2 Tesalonicenses 2:8 - Chayahuita (Shahui)

⁸ Yaꞌnohuachin, piyapiꞌsaꞌ aquë aquëtëꞌ co noyahuëꞌ cancantapi. Inari camaihuachin, notohuaroꞌ piyapiꞌsari natëapi. Ayaroꞌ tahuëriso nipirinhuëꞌ, Sinioro Quisosori anaꞌintarin. Huënaráchin huënaráchin oꞌmantahuachin, minsëarin. Topinan noncharapirinhuëꞌ, ataꞌhuantarin. Co huachi nanitarinhuëꞌ piyapiꞌsaꞌ nonpintacasoꞌ.

2 Tesalonicenses 2:8 ပူးပေါင်းရင်းမြစ်များ

Copo naporinso' 4:9

Panca ihuan paꞌpachina, nani maꞌsha tapirin. Inapochachin Yosërintaꞌ, aꞌnanaya inapita noꞌhuiton ataꞌhuantarin.

Isaías 11:4

Noya coisë pochin, sanpatopisopita maꞌsona onpotacasoꞌ shaꞌhuitapon. Popriyatopisopitanta paꞌpoyaton, catahuapon. Noꞌhuitërayaroꞌsasoꞌ, topinan noncharapirinhuëꞌ anaꞌintapon. Co noyahuëꞌ nipisopitantaꞌ, pihuitëꞌ aꞌparëso pochin ataꞌhuantapon.

Daniel 7:25

Yosëso chini chiníquën nanantopirinhuëꞌ, noꞌhuipon. Yosë piyapinënpitantaꞌ, shitiquiapon. Yosë pënëntërinsopita anishatacaso camaitapon. Yosë chinotatona niyontonacaiso tahuëriꞌsantaꞌ, inapotapon. Yosë piyapinënpita quëran huarëꞌ, cara piꞌipi miria nohuantërinsoꞌ nitapon.

Daniel 7:26

Napopirinhuëꞌ, coisëroꞌsaso piyapiroꞌsa natanapi. Ina copirno ocoirahuatonaꞌ, ataꞌhuantapi huachi. Inapotahuatona Yosë piyapinënpita yaꞌhuërëꞌ, isoroꞌpaꞌ huaꞌanëntacaiso marëꞌ quëtaponaꞌ. Inapitasoꞌ huaꞌanëntohuachinaꞌ, noya noya nisapi huachi. Huaꞌanëntopiso yaꞌhuëmiatarin. Nisha nisha piyapiroꞌsa isoroꞌpaquë yaꞌhuëpisopita piyapitaponaꞌ. Camaihuachina natëponaꞌ,’ itërinco.

Oseas 6:5

Napoaton pënëntonaꞌpiroꞌsa quëran paꞌsa paꞌsatërëso pochin nitëranquëmaꞌ. Shaꞌhuitopiranquëmahuëꞌ co natëramacohuë niꞌton, tëpatë pochin nitëranquëmaꞌ. Oꞌcori huënshaꞌ, taꞌsochachin huira ahuëtërin. Inapochachin carimanta anaꞌintohuatënquëmaꞌ, co oshataponquëmahuëꞌ.

Mateo 13:19

Tricoraya paꞌsarayarëso pochin Yosë nanamën yaꞌipi parti aꞌchintërëꞌ. ‘Yosë yahuaꞌanëntarinquëmaꞌ,’ topachina, aꞌnaquën piyapiꞌsaꞌ ira pochin nipi. Nanamën natanpirinahuëꞌ, co yonquipihuëꞌ. Inairaroꞌsari huëcapairahuatonaꞌ, pëꞌyaquipiso pochin aꞌnaroáchin sopai huëꞌnin. Huëꞌsahuaton, Yosë nanamën natanpisoꞌ osërëtiirin. Ananiantërin huachi.

Mateo 13:38

Isoroꞌpaꞌ panca imin pochin ninin. Yosë huaꞌanëntërinquë yaꞌconpisopitasoꞌ noya yaꞌpirin pochin nipi. Sopai natëpisopitaso nipirinhuëꞌ, pacatëroꞌ pochin niconpi. Co noyahuëꞌ cancantatonaꞌ, sopai natëpi.

