2 Timoteo 2:21 - Chayahuita (Shahui)

²¹ Inapochachin co noyahuëꞌ yonquiramasoꞌ naniantohuatamaꞌ, ninshiraya minëꞌ pochin nisaramaꞌ. Noyasáchin cancantohuatamaꞌ, Yosë nohuantarinquëmaꞌ. Acoarinquëmaꞌ noya nicacaso marëꞌ.

2 Timoteo 2:21 ပူးပေါင်းရင်းမြစ်များ

Isaías 1:25

Naquëranchin maꞌsha onpotaantaꞌhuanquënso yaꞌhuërin. Amoro ahuiquitomiatërëso pochin amirotochináchin ninamasoꞌ, inquitaranquëmaꞌ.

Isaías 52:11

¡Papironia quëran pipico huachi! Ama manta Yosëri amirotochináchin niꞌninsoꞌ sëꞌhuacosohuëꞌ. Sinioro pëinënquë yaꞌhuërinsopita quëpanaꞌpiroꞌsanquëmaꞌ, ama huachi oshahuaantacosohuëꞌ.

Jeremías 15:19

Naporoꞌ Siniorosoꞌ, aꞌpaniantarinco: “Cachachin tahuërëtaantahuatanco, huaꞌanëntaantaranquën. Ama maꞌton maꞌton nonquësohuëꞌ. Noya nininsoráchin nonquëꞌ. Inapohuatan, pënëntamaso marëꞌ carinquën nanan quëtaranquën. Chinitërinënquënsopita ama natëquësohuëꞌ. Quëma tëhuënchinsoꞌ, natëinënquënso yaꞌhuërin.

Malaquías 3:3

Huënsëaton corto huaꞌanoꞌsa tapararin. Oro, prata, inapita pënquë asoquipiso pochin co noyahuëꞌ nipisopita inquitarin. Naporo huarëꞌ Nihui quëran pipipisopitasoꞌ, noꞌtën chachin ca marëꞌ maꞌsha quëpisoꞌ, aꞌnotaponaco.

Hechos 9:15

“Iꞌhua mini co noyahuëꞌ yonquipirinhuëꞌ, nani huayonahuë ca nanamëhuë aꞌchinacaso marëꞌ. Nisha nisha piyapiꞌsaꞌ aꞌchintarin imainacoso marëꞌ. Huaꞌanoꞌsanënpitantaꞌ shaꞌhuitarin. Israiroꞌsantaꞌ aꞌchintarin imainacoso marëꞌ.

1 Corintios 5:7

Iráca Pascoa cosharoꞌ caꞌpachinara, co piꞌpian tërantaꞌ ahuëpocatërinsoꞌ nohuantopihuëꞌ. Yaꞌipiya tëꞌyatopi. Pascoaquë carniroaꞌhua tëpapiso pochin Quisocristo nani chiminin canpoa marëꞌ. Ina imaramaꞌ niꞌton, nasha cancan quëtërinquëmaꞌ.

2 Corintios 7:1

Iyaroꞌsa naꞌcon nosororanquëmaꞌ. Ina pochin Yosë yonquirinpoa niꞌton, yaꞌipi co noyahuëꞌ yonquirëhuasopita naniantahuaꞌ. Yaꞌipi co noyahuëꞌ ninëhuasopitantaꞌ aꞌpoaꞌahuaꞌ. Yosë tëꞌhuatatëhuaꞌ, noyasáchin niahuaꞌ.

2 Corintios 9:8

Yosë yaꞌipi nanitaparin. Nosoroatënquëmaꞌ, naꞌcon catahuarinquëmaꞌ noya nicacamasoꞌ. Nani tahuëri catahuarinquëmaꞌ. Ina catahuahuachinquëmaꞌ, noya cancantaramaꞌ. Ina nohuanton, yaꞌhuëtarinquëmaꞌ aꞌnapitantaꞌ quëtacaso marëꞌ.

Efesios 2:10

Yosë anoyacancantërinpoaꞌ. Anoyacancantahuatonpoaꞌ, acorinpoaꞌ nóya nicacaso marëꞌ. Quisocristo catahuahuachinpoaꞌ, noya nisarëhuaꞌ. Iráca quëran huarëꞌ yonquirinpoaꞌ ina pochin nicacasoꞌ. Ina marëꞌ nichaꞌërinpoaꞌ.

1 Timoteo 6:11

Quëmaso nipirinhuëꞌ api Yosë imaran niꞌton, ama coriquiráchin yonquiquësohuëꞌ. Noya nicacasoáchin yonquiquëꞌ. Cancanën quëran huarëꞌ Yosë chinotëquëꞌ. “Inasoꞌ nosoroatonco, catahuarinco,” taꞌton, noya natëquëꞌ. Naporahuaton, yaꞌipi piyapi nosoroquëꞌ. Maꞌsha onpoaponahuëꞌ, chiníquën cancantëquëꞌ. Sano piyapi niquëꞌ.

2 Timoteo 2:16

Nonpin nananoꞌsaso nipirinhuëꞌ tananpitëquëꞌ. Ama natanquësohuëꞌ. Topinan quëran ninontapi. Inapita imapatëhuaꞌ, co huachi Yosë pochin yonquiarëhuahuëꞌ.

2 Timoteo 2:20

Panca pëiquë nisha nisha maꞌsha yaꞌhuërin inaquë oꞌshitacaso marëꞌ. Niꞌtoroꞌsaꞌ huëꞌpachinara, nasha minëꞌ ninshirayáchin masahuatëꞌ, oꞌshitërëꞌ. Minëtëꞌ, paꞌchitëꞌ, inapitaso nipirinhuëꞌ co ina marëꞌ yaꞌhuërinhuëꞌ. Nëꞌhuëiꞌ acocaso marëꞌ, huiꞌsëcaso marëꞌ, inapita marëꞌ yaꞌhuërin.

2 Timoteo 3:17

Quisocristo imapatëhuaꞌ, quiricanën quëran catahuarinpoaꞌ noya nicacaso marëꞌ. Nitotatëhuaꞌ, natëhuatëhuaꞌ, nóya nisarëhuaꞌ. Ina marëꞌ quiricanën quëtërinpoaꞌ.

2 Timoteo 4:11

Nocasëíchin isëquë yaꞌhuërarin. Marcontaꞌ macaton, quëquëꞌ. Inasoꞌ noya catahuarinco.

Tito 3:1

Imapisopita nani nitotopirinahuëꞌ, inachachin quëmarintaꞌ pënëantaquëꞌ. “Copirno natëcoꞌ,” itëquëꞌ. Yaꞌipi copirno acorinsopitantaꞌ natëcasoꞌ yaꞌhuërin. Noya nicacaisoꞌ yonquiꞌinaꞌ.

Tito 3:14

Yaꞌipi imapisopitantaꞌ shaꞌhuitëquëꞌ noya niinaꞌ. Pahuantërinsopita catahuainaꞌ. Inapotohuachinaꞌ, co topinan yaꞌhuapihuëꞌ.

Tito 3:8

Noꞌtëquën shaꞌhuitëranquën. Quëmantaꞌ inachachin aꞌchintëquëꞌ, tënahuë. Pënënáquëꞌ yaꞌipi imapisopita noya nicacaiso marëꞌ. Aꞌchintëranquënsosoꞌ nóya imacasoꞌ. Natëhuatëhuaꞌ, noya noya yaꞌhuarihuaꞌ.

1 Pedro 1:22

Yosë nanamënsoꞌ noꞌtën nanan. Ina natëhuatamaꞌ, yaꞌipi co noyahuëꞌ yonquiramasopita naniantaramaꞌ. Noyápiachin cancantaramaꞌ. Yosë anoyacancantërinquëmaꞌ ninosorocamaso marëꞌ. Napoaton imaramasopita capini noya ninosorocoꞌ. Tëhuënchachin cancanëma quëran huarëꞌ ninosorocoꞌ.

1 Pedro 1:7

Maꞌsha onpohuatëhuaꞌ, Yosë catahuararinpoaꞌ yaꞌipi cancanënpoa quëran imacaso marëꞌ. Oro tapacaiso marëꞌ aꞌirotopiso pochin nitarinpoaꞌ. Oro inapotohuachinara, noyápiachin pipirin. Yaꞌipi nëꞌhuë huiquitahuaton, orosachin ninin. Inapochachin iporasoꞌ Yosë nohuanton, pënquë ahuiquitërëso pochin maꞌsha onpotërinpoaꞌ noya noya acoinpoaso marëꞌ. Oro paꞌton niponahuëꞌ, co yaꞌhuëmiatërinhuëꞌ. Canpoaso nipirinhuëꞌ, Yosë natëhuatëhuaꞌ, nanpimiatarihuaꞌ. Napoaton naꞌcon yonquiaꞌahuaꞌ cancanënpoa quëran huarëꞌ natëcasoꞌ. Ina Yosë nohuantërinsoꞌ. Natëmiatohuatëhuaꞌ, Yosë noya noya niꞌsarinpoaꞌ. Quisocristo oꞌmantahuachin, noya noya acorarinpoaꞌ. Ina pochin yaꞌnoarihuaꞌ.

1 Juan 3:3

“Aꞌna tahuëri Quisocristo niꞌsarëhuaꞌ,” taꞌtëhuaꞌ, co noyahuëꞌ yonquirëhuasopita naniantarëhuaꞌ. Quisocristosoꞌ noyápiachin cancantërin niꞌton, canpoantaꞌ noyápiachin cancantacasoꞌ nohuantarihuaꞌ.