2 Timoteo 2:10 - Chayahuita (Shahui)

¹⁰ “Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.

2 Timoteo 2:10 ပူးပေါင်းရင်းမြစ်များ

Proverbios 8:35

Inso tëranta quënanpachincosoꞌ, nanpirin quënanapon. Siniororinta nosoroaton catahuacaso quënanapon.

Mateo 24:22

Yosë nohuanton, co huaꞌquiꞌ aparisitapihuëꞌ. Huaꞌquiꞌ aparisitapi naporini, yaꞌipi piyapiꞌsaꞌ taquiꞌitonahuëꞌ. Nipirinhuëꞌ, piyapinënpita nosoroaton, co nohuantërinhuëꞌ huaꞌquiꞌ aparisitacaisoꞌ. Huayoninsopita nichaꞌësarin huachi.

Mateo 24:24

Naꞌa nonpin nanan pënëntonaꞌpiroꞌsaꞌ huëcaponaꞌ. ‘Casoꞌ Cristoco’ tosapi aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsopita nisapi piyapiꞌsaꞌ nonpintacaiso marëꞌ. Huayoninsopitantaꞌ nonpintochinaichin nisapi.

Mateo 24:31

Oꞌmantarahuato, naꞌa anquëniroꞌsaꞌ aꞌpararahuë. Panca tronpita pihuitonaꞌ, yaꞌipi parti paꞌsapi huayonahuësopita ayontonacaiso marëꞌ.

Lucas 18:7

¡Yosëso nipirinhuëꞌ nóya niꞌton, huayoninsopita naꞌcon catahuarin! Aꞌnapitari aparisitohuachinaꞌ, Yosëri noꞌtëquën anaꞌintarin. Tahuërirë chachin, tashirë chachin ina nontopi niꞌton, catahuaarin. Co naniantarinhuëꞌ.

Lucas 22:57

—¡Co imoya casoꞌ ina nohuitërahuëꞌ! itërin Pitrori.

Juan 11:52

Nipirinhuëꞌ, co cotioroꞌsa marëáchin chiminarinhuëꞌ. Yaꞌipi piyapiꞌsaꞌ yaꞌhuërënamën chiminarin. Natëhuachinaꞌ, Yosëri huiꞌninpita pochin niꞌsarin. Aꞌnaquën aquë yaꞌhuëpirinahuëꞌ, imapachinaꞌ, aꞌna huëntoíchin pochin nisapi.

Juan 17:24

Quëma nohuanton Tata, isopitasoꞌ imasarinaco. Inapita nohuantërahuë carëꞌ yaꞌhuëcaisoꞌ. Iráca quëran huarëꞌ quëma nosororanco. Coꞌhuara isoroꞌpaꞌ yaꞌhuëyátërasohuëꞌ, nosoroatonco, nóya acoranco. Inatohuaꞌ inapitantaꞌ pantahuachinaꞌ, noya noya niꞌsarinaco. Ina naꞌcon nohuantërahuë.

Juan 17:9

Imarinacosopita marëꞌ chiníquën nontaranquën. Huiꞌnanpita pochin niꞌnan. Iráca quëran huarëꞌ yonquiran imainacosoꞌ. Aꞌnapitasoꞌ co imarinacohuëꞌ. Co inapita marëꞌ nontaranquënhuëꞌ.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

Romanos 9:23

Aꞌnaquënpoaso nipirinhuëꞌ, nosoroatonpoaꞌ nichaꞌësarinpoaꞌ. Inaora nohuanton, nosororinpoaꞌ. Iráca chachin yonquirinpoaꞌ nichaꞌëinpoaso marëꞌ. Anoyacancantohuachinpoaꞌ, piyapiꞌsaꞌ naꞌcon Yosë yonquiapi. “Ma noyacha catahuarin paya,” tosapi.

1 Corintios 1:21

Ina nohuanton, piyapi inahuara yonquinëna quëran co nanitopihuëꞌ Yosë nohuitacaisoꞌ. Quisocristo chimininsoꞌ aꞌchinárai. Aꞌnaquënsoꞌ ina natanpachinara, tëhuapi. Canpoaso nipirinhuëꞌ natëhuatëhuaꞌ, anoyacancantërinpoaꞌ. Ina Yosë nohuantërin.

1 Corintios 9:22

Aꞌnaquëontaꞌ imaponahuëꞌ, co yaꞌipi cancanëna quëran natëyátërapihuëꞌ. Inapitantaꞌ co nocanahuëꞌ. “Casoꞌ noya noya imarahuë,” co itërahuëꞌ. Inapita pochin ninahuë natanatonaco, noya noya Quisocristo imacaiso marëꞌ. Yaꞌipi piyapiꞌsaꞌ nosoroato, sanoanan quëran aꞌchintarahuë caraya tërantaꞌ chaꞌëcaiso marëꞌ.

2 Corintios 1:6

Canpitantaꞌ Yosë nohuitacamaso marëꞌ aꞌchintërainquëmaꞌ. Ina marëꞌ aparisitërinacoi. Parisitapiraihuëꞌ, Yosë achinicancanincoi ahuantaꞌhuaiso marëꞌ. Yosë catahuarinquëmaꞌ canpitantaꞌ, tënai. Parisitopiramahuëꞌ achinicancanarinquëmaꞌ quiya pochachin ahuantamaso marëꞌ.

2 Corintios 12:15

Napoaton co mantaꞌ maꞌparanquëmahuëꞌ. Noya cancantato, sacatarahuë cosharoꞌ paꞌanaꞌhuaso marëꞌ. Ina quëran parisitaporahuëꞌ, aꞌchintaranquëmaꞌ noya imacamaso marëꞌ. Carimasoꞌ naꞌcon naꞌcon nosoropiranquëmahuëꞌ, canpitasoꞌ co onpopinchin nosororamacohuëꞌ topirahuëꞌ.

2 Corintios 4:15

Canpitantaꞌ imacamaso marëꞌ parisitërai. Inaora nohuanton, Yosë naꞌcon nosororincoi. Naꞌcon naꞌcon piyapiꞌsaꞌ ina nohuitohuachinaꞌ, noya cancantatonaꞌ, Yosë nontapi. “Ma noyanquëncha, Sinioro, paya. Nosoroatoncoi, nichaꞌësarancoi niꞌton, ‘Yosparinquën,’ Sinioro,” itapi.

2 Corintios 4:17

Tëhuënchachin iporasoꞌ piꞌpian parisitapirëhuahuëꞌ, co huaꞌquiꞌ isoroꞌpaquë yaꞌhuarihuahuëꞌ. Yosëꞌpaꞌ paꞌpatëhuaꞌ, co onporontaꞌ pipiarëhuahuëꞌ. Imarëhuaso marëꞌ parisitapirëhuahuëꞌ, inapaquësoꞌ noya noya cancantarihuaꞌ. Yosë pochachin cancantarihuaꞌ.

Efesios 3:13

Aꞌchintëranquëmaꞌ niꞌton, tashinan pëiquë poꞌmorinaco. Parisitapirahuëꞌ, chiníquën cancantocoꞌ. Canpitantaꞌ Quisocristo imacamaso marëꞌ parisitërahuë. Ina marëꞌ noya cancantacasoꞌ yaꞌhuërin.

Colosenses 1:24

Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

1 Tesalonicenses 5:9

Co anaꞌintinpoaso marëꞌ Yosë acorinpoahuëꞌ. Sinioro Quisocristo imarëhuaꞌ niꞌton, nichaꞌësarinpoaꞌ. Ina nohuanton chaꞌësarëhuaꞌ.

2 Tesalonicenses 2:14

Yosë nanamën aꞌchintohuatëinquëmara, canpitantaꞌ imaramaꞌ. Yosë acorinquëmaꞌ Sinioro Quisocristo pochin nicacamasoꞌ. Aꞌna tahuëri oꞌmantahuachin, ina pochin yaꞌnoaramaꞌ.

2 Timoteo 1:1

Ca Paonoco ninshitaranquën. ¿Noya quëmantaꞌ yaꞌhuaran? Noya cantaꞌ isëquë yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Quisocristo imapatëhuaꞌ, Yosë nohuitatëhuaꞌ, nanpimiatarihuaꞌ.

2 Timoteo 2:1

Quëmantaꞌ api: “Quisocristo catahuarinco,” taꞌton chiníquën cancantëquëꞌ. Ina imapatëhuaꞌ, inaora nohuanton catahuarinpoaꞌ chiníquën cancantacasoꞌ. Huiꞌnahuë pochin nicatënquën, pënënaranquën.

2 Timoteo 2:3

Noya sontaro pochin niquëꞌ. Inasoꞌ parisitohuachina, ahuantërin. Inapochachin quëmantaꞌ Quisocristo marëꞌ parisitohuatan, ahuantëquëꞌ.

Tito 1:1

Ca Paonoco ninshitaranquën, niꞌquëꞌ. ¿Noya yaꞌhuaran? Noya cantaꞌ yaꞌhuarahuë. Tata Yosë huaꞌanëntërinco niꞌton, inasáchin natërahuë. Quisocristo acorinco nanamën aꞌchinaꞌhuaso marëꞌ. Yosë huayoninpoaꞌ niꞌton, huëntonënquë yaꞌconëhuaꞌ. Nóya natëcaiso marëꞌ aꞌchinarahuë. Noꞌtën nanan aꞌchinaꞌhuaso marëꞌ acorinco. Ina natëhuatëhuaꞌ, noꞌtëquën imasarëhuaꞌ.

1 Pedro 2:10

Iráca co Yosë piyapinënpita nipiramahuëꞌ, iporasoꞌ nani huëntonënquë ayaꞌconinquëmaꞌ. Iráca co insontaꞌ tëhuënchachin nosororinquëmahuëꞌ. Iporasoꞌ Yosë nosororinquëmaꞌ.

1 Pedro 5:10

Yosë paꞌpi nosororinpoaꞌ. Quisocristo imarëhuaꞌ niꞌton, aꞌna tahuëri inápaquë quëpantarinpoaꞌ. Iporasoꞌ maꞌsha onpopirëhuahuëꞌ, catahuarinpoaꞌ. Co huaꞌquiꞌ parisitarihuahuëꞌ. Ina quëran nosoroatonpoaꞌ, anoyatarinpoaꞌ. Achinicancanarinpoaꞌ. Noya noya acoarinpoaꞌ.