2 Tesalonicenses 1:9 - Chayahuita (Shahui)

⁹ Noꞌtëquën anaꞌintaton, parisitopiquë aꞌpararin. Aquë aꞌpahuachin, chiníquën parisitomiatapi, co chaꞌësapihuëꞌ. Inatohuaꞌ paatonaꞌ, co onporontaꞌ Quisocristo nohuitapihuëꞌ. Inasoꞌ chini chiníquën nanantaton, noyasáchin niponahuëꞌ, inapitasoꞌ co onporontaꞌ nirayarapihuëꞌ.

2 Tesalonicenses 1:9 ပူးပေါင်းရင်းမြစ်များ

Génesis 3:8

Iꞌhuanahuanquë huisontapasoꞌ, Yosëri nararoquë huëcapairinso natanpi. Natanahuatonaꞌ, naꞌpicaiso marëꞌ taꞌapi.

Génesis 4:16

Ina quëran Caino paꞌnin. Yosë quëran pipirahuaton, Noto parti yaꞌhuëconin. Inaso noꞌpaꞌ, Itin quëran piꞌi pipirinso parti quëparitërin.

Salmos 16:11

Onporahuatosoꞌ nanpimiataꞌhuasoꞌ, quëma aꞌchintaranco. Nani tahuëri catahuaranco niꞌton, noya cancantarahuë. Quëmaquëꞌpaꞌ nipato, capa cancantomiatarahuë.

Salmos 51:11

Ama aꞌpomiatocosohuëꞌ. Noya nicaꞌhuaso catahuarincoso ispirito, ama cancanëhuë quëran ocoiquësohuëꞌ.

Isaías 1:28

Co natëtochináchinhuëꞌ cancantopisopita, oshahuanoꞌsaꞌ, inapitasoꞌ, tëshi paꞌquirëso pochin nitarahuë. Aꞌporinacosopitantaꞌ, chiminaponaꞌ.

Isaías 33:14

Quirosarin oshahuanoꞌsasoꞌ, paꞌyanapi. Yaꞌipi inpioroꞌsanta paꞌyanatonaꞌ: “Siniorosoꞌ, pën maꞌsha ahuiquitërinso pochin ninin. Yaꞌhuëmiatërinso pën pochin niꞌton, ¡Sinioro anaꞌintërinquësoꞌ, pën yaꞌhuëmiataton yaꞌipi ahuiquitërin! ¡Co inquënpoa tërantaꞌ, inaquë yaꞌhuëcaso nanichitërihuahuëꞌ!” tapona.

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Mateo 22:13

‘Iso quëmapi masahuatomaꞌ, tonpocoꞌ. Paꞌon, tanpaquën, inapita noyá tonpocoꞌ. Nani tonporahuatomaꞌ, tashinanquë tëꞌyatocoꞌ. Inatohuaꞌ piyapiꞌsaꞌ naꞌnërapi, chiníquën parisitapi huachi,’ itërin piyapinënpita.

Mateo 24:30

Naporoꞌ oꞌmantararahuë. Yosë quëran quëmapico niꞌto, inápa quëran oꞌmantararahuë huachi. Nisha nisha nananquë nonpisopita: ‘Anaꞌintarinpoaꞌ,’ taꞌtonaꞌ paꞌyanapi, naꞌnëapi, napoapi. Chiníquën nanantato, chitoroꞌ huáncana oꞌmantararahuë, niꞌsarinaco. Huënaráchin huënaráchin yaꞌnoarahuë.

Mateo 25:41

Ahuënanëhuë quëran acorahuësopitaso nipirinhuëꞌ, shaꞌhuitarahuë: ‘Yaꞌipinquëmaꞌ paco huachi. Tata Yosë co noyahuëꞌ niꞌninquëmaꞌ niꞌton, anaꞌintarinquëma huachi. Panca pën nani acorin sopairoꞌsaꞌ anaꞌintacaso marëꞌ. Inaquë pën co onporontaꞌ tacopiarinhuëꞌ. Inaquë pacoꞌ canpitantaꞌ.

Mateo 25:46

Parisitopiquë paꞌsahuatonaꞌ, inaquë yaꞌhuëmiatapi huachi. Noya nipisopitaso nipirinhuëꞌ, Yosë pochin nanpimiatapi huachi,” itërin Quisosori.

Mateo 26:24

Yosë quiricanën quëran ninorincoso chachin chiminarahuë. Yashaꞌhuirapirincoso nipirinhuëꞌ, maꞌhuantacha nicapon paya. Co nasitërinhuëꞌ naporini, noya noya niitonhuëꞌ, itërin.

Mateo 7:23

Cariso nipirinhuëꞌ itapo: ‘Yanonpintatomaco, napopiramahuëꞌ, co noyahuëꞌ cancantëramaꞌ. Co piyapinëhuëpitanquëmahuëꞌ. Co onporontaꞌ imaramacohuëꞌ. ¡Paco huachi!’ itapo,” itërin Quisosori.

Lucas 13:27

“Coꞌ mini nohuitëranquëmahuëꞌ. Co noyahuëꞌ ninamaꞌ niꞌton, co piyapinëhuëpitanquëmahuëꞌ. Paco huachi,” itahuatënquëmaꞌ, aꞌpaarinquëmaꞌ.

Juan 5:14

Ina quëran chinotopiso pëiquë paꞌsahuaton, apia anoyatërinsoꞌ quënancoantarin. —Niꞌquëꞌ iyasha. Nani quëmasoꞌ noyatëran. Ama huachi oshahuaantaquësohuëꞌ, naꞌcon naꞌcon maꞌsha onpotan, itërin.

Filipenses 3:19

Inapitasoꞌ co Quisocristo nanamën imapihuëꞌ. Maꞌsona tërantaꞌ yanipachinara, nipi. Ina marëꞌ tapanacasoꞌ yaꞌhuëpirinhuëꞌ, co tapanpihuëꞌ. “Nohuantato, napoarahuë,” toconpi. Isoroꞌpaquë yaꞌhuërinsopitaráchin yonquipi. Aꞌna tahuëri pënquë parisitomiatapi.

1 Tesalonicenses 5:3

Co imapisopitasohuëꞌ oꞌmantacasoꞌ tahuëri co yonquipihuëꞌ. “Noya yaꞌhuarëhuaꞌ, co mantaꞌ onpoarihuahuëꞌ,” topirinahuëꞌ. Aꞌnanaya chiníquën anaꞌintacasoꞌ naniarin, co chaꞌësapihuëꞌ. Sanapi yahuaihuachina, onporosona iquitacasoꞌ co nitotërinhuëꞌ. Aꞌnanaya iquitërin. Inapochachin aꞌnanaya Yosëri anaꞌintarin.

2 Tesalonicenses 2:8

Yaꞌnohuachin, piyapiꞌsaꞌ aquë aquëtëꞌ co noyahuëꞌ cancantapi. Inari camaihuachin, notohuaroꞌ piyapiꞌsari natëapi. Ayaroꞌ tahuëriso nipirinhuëꞌ, Sinioro Quisosori anaꞌintarin. Huënaráchin huënaráchin oꞌmantahuachin, minsëarin. Topinan noncharapirinhuëꞌ, ataꞌhuantarin. Co huachi nanitarinhuëꞌ piyapiꞌsaꞌ nonpintacasoꞌ.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Hebreos 10:29

Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

2 Pedro 2:17

Nisha aꞌchinaꞌpiroꞌsaꞌ co Quisocristo nanamën aꞌchinpihuëꞌ. Poso yanirinso pochin nipi. Yanihuachina, co huachi oꞌocasoꞌ yaꞌhuërinhuëꞌ. Inapochachin nisha aꞌchinaꞌpiroꞌsaꞌ nonpintarinënquëmaꞌ. Isontaꞌ yonquicoꞌ. Huaꞌquiꞌ co oꞌnanpachinahuëꞌ, chitoroꞌ yaráton quënanpatëra, paꞌyatopirëhuëꞌ. Panca ihuani quëpahuachina, co huachi oꞌnaninhuëꞌ. Inapochachin nisha aꞌchinaꞌpiroꞌsaꞌ nisapi. “Noya noya aꞌchintarainquëmaꞌ,” itopirinënquëmahuëꞌ, co tëhuënchachin catahuarinënquëmahuëꞌ. Nani iráca Yosëri yonquirin anaꞌintacasoꞌ. Tashinanquë aꞌpararin. Inaquë parisitáponaꞌ. Co onporontaꞌ pipiponahuëꞌ.

2 Pedro 3:7

Inapochachin ipora isoroꞌpaꞌ, piꞌiroꞌtëꞌ, inapita yaꞌhuëpirinahuëꞌ, nani Yosëri chinotërin anaꞌintacasoꞌ: “Aꞌna tahuëri pën quëran ataꞌhuantarahuë,” tënin niꞌton, tahuëri nanihuachin, pën quëran chachin ataꞌhuantarin. Naporoꞌ tahuëri yaꞌipi oshahuanoꞌsaꞌ chiníquën anaꞌintarin. Parisitopiquë aꞌpararin.

Judas 1:13

Pamantaꞌ yonquicoꞌ. Panca pamatohuachina, notohuaroꞌ saꞌpoꞌ, amoroꞌ, inapita quënin. Nonpinaꞌpiroꞌsasoꞌ, ina pochin co sano cancantopihuëꞌ. Co noyahuëꞌ nipi niꞌton tapanacaso nipirinhuëꞌ, co nitotapanpihuëꞌ. Ina marëꞌ Yosëri anaꞌintarin. Tayorantaꞌ yonquicoꞌ. Anotohuachina, tacopirin. Co huachi aꞌpininhuëꞌ. Inapochachin nisha aꞌchinaꞌpiroꞌsantaꞌ, tashinanquë paꞌmiatapi. Quisocristo aꞌpohuachinaꞌ, parisitopiquë pacacasoꞌ yaꞌhuërin huachi.

Apocalipsis 20:11

Ina quëran panca huaꞌanëntacasoꞌ shira quënanahuë, huiríchin nininsoꞌ. Inaquë Yosë huënsëaton, piyapiꞌsaꞌ anaꞌintarin. Chini chiníquën nanantarin niꞌton, isoroꞌpaꞌ, piꞌiroꞌtëꞌ, inapita taꞌhuantopi. Capa nisarin.

Apocalipsis 20:14

Chimirin, chiminpisopita yaꞌhuëpiquë, inapita panca sono pën orotárinquë tëꞌyatapi. Inaquë parisitomiatáponaꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.