2 Samuel 7:22 - Chayahuita (Shahui)

²² Quëmaso Sinioro, Yosënquën. Chini chiníquën nanantëran. ¡Ma nóyacha quëmasoꞌ ninan paya! Shimashonëhuëipita yáshaꞌhuitërinacoi: ‘Co insonta ina pochin yaꞌhuërinhuëꞌ. Co aꞌna yosë tëranta ina pochin nininhuëꞌ,’ itërinacoi.

2 Samuel 7:22 ပူးပေါင်းရင်းမြစ်များ

2 Samuel 22:32

¡Quëmasáchin Sinioro Yosënquën! ¡Co aꞌna yaꞌhuërinhuëꞌ paꞌpoyaincoisoꞌ!

Salmos 145:3

Siniorosoꞌ, chini chiníquën nanantërin. Inasáchin noya noya chinotahuaꞌ. Chiníquën nanantërinsoꞌ, co inquënpoa tëranta nitotarihuahuëꞌ.

Salmos 89:6

Co aꞌna yosë quëma pochin yaꞌhuërinhuëꞌ. Inápaquë yaꞌhuëpirinahuë tërantaꞌ, co quëma pochin nipihuëꞌ.

Salmos 89:8

Sinioro quëmasoꞌ yaꞌipi huaꞌanëntëran. ¡Co insonta quëma pochin nininhuëꞌ! Yaꞌipi nanitapaton, noꞌtëquënáchin nonan. ¡Co insonta quëma pochin nininhuëꞌ!

Salmos 96:4

Yosëso chini chiníquën nanantërin. Inasáchin chinotacaso yaꞌhuërin. Mamanshiroꞌsasoꞌ topinan quëran tëꞌhuatopi. Yosë tëhuënchinsoꞌ tëꞌhuatacaso yaꞌhuërin.

Éxodo 10:2

Iquipitoroꞌsa inapotohuato, huiꞌnamapita, shaꞌhuitohuatamaꞌ nitotapi huachi. Shiparimapitanta nitotaponaꞌ. Iquipitoroꞌsaso chinitapirinacohuëꞌ, cariso nipirinhuëꞌ, mona poꞌmotato paꞌpi huëhuëpiro nininsopita anaꞌintaꞌhuaso marëꞌ acorahuë: ‘Tëhuënchachin inaso Sinioro, israiroꞌsanpoa chinotërëhuasoꞌ,’ taꞌcamaso marëꞌ napotarahuë,” itërin.

Éxodo 15:11

Co insonta Sinioro quëma pochin nininhuëꞌ. Quëmasáchin noya noyanquën. Chini chiníquën nanantëran. Anaꞌintacaso marëꞌ paꞌpi huëhuëpiro nininsopita maꞌsha aꞌnoran. Napoaton yaꞌipiya quëran chinochinën.

Éxodo 8:10

—¡Tashiraya chachin copichin tënahuë taꞌa! tënin copirno. —Naporanso chachin mini nisarin, tashiraya copi taꞌparinquëmaꞌ. Iꞌquëráchin yaꞌhuëhuachinaꞌ, co huachi apiponquëmahuëꞌ. Inapohuachin: “Tëhuënchachin israiroꞌsari chinotopisoꞌ, chini chiníquën nanantërin tosaran,” itërin Moisësëri.

Éxodo 8:6

Moisësëri shaꞌhuitohuachina, Aaronso yaꞌipi iiroꞌsa yaꞌhuërinquë huaranën ihuërin. Ina iiroꞌsa quëran huarira pipirahuatonaꞌ, yaꞌipi Iquipito roꞌtë yanquëëtërin.

Éxodo 9:14

Co aꞌpahuatanhuëꞌ, iporasoꞌ chini chiníquën anaꞌintaranquën. Catahuarinquënsopita huaꞌanoꞌsaꞌ, piyapinënpita, inapitanta inapotarahuë. Co insonta isoroꞌpaquë ca pochin yaꞌhuërinhuëꞌ. Ina ipora anitotaranquën.

Isaías 40:18

¡Co aꞌnaya tëranta Yosë pochin yaꞌhuërinhuëꞌ! ¡Co inso mamanshi tërantaꞌ, ina pochin yaꞌhuërinhuëꞌ! Mamanshisoꞌ, huaꞌna asoquirahuatona nipi. Nitapacaisoꞌ ninaꞌpiri oro quëran pashitërin. Inapotahuaton prata quëran catinaaꞌhuaroꞌsa apëꞌpëconotërin.

Isaías 40:25

Siniorosoꞌ noyasáchin nicaton naporin: “¿In pochinta niꞌnamaco? ¡Co ca pochin aꞌna yaꞌhuërinhuëꞌ!

Isaías 45:18

Siniorosoꞌ Yosë niꞌton, piꞌiroꞌtë acorin. Isoroꞌpanta acohuachina, noyá acorin. Co topinan nicacaso marëꞌ acorinhuëꞌ. Piyapiroꞌsari yaꞌhuëtacaiso marëꞌ acorin. Ina chachin nontatonpoaꞌ: “Caso Sinioroco. Co aꞌninquëchin yaꞌnorahuëꞌ. Co aꞌna ca pochin yaꞌhuërinhuëꞌ.

Isaías 45:22

Nisha nisha parti isoroꞌpaquë yaꞌhuëramasopita, huëco caquë nichaꞌëinquëmaꞌ. Casáchin Yosëco niꞌto, paꞌpi áquë yaꞌhuëpiramahuëꞌ, huëcoꞌ.

Isaías 45:5

Ca mini Sinioroco. Co aꞌna yaꞌhuërinhuëꞌ. Casáchin Yosëco. Co quëma nohuitopirancohuëꞌ, ca nohuanton míso ahuëtaran.

Ezequiel 36:22

Napoaton Siniorosoꞌ israiroꞌsa nontaꞌhuasoꞌ camairinco: “Sinioro naporin: ‘Canpitasoꞌ co nichaꞌëahuanquëmasoꞌ inashitëramahuëꞌ. Napoaponahuëꞌ, canpita naꞌin quëran nisha nisha parti quëparinëmaquë, piyapiꞌsa naponin yonquirapirinaco. Inapoatona tëhuarinaco. Napoaton napopisoꞌ acopitaꞌhuaso marëꞌ nichaꞌësaranquëmaꞌ. Inapotohuatënquëmaꞌ, nisha nisha piyapiꞌsasoꞌ Sinioroco niꞌto, chiníquën nanantërahuëso nitotapi: “Israiroꞌsasoꞌ, noꞌtën Yosë chachin chinotopi,” tëcaponaꞌ. Ca Sinioroco niꞌto, shaꞌhuitëranquëmaso chachin nisarahuë.

Ezequiel 36:32

Ama ninonpintocosohuëꞌ. Co canpita noya ninamaso marëꞌ ina pochin acoaranquëmahuëꞌ. Canpitaso co noyahuëꞌ ninama niꞌton, tapanamaso yaꞌhuërin.

Daniel 2:45

Ina tapon naporin huaꞌnaranquë motopi quëran naꞌpi notarintaton huaꞌnamia, shaꞌpi huaꞌna, tëshiroꞌpaꞌ, prata, oro, inapita niꞌnomorinsoꞌ. Yosëso chini chiníquën nanantaton, aꞌna tahuëri maꞌsona onpocasoꞌ anitotërinquën. Huaꞌnaranso noꞌtëquën shaꞌhuitëranquën. Maꞌsona tapon naporinsontaꞌ, noꞌtëquën shaꞌhuitëranquën, itërin. Naporoꞌ Napocotonosoꞌ, Naniri notënanquë isonin. Isonin quëran noꞌpaquë huarëꞌ monshorahuaton mosharin. Ina quëran piyapinënpita camairin, maꞌsha tëparahuatona Naniri moshacaisoꞌ. Yonarin pochin nininsonta aꞌpërahuatonaꞌ, moshacaiso camaitërin.

Miqueas 7:18

Siniorosoꞌ noya niꞌton, ina nontato: “¡Quëmaíchin Yosënquën. Co aꞌna quëma pochin yaꞌhuërinhuëꞌ! Piyapiꞌsa co noyahuëꞌ nipirinahuëꞌ, oshanëna marëꞌ sëtatona nontërinën niꞌton, nichaꞌëran. Caraya israiroꞌsacoi quëparitëraisopita, co natantochináchinhuëꞌ cancantatoi tëhuëtërainquën. Inapopiraihuëꞌ nontërainquën niꞌton, tëhuëtërainquënsoꞌ naniantëran. Noꞌhuípiro nipiraihuëꞌ nosororancoi niꞌton, noꞌhuitëransoꞌ asanoran. Inapoaton catahuantarancoi.

Deuteronomio 32:39

Casáchin Yosëco. Mamanshiroꞌsasoꞌ, co ca pochin nipihuëꞌ. Ca nohuanto piyapiꞌsa nanpirapi, ca nohuanto chiminapi. Ca nohuanto piyapiꞌsa maꞌsha onpopi. Ca nohuanto chachin noyataantapi. Anaꞌintaꞌhuaso chinotohuato, co insonta chaꞌëtarincohuëꞌ. Chini chiníquënco niꞌto, anaꞌintarahuë.

Deuteronomio 4:39

Napoaton noya yonquirahuatomaꞌ: ‘Sinioroíchin Yosësoꞌ. Inápaquë huaꞌanëntërinso pochachin isoroꞌpaquënta huaꞌanëntarin. Co aꞌna ina pochin yaꞌhuërinhuëꞌ,’ tocoꞌ.

1 Samuel 2:2

¡Inasáchin noya noyasoꞌ! ¡Co insonta ina pochin paꞌpoyarinpoahuëꞌ! Co aꞌna yosë ina pochin yaꞌhuërinhuëꞌ.