2 Timoteo 2:24 - Chayahuita (Shahui)

²⁴ Sinioro piyapinënpoaꞌ nipatëhuaꞌ, co piyapiꞌsaꞌ noꞌhuicasoꞌ yaꞌhuërinhuëꞌ. Noya nontacasoꞌ yaꞌhuërin. Noya nitotatëhuaꞌ, aꞌchintahuaꞌ. Noꞌhuipirinpoahuëꞌ, ama noꞌhuiahuasohuëꞌ, ahuantahuaꞌ. Sanoanan quëran nontahuaꞌ.

2 Timoteo 2:24 ပူးပေါင်းရင်းမြစ်များ

Isaías 40:11

Huaꞌanëni ohuicanënpita aꞌpairin. Carniroaꞌhuaroꞌsaꞌ, iporahuaton quëparin. Nasha huaipisopita oshaquëran quëpaton aꞌcarin. Ina naporinso pochin canpoantaꞌ, Sinioro noya aꞌpaiarinpoaꞌ,” itocoꞌ.

Daniel 6:20

Nani yaꞌcaritohuachina, co napion ancantaton: —¡Naniri. Quëmaso Yosëíchin cancantaton natëran! Inasoꞌ nanpiárin nichinapon chachin, ¿nichaꞌërinquën paꞌpiniroꞌsa quëran to? itërin.

Mateo 12:19

Co noꞌhuiarinhuëꞌ. Co chiníquën nonsarinhuëꞌ. Co cachiquë paaton, piyapiꞌsaꞌ anoꞌhuitarinhuëꞌ.

Juan 6:52

Ina natanahuatonaꞌ, cotioroꞌsaꞌ nisha nisha ninontopi. —¿Onporahuatontaꞌ nonën chachin caꞌnëso pochin quëtërëꞌponpoa nicaya? nitopi.

Hechos 15:2

Paonosoꞌ, co ina pochin yonquirinhuëꞌ. “Co niacotacasoꞌ yaꞌhuërinhuëꞌ,” tënin. Pirnapintaꞌ inachachin yonquirin. Napoaton canquipisopitarëꞌ ninontopi. “Co noꞌtëquën aꞌchinamahuëꞌ,” nitatonaꞌ, chiníquën ninontopi. Napoaton imapisopitari itaponaꞌ: “Quirosarinquë pacoꞌ. Caꞌtanoꞌsaꞌ, ansianoꞌsaꞌ, inapita natancoꞌ. ¿Maꞌtamaꞌ shaꞌhuichinënquëmapaꞌ?” taꞌtonaꞌ, Paono, Pirnapi, inapita aꞌpapi. Aꞌnapitantaꞌ inapitarëꞌ aꞌpapi.

Hechos 23:9

Napoaton ninontatonaꞌ, noncaroapi. Parisio maistroꞌsaꞌ huanirahuatonaꞌ, chiníquën nonpi. —Iso quëmapisoꞌ noya, tënai. Co mantaꞌ onporinhuëꞌ. Anquëni noninsoꞌ natamara. Huaꞌyani aꞌna nontomara, tënin aꞌnaquën. Napohuachinara, satosioroꞌsaꞌ noꞌhuitopi.

Hechos 7:26

Tahuëririnquë catoꞌ israiroꞌsa capini niahuërapi, Moisësëri quënanconin. “¿Onpoatomataꞌ canpita capini niahuëaramaꞌ? Nanan anoyatocoꞌ,” itërin.

2 Corintios 10:1

Ca Paonoco sanoanan quëran pënënanquëmaꞌ. Aꞌnaquën napopi: “Paono aquë quëran ninshitohuachinpoara, chiníquën nanan aꞌpatirinpoaꞌ. Isëquë chachin yaꞌhuapon, tëꞌhuatatonpoaꞌ, co chiníquën pënëninpoahuëꞌ,” topi natantërahuë. Quisocristosoꞌ chiníquën nanantaponahuëꞌ, co noꞌhuirinpoahuëꞌ. Sanoanan quëran pënëninpoaꞌ. Ina pochin cancantato, cantaꞌ sanoanan quëran pënënanquëmaꞌ.

2 Corintios 10:4

Aꞌnaquënsoꞌ inimiconënpita minsëcaiso marëꞌ nisha nisha quihuípi. Quiyaso nipirinhuëꞌ co quiyaora yonquinëhuëi quëran minsëtaraihuëꞌ. Sacaiꞌ nipirinhuëꞌ, Yosë ananitërincoi nonpin nananoꞌsaꞌ minsëcaꞌhuaisoꞌ.

2 Corintios 6:4

Maꞌsona tërantaꞌ nipatoira, Yosëíchin natërai piyapiꞌsaꞌ nicatonacoi ina yonquicaiso marëꞌ. Aparisitopirinacoihuëꞌ, co iꞌhuërëtëraihuëꞌ. Maꞌsha, cosharoꞌ, inapita pahuantopirincoihuëꞌ, ahuantatoi, chiníquën cancantërai. Maꞌsha onpoapoiraihuëꞌ, co paꞌyanaihuëꞌ.

Gálatas 5:22

Nipirinhuëꞌ, Ispirito Santo natëhuatëhuaꞌ, catahuarinpoaꞌ ninosorocasoꞌ. Catahuahuachinpoaꞌ, Yosë nohuitatëhuaꞌ, capa cancantarihuaꞌ. “Yosë noya niꞌsarinco,” taꞌtëhuaꞌ, sano cancantarihuaꞌ niꞌton, noya ninicatëhuaꞌ yaꞌhuarihuaꞌ. Piyapiꞌsaꞌ noꞌhuipirinpoahuëntaꞌ, co yanoꞌhuirihuahuëꞌ. Maꞌsha onpohuatëhuantaꞌ, ahuantarihuaꞌ. Nosoroatëhuaꞌ, nóya nontarihuaꞌ. Ispirito Santo catahuahuachinpoaꞌ, noya nicarihuaꞌ. Noꞌtëquën nontarihuaꞌ; co piꞌpisha tërantaꞌ nonpintarihuahuëꞌ.

Efesios 4:2

“Yosëíchin catahuarinpoaꞌ noya nicacasoꞌ,” taꞌtomaꞌ, ama aꞌnapita nocancosohuëꞌ. Sanoanan quëran nontatomaꞌ, ama noꞌhuicosohuëꞌ. Aꞌnapita maꞌsha onpotohuachinënquëmaꞌ, ama yaiꞌhuërëtocosohuëꞌ. Co noyahuëꞌ nipirinahuëꞌ, nosoroatomaꞌ noya nontocoꞌ.

Deuteronomio 34:5

Ina pochin Yosë piyapinën Moisësë itopiso chiminin. Moapo noꞌpaquë chachin chiminin. Siniorori shaꞌhuitërinso chachin ninin.

Filipenses 2:14

Noya ninicatomaꞌ iyaroꞌsaꞌ yaꞌhuëcoꞌ. Ama ninoꞌhuicosohuëꞌ. Maꞌsona tërantaꞌ nipatamaꞌ, noya cancantatomaꞌ, nicoꞌ.

Filipenses 2:3

Aꞌnaquën chiníquën nanan nohuantopi. Inasáchin yonquiatonaꞌ, aꞌnapita nocanpi. “Casoꞌ noya noyaco,” topi yonquinëna quëran. Canpitaso nipirinhuëꞌ ama ina pochin cancantocosohuëꞌ. Aꞌnapita noya noya niꞌcoꞌ.

Colosenses 3:13

Ama yaiꞌhuërëtocosohuëꞌ. Aꞌnapita noꞌhuihuachinquëmaꞌ, nanan anoyatocoꞌ. Maꞌsha onpotopirinquëmaontaꞌ, naniantocoꞌ. Sinioro oshanëmaꞌ nani inquitërinquëmaꞌ. Ina nonanatomaꞌ, canpitantaꞌ nanan anoyatocoꞌ.

1 Tesalonicenses 2:7

Quisocristo aꞌparincoi niꞌton, chiníquën nanan quëtërincoi. Napoaponahuëꞌ, co chiníquën nontërainquëmahuëꞌ. Co inso tërantaꞌ huaꞌan pochin camairaihuëꞌ natëinacoiso marëꞌ. Sanoanan quëran nontërainquëmaꞌ. Sanapi huaꞌhuinpita nosoroaton, noya nocomarinso pochin quiyarimantaꞌ niꞌnainquëmaꞌ.

1 Timoteo 6:11

Quëmaso nipirinhuëꞌ api Yosë imaran niꞌton, ama coriquiráchin yonquiquësohuëꞌ. Noya nicacasoáchin yonquiquëꞌ. Cancanën quëran huarëꞌ Yosë chinotëquëꞌ. “Inasoꞌ nosoroatonco, catahuarinco,” taꞌton, noya natëquëꞌ. Naporahuaton, yaꞌipi piyapi nosoroquëꞌ. Maꞌsha onpoaponahuëꞌ, chiníquën cancantëquëꞌ. Sano piyapi niquëꞌ.

Tito 1:1

Ca Paonoco ninshitaranquën, niꞌquëꞌ. ¿Noya yaꞌhuaran? Noya cantaꞌ yaꞌhuarahuë. Tata Yosë huaꞌanëntërinco niꞌton, inasáchin natërahuë. Quisocristo acorinco nanamën aꞌchinaꞌhuaso marëꞌ. Yosë huayoninpoaꞌ niꞌton, huëntonënquë yaꞌconëhuaꞌ. Nóya natëcaiso marëꞌ aꞌchinarahuë. Noꞌtën nanan aꞌchinaꞌhuaso marëꞌ acorinco. Ina natëhuatëhuaꞌ, noꞌtëquën imasarëhuaꞌ.

Tito 1:7

Yosë nohuanton, ansianoꞌsaꞌ yaꞌhuëpi imapisopita catahuacaiso marëꞌ. Yosëri acorin niꞌton, noyasáchin niinaꞌ. Ama nocanchinasohuëꞌ. “Casáchin noꞌtëquën nitotërahuë,” topachinaꞌ, ama acoquësohuëꞌ. Ama yanoꞌhuichinasohuëꞌ. Ama noꞌpiinasohuëꞌ. Ama yaahuëchinasohuëꞌ. Ama coriquiráchin cancanchinasohuëꞌ. Ama piꞌpian tërantaꞌ nonpinatonaꞌ, canainasohuëꞌ. Insosona ina pochin cancantohuachin, ama ansiano acoquësohuëꞌ.

Tito 1:9

Yosë nanamën noꞌtëquën aꞌchintërainquëmaꞌ. Ina nanansáchin ansianoꞌsaꞌ imainaꞌ. Ina naꞌcon yonquihuachinaꞌ, noya pënëntaponaꞌ, noꞌtëquën aꞌchinaponaꞌ. Aꞌnapitaso nisha nanan aꞌchinpirinahuëꞌ, ansianoꞌsarisoꞌ Yosë nanamënáchin aꞌchinchinaꞌ. Ama imapisopita nonpin nanan natëtacaiso marëhuëꞌ inapochinaꞌ.

Tito 3:2

Ama pinochinasohuëꞌ. Ama ninoꞌhuiinasohuëꞌ. Noya ninicatonaꞌ yaꞌhuëꞌinaꞌ. Yaꞌipi piyapiꞌsaꞌ noya nicatonaꞌ, sanoanan quëran nonchinaꞌ.

Santiago 1:1

Ca Santiacoco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Tata Yosë huaꞌanëntërinco niꞌton, Sinioro Quisocristoíchin natërahuë. Yaꞌipi cotioroꞌsanquëmaꞌ Quisocristo imaramasoꞌ ninshitaranquëmaꞌ. Canpitasoꞌ yanquëërahuatomaꞌ, nisha nisha parti yaꞌhuaramaꞌ. Yaꞌipi Yosë piyapinënpitanquëmaꞌ ninamasoꞌ ninshitaranquëmaꞌ.

Santiago 3:17

Yosëso nipirinhuëꞌ, noꞌtëquën ayonquirinpoaꞌ. Ina catahuahuachinpoaꞌ, noyápiachin cancantarihuaꞌ. Co mantaꞌ noꞌhuitarihuahuëꞌ. Sanoanan quëran nontarihuaꞌ. Aꞌnapita pënënpachinpoaꞌ, noya natanarihuaꞌ. Piyapiꞌsaꞌ nosoroarihuaꞌ. Naporahuaton noyasáchin nisarëhuaꞌ. Co nisha nisha yonquiarihuahuëꞌ. Co nonpintarihuahuëꞌ. Yosëíchin catahuarinpoaꞌ ina pochin cancantacasoꞌ.

Santiago 4:2

Nani maꞌsha nohuantopiramahuëꞌ, co yaꞌhuëtërinquëmahuëꞌ niꞌton, yatëpatopiso pochin cancantëramaꞌ. Aꞌna piyapi maꞌshanënpitantaꞌ nohuantaparamaꞌ. Co yaꞌhuëtohuachinquëmarahuëꞌ, ninoꞌhuiramaꞌ, yaniahuëramaꞌ. Co Yosë nontëramahuëꞌ niꞌton, noya nininsopita co yaꞌhuëtërinquëmahuëꞌ.

Josué 1:1

Moisësësoꞌ Yosë piyapinën. Non huiꞌnin Cosoi itopisoso nipirinhuëꞌ, Moisësë catahuarin. Ina chiminpachina, Yosëri Cosoi nontaton itapon:

1 Pedro 3:8

Yaꞌipinquëmaꞌ noya niniꞌtomaꞌ, yaꞌhuëcoꞌ. Aꞌnaquën sëtohuachinaꞌ, noya nontocoꞌ ama aquëtëꞌ sëchinasohuëꞌ. Noya cancantohuachinaꞌ, canpitantaꞌ noya cancantocoꞌ. Imaramaso capini ninosorocoꞌ. Ninosoroatomaꞌ iyaroꞌsaꞌ nicatahuacoꞌ. Ama ninocancosohuëꞌ. Canpitantaꞌ imoyaroꞌsaꞌ, noya ninontocoꞌ.

Judas 1:3

Carinquëmaꞌ iyaroꞌsaꞌ nosororanquëmaꞌ. Iꞌhuamiáchin yonquirahuë ninshitaꞌhuanquëmaso marëꞌ. Yosë anoyacancantërinpoasoꞌ noya noya yaaꞌchintopiranquëmahuëꞌ, apira nanan natantërahuë. Aꞌnaquënsoꞌ nonpin nanan aꞌchintarinënquëmaꞌ, natantërahuë. Napoaton pënënaꞌhuanquëmasoꞌ yaꞌhuërin, tënahuë. Quisocristo nanamën noꞌtëquën aꞌchintërainquëmaꞌ. Yosë nohuanton, noꞌtëquën ninshitërai yaꞌipi imapisopita nitotacaiso marëꞌ. Nani yaꞌipiya nanamën anitotërinpoaꞌ. Inasáchin natëtomaꞌ, aꞌnapitantaꞌ aꞌchintocoꞌ noꞌtëquën yonquicaiso marë antaꞌ. Ama piꞌpian tërantaꞌ nisha aꞌchintocosohuëꞌ, tënahuë.