2 Samuel 19:24 - Chayahuita (Shahui)

²⁴ Saonocoꞌ shiin Mihui-posi itopisonta copirno ninapon paꞌmarin. Apia nipirinhuëꞌ, catahuapi niꞌton, Quirosarin quëran paꞌmaton Cortaniiꞌ aquëtëran copirno ninarin. Tapi Quirosarin quëran pipirin quëran huarëꞌ sëtaton co manta nitaparinhuëꞌ. Co nantën tëranta paꞌmorinhuëꞌ. Co shinoratëontaꞌ, yaquirinhuëꞌ. Co aꞌmorinso tëranta pëꞌsarinhuëꞌ. Naporin.

2 Samuel 19:24 ပူးပေါင်းရင်းမြစ်များ

2 Samuel 12:20

Ina natanahuaton, huanirin. Amarahuaton nitaparin. Pimóton nininsoꞌ pashirin. Naporin. Inapo nitaparahuaton, Yosë caposonën acocaso marëꞌ nëꞌmëtë pëi nipiquë yaꞌconin. Inaquë Yosë chinotahuaton, pëinënquë paantarin. Capacaso natantohuachina, acotiipi caꞌnin.

2 Samuel 15:30

Tapisoꞌ Oriposë motopiaꞌhua nanpëtacaso marëꞌ sapatën ocoirin. Ocoirahuaton iꞌnanpirantë nanpëontarin. Motëonta moꞌshiquë nipashimototahuaton, naꞌnërëꞌnachin nanpërin. Yaꞌipi imapisopitanta inapochachin nicatona paꞌsapi. Sëtopisoꞌ nitotacaiso marëꞌ napopi.

2 Samuel 16:3

—¿Saonocoꞌ shiin Mihui-posi poꞌ? itaantarin copirnori. —Inasoꞌ, Quirosarinquëranchin quëparitërin: “Iporacha tëhuënchinsoꞌ tata mashoco Saono pochin israiroꞌsa copirnonëna nicaꞌhuaso marëꞌ acoaponaco,” taꞌton yaꞌhuëárin, itërin.

1 Reyes 2:8

Isontaꞌ, shaꞌhuichinquën yonquiquëꞌ: Cohuira huiꞌnin Simii itopisoꞌ, iporahuanta yaꞌhuëarin. Inasoꞌ, Mincamin huënton quëmapi. Paorinquë yaꞌhuërin. Iráca taꞌato Maanainquë paasoco, paꞌpi chiníquën noꞌhuirinco. Inaso niponahuëꞌ, noya huënantahuatora, Cortaniiꞌpaꞌ nacapirinco. Naporoꞌ: ‘Yoscoarëꞌ co carinquën tëparanquënhuëꞌ,’ itërahuë.

Éxodo 19:10

Naporoꞌ Siniorori itapon: —Paꞌmaton israiroꞌsa shaꞌhuitomaquëꞌ: Casáchin yonquiꞌinaco. Naporahuaton pëꞌsainatona noya nitapainaꞌ. Ipora tahuëri, tashirayanta inapoꞌinaꞌ. Ina tashiraya ca Sinioroco chachin oꞌmararahuë. Sinai motopi huiꞌnimotënꞌpaꞌ oꞌmararahuë. Yaꞌipi israiroꞌsanta chitoroquë oꞌmarahuësoꞌ, niꞌsapi.

Mateo 6:16

Ina quëran itaantarin: “Ama nonpinaꞌpiroꞌsa pochin nicosohuëꞌ. Aꞌnaquën Yosë nontacaso marëꞌ yaꞌipi tahuëri co mantaꞌ coshatërinhuëꞌ. Naporahuaton, co nitapamantarinhuëꞌ. Sëtërëso pochin yaꞌnorin aꞌnapita nitotacaiso marëꞌ. Co cancanën quëran chinotaponahuëꞌ, aꞌnapitari nicacaiso marëꞌ naporin. Niꞌpachinara: ‘Ma noya Yosë chinotërin,’ topi. Piyapiꞌsari noya niꞌpirinahuëꞌ, co huachi Yosëri acanaarinhuëꞌ.

Romanos 12:15

Aꞌnapita naꞌcon yonquicoꞌ. Canpitaora ninatanamaso pochin cancantocoꞌ. Noya cancantohuachinaꞌ, ina marëꞌ canpitantaꞌ noya cancantocoꞌ. Sëtohuachinaꞌ, sëtocoꞌ.

Hebreos 13:3

Ama tashinan pëiquë poꞌmopisopita naniantocosohuëꞌ. Catahuacoꞌ. Canpitantaꞌ tashinan pëiquë yaꞌhuëaramaso pochachin yonquicoꞌ. Aꞌnaquëontaꞌ imapiso marëꞌ chiníquën aparisitohuachinaꞌ, noya yonquicoꞌ. Canpitantaꞌ inapita ninatanpiso pochin cancantatomaꞌ, nosorocoꞌ.