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Mateo 16:28

Tëhuënchachin isoroꞌpaꞌ huaꞌanëntapo. Aꞌnaquëmaꞌ coꞌhuara chimiyantërasënquëmahuëꞌ, huaꞌanëntarahuësoꞌ niꞌsaramaꞌ, itërin.

1 Corintios 1:28

Iporasoꞌ aꞌnaquën nocaninënpoaꞌ. “Canpitasoꞌ topinan piyapiꞌsanquëmaꞌ. Co mantaꞌ nitotëramahuëꞌ. Napoonamaꞌ,” itopirinënpoahuëꞌ, Yosësoꞌ nohuantërinpoaꞌ. Inapitasoꞌ chiníquën nanantaponaraihuëꞌ, co imapihuëꞌ niꞌton, yaꞌipi Yosëri ayatarin.

2 Tesalonicenses 2:3

Niꞌcona nonpintochinënquëmaꞌ. Coꞌhuara Quisocristo oꞌmayátërasohuëꞌ, notohuaroꞌ piyapiꞌsaꞌ Yosë aꞌpoapi. Co piꞌpian tërantaꞌ yanatërapihuëꞌ. Naporoꞌ aꞌna quëmapi yaꞌhuapon. Yaꞌipi piyapiꞌsaꞌ nonpintarin ama Yosë imacaiso marëhuëꞌ. Paꞌpi co noyahuëꞌ nisarin. Sopairi noyá yaꞌcoancantërin niꞌton, chiníquën anaꞌintacasoꞌ yaꞌhuërin. Ayaroꞌ tahuëri Yosëri anaꞌintaton, parisitopiquë aꞌpararin.

1 Timoteo 6:14

Ina yonquiaton, Quisocristo noninso chachin natëquëꞌ. Ama aꞌnapita pinocaiso marëhuëꞌ noꞌtëquën aꞌchinquëꞌ. Sinioro Quisocristo oꞌmantaquë huarëꞌ noya natëquëꞌ.

2 Timoteo 1:10

Nosororinpoasoꞌ nani anitotërinpoaꞌ. Quisocristo oꞌmarin niꞌton, nitotërëhuaꞌ. Quisocristo chachin nichaꞌërinpoaꞌ. Nanpiantarahuaton, chimirin minsërin. Nanamën natëhuatëhuaꞌ, Yosë nohuitatëhuaꞌ, nanpimiatarëhuaꞌ. Chiminarihuarahuëꞌ, nanpiantarihuaꞌ. Nanamën quëran anitotërinpoaꞌ.

2 Timoteo 4:1

Yosë niꞌsárinpoa niꞌton, pënënaranquën. Quisocristontaꞌ niꞌsárinpoa niꞌton, “nanamën aꞌchináquëꞌ,” tënahuë. Aꞌna tahuëri inasoꞌ oꞌmantararin isoroꞌpaꞌ huaꞌanëntacaso marëꞌ. Naporoꞌ chiminpisopita, nanpirëhuasopita, yaꞌipinpoaꞌ coisë pochin noꞌtëquën shaꞌhuitarinpoaꞌ. Oshahuanoꞌsaꞌ anaꞌintarin. Natërëhuasopitasoꞌ noya acoarinpoaꞌ. Napoaton Yosë marëꞌ noya sacatëquëꞌ.

2 Timoteo 4:8

Napoaton Yosëꞌpaꞌ acanaarinco. Quisocristo oꞌmantahuachin, coisë pochin nicaton, noꞌtëquën shaꞌhuitarinpoaꞌ. Naporoꞌ noya ninahuëso marëꞌ acanaarinco. Co casáchin acanaarincohuëꞌ. Aꞌnapitantaꞌ Quisocristo nosoroatonaꞌ, “Manóton oꞌmantaꞌin,” topisopitantaꞌ Yosëꞌpaꞌ canaapi.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Hebreos 10:27

Ina quëran paꞌpi tëꞌhuatacasoꞌ yaꞌhuërin. Yosë chiníquën anaꞌintarinpoaꞌ. Aꞌna tahuëri inimiconënpita pënquë aꞌpararin.

1 Juan 2:13

Aꞌnaquëmaꞌ nani huaꞌquiꞌ imatomaꞌ aꞌnapita catahuaramaꞌ niꞌton, Quisocristo noya nohuitëramaꞌ. Inasoꞌ iráca quëran huarëꞌ yaꞌhuërin. Noya imaramaꞌ niꞌton, ninshitaranquëmaꞌ. Canpitantaꞌ huiꞌnapiꞌsanquëmaꞌ, nani sopai minsëramaꞌ. Napoaton ninshitaranquëmaꞌ.

1 Juan 3:12

Iráca Cainosoꞌ sopai natëton, iin tëparin. ¿Maꞌmarëtaꞌ tëparin? Iinsoꞌ noya ninin niꞌton, noꞌhuiton, tëparin. Ama ina pochin cancantocosohuëꞌ.

1 Juan 5:18

Yosëri imarinsopita huëntonënquë ayaꞌconin. Noyasáchin nicacasoꞌ yaꞌhuërin. Yosë huiꞌnini chachin aꞌpaiarin. Sopairi yanonpintopirinhuëꞌ, Quisocristori catahuarin niꞌton, co sopairi minsëarinhuëꞌ.

Apocalipsis 1:16

Inchinan imirin quëran canchisë tayora pochin nininsoꞌ sëꞌquërin. Naporahuaton, nanamën quëran sahuëni pochin nininsoꞌ pipirarin. Cato quëran chachin toꞌnapinan. Yaꞌipi yaꞌpirinsoꞌ piꞌi pochin aꞌpinin. Huënaráchin huënaráchin yaꞌnorin.

Apocalipsis 13:5

Sopai nohuanton, maꞌsha marë quëran pipirinsoꞌ naꞌcon Yosë pinosarin. “Yosë quëran chini chiníquën nanantërahuë. Co ina chinotacasoꞌ yaꞌhuërinhuëꞌ,” tosarin. Sopairi catahuarin niꞌton, copirno yaꞌconarin. Chini chiníquën nanantarin niꞌton, yaꞌipi copirnoroꞌsaꞌ camaiarin. Cara piꞌipi miria yaꞌipiya huaꞌanëntarin.

Apocalipsis 19:15

Quëmapi quëchitërinsoꞌ nanamën quëran sahuëni pochin nininsoꞌ yaꞌhuëtërin. Chiníquën nanantaton, nanamën quëran chachin inimiconënpita minsëarin. Noninsoꞌ sahuëni pochin nicaton, topinan noncharapirinhuëꞌ, co noyahuëꞌ nipisopita minsëarin. Piyapiꞌsaꞌ noꞌtëquën anaꞌintarin. Yosëri noꞌhuirin niꞌton, oparoꞌsaꞌ toꞌpoirëso pochin oshahuanoꞌsaꞌ chiníquën anaꞌintarin.

Apocalipsis 2:16

Napoaton yaꞌipi co noyahuëꞌ yonquiramasopita naniantocoꞌ. Insosona co naniantohuachinhuëꞌ, chiníquën anaꞌintarahuë. Nanamëhuë quëran sahuëni inëshin nininsoꞌ yaꞌhuëarin oshahuanoꞌsaꞌ anaꞌintaꞌhuaso marëꞌ.

Apocalipsis 20:10

Ina quëran sopai anaꞌintomiatarin. Huaꞌquiꞌ piyapiꞌsaꞌ nonpintërin niꞌton, Yosëri anaꞌintarin. Panca sono shaꞌpimoꞌshirë chachin pën orotërinquë tëꞌyatarin. Co onporontaꞌ pipiarinhuëꞌ. Inaquë maꞌsha paꞌpi tëꞌhuatoroꞌ nininsontaꞌ parisitarin. Nonpin nanan pënëntonaꞌpintaꞌ inaquë chachin parisitarin. Tahuërirë chachin, tashirë chachin chiníquën parisitapi. Co onporontaꞌ sanoarinhuëꞌ. Co onporontaꞌ pipiapihuëꞌ.