2 Tesalonicenses 3:5 - Chayahuita (Shahui)

⁵ Yosë catahuainquëmaꞌ ina nosororinpoasoꞌ naꞌcon yonquicamaso marëꞌ. Parisitopiramahuëꞌ, achinicancainquëmaꞌ Quisocristo pochin ahuantacamaso marëꞌ.

2 Tesalonicenses 3:5 ပူးပေါင်းရင်းမြစ်များ

Salmos 40:1

Maꞌsha onpohuatora, Sinioroíchin catahuaincoso ninarahuë. Naporahuë niꞌton, co napion ancantato nontërahuësoꞌ natanahuatonco, catahuarinco.

Proverbios 3:6

Maꞌsona tëranta yanipatamaꞌ: “Anitotoco Sinioro noꞌtëquën yonquiꞌi,” itocoꞌ. Napohuatamaꞌ, anitotarinquëmaꞌ. Ina catahuarinquëma noya nicacamasoꞌ.

Jeremías 31:33

Naporo tahuëriꞌsa israiroꞌsarëꞌco anoyatohuato, iso pochin nisarahuë: Aꞌchintërahuësopita yonquinëna quëran anitotarahuë. Ina nitotohuachinaꞌ, noꞌtëquën natëtacaisoꞌ catahuararahuë. Casáchin chinotarinaco. Inapitanta piyapinëhuëpita nisapi.

Romanos 5:5

Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

Romanos 8:25

“Tëhuënchachin noyá nichaꞌësarinpoaꞌ,” taꞌtëhuaꞌ, co sëtërëhuahuëꞌ. Noya cancantatëhuaꞌ, ninarihuaꞌ.

Romanos 8:28

Yosë nosorohuatëhuaꞌ, noyasáchin yonquirinpoaꞌ. Maꞌsha onpohuatëhuara, naꞌcon catahuarinpoaꞌ. Piꞌpian parisitapirëhuahuëꞌ, ina nohuanton, parisitërëhua quëran noya noya pipiarëhuaꞌ. Achinicancaninpoaꞌ niꞌton, noya noya imarihuaꞌ. Nani huayoninpoaꞌ ina nohuantërinsoꞌ nicacaso marëꞌ.

1 Corintios 8:3

Napoaponahuëꞌ, Yosë nosorohuatëhuaꞌ, ina pochin cancantarihuaꞌ. Ina quëran Yosë nohuitatonpoaꞌ, noya niꞌsarinpoaꞌ.

Gálatas 5:22

Nipirinhuëꞌ, Ispirito Santo natëhuatëhuaꞌ, catahuarinpoaꞌ ninosorocasoꞌ. Catahuahuachinpoaꞌ, Yosë nohuitatëhuaꞌ, capa cancantarihuaꞌ. “Yosë noya niꞌsarinco,” taꞌtëhuaꞌ, sano cancantarihuaꞌ niꞌton, noya ninicatëhuaꞌ yaꞌhuarihuaꞌ. Piyapiꞌsaꞌ noꞌhuipirinpoahuëntaꞌ, co yanoꞌhuirihuahuëꞌ. Maꞌsha onpohuatëhuantaꞌ, ahuantarihuaꞌ. Nosoroatëhuaꞌ, nóya nontarihuaꞌ. Ispirito Santo catahuahuachinpoaꞌ, noya nicarihuaꞌ. Noꞌtëquën nontarihuaꞌ; co piꞌpisha tërantaꞌ nonpintarihuahuëꞌ.

Deuteronomio 30:6

Naporoso canpoarëꞌ anoyatërinso cancanëmaquë chachin ninshitërëso pochin, acoarin. Inapotatënquëma natëtochináchin cancantamaso marëꞌ catahuarinquëmaꞌ. Yaꞌipi cancanëma quëran nisahuaton, yaꞌipi huaꞌyanëma quëran nosoroamaso marëꞌ inapotarinquëmaꞌ. Inapohuatamaꞌ, noꞌpaꞌ quëtërinquëmaquë, huaꞌqui tahuëri niꞌsaramaꞌ.

1 Tesalonicenses 1:10

Ina chinotatoi, huiꞌnin chachin ninarai. Canpoa marëꞌ Quisocristo chiminin. Ina quëran Yosëri ananpitaantarin. Aꞌna tahuëri inápa quëran oꞌmantahuachin, nichaꞌësarinpoaꞌ. Co imapisopitasohuëꞌ nipirinhuëꞌ, Tata Yosëri noꞌhuiton anaꞌintarin huachi, tënamaꞌ,” topi, natantërai.

1 Tesalonicenses 3:11

Tata Yosë chachin catahuaincoi onpopiontaꞌ paꞌii. Sinioro Quisosontaꞌ catahuahuachincoi, paꞌsarai nicapoinquëmaꞌ.

2 Timoteo 4:8

Napoaton Yosëꞌpaꞌ acanaarinco. Quisocristo oꞌmantahuachin, coisë pochin nicaton, noꞌtëquën shaꞌhuitarinpoaꞌ. Naporoꞌ noya ninahuëso marëꞌ acanaarinco. Co casáchin acanaarincohuëꞌ. Aꞌnapitantaꞌ Quisocristo nosoroatonaꞌ, “Manóton oꞌmantaꞌin,” topisopitantaꞌ Yosëꞌpaꞌ canaapi.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.

Santiago 2:5

Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ.

1 Pedro 4:1

Quisocristo isoroꞌpaquë oꞌmaton, tëhuënchachin parisitërin. Napoaton canpitantaꞌ parisitohuatamaꞌ, ahuantocoꞌ. Quisocristo yonquiatëhuaꞌ, noya ahuantohuatëhuaꞌ, noya noya cancantarihuaꞌ. Co huachi oshahuanacasoꞌ paꞌyatarihuahuëꞌ.

2 Pedro 3:12

Oꞌmantacasoꞌ tahuëri noya ninahuaꞌ. “Manoton oꞌmantaꞌin,” taꞌtëhuaꞌ, noyápiachin cancantahuaꞌ. Ina tahuëri nanihuachin, yaꞌipi inápaquë yaꞌhuërinsopita pën quëran taꞌhuantarin. Piꞌi, yoqui, tayora, inapita soquiarin.

1 Juan 4:19

Yosëꞌton naꞌcon nosororinpoaꞌ niꞌton, canpoarintaꞌ Yosë nosoroatëhuaꞌ, aꞌnapitantaꞌ nosoroarihuaꞌ.

Apocalipsis 1:9

Ca Coanshaco ninshitaranquëmaꞌ. Canpitaroꞌco chachin imarahuë. Ina marëꞌ parisitopirëhuahuëꞌ, huaꞌanëntërinquë ayaꞌconinpoaꞌ. Quisocristo chachin catahuahuachinpoaꞌ, noya ahuantarëhuaꞌ. Yosë nanamën aꞌchinahuëso marëꞌ aparisitërinaco. Quisocristo imarahuë niꞌton, aꞌna soꞌtonꞌpaꞌ aꞌparinaco, Patomosë itopiquë.

Apocalipsis 13:10

“Mapachinënquëmaꞌ, parisitacasoꞌ yaꞌhuërin. Sahuëniquë yatëpahuachinënquëmaꞌ, ahuantacasoꞌ yaꞌhuërin. Ina yonquiatomaꞌ, chiníquën cancantocoꞌ. ‘Yosë catahuarinpoaꞌ,’ taꞌtomaꞌ, imamiatocoꞌ.”