꞌ niꞌton, co nonpintarinquëmahuëꞌ. Noya nichaꞌësarinquëmaꞌ.

Hebreos 6:7

Niꞌcoꞌ. Yaꞌpirin shaꞌpatëra, oꞌnan yaꞌhuëhuachina, papotërin. Huaꞌanënsoꞌ inaquë sacatarin. Noya nitohuachina, noya cancantërin. “Yosë nohuanton, noya papotërin,” tënin.