2 Samuel 6:2 - Chayahuita (Shahui)

² Inapitarë chachin Quirosarin quëran paꞌnin. Paꞌsahuatonaꞌ, Quiriato-quiarimoquë canconpi. Inaso ninanoꞌ, Paara itopi antaꞌ. Cota huënton noꞌpanënaquë yaꞌhuërin. Siniororë anoyatopiso caposonën macaton Quirosarinquë quëpacaso marëꞌ inatohua paꞌnin. (Israiroꞌsasoꞌ, Sinioro yaꞌipi nanitaparinsoꞌ chinotopi. Ina caposo aꞌtanamënquë, Sinioroso huaꞌanëntërinso shiranën yaꞌhuëtërin. Cato quiropinoꞌsa nonanpisoꞌ huáncana yaꞌhuërin.) Yaꞌhuërinso ninanoquë acocaso marëꞌ Tapiri yaquëparin.

2 Samuel 6:2 ပူးပေါင်းရင်းမြစ်များ

2 Samuel 22:11

Cahuarioquë yaꞌmitërëso pochin aꞌna quiropinoquë yaꞌmitëran. Yanponatë paꞌnëso pochin aꞌnaroáchin huëcapairinco. Panca ihuantaꞌ, anpiantëhuan pochin ninin. Ina aipi paꞌnëso pochin oꞌmaransoꞌ yaꞌnorin.

Salmos 80:1

Quëmasoꞌ Sinioro, ohuica huaꞌanën pochin ninan. Israiroꞌsacoisoꞌ, ohuicanënpita pochin ninai. Cosi shinpita noya aꞌpaiquëꞌ. Quiropinoꞌsa anquipisoanaquë quëmasoꞌ yaꞌhuëran. Noya nicaton Iprain, Mincamin, Manasisi, inapita huëntonoꞌsa catahuaquëꞌ. Chiníquën nanantaton nichaꞌëcoi.

Isaías 54:5

Nininquëmasoꞌ, saꞌatatë pochin nitarinquëmaꞌ. Inasoꞌ nininën, Sinioro yaꞌipi nanitaparinsoꞌ. Inasoꞌ Yosë, noyasáchin ninin niꞌton, Israirori chinotërin. Ina nichaꞌërinquëmaꞌ. Yaꞌipi isoroꞌpaꞌ huaꞌanëntaton napotarinquëma niꞌton, yaꞌipi inapita naniantaramaꞌ.

1 Pedro 1:12

Ina quëran Yosëri anitotërin. “Pahuanarin nanicasoꞌ. Aꞌna tahuëri yaꞌhuëpisopita nitotacaiso marëꞌ ca nohuanton, ninoramaꞌ,” itërin Yosëri. Canpita iyaroꞌsaꞌ nitotacamaso marëꞌ ninopi. Iporasoꞌ ina noya nanan chachin aꞌchintërainquëmaꞌ. Inápa quëran oꞌmaton, Ispirito Santo catahuarincoi noya aꞌchinaꞌhuaiso marëꞌ. Anquëniroꞌsa quëran huarëꞌ yanitotopirinahuëꞌ, co yaꞌipiya nitotopihuëꞌ.

1 Samuel 4:4

Ninapotatonaꞌ, sontaroꞌsa aꞌpapi. Inapitasoꞌ paꞌsahuatonaꞌ, Siniororë anoyatopiso caposonën macontapi. Siniorosoꞌ yaꞌipi nanitapaton, quiropinoꞌsa huáncana shiranënquë huënsaton huaꞌanëntërin. Iri huiꞌninpita: Opini, Pinisë, inapitanta paꞌpi. Inapitari Siniororë anoyatopisoꞌ caposonën aꞌpaipi niꞌton, inahuanta caꞌtantopi.

1 Samuel 6:21

Ina yonquiatona Quiriato-quiarimo ninanoquë yaꞌhuëpisopita nanan aꞌpatopi: “Huiristinoꞌsa Sinioro caposonën ayantërinënpoaꞌ. Huëco canpitari isëran quëpacoꞌ,” itopi.

1 Samuel 7:1

Napotohuachinara, inahuaso paꞌsahuatonaꞌ, Sinioro caposonën macontapi. Yaꞌhuëpiꞌpaꞌ quëparahuatonaꞌ, Apinatapo itopisoꞌ pëinënquë poꞌmontapi. Inaso pëinën, motopiaꞌhuayaquë yaꞌhuërin. Inapotahuatonaꞌ, huiꞌnin Iriasaro itopisoꞌ Sinioro caposonën aꞌpaicaso marëꞌ acopi.