2 Tesalonicenses 3:3 - Chayahuita (Shahui)

³ Tata Yosëso nipirinhuëꞌ co onporontaꞌ naniantërinpoahuëꞌ. Achinicancaninpoaꞌ. Sopai yaminsëpirinpoahuëꞌ, ina niꞌsarinpoaꞌ. Catahuarinpoaꞌ sopai minsëcasoꞌ.

2 Tesalonicenses 3:3 ပူးပေါင်းရင်းမြစ်များ

Salmos 121:7

Nani maꞌsha huëhuëpiro quëran Sinioro paꞌpoyararinpoaꞌ. Inapotarinpoa niꞌton, noya nanpiarihuaꞌ.

Salmos 19:13

“Quiyaora noya nisarai,” topatoira, co natantochináchinhuëꞌ cancantarai. Piyapinëncoi niꞌtoi, ina pochin cancantohuatoi, inquitocoi. Inapotohuatancoi, co tëhuëcaꞌhuaiso yaꞌhuëtarincoihuëꞌ. Panca oshahuanaꞌhuaiso nipirinhuëꞌ, chaꞌësarai.

Mateo 5:37

Maꞌsona tërantaꞌ iyaroꞌsaꞌ nonpatamaꞌ, noꞌtëquënáchin noncoꞌ. ‘Paꞌsarahuë,’ topatamaꞌ, pacoꞌ. ‘Co paꞌsarahuëꞌ,’ topatamaꞌ, ama pacosohuëꞌ. Noꞌtëquënáchin nonpatamaꞌ, co Yoscoarëꞌ taꞌcasoꞌ yaꞌhuërinhuëꞌ. Piꞌpisha tërantaꞌ piyapi nonpintohuatamaꞌ, sopai nohuanton napoaramaꞌ, tënahuë,” tënin Quisoso.

Mateo 6:13

Co noyahuëꞌ yonquihuatoi, catahuacoi aꞌnaroáchin nanianchii. Catahuacoi ama sopai minsëincoisohuëꞌ. [Quëmasáchin huaꞌanëntarancoi. Yaꞌipi nanitaparan. Ipora quëran huarëꞌ yaꞌipiya natëinënquën. Amen,]’ itocoꞌ Yosë nontohuatamaꞌ.

Lucas 11:4

Co noyahuëꞌ nicatoi, oshahuanai. Nosoroatoncoi, oshanëhuëi inquitocoi. Aꞌnapita maꞌsha onpotohuachincoi, nanan anoyatëraiso pochachin oshanëhuëi inquitatoncoi anoyacancantocoi. Co noyahuëꞌ yonquihuatoi, catahuacoi aꞌnaroáchin nanianchii,” itocoꞌ, Yosë nontohuatamaꞌ, tënin.

Juan 17:15

Co nohuantërahuëꞌ isoroꞌpa quëran ocoicamasoꞌ. Isëquë yaꞌhuëpirinahuëꞌ, catahuaquëꞌ ama sopairi minsëinsohuëꞌ.

1 Corintios 1:9

Yosë co naniantarinquëmahuëꞌ. Shaꞌhuitërinquëmaso chachin catahuarinquëmaꞌ. Nani acorinquëmaꞌ huiꞌnin nohuitacamaso marëꞌ. Quisocristo chachin huaꞌanëntërinpoa huachi.

1 Corintios 10:13

Sopai yaꞌipi piyapinpoaꞌ shaꞌhuitërinpoaꞌ co noyahuëꞌ nicacaso marëꞌ. Yosëso nipirinhuëꞌ catahuarinpoaꞌ. Aꞌnaya aꞌnayanpoaꞌ co nanitërëhuasohuëꞌ nitotaton, niꞌsarinpoaꞌ. “Tananpitëquëꞌ,” itohuachina, co sopai nanitërinhuëꞌ aquëtëꞌ tëniinpoasoꞌ. Cancanënpoa quëran huarëꞌ Yosë natëhuatëhuaꞌ, co sopai minsëarinpoahuëꞌ. Maꞌsha onpopirëhuahuëntaꞌ, Yosë ananitarinpoaꞌ ahuantacasoꞌ. Yosë chachin catahuarinpoaꞌ sopai minsëcaso marëꞌ.

1 Tesalonicenses 5:24

Yosë nani nontërinpoaꞌ imacaso marëꞌ. Huëntonënquë chachin ayaꞌconinpoaꞌ. Noꞌtëquën shaꞌhuitërinpoaꞌ. Co onporontaꞌ nonpintarinpoahuëꞌ niꞌton, noya catahuarinpoaꞌ.

2 Tesalonicenses 2:17

Ina yonquiatoi, canpita marëꞌ Yosë nontarai. “Nani tahuëriya Sinioro catahuaquëꞌ, chiníquën cancanchinaꞌ. Achinicancanquëꞌ noyasáchin niinaꞌ. Catahuaquëꞌ noyásha noinaꞌ,” itërai.

2 Timoteo 4:18

Paꞌpi co noyahuëꞌ yonquirapihuachinacontaꞌ, onpopiontaꞌ nichaꞌësarinco. Quisocristo anoyacancantërinco niꞌton, aꞌna tahuëri huaꞌanëntërinquë quëpantarinco. ¡Ma noyacha Quisocristoso paya! Ipora quëra huarëꞌ inasáchin chinotahuaꞌ. Amen.

1 Pedro 5:10

Yosë paꞌpi nosororinpoaꞌ. Quisocristo imarëhuaꞌ niꞌton, aꞌna tahuëri inápaquë quëpantarinpoaꞌ. Iporasoꞌ maꞌsha onpopirëhuahuëꞌ, catahuarinpoaꞌ. Co huaꞌquiꞌ parisitarihuahuëꞌ. Ina quëran nosoroatonpoaꞌ, anoyatarinpoaꞌ. Achinicancanarinpoaꞌ. Noya noya acoarinpoaꞌ.

2 Pedro 2:9

Inapochachin ipora Quisocristo imapatëhuaꞌ, Yosë nanitërin catahuainpoasoꞌ. Sopai yaminsëpirinpoahuëntaꞌ, Yosë catahuarinpoaꞌ chaꞌëcaso marëꞌ. Oshahuanoꞌsaso nipirinhuëꞌ anaꞌintarin. Nani yonquirin chiníquën anaꞌintacasoꞌ. Ayaroꞌ tahuëri nanihuachin, noꞌtëquën anaꞌintaton, parisitopiquë aꞌpararin.

Judas 1:24

Tata Yosësoꞌ yaꞌipi nanitaparin. Noya aꞌpaiarinquëmaꞌ ama anotërëso pochin tëhuëcamaso marëhuëꞌ. Catahuahuachinpoaꞌ, co sopai minsëarinpoahuëꞌ. Noya noya tapararinpoaꞌ imamiatacaso marëꞌ. Aꞌna tahuëri yaꞌhuërinquë noya niꞌsarinpoaꞌ. Inatohuasoꞌ noya noya. Capa cancantarihuaꞌ. Tata Yosëíchin huaꞌanëntërinpoaꞌ. Ina nohuanton, Quisocristo nichaꞌësarinpoaꞌ. Inasáchin catahuarinpoaꞌ noya chinotacasoꞌ. Ma noyacha Tata Yosëso paya. Iráca quëra huarëꞌ chini chiníquën nanantërin. Noya noya niꞌton, yaꞌipi piyapiꞌsari chinochinaꞌ. Inasáchin natëahuaꞌ. Ama onporontaꞌ naniantahuasohuëꞌ. Amen. Nani huachi. Cotasë