2 Tesalonicenses 3:6 - Chayahuita (Shahui)

⁶ Sinioro Quisocristo nanan quëtërincoi niꞌton, noꞌtëquën iyaroꞌsaꞌ pënënainquëmaꞌ. Aꞌnaquëmasoꞌ imapomarahuëꞌ, co sacatatomahuëꞌ, nisha nisha yonquiramaꞌ. Yosë nanamën noꞌtëquën aꞌchintopirainquëmahuëꞌ, co natëramacoihuëꞌ. Insosona inapohuachin, ama inapitarëꞌquëmaꞌ nipayacosohuëꞌ.

2 Tesalonicenses 3:6 ပူးပေါင်းရင်းမြစ်များ

Mateo 18:17

Co inapita tërantaꞌ yanatëantahuachinhuëꞌ, yaꞌipi imaramasopita niyontonpachinaꞌ, yaꞌipiya shaꞌhuitëquëꞌ inahuarintaꞌ nanan anoyachinaꞌ. Inapitarintaꞌ pënëantapirinahuëꞌ, co inapita tërantaꞌ yanatantahuachinhuëꞌ, ama huachi iyama pochin niꞌcosohuëꞌ. Co imarinso pochinhuë nipon, Noma copirno marëꞌ coriqui maꞌpatonaꞌpi pochin nipon niꞌco huachi.

Romanos 16:17

Quisocristo nanamën nóya aꞌchintërinënquëmaꞌ. Aꞌnaquënso nipirinhuëꞌ co noꞌtëquën aꞌchinpihuëꞌ. Yaanishacancantopi. Niꞌcona, iyaroꞌsaꞌ, nonpintochinënquëmaꞌ. Insëquësona aꞌchintohuachinara, nisha nisha yonquiapi. Ama inapita natancosohuëꞌ. Tananpitocoꞌ paꞌinaꞌ.

1 Corintios 11:2

Ma noyanquëmaꞌ iyaroꞌsaꞌ niꞌton, naꞌcon yonquiramaco. Yosë nanamën aꞌchintohuatënquëmara, noya natëramaco.

1 Corintios 5:4

Quisocristo imaramaꞌ niꞌton, niyontoncoꞌ. Niyontonpatamaꞌ, ca pochin cancantatomaꞌ, ina quëmapi chiníquën pënëncoꞌ. “Sinioro Quisoso nanan quëtërincoi niꞌton, ama huachi Tata Yosë aꞌpainquënsohuëꞌ, tënai. Sopai natëran niꞌton, parisitamasoꞌ yaꞌhuërin,” itocoꞌ. Inapotohuatamaꞌ, aꞌna tahuëri yonquiapon nimara. “Co noyahuëꞌ yonquirahuësoꞌ naniantato, Yosë imantaꞌi,” tapon nimara. Napohuachin, Sinioro Quisoso oꞌmantahuachin, nichaꞌësarin huachi.

1 Corintios 5:9

Iꞌhuantaꞌ nani ninshitëranquëmaꞌ. “Ama monshihuaninsopitarëꞌquëmaꞌ nipayacosohuëꞌ. Ama inapita noya niꞌcosohuëꞌ,” itëranquëmaꞌ.

2 Corintios 2:10

Nanan anoyatohuatamaꞌ, cantaꞌ nanan anoyatërahuë pochin cancantarahuë. Canpita yonquiatënquëmaꞌ, nanan anoyatërahuë. “Quisocristo nani tahuëri niꞌsarinpoaꞌ,” taꞌto, cancanëhuë quëran huarëꞌ nanan anoyatërahuë.

Efesios 4:17

Quisocristo nanan quëtërinco niꞌton, pënënaranquëmaꞌ. Naꞌa piyapiꞌsaꞌ co imatonaraihuëꞌ, topinan quëran yaꞌhuërapi. Somaraya pochin cancantatonaꞌ, nisha nisha yonquipi. Co natantochináchinhuëꞌ cancantopi niꞌton, co Yosë nanamën nitotopihuëꞌ. Co Yosë yonquiatonaraihuëꞌ, co mantaꞌ Yosë nohuitopihuëꞌ. Ama inapita pochin nicosohuëꞌ.

Colosenses 3:17

Maꞌsona tërantaꞌ yanipatamaꞌ, Sinioro Quisoso yonquiatomaꞌ, nicoꞌ. Ina yonquiatomaꞌ, noya noncoꞌ. Quisoso catahuarinquëmaꞌ niꞌton, “Yosparinquën,” Tata Yosë itocoꞌ.

1 Tesalonicenses 4:1

Iporasoꞌ iyaroꞌsaꞌ Sinioro Quisoso nanan quëtërincoi niꞌton, pënëantarainquëmaꞌ. Iráca pënënainquëmaꞌ noya nicacamaso marëꞌ. “Noya nipatamaꞌ, Yosë noya niꞌsarinquëmaꞌ,” itërainquëmaꞌ, natëramacoi. Iporasoꞌ aquë aquëtëꞌ natëtatomaꞌ, noyasáchin nicoꞌ, tënahuë.

1 Tesalonicenses 4:11

Nani tahuëri yonquicoꞌ sano piyapi nicacamaso marëꞌ. Ama topinan yaꞌhuëcosohuëꞌ. Yaꞌipinquëmaꞌ noya sacatocoꞌ ama pahuanchinquëmasohuëꞌ. Iráca inachachin pënënainquëmaꞌ.

1 Tesalonicenses 5:14

Canpita capini iyaroꞌsaꞌ nipënëncoꞌ. Aꞌnaquën co yasacatopihuëꞌ. Inapita pënëncoꞌ ama chiroinasohuëꞌ. Aꞌnaquën maꞌsha onpohuachinara, Yosë yananiantopi. Inapitantaꞌ noya nontocoꞌ chiníquën cancanchinaꞌ. Aꞌnaquëontaꞌ cancanëna quëran co chinipihuëꞌ. Catahuacoꞌ ama Yosë nanianchinasohuëꞌ. Inapohuatamaꞌ, ama insontaꞌ noꞌhuicosohuëꞌ. Sanoanan quëran pënëncoꞌ.

2 Tesalonicenses 2:15

Napoaton iyaroꞌsaꞌ, chiníquën cancantatomaꞌ, yaꞌipi cancanëma quëran imacoꞌ. Canpitataquë yaꞌhuasocoi, noꞌtëquën aꞌchintërainquëmaꞌ. Ina quëran quirica aꞌpatëranquëmaꞌ naꞌcon naꞌcon nitotacamaso marëꞌ. Noꞌtën nanansáchin imamiatocoꞌ.

2 Tesalonicenses 3:7

Nani nitotëramaꞌ noya nicacamasoꞌ. “Nonancoi,” itërainquëmaꞌ. Canpitataquë yaꞌhuasocoi, co quiyasoꞌ topinan yaꞌhuëraihuëꞌ. Co chiroraihuëꞌ.

1 Timoteo 5:21

Tata Yosë Quisocristorë chachin niꞌsarinpoaꞌ. Anquëniroꞌsaꞌ acorinsopitantaꞌ niꞌsarinënpoaꞌ. Napoaton api, yaꞌipiya noꞌtëquën pënënquëꞌ. Ama aꞌnaroáchin anaꞌintëquësohuëꞌ. Noya natantëquëꞌ noꞌtëquën nitotacaso marëꞌ. Ina quëran noꞌtëquën yonquiaton, pënënquëꞌ. Inso tërantaꞌ co noyahuëꞌ nipachina, pënënacasoꞌ yaꞌhuërin.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

2 Timoteo 3:5

“Quiyantaꞌ Yosë imarai,” topirinahuëꞌ, co tëhuënchachin imapihuëꞌ. Chinotopirinahuëꞌ, co cancanëna quëran huarëꞌ natëpihuëꞌ niꞌton, co Yosëri catahuarinhuëꞌ ina pochin cancantacaisoꞌ. Ama inapita natanquësohuëꞌ. Tananpitëquëꞌ paꞌinaꞌ.

2 Timoteo 4:1

Yosë niꞌsárinpoa niꞌton, pënënaranquën. Quisocristontaꞌ niꞌsárinpoa niꞌton, “nanamën aꞌchináquëꞌ,” tënahuë. Aꞌna tahuëri inasoꞌ oꞌmantararin isoroꞌpaꞌ huaꞌanëntacaso marëꞌ. Naporoꞌ chiminpisopita, nanpirëhuasopita, yaꞌipinpoaꞌ coisë pochin noꞌtëquën shaꞌhuitarinpoaꞌ. Oshahuanoꞌsaꞌ anaꞌintarin. Natërëhuasopitasoꞌ noya acoarinpoaꞌ. Napoaton Yosë marëꞌ noya sacatëquëꞌ.

2 Juan 1:10

Aꞌna piyapi huëꞌpachin: “Carinquëmaꞌ aꞌchinchinquëmaꞌ,” itohuachinquëmaꞌ, ama aꞌnaroáchin natëcosohuëꞌ. Co Quisocristo nanamën aꞌchintohuachinquëmahuëꞌ: “Inca. Co yanatanainquënhuëꞌ,” itocoꞌ. Ama yaꞌhuëramaquë ayaꞌconcosohuëꞌ. “Yosë catahuainquën,” ama itocosohuëꞌ.