2 Timoteo 2:3 - Chayahuita (Shahui)

³ Noya sontaro pochin niquëꞌ. Inasoꞌ parisitohuachina, ahuantërin. Inapochachin quëmantaꞌ Quisocristo marëꞌ parisitohuatan, ahuantëquëꞌ.

2 Timoteo 2:3 ပူးပေါင်းရင်းမြစ်များ

Hechos 23:31

Ina quëran sontaroꞌsasoꞌ natërahuatonaꞌ, Paono quëpapi. Tashiꞌ nipirinhuëꞌ, Antipatërisëꞌpaꞌ quëpapi.

1 Corintios 13:7

Co noyahuëꞌ nanan natantohuatëhuaꞌ, co aꞌnaroáchin natëtarihuahuëꞌ. Noya yonquiatëhuaꞌ, natëarihuaꞌ. “Yosë nohuanton, oshaquëran noya cancantapon,” taꞌtëhuaꞌ, ninarëhuaꞌ. Maꞌsha onpotopirinënpoahuëntaꞌ, yaꞌipi ahuantarihuaꞌ.

1 Corintios 9:7

Niꞌcoꞌ, iyaroꞌsaꞌ. Sontaro yaꞌconpachinara, co cosharonën paꞌanacasoꞌ yaꞌhuërinhuëꞌ. Capacasoꞌ, aꞌmocasoꞌ, inapita topinan quëtopi. Inapochachin opa shaꞌpachina, huaꞌanëni inaora macaton, irorin. Co ina marëꞌ pahuërëtacasoꞌ yaꞌhuërinhuëꞌ. Ohuica pëꞌtahuanaꞌpintaꞌ nohuantohuachina, ohuica shoꞌshoiꞌ shiꞌshiaton, oꞌorin.

2 Corintios 1:6

Canpitantaꞌ Yosë nohuitacamaso marëꞌ aꞌchintërainquëmaꞌ. Ina marëꞌ aparisitërinacoi. Parisitapiraihuëꞌ, Yosë achinicancanincoi ahuantaꞌhuaiso marëꞌ. Yosë catahuarinquëmaꞌ canpitantaꞌ, tënai. Parisitopiramahuëꞌ achinicancanarinquëmaꞌ quiya pochachin ahuantamaso marëꞌ.

1 Timoteo 1:18

Huiꞌnahuë pochin api, niꞌnanquën. Iꞌhua chachin ansianoꞌsaꞌ Yosë nontatonaꞌ, acorinënquën Yosë nanamën aꞌchinamaso marëꞌ. Naporoꞌ Yosëri anitotërinsoꞌ shaꞌhuitatënën, pënëninënquën. “Yosë nohuanton, api, nanamën noya aꞌchinaran. Ina marëꞌ acorinquën. Parisitaponahuëꞌ, catahuarinquën. Napoaton Quisoso aꞌchininso chachin aꞌchinquëꞌ,” itërinënquën. Iporantaꞌ inachachin pënënaranquën. Quisoso nanamën chachin aꞌchinquëꞌ sopai minsëcaso marëꞌ. Tëhuënchachin sopai yacanapirinpoahuëꞌ, Quisocristo catahuarinpoaꞌ minsëcaso marëꞌ.

2 Timoteo 1:1

Ca Paonoco ninshitaranquën. ¿Noya quëmantaꞌ yaꞌhuaran? Noya cantaꞌ isëquë yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Quisocristo imapatëhuaꞌ, Yosë nohuitatëhuaꞌ, nanpimiatarihuaꞌ.

2 Timoteo 1:8

Ama tapanatonhuëꞌ, Sinioro nanamën aꞌchináquëꞌ. Ina aꞌchinahuëso marëꞌ tashinan pëiquë poꞌmorinaco. Ama ina marëntaꞌ tapanquësohuëꞌ. Quëmantaꞌ aꞌchinanso marëꞌ aparisitohuachinënquën, chiníquën cancantëquëꞌ. Napohuatan, Yosë catahuarinquën noya ahuantamasoꞌ.

2 Timoteo 2:10

“Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.

2 Timoteo 2:9

Ina aꞌchinahuëso marëꞌ parisitërahuë. Noꞌhuitonaco, tashinan pëiquë poꞌmorinaco. Apinaꞌpi pochin nicatonaco, catinatërinaco. Inapotopirinacohuëꞌ, Yosë nanamënsoꞌ co nanitopihuëꞌ inapotacaisoꞌ. Nisha nisha parti aꞌchinapi niꞌton, nahuinin.

2 Timoteo 3:11

Aparisitopirinacohuëꞌ, ahuantërahuë. Yaꞌipi niꞌnan niꞌton, nitotëran. Antioquiaquë, Iconioquë, Nistraquë, inaquëpita chiníquën parisitaporahuëꞌ, Sinioro catahuarinco niꞌton, chaꞌërahuë.

2 Timoteo 4:5

Quëmaso nipirinhuëꞌ, yonquínahuan niquëꞌ. Aparisitohuachinënquën, ama noꞌhuitatonahuëꞌ, ahuantëquëꞌ. Aꞌnaya aꞌnaya Yosë nanamën aꞌchintëraꞌpiaquëꞌ. Co imapisopitahuëntaꞌ nitochinaꞌ. Yaꞌipi imapisopita catahuaquëꞌ noya noya imainaꞌ.

Filemón 1:2

Imoya Apiantaꞌ yonquiato, ninshitaranquëmaꞌ. Arquipontaꞌ yonquirai. Yosë nanamën aꞌchinpatora, inantaꞌ naꞌcon catahuarincoi. Parisitaponahuëꞌ, noya ahuantërin. Yaꞌipi imapisopita quëma pëinënquë niyontonpisoꞌ naꞌcon yonquirai. Iso quirica nontëquëꞌ inapitantaꞌ natainaꞌ.

Hebreos 10:32

Yaꞌnan imaramasoꞌ tahuëriꞌsaꞌ yonquicoꞌ. Quisocristo nanamën aꞌchintohuachinënquëmara, noya natanatomaꞌ, imaramaꞌ. Ina marëꞌ parisitapomarahuëꞌ, co yaaꞌporamahuëꞌ. Noya ahuantëramaꞌ.

Hebreos 11:27

Yosë natëton, Moisësë Iquipito quëran pipirin. Copirnori noꞌhuipirinhuëꞌ, co tëꞌhuatërinhuëꞌ. “Yosë co quënanaporahuëꞌ, niꞌsárinco,” taꞌton, chiníquën cancantërin. Chiníquën cancantaton, Yosë piyapinënpita catahuarin.

Hebreos 6:15

Itohuachina, Apraani Yosë natërin. Huaꞌquiꞌ co huiꞌnin yaꞌhuëtopirinhuëꞌ, noya cancantaton, ninarárin. “Co Yosë nonpintërincohuëꞌ,” taꞌton, natërin. Napoaton napoin quëran huiꞌnin nasitërin.

Santiago 1:12

Yaꞌipinpoaꞌ maꞌsha onporëhuaꞌ. Caniorëhuaꞌ, parisitërëhuaꞌ, naporëhuaꞌ. Noya ahuantohuatëhuaꞌ, nóya cancantarihuaꞌ. “Parisitaponaraihuëꞌ, nóya imasarinaco,” taꞌton, Yosë noya niꞌsarinpoaꞌ. Ina marëꞌ inápaquë noya acanararinpoaꞌ. Nanpimiatarihuaꞌ. “Tëhuënchachin nosorohuatamaco, ananpitaantaranquëmaꞌ,” itërinpoaꞌ. Shaꞌhuitërinpoaꞌ niꞌton, co onporontaꞌ nonpintarinpoahuëꞌ.