2 Timoteo 2:2 - Chayahuita (Shahui)

² Piyapiꞌsaꞌ niyontonpachinara, Yosë nanamën aꞌchintërahuë. Quëmantaꞌ natanan. Inapochachin quëmantaꞌ caraíchin quëmapiꞌsaꞌ huayonahuaton, ina nanan chachin aꞌchintantaquëꞌ. Noya natërinsopita aꞌchintëquëꞌ. Inahuanta aꞌnapita aꞌchintacaiso marëꞌ inapotëquëꞌ.

2 Timoteo 2:2 ပူးပေါင်းရင်းမြစ်များ

Esdras 7:10

Istrasësoꞌ, yaꞌipi cancanën quëran Sinioro pënëntërinso yanitotërin. Ina nitotahuaton, noꞌtëquën natëcaso yonquirin. Naporahuaton, aꞌnapita israiroꞌsanta aꞌchintochináchin cancantërin.

Esdras 7:25

Quëmanta Istrasë Yosë yonquínahuan acorinquën. Inapotërinquën nichinapon chachin, coisëroꞌsaꞌ, chirinchiroꞌsaꞌ, inapita acoquëꞌ. Iopiratisëiꞌ aquëtëran piꞌi yaꞌconinso partiquë inapoquëꞌ. Piyapiroꞌsa noya nicatona yaꞌhuëcaiso marëꞌ camaichinaꞌ. Yosë pënëntërinsoꞌ nitotopisopita acoquëꞌ. Co nitotopisopitahuënta acohuatan, aꞌchintëquëꞌ.

Proverbios 13:17

Co noya comisionsoꞌ, nanan apancatërin. Noya comisionso nipirinhuëꞌ, nanan anoyatërin.

Jeremías 23:28

Aꞌna pënëntonaꞌpi huaꞌnatohuachina, ‘huaꞌnarahuë taꞌa,’ chin. Nanamëhuë chachin natanpachinso napoaponahuëꞌ, ama nisha shaꞌhuiinsohuëꞌ. Tricorayasoꞌ co piꞌpitën pochin nininhuëꞌ. Nanamëhuësoꞌ, tricoraya pochin ninin. Nanamëhuësoꞌ, pën maꞌsha ahuiquitërinso pochin ninin. ¡Panca martichoquë natëtë nipoatërëso pochin ninin antaꞌ! Ca Sinioroco shaꞌhuitaranquëmaꞌ.

Malaquías 2:7

Ina pochin mini corto huaꞌanoꞌsasoꞌ, piyapiꞌsa aꞌchintacaiso yaꞌhuërin. Aꞌchintohuachinaꞌ, nohuitarinaco huachi. Yaꞌipi piyapiꞌsa inapitari aꞌchintacaiso marëꞌ paapacaiso yaꞌhuërin. Ca Sinioroco yaꞌipi nanitaparahuësoꞌ, inapita quëran anitotaranquëmaꞌ.

Números 12:7

Piyapinëhuë Moisësëso nipirinhuëꞌ, co ina pochin anitotërahuë. Inasoꞌ, yaꞌipi piyapinëhuëpita quëran noꞌtë noꞌtëquën natërinco.

Mateo 13:52

—Yosë quiricanën nani nitotaramaꞌ. Yosë huaꞌanëntërinsoꞌ aꞌchintëranquëmaꞌ niꞌton, pëiꞌ huaꞌanën pochin nisaramaꞌ. Pëiꞌ huaꞌanën noya nipachina, yaꞌipi pëinënquë yaꞌhuëpisopita noya nocomarin. Nani naꞌcon aꞌchintëranquëmaꞌ Yosë nanamën aꞌchinacamaso marëꞌ. Iráca ninshitopisoꞌ nitotëramaꞌ. Naporahuaton, aꞌnantaꞌ nashamiachin aꞌchintaranquëmaꞌ. Yaꞌipiya nitotatomaꞌ, aꞌchintëraꞌpiaramaꞌ, itërin Quisosori.

Mateo 24:25

Nani shaꞌhuitëranquëmaꞌ ama naporo tahuëri nonpintinënquëmaso marëhuëꞌ.

Lucas 12:42

Napotohuachina: “Niꞌcoꞌ iyaroꞌsaꞌ. Oꞌmacaꞌhuaso tahuëri aꞌna patron pochin nisarahuë. Inasoꞌ aquë yapaꞌpachina, inpriatonën noya natërinsoꞌ shaꞌhuitërin. ‘Piyapinëhuëpita noya niꞌquëꞌ. Cosharoꞌ, maꞌsha, inapita pahuantohuachinaꞌ, quëtëraꞌpiraquëꞌ,’ itahuaton paꞌnin.

1 Corintios 4:2

Inpriatonpoꞌ nipatëra, huaꞌanënpoꞌ noꞌtëquën natëcasoꞌ yaꞌhuërin. Inapochachin Yosë huaꞌanëntërincoi niꞌton, inasáchin natëcasoꞌ yaꞌhuërin.

2 Corintios 2:14

Ma noyacha Tata Yosëso paya, tënëhuaꞌ. Quisocristo imarëhuaꞌ niꞌton, nani tahuëri ina catahuarinpoaꞌ inimiconënpoapita minsëcasoꞌ. Inapitasoꞌ co nohuantopihuëꞌ Quisocristo nanamën aꞌchinaꞌhuaisoꞌ. Co nohuantopirinahuëꞌ, nisha nisha parti paatoi, nanamën aꞌchinárai. Pimóton huaꞌsaiꞌ pimoanahuaninso pochin Quisocristo nanamën nahuinarin. Aꞌchintatoi, naꞌa piyapiꞌsaꞌ anitotërai.

2 Corintios 3:5

Quiyaora co piꞌpisha tërantaꞌ nanitëraihuëꞌ noya aꞌchintaꞌhuainquëmasoꞌ. Yosëíchin ananitërincoi. Co catahuarincoihuëꞌ naporini, co canpitantaꞌ cancanëma quëran imaitomahuëꞌ.

Colosenses 1:7

Ipapërasë aꞌchintërinquëmaꞌ, inaroꞌcoi nóya ninosororaisoꞌ. Quiya pochachin natëton, Quisocristo nanamën aꞌchinarin. Co quiyasoꞌ nanitëraihuëꞌ canpitataquë pacaꞌhuaisoꞌ niꞌton, ina aꞌparahuë aꞌchintinquëmaso marëꞌ. Co chirorinhuëꞌ aꞌchinacasoꞌ.

1 Timoteo 1:12

Ina marëꞌ Sinioro Quisocristo achinicancaninco. “Noꞌtëquën natëarinco,” taꞌton, acorinco aꞌchinaꞌhuaso marëꞌ. Napoaton: “Yosparinquën Sinioro,” itërahuë.

1 Timoteo 1:18

Huiꞌnahuë pochin api, niꞌnanquën. Iꞌhua chachin ansianoꞌsaꞌ Yosë nontatonaꞌ, acorinënquën Yosë nanamën aꞌchinamaso marëꞌ. Naporoꞌ Yosëri anitotërinsoꞌ shaꞌhuitatënën, pënëninënquën. “Yosë nohuanton, api, nanamën noya aꞌchinaran. Ina marëꞌ acorinquën. Parisitaponahuëꞌ, catahuarinquën. Napoaton Quisoso aꞌchininso chachin aꞌchinquëꞌ,” itërinënquën. Iporantaꞌ inachachin pënënaranquën. Quisoso nanamën chachin aꞌchinquëꞌ sopai minsëcaso marëꞌ. Tëhuënchachin sopai yacanapirinpoahuëꞌ, Quisocristo catahuarinpoaꞌ minsëcaso marëꞌ.

1 Timoteo 4:14

Iráca ansianoꞌsaꞌ niyontonahuatonaꞌ, acorinënquën Yosë nanamën aꞌchinamaso marëꞌ. Sëꞌhuamotorahuatënënquën, nanan quëtërinënquën aꞌchinamaso marëꞌ. Ina quëran Yosë catahuarinquën nóya aꞌchinamasoꞌ. Ama ina naniantaton, topinan yaꞌhuëquësohuëꞌ.

1 Timoteo 4:6

Nani pënënanquën. Ina nanan aꞌchinpatan, noya nisaran. Quisocristo noya niꞌsarinquën. Cosharoꞌ achinirinposo pochin Yosë nanamën natëhuatan, achinicancanarinquën. Noꞌtëquën aꞌchintërainquën niꞌton, noya imasaran.

1 Timoteo 5:22

Ansiano yaacohuatan, noya yonquiaton, oshaquëran acoquëꞌ. Aꞌnaroáchin acohuatan, co noyahuëꞌ nipachina, quëmantaꞌ naꞌianan. Noyasáchin niquëꞌ.

1 Timoteo 6:12

Iráca imapisopita niyontonpachinara, chiníquën cancantaton, “Casoꞌ Quisocristo imarahuë,” itëran. Napoaton “Yosë catahuarinco,” taꞌton, sopai minsëquëꞌ. Yosë nani huëntonënquë ayaꞌconinquën niꞌton, imamiatëquëꞌ. Ina quëran aꞌna tahuëri inápaquë nanpimiataran.

2 Timoteo 3:10

Quëmaso nipirinhuëꞌ noya cancantaton, huaꞌquiꞌ caꞌtananco. Yosë nanamën aꞌchinpatëra, noya natanan. Yaꞌipi naporahuësoꞌ niꞌnan. Yosëíchin yonquiato, imamiatarahuë. Cancanëhuë quëran huarëꞌ natërahuë. Co piyapiꞌsaꞌ noꞌhuirahuëꞌ, nosororahuë. Maꞌsha onpoaporahuëꞌ, chiníquën cancantërahuë.

2 Timoteo 3:14

Quëmaso nipirinhuëꞌ, Yosë nanamën imamiatëquëꞌ. Nani iráca mama, mama paya, ca, aꞌnapitantaꞌ aꞌchintërainquën, cancanën quëran huarëꞌ natëran. Noya nohuitërancoi niꞌton: “Noꞌtëquën aꞌchintërinacoi,” taꞌton, imamiatëquëꞌ.

Hebreos 2:17

Napoaton isoroꞌpaquë oꞌmaton, piyapi chachin nasitimarin. Co piyapi pochin nasitërinhuëꞌ naporini, co catahuainpoasoꞌ nanichitonhuëꞌ. Piyapi pochachin inantaꞌ niꞌton, noyá nohuitërinpoaꞌ. Corto huaꞌan chini chiníquën nanantërinso pochin nicaton, canpoa marëꞌ Yosë nontarin nanan anoyatinpoaso marëꞌ. Nosoroatonpoaꞌ, chiminin oshanënpoaꞌ inquitinpoaso marëꞌ. Inasoꞌ co nonpintërinpoahuëꞌ